Sala ena Oti Kina na Leqa ni Yago

VAKASAMATAKA mada ni sa na rai na mataboko, rogo na didivara, sere ena marau na galu, ra qai lako na lokiloki ni sa kaukaua vinaka na yavadra! E sega ni tukuni tiko e ke na rawaka ena veiqaravi vakavuniwai, ia ena rawa wale ga oqo ena gauna e yavala kina na Kalou ena vukudra na kawatamata. E tukuna na iVolatabu: “Ena qai rai na matadra na mataboko, ka rogo na daligadra na didivara. Ena qai ladelade na lokiloki me vaka na me kila, ka sere na yamedra na galu.” (Aisea 35:​5, 6) Eda vakadeitaka vakacava ni na yaco dina na parofisai veivakurabuitaki oqo?

Taumada, ena gauna a bula voli kina o Jisu Karisito e vuravura, a vakabulai ira era bikai tu ena veimataqali tauvimate kei ira e vakaleqai tu na yagodra. E vuqa era vakadinadinataka e levu na nona cakacaka mana​—bau kina o ira sara mada ga na nona meca. Ena dua na gauna, era a vaqaqa vakamatailalai na dau vakatitiqa na nona veivakabulai o Jisu mera vakacalai koya kina. Ia era qai vakamaduataki, ni ka era cakava e vakadinadinataka ga na nona cakacaka mana. (Joni 9:​1, 5-​34) Ni oti tale e dua na cakacaka mana tawavakamelei rawa i Jisu, era kaya ena cudru: “A cava mada me da kitaka? Ni sa cakava na cakacaka-mana e vuqa na tamata oqo?” (Joni 11:47) Ia, o ira na tauvanua era sega tale ni qai lomalomarua, ni levu era vakabauti Jisu.​—Joni 2:​23; 10:​41, 42; 12:​9-​11.

Cakacaka Mana i Jisu ​—E iVakaraitaki Lailai ni Veivakabulai e Vuravura Taucoko

Na cakacaka mana i Jisu e sega ni vakadinadinataki wale ga kina ni o Jisu na Mesaia e Luve ni Kalou. E solia tale ga na yavu ni kena vakabauti na veika e yalataka tu na iVolatabu, nira na vakabulai na kawatamata talairawarawa ena gauna sa bera mai. E okati ena vosa ni yalayala oqo na parofisai ena Aisea wase e 35, e cavuti tiko ena imatai ni parakaravu. E kaya na Aisea 33:24 me baleta na nodra bula ena gauna sa bera mai o ira na dau qarava na Kalou ena yalodina: “Na lewe ni koro ena sega ni kaya, ka’u sa tauvi mate.” E tautauvata tale ga na ka e yalataka na Vakatakila 21:​4: “Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa [na veivakatovolei kei na rarawa e dau sotavi edaidai].”

Era dau masulaka vakawasoma na tamata me vakayacori na veiparofisai oqo ena gauna era dau cavuqaqataka kina na masu i Jisu e dau vakatokai na Masu ni Turaga, e koto kina na malanivosa oqo: “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.” (Maciu 6:​10, VV) Io, e okati tale ga o vuravura kei na kawatamata ena inaki ni Kalou. Dina ga ni tiko na vuna e yaco kina na tauvimate kei na vakaleqai ni yago, ia ena sega ni dede; sa na sega vakadua tale ni vakacaraki na ‘itutuniyavana’ na Kalou.​—Aisea 66:1.a

Veivakabulai e Sega ni Veivakaocai Qai Sega ni Saumi

Se mani vakacava na nodra rarawa na tamata, na veivakabulai e cakava o Jisu e sega ni veivakaocai, sega ni lokuyara, qai sega ni saumi. Ia, na tete ni itukutuku oqo e vaka na kama ni veigasau, sega ni dede era “sa lewe vuqa sara sa lako mai vua, era sa kauta mai na lokiloki, na mataboko, na galu, na gera, ka lewe vuqa tale; a ra sa kotori ira sobu ki na yava i Jisu; a sa vakabulai ira ko koya.” Era a ciqoma vakacava na itukutuku oqo? A tomana o Maciu ena nona vola na ka e raica e matana: “A ra sa kurabui kina ko ira na lewe vuqa, ni ra sa raica sa vosa rawa na galu, sa bula na gera, sa lako rawa na lokiloki, a sa rai rawa na mataboko: a ra sa vakacaucautaka na Kalou i Isireli.”​—Maciu 15:​30, 31.

