Vukei Tamana O Luvena
O JAMES, mai Igiladi, e yabaki 30 vakacaca, e via leqa na nona vakasama na cauravou oqo qai veilecayaki na nona ivakarau ni bula ni tauvi koya tale ga vakalailai na mate na autism. Ia ena dua na gauna dede e dau tomani tinana voli kei ganena ina nodra soqoni na iVakadinadina i Jiova. O tamadratou e sega ni bau kauai ina nodratou vakabauta na veitinani. Dua na bogi ni soqoni, a vakatasuasuataki kina na sala me sureti kina e dua na noda veikilai me tiko ena iVakananumi ni mate i Karisito. Ni ratou suka mai na veitinani a vakusakusa sara o James ina nona rumu. E muri koya vakatotolo o tinana, qai raica ni cumuwaqara o James ena nona vaqara na ivoladraudrau makawa, Na Vale ni Vakatawa kei na Yadra! E digitaka sara e dua na ivoladraudrau e koto e dakuna na iyaloyalo ni tikidua ni veisureti ina iVakananumi, e cicivaka sara vei tamana. E dusia taumada na iyaloyalo qai dusi tamana qai kaya “Ta!” Erau veiraici ena kurabui na nona itubutubu ni kidavi rau ni sa sureti tamana tiko o James ina iVakananumi. A kaya vua o tamana ni na tovolea me tiko kina.
Ena bogi ni iVakananumi, a gole ina droa ni isulu i tamana o James, lai talaucaka mai kina e dua na tarausese balavu, e solia sara vei tamana, qai matanataka vua me daramaka. Kaya o tamana ni na sega ni lako ina soqoni. Rau sa mani lako ga na veitinani ina Kingdom Hall.
Sivi vakalailai oya, sa sega ni dau qai galeleta o James na gole ina soqoni ni ivavakoso, e dau cata mada ga ni via vakasulumi koya o tinana, ni lomana me tiko ga mai kei tamana e vale. Dua na mataka ni Sigatabu se baci vakabesebese o James ni via vakasulumi koya o tinana me rau gole ina soqoni. E kidacalataka o tina i James ni rogoci tamadratou ni kaya, “James, keu lako ina soqoni nikua, o na lako tale ga?” Matadredredre sara o James. E mokoti tamana qai kaya “Io!” ratou sa mani gole tolutolu ina Kingdom Hall.
Tekivu mai oya, sa dau tiko o tama i James ena soqoni kece ena Sigatabu, e kaya tale ga ni sa na tiko ena siga ni soqoni tale e so ni sa lomana me toso. (Iperiu 10:24, 25) A cakava vaka kina, ni oti ga e rua na vula sa tekivu vuli iVolatabu wasoma. Toso totolo sara, e saga me bulataka na ka e vulica, sega ni dede sa vakaitavi tale ga ena vunautaki ni Matanitu ni Kalou. Ni oti e dua na yabaki na nona vuli iVolatabu, a yalataka na nona bula vei Jiova, tini sara me papitaiso. Ena gauna oqo sa dauveiqaravi vakaitalatala tiko ena nona ivavakoso. Eratou sa mai duavata vakavuvale ni qaravi Jiova.