‘Muri Au Tiko Ga’

“Ni dou sa kacivi me vakakina: ni sa vosota talega na Karisito na rarawa e na vukumudou, a sa laiva vei kemudou nai vakarau, mo dou muria na we ni yavana.”​—1 PITA 2:​21.

1, 2. Na cava e sega ni dredre kina meda muria na ivakaraitaki cecere ni veivakavulici i Jisu?

O JISU Karisito a Qasenivuli levu duadua e vuravura. E tamata uasivi tale ga, a sega ni bau valavala ca ena gauna ni nona bula vakatamata. (1 Pita 2:​22) E kena ibalebale beka oqo ni rui cecere na nona ivakaraitaki ni veivakavulici me dredre kina vei keda na tamata ivalavala ca meda muria? E sega ni vaka kina.

² Eda raica ena ulutaga sa oti ni a yavutaki ena loloma na veivakavulici i Jisu. Eda rawa kece ni loloma. E dau uqeti keda vakalevu na Vosa ni Kalou meda toroya cake noda lomani ira na tani. (Filipai 1:9; Kolosa 3:​14) E sega ni namaka vei keda o Jiova na veika eda sega ni cakava rawa. Ni dau “loloma na Kalou” qai buli keda meda ucui koya, e rawa ni kainaki ni a buli keda meda dau loloma. (1 Joni 4:8; Vakatekivu 1:​27) O koya gona nida wilika na vosa i Pita e yavutaki kina na ulutaga oqo, eda nuidei nida na rawata. E rawa nida muria voleka na weniyava i Karisito. E rawa sara ga meda muria na ivakaro i Jisu: ‘Muri au tiko ga.’ (Luke 9:23) Meda vaqaqa mada na sala e lomana se taleitaka kina na Karisito na ka dina e vakavuvulitaka, kei na nona lomani ira na tamata e vakavulica.

Taleitaka na Ka Dina Eda Vulica

3. Na cava e dredre kina mera vuli ka e so, ia na ivakasala cava e kune ena Vosa Vakaibalebale 2:​1-5?

³ Eda na qai taleitaka na ka dina eda vakavuvulitaka kevaka eda taleitaka mada e liu meda vulica. E sega ni ka rawarawa ena gauna oqo na tataleitaki vaka oqori. Na vuli vakavo kei na ivakarau ca e vulici ena gauna ni itabagone e dau vakavuna mera sega ni via vuli ka kina e le levu. Ia, e dodonu meda vuli vei Jiova. E kaya na Vosa Vakaibalebale 2:​1-5: “Na luvequ, kevaka ko na vakabauta na noqu vosa, ka vunia na noqu vunau me nomu; mo vakatu daligamu kina ki na vuku, ka vagolea sara na lomamu ki na yalomatua; io, kevaka ko tagica na lomavuku, ka tabalaka na domomu mo kila ka; kevaka ko qara me vaka ko sa qara na siliva, ka vakasaqara me vaka sai yau vuni; ko na qai kila na rerevaki Jiova, ka kunea na Kalou mo kilai koya.”

4. Na cava na ibalebale ni noda “vagolea” na lomada? Na itovo ni rai cava ena vukei keda?

⁴ Eda uqeti ena tikina e 1 me yacova na 4 meda kua wale ga ni “vakabauta” se “vunia” ia meda “qara” se “vakasaqara” tale ga. Na cava ena uqeti keda meda cakava na veika oya? Dikeva mada na ivakasala “vagolea sara na lomamu ki na yalomatua.” E vakaraitaka e dua na ivola, ni veivakadreti oqo “e sega nida kerei tiko kina meda kauaitaka na ivakavuvuli; ia meda ciqoma ga ena marau na ivakavuvuli oya.” Na cava ena vukei keda meda ciqoma ena marau na veika e vakavulici keda kina o Jiova? Na itovo ni noda rai. E dodonu meda raica na noda ‘kila na Kalou’ me vaka na “siliva” kei na “[i]yau vuni.”