Dikeva nira a sega ni digitaki tu mai vakailiu ena kedra maliwa na lewe vuqa o ira a vakabula o Jisu​—me vaka era dau cakava na dauveivakaisini. E levu vei ira na wekadra na tauvimate kei na nodra itokani era kauti ira yani na tauvimate ra qai ‘kotori ira sobu ina yava i Jisu, qai vakabulai ira o koya.’ Meda raica sara mada oqo e so na ivakaraitaki matata ni veivakabulai i Jisu.

Mataboko: Nona tiko voli mai Jerusalemi, a vakavuna o Jisu me rai na turaga a “sucu mataboko.” E kilai levu na turaga oqo me dua na daukerekere mataboko ena korolevu. Mo vakasamataka mada na nodra mamarau kei na maue na lewenikoro nira raica na nona lako voli ni sa rai rawa! Io, sega ni o ira kece era marautaka. Nodra cudruvaka na nona vakavotuya o Jisu na nodra ivalavala ca, era a saga vakaukaua e so na lewe ni ilawalawa Jiu kilai qai dau veirawai era vakatokai na Farisi mera beitaki Jisu vakailasu ena ka a cakava. (Joni 8:​13, 42-​44; 9:​1, 6-​31) Ra mani vakataroga na turaga a vakabulai, o rau na nona itubutubu, oti ra qai vakatarogi koya tale. Ia, na nodra veivaqaqai na Farisi e vakadinadinataki ga kina na cakacaka mana i Jisu, ni a vakacudrui ira. Na nona veilecayaki na turaga a vakabulai oqo ena torosobu ni nodra veivakaisini na iliuliu ni lotu, a kaya: “Sa sega ni rogo mai nai vakatekivu kei vuravura, ni sa dua sa basuka na matana e dua sa sucu mataboko. Kevaka sa sega ni lako mai vua na Kalou ko koya oqo, sa sega ni rawata e dua na ka.” (Joni 9:​32, 33) Ena ivakamacala dodonu qai vuku oya ni vakabauta, era “vakatatabui koya” kina na Farisi, e kena ibalebale nira a vakasivoi koya na turaga a mataboko e liu mai na nodra valenilotu.​—Joni 9:​22, 34.

Didivara: Nona tiko voli mai na Tikapoli o Jisu, ena yasayasa vakatokalau ena bati ni uciwai na Joritani, “a ra sa kauta mai vei koya e dua sa didivara, a sa kaka.” (Marika 7:​31, 32) A sega wale ga ni vakabulai koya o Jisu ia a vakaraitaka tale ga na nona kauaitaki koya dina na didivara, ni rairai ena madualaki ira na lewe vuqa. E kaya na iVolatabu ni o Jisu a kauti koya na didivara “vakatikitiki mai vei ira na lewe vuqa” qai vakabula. Era “kurabui vakalevu sara,” o ira na sarasara ra qai kaya: “Sa cakava vakavinaka na ka kecega ko koya; sa kitaki ira na didivara me ra rogo, kei ira talega na galu me ra vosa.”​—Marika 7:​33-​37.

