Vakatanitaki e Vuravura na Dina
ENA dua na yakavi katakata, ni siga Vakaraubuka mai Tel Aviv, e Isireli, a tomani ira na ilala itabagone era wawa tu ena yasa ni dua na valenidanisi e dua na cauravou. Dede ga vakalailai a kacabote e dua na ka ena kedra maliwa na ilala oya.
Se baci bolemate tale e dua na cauravou e orota tu i tolona na gasaukuro ra qai tini mate vakaloloma kina e 19 tale na itabagone. E muri a qai kaya vei ira na dauvolaitukutuku e dua a solia na veivuke vakavuniwai: “E laurai ena veivanua kece ga na tikitikiniyago, e yagodra kece na itabagone, se ra gone sara ga—au se qai bau raica e dua na ka vakaloloma dina.”
A vola o Thurstan Brewin ena ivola na Lancet: “Na dina e dua vei ira na ivalavala eda qoroya kece . . . , ia na ivalavala sara ga oqo e rawa ni vakavuna na kacabote ni ivalu qai dredre sara me tini.” Io, me tekivu sara mai na ivalu vakalotu ni ika11 ina ika13 ni senitiuri me kauta mai ina veivakamatei vakadomobula a cakava o Itala mai Jamani, e dave vakayauyau na dra ena vuku nira dui dina ga ina ka era vakabauta na vakaitavi kina.
Levu Era Vakaleqai ni Sega na Dina
E sega ni vakabekataki, na yalodua e dau veivakaleqai, ia ke qai sega na dina ena rawa ni vakavuna na bula veitawasei. Na dina, e kaya na Webster’s New Encyclopedic Dictionary, e kena ibalebale ‘na veidinadinati kei na dua tale, se ina dua na inaki,’ vakatale ga kina “na nona tudei e dua ni vakatovolei me veidabui se dro.” Dina ga nira kaya e levu nira doka na ivakarau ni dina vaka oya, ia e se sotava ga na leqa na kawatamata ni sega na dina ena ivakatagedegede bibi taudua—ena loma ni bula vakavuvale. E rewailagi na iwiliwili ni veisere, e vakavuna oqo na kena vakabibitaki na veika me vakacegui ira ga, na nuiqawaqawataki kei na drakidrakita ni bula ena veisiga, kei na kena takalevu na veibutakoci. Me vakataki ira ga na vakaleqai ena kacabote ni gasaukuro mai Tel Aviv, e dau vakavuqa me lai kedra wale na isamu ni dawa na itabagone.
E kaya e dua na ivolatukutuku: “E dau cakacaka yaco vakalevu ina vuli ni gone na leqa ni vuvale, oya ni yaco na veisere, veibiu, se me sa vuvale itubutubu le dua.” Era dau sotava vakalevu na gonetagane era lako mai na vuvale e itubutubu le dua kina o tina na leqa ni vuli, nodra via vakamatei ira ga, ra qai coko ena basulawa. Ena veiyabaki, era na sotava e dua na milioni na gone e Mereke nodra veisere na itubutubu. Ke mani dikevi na yabaki cava ga, e laurai ni veimama na gone era vakamau tu na nodra itubutubu ena vanua oya e dau kedra na isamu ni dawa ni yaco na veisere nira se qai yabaki 18. Ia, e laurai ena iwiliwili e tauri rawa nira sotava tale ga na bula vakaloloma na itabagone ena veiyasa i vuravura tale e so.
Sa Rui Cecekia Beka?
Sa sega ni kune na dina ena basoga kece ni noda bula, oya na vuna e veiganiti kina na malanivosa nei Tui Tevita: “I Jiova, mo ni ia na veivakabulai, ni sa oti na tamata lotu dina: sa yali ko ira sa lomadina maivei ira na luve ni tamata.” (Same 12:1) Na cava e sa rui takalevu kina na sega ni dina? A vola o Roger Rosenblatt, ena ivola na Time: “E sega ni vakatitiqataki ni itovo cecekia na dina. Ia, nida tamata malumalumu ena dredre me namaki na noda tadolova rawa. Kuria oya, sa da rui rerere, beci keda vakataki keda, da vakayagataka na tamata me ivakarawa ni ka, da qai kocova na itutu.” Ni vakamacalataki na gauna eda bula tu kina oqo, e kaya vakadodonu na iVolatabu: “Ra na daulomani ira walega na tamata, . . . era na sega ni yalosavasava [se, “sega ni dina, NW], era na caca veiwekani.”—2 Timoci 3:1-5.
Nida vakasamataka na kaukaua ni kena cakacaka yaco na dina—se kena sega na dina—ena nona vakasama kei na nona ivalavala e dua, eda na rairai taroga, ‘E dodonu meda dina vei cei?’ Dikeva na kena isau ena ulutaga e tarava.
[iTaba ni Credit Line ena tabana e 3]
iTaba e cake: © AFP/CORBIS