5, 6. (a) Na cava e rawa ni yacovi keda? Eda na tarova vakacava? (b) Na cava meda kuria tiko ga kina na iyau eda kila mai na iVolatabu?

⁵ E sega ni dredre me tiko vei keda na itovo ni rai oya. Me kena ivakaraitaki, na ‘kila me baleta na Kalou’ eda vulica e rairai okati kina na ka dina me baleta na inaki i Jiova mera na bula tawamudu na tamata yalodina ena Parataisi e vuravura. (Same 37:​28, 29) Ena imatai ni gauna o kila kina na ka dina oya, e sega ni vakabekataki ni o raica me vaka e dua na iyau, e curuma na nomu vakasama kei na lomamu, o marautaka baleta ni solia vei iko e dua na inuinui. Vakacava ena gauna oqo? Sa buawa beka vei iko na irairai ni iyau oya? Tovolea mada e rua na ka oqo. Kena imatai, vakalesuya tale mada mai na nomu tataleitaki, vakananuma lesu na vuna o taleitaka kina na veika dina kece e vakavulici iko kina o Jiova, okati kina na veika o vulica ena vica na yabaki sa oti.

⁶ Kena ikarua, kuria tiko ga na iyau sa tu vei iko. Ke o kelia e dua na vatutalei, o na tawana beka ga ena nomu taga o gole sara? Se o na vakekeli tiko ga de o mani kunea e so tale? E sinai ena Vosa ni Kalou na vatutalei ni ka dina. Se mani vakacava na kena levu o kunea, o se rawa tiko ga ni kunea e so tale. (Roma 11:33) Ni o kelia na vatutalei ni ka dina, tarogi iko mada: ‘Na cava e vaka kina na iyau? E vukei au beka meu kilai Jiova se na nona inaki? E vukei au beka meu muria na weniyava i Jisu?’ Ni o taroga na veitaro oqori, ena vakaukauataka cake na nomu taleitaka na ka dina e vakavulici iko kina o Jiova.

Taleitaka na Ka Dina Eda Vakavuvulitaka

7, 8. Na cava e so na sala eda vakaraitaka kina vei ira tale e so nida taleitaka na ka dina eda vulica ena iVolatabu? Cavuta e dua na kena ivakaraitaki.

⁷ Nida vakavulici ira e so tale, eda na vakaraitaka vakacava nida taleitaka na ka dina eda sa vulica mai na Vosa ni Kalou? Me vakataki Jisu, meda dau vakararavi vakalevu ina iVolatabu ena gauna eda vunau se veivakavulici kina. Era sa uqeti tiko ena gauna oqo na tamata ni Kalou ena veiyasa i vuravura mera vakayagataka vakalevu na iVolatabu nira cakacaka vakavunau. Meda saga gona na sala meda vakaraitaka kina vua na itaukeinivale ni bibi vei keda na ka eda lai wasea vei ira mai na iVolatabu.​—Maciu 13:52.

⁸ Me kena ivakaraitaki, ni oti na nodra vakacaca na batikadi ena koro o Niu Yoka ena yabaki sa oti, a vakayagataka na Same 46:​1, 11 e dua na tacida yalewa lotu Vakarisito vei ira e sotava ena cakacaka vakavunau. E dau tarogi ira taumada se era sa walia tiko vakacava na nodra lomaleqa ni oti na vakacaca oya. E rogoci ira vinaka, vakavinavinakataka na ka era kaya, qai dau tomana: “E rawa beka meu wilika vei kemuni e dua na tikinivolatabu e vakacegui au ena gauna dredre oqo?” E levu era vakarorogo, mani tini sara ina so na veitalanoa momona. Ni vosa vei ira na gone, e dau kaya na tacida oqo: “Sa 50 na yabaki noqu vakavuvulitaka tiko na iVolatabu, ia oni kila na cava? Au se sega ni sotava e dua na leqa me sega ni walia na ivola oqo.” Ke bulabula na noda ivakamacala, eda na vakaraitaka tiko ni bibi vei keda da qai taleitaka tale ga na veika eda vulica mai na Vosa ni Kalou.​—Same 119:​97, 105.