Paralasi: Nona tiko voli o Jisu mai Kapenaumi, era a kauta yani vua e dua na tamata e tauvi paralasi e davo koto ena imocemoce. (Maciu 9:2) Na tikina e 6 ina 8 e vakamacalataka na ka a qai yaco. “(sa qai kaya ko koya [o Jisu] vua sa tauvi-paralasi,) Mo tu cake, ka kauta na nomui mocemoce, ka lako ki na nomu vale. A sa tu cake ko koya, ka lako ki na nona vale. Ia ni ra sa raica ko ira na le vuqa, era sa kurabui, ka vakarokorokotaka na Kalou, ni sa solia ko koya na kaukauwa vakaoqo vei ira na tamata.” Era a tu tale ga e kea na nona tisaipeli o Jisu kei ira na nona meca. Dikeva ni o ira na tisaipeli i Jisu, era “vakarokorokotaka na Kalou” ena vuku ni ka era vakadinadinataka, ni a sega ni vakacalai ira na lomaca kei na veivakaduiduitaki.

Matedewa: “A sa lako mai vei koya [Jisu] e dua na vukavuka, ka vakamasuta, ka tekiduru vua, ka kaya vua, kevaka ko ni sa vinakata, ko ni sa vakasavasavataki au rawa. A sa yalololoma ko Jisu, ka dodoka na ligana, ka tarai koya, ka kaya vua, au sa vinakata; mo savasava mai. Ia ni sa vosa oti, sa takali vakasauri vua na vukavuka.” (Marika 1:​40-​42) A sega ni vakasaurarataki o Jisu me vakabulai koya na turaga oya ia a vakayacora ga ena dela ni nona veinanumi dina. Vakasamataka mada ke o iko na turaga vukavuka oya. Na cava ena yacovi iko ke sega ni veivakaocai qai vakasauri na nomu vakabulai mai na tauvimate e sega na kena iwali, e kakana tiko vakamalua e laki vakatanitaka na ibulibuli ni yagomu o qai vakatabui tale ga mai na bula veimaliwai raraba? Sega ni vakabekataki ni o na kila vinaka na vuna a “cuva vakatoboicu ki na yava i koya [Jisu], ka vakamolimoli vua,” e duatani tale na vukavuka a vakabulai vakacakamana.​—Luke 17:​12-​16.

Mavoa: Na iotioti ni nona cakamana o Jisu ni bera na nona kau vakavesu me lai vakamatei oya na veivakabulai. A yalototolo na yapositolo o Pita ena gauna era vakarau kauti Jisu tani kina, ni a qai “ucuna  . .  nai seleiwau sa tu vua, ka yavita kina na tamata ni bete levu, ka taya laivi na daligana i matau.” (Joni 18:​3-5, 10) A vola o Luke na itukutuku vata ga oya qai tukuni kina ni o Jisu a “tara na daligana, ka vakabula.” (Luke 22:​50, 51) A vakayacori tale na itovo ni veinanumi oqo nira rai tu na itokani i Jisu kei ira na nona meca​—ena ivakaraitaki oqo, o ira na mai vesuki koya.

Io, na noda dikeva vakavoleka ga na cakacaka mana i Jisu, e matata vinaka kina na kena kilai ni itukutuku dina. (2 Timoci 3:​16) Me vaka ga sa cavuti oti, na vuli vaka oqo e vakaukauataka na noda vakabauta na vosa ni yalayala ni Kalou me vakabulai ira na tamata talairawarawa. Na ibalebale ni vakabauta vakarisito e vakamacalataka na iVolatabu, oya “na noda vakadinata ni na yaco na veika eda nuitaka, na noda kila ni ra tu dina na veika eda sega ni raica.” (Iperiu 11:​1, VV) E matata vinaka ni sega ni vakauqeta na Kalou na vakabauta e sega ni dua na kena yavu vinaka se na vakanuinui ni na yaco dina na ka o tatadrataka, ia na vakabauta e dodonu me yavutaki dei ena ka e dina. (1 Joni 4:1) Nida saga na vakabauta vaka oya, eda na vakila na noda kaukaua vakayalo, bulabula, qai mamarau.​—Maciu 5:3; Roma 10:17.

Me Liu Taumada na Veivakabulai Vakayalo!

