Tukutuku Mai na Daukacivaka na Matanitu

Kunei na Dina ena Vanua Tawanamaki

E INAKI ni Kalou “me bula na tamata kecega, ka mai kila sara nai vakavuvuli dina.” (1 Timoci 2:​3, 4) Me rawati gona oqori era sa tabaka ra qai veisoliyaka na iVakadinadina i Jiova e vica vata na milioni na ilavelave ni iVolatabu kei na ivola vakaivolatabu. Ena so na gauna era vukei kina na yalomalumalumu mera vulica na ka dina ena sala tawanamaki. Era volatukutukutaka na dau kacivaka na Matanitu e Freetown, Sierra Leone, mai Aferika, na veika oqo.

O Osman, e lewe ni dua na vuvale eratou lewe ciwa kina na gone, qai taravi ulumatua o koya. Ni tuberi mai ena dua na vuvale lotu, e dau lai sokalou wasoma kei tamana. Ia, e vakaleqa vakalevu na lomana na ivakavuvuli ni nona lotu me baleti eli. E sega ni kila rawa se cava na vuna e vakararawataki ira kina na tamata ca ena bukawaqa na Kalou e dau yalololoma. E sega ni vakacegui koya na ka kece e vakamacalataki vua me baleta na lai kama i eli.

Ena dua na siga, ni se qai yabaki 20 e raica e dua na ivola karakarawa ena kavanibenu. Ni dau taleitaka na wilivola, a tomika, qusia, qai raica na kena ulutaga​—Na Ka Dina sa Basika ki na Bula Tawamudu.a

‘Na cava na ka dina oqo?’ e taroga lo e lomana o Osman. Nona via kila, a kauta i vale na ivola qai wilika tasevu. Dua na ka nona marautaka ni kila ni tiko na yaca ni Kalou​—o Jiova! (Same 83:18) E vulica tale ga ni itovo kilai tani ni Kalou na loloma, ni sega ni taleitaka tale ga o koya na vakasama mera vakararawataki tiko ena bukawaqa na tamata. (Jeremaia 32:35; 1 Joni 4:8) Kena ilutua, e wilika o Osman ni o Jiova ena vakataudeitaka na vuravura me parataisi mera na bula tawamudu kina na tamata. (Same 37:29; Vakatakila 21:​3, 4) Na ka dina vakatubuqoroqoro oqo e vakarautaka mai na Kalou dau yalololoma! E vakavinavinakataki Jiova mai vu ni lomana o Osman ni vakatara me kunea na ka dina ena vanua tawanamaki.

Ena nodratou veivuke nona itokani, a kunea na Kingdom Hall qai gole kina me lai tiko ena imatai ni gauna ena soqoni. E kea tale ga a kerea kina e dua na tacida me vakavulici koya ena iVolatabu. Dina ga nira saqati koya vakaukaua na wekana, e toso tiko ga vakayalo me yaco sara ni lai papitaiso. (Maciu 10:36) Sa qase tiko ni ivavakoso ena gauna oqo. E talei dina na ka e yaco oqo ni vu ga mai ena kena kunei e dua na ivola vakaivolatabu ena kavanibenu!

[iVakamacala e ra]