9, 10. Na cava e bibi kina meda vakayagataka na iVolatabu nida sauma na taro e baleta na veika eda vakabauta?

⁹ Nira vaqaqa e so na veika eda vakabauta, oqori e gauna vinaka meda vakaraitaka kina noda taleitaka na Vosa ni Kalou. Me vakataki Jisu, eda na sega ni yavutaka na noda isaunitaro ena veika ga eda nanuma. (Vosa Vakaibalebale 3:​5, 6) Ia, eda na vakayagataka ga na iVolatabu. O rerevaka beka de o na tarogi ena dua na taro o na sega ni rawa ni sauma? Oqo e rua na ka o rawa ni cakava.

¹⁰ Saga mo dau vakavakarau vinaka. A vola na yapositolo o Pita: “Mo ni vakarokorokotaki Karisito ga e yalomuni me nomuni Turaga. Mo ni dau vakarau tu e na veigauna kece ga mo ni vakamacalataka vua na tamata yadua e via kila na i nuinui sa tu vei kemuni.” (1 Pita 3:​15, VV) O sa vakarau tu mo vakamacalataka na veika o vakabauta? Me kena ivakaraitaki, ke dua e via kila se cava o sega ni dau vakaitavi kina ena so na ivalavala e sega ni vakaivolatabu, kua ni kaya ga, “E sega ni vakatara na noqu lotu.” Na isaunitaro oya ena vakaraitaka nira vakatulewa ena vukumu e so, o rairai lewe tale ga ni lotu e kena iliuliu na tamata. Ena vinaka cake mo kaya, “E sega ni vakatara na Vosa ni Kalou, na iVolatabu” se, “E sega ni marautaka na noqu Kalou.” Qai vakamacalataka na vuna.​—Roma 12:1.

11. Na ivola cava ena vukei keda meda sauma na taro me baleta na ka dina mai na Vosa ni Kalou?

¹¹ Ke o vakila ni o se sega ni vakavakarau vinaka, de vinaka mo vakayagataka e so na gauna mo vulica kina na ivola Usutu Vakaivolatabu me Veivosakitaki.a Digitaka e vica na ulutaga e dau tarogi wasoma, qai nanuma toka e vica na kena tikinivolatabu. Me toka volekati iko na nomu ivola na Usutu Vakaivolatabu kei na nomu iVolatabu. Vakayagataki rau ruarua, vakaraitaka ni ivola oqo e vukei iko mo kunea na isaunitaro mai na iVolatabu.

12. Na cava eda rawa ni kaya ke da sega ni kila na isaunitaro mai na iVolatabu?

¹² Kua ni lomaleqa. E sega ni bau dua e rawa ni sauma kece na taro. O koya gona, ke o tarogi ena dua na taro o sega ni rawa ni sauma, tukuna ga: “Au vakavinavinakataka nomu taroga na taro oqori. Au sega ni rawa ni sauma ena gauna oqo, ia au vakadeitaka ni sauma na taro oqori na iVolatabu. E noqu mesamesa na vakadidike ena iVolatabu, au na vaqaqa na isau ni nomu taro, au na qai mai sauma.” Na vosa vakadodonu vaka oya ena rawa ni lai tomani tale kina na veivosaki.​—Vosa Vakaibalebale 11:2.

Lomani Ira Eda Vakavulica

13. Na cava meda kua ni beci ira kina o ira eda vunau vei ira?

¹³ O Jisu e lomani ira na tamata e vakavulici ira. Eda rawa ni vakadamurimuri koya vakacava? Meda kua ni beci ira na tamata era tu yavoliti keda. E dina ni sa qai voleka ga “nai valu ni siga dina ko ya ni Kalou Kaukauwa” era na vakarusai kina e vica vata na bilioni na tamata. (Vakatakila 16:14; Jeremaia 25:33) Ia, eda sega ga ni kila se o cei ena vakabulai se o cei ena vakarusai. E se bera na gauna me qai vakatulewa kina o koya sa digitaka o Jiova, oya o Jisu Karisito. Me yacova na gauna e tau kina na lewa, eda na se nuitaka tiko ga nira na yaco mera dauveiqaravi i Jiova.​—Maciu 19:​24-​26; 25:​31-​33; Cakacaka 17:31.

14. (a) Eda na dikevi keda vakacava se eda kauaitaki ira tiko se sega na tamata? (b) Eda na vakaraitaka vakacava nida kauaitaki ira dina na tamata?

¹⁴ Me vakataki Jisu, eda na kauaitaki ira tiko ga na tamata. Meda tarogi keda mada: ‘Au lomani ira beka na tamata e vakaisini ira na isoqosoqo ni lotu, politiki, kei na bisinisi? Ke ra sega ni kauaitaka na itukutuku eda kauta vei ira, au dau saga beka meu kila se cava e vakavuna? Au se nanuma tiko niu a vaka tale ga oya o yau kei ira era qaravi Jiova tiko ena yalodina ena gauna oqo? Au sa veisautaka beka na ivakarau ni noqu vunau? Seu raici ira me vaka nira sa sega ni rawa ni veisau?’ (Vakatakila 12:9) Ke ra vakila na tamata nida kauaitaki ira dina, ena rawa nira rogoca na noda itukutuku. (1 Pita 3:8) Ena uqeti keda tale ga meda kauaitaki ira vakalevu eda vunau vei ira. Eda na kauaitaka na ka era taroga kei na veika e vakaleqai ira tiko. Nida sikovi ira tale, meda vakaraitaka nida lai vakasamataka tiko na veika era kaya ena noda veisiko e liu. Vakaraitaka vei ira ni rawa meda vukei ira beka ke ra sotava tiko e so na leqa bibi.

15. Na cava meda kauaitaka kina na veika vinaka era cakava e so? Eda na kauaitaka vakacava?

¹⁵ Me vakataki Jisu, meda kauaitaka tale ga na veika vinaka era cakava e so. De veivakadrukai na nona saga tiko e dua na itubutubu ledua me susugi ira na luvena. De sasaga sara tiko vakaukaua e dua na tagane me qarava na nona vuvale. De kauaitaka tiko na veika vakayalo e dua sa qase. Eda kauaitaka beka na veika era cakava oya da qai vakacaucautaki ira? Ke da cakava oqori, ena vinaka kina na noda veimaliwai me vakarawarawataka na noda vunautaka vei ira na Matanitu ni Kalou.​—Cakacaka 26:​2, 3.

Meda Yalomalumalumu Nida Veilomani

16. Na cava meda yalomalumalumu kina da qai dokai ira eda vunau vei ira?

¹⁶ Nida lomani ira eda vakavulici ira tiko eda na muria kina na ivakasala ena iVolatabu: “Na vuku sa vu ni viavialevu, a loloma ga sa vu ni vakatataki cake.” (1 Korinica 8:1) E sega ni tukuni rawa na vuku e tu vei Jisu, ia e sega ni qaciqacia. Nida vakamacalataka na veika eda vakabauta, kua ni yalokatakata se qaciqacia. Eda vinakata ga meda tara na lomadra na tamata me rawa kina nira taleitaka na ka dina eda taleitaka vakalevu. (Kolosa 4:6) Ni vakasalataki keda na lotu Vakarisito o Pita meda tu vakarau meda taqomaka noda vakabauta, e tukuna o koya meda cakava oqo “e na yalomalumalumu kei na rere.” (1 Pita 3