E vuqa na tamata bulabula vakayago era bula rarawa. So era saga mera vakamatei ira ga ni sega na nodra inuinui ena gauna sa tu mai liu se nira sa lomoci tu ena levu ni leqa. Era vakaleqai tu vakayalo​—e leqataki cake sara na ituvaki oqo ena mata i Jiova mai na leqa ni yago. (Joni 9:​41) Ena yasana kadua, levu e vakaleqai na yagodra me vakataki Christian kei Junior erau cavuti ena imatai ni ulutaga, era marau qai vakainaki na nodra bula. Na vuna? Nira bulabula vakayalo ra qai vakaukauataki ena inuinui e yavutaki dei ena iVolatabu.

Nona vakamacalataka tiko na veika eda dau gadreva na tamata, a kaya o Jisu: “Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.” (Maciu 4:4) Io, era sega wale ga ni gadreva na tamata na veika vakayago me vakataki ira na manumanu. Nida a buli ga meda “[i]tovo” vata kei na Kalou, eda na gadreva gona na kakana vakayalo​—na kilaka me baleta na Kalou kei na sala eda cokoti kina ina nona inaki kei na noda cakava na lomana. (Vakatekivu 1:​27; Joni 4:​34) Na noda kila na Kalou e vakainaki kina na noda bula da qai kaukaua vakayalo kina. E yavu tale ga ni kena rawati na bula tawamudu ena parataisi e vuravura. A kaya o Jisu: “Ia sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”​—Joni 17:3.

Ena vinaka tale ga meda kila ni o ira a bula vata kei Jisu era sega ni vakatokai koya me “Dauveivakabulai” ia era vakatokai koya ga me “[i]Vakavuvuli.” (Luke 3:​12; 7:​40) Na vuna? Ni a vakavulica vei ira na tamata o Jisu na iwali dina ni leqa ni kawatamata​—oya na Matanitu ni Kalou. (Luke 4:​43; Joni 6:​26, 27) Na matanitu vakalomalagi oqo ena veiliutaki kina o Jisu Karisito me lewa na vuravura taucoko kei na kena vakayacori na vosa ni yalayala kece ena iVolatabu me baleta na nodra yaco mera bula uasivi ka tawamudu na tamata yalododonu kei na vuravura, na nodra itikotiko. (Vakatakila 11:15) Oya na vuna, a semata kina o Jisu ena Masu ni Turaga, na yaco mai ni Matanitu kei na kena vakayacori na inaki ni Kalou e vuravura.​—Maciu 6:​10.

Vuqa e vakaleqai tu na yagodra, ena nodra vulica na inuinui veivakauqeti oqo e veisautaka sara ga nodra tagi ni rarawa mera marau. (Luke 6:​21) Ena sega wale ga ni vakaotia na Kalou na tauvimate kei na leqa ni yago; ena vakaotia sara ga vakadua na ka e vakavuna tiko na nodra rarawa na tamata​—na ivalavala ca. Io, e tukuni ena Aisea 33:24 kei na Maciu 9:​2-7, sa cavuti oti, ni ivalavala ca e vakavuna na tauvimate. (Roma 5:​12) O koya gona, ni sa na oti na ivalavala ca, ena tawamudu na nodra rekitaka na kawatamata na “nodra galala lagilagi na luve ni Kalou,” na galala e vauca na bula uasivi ni yago kei na vakasama.​—Roma 8:​21, VV.

E dau rawarawa sara mera vakawalena e so na nodra bulabula vinaka. Ia e sega ni vaka kina o ira era rarawa tu ni vakaleqai na yagodra. Era kila ni ka talei ni vinaka tu na yagoda kei na noda bula kei na kena rawa ni dau veisau na ituvaki ni yaco vakasauri se tawanamaki e so na ka. (Dauvunau 9:​11, NW) O koya gona, e nuitaki nira na kauai sara na vakaleqai tu na yagodra ena nodra wilika na nuinui totoka e yalataka tu na Kalou me vaka e volai tu ena iVolatabu. A mate sara ga o Jisu me vakadeitaka ni na yaco na vosa ni yalayala oya. Na veivakadeitaki oqori e uasivi duadua.​—Maciu 8:​16, 17; Joni 3:​16.

[iVakamacala e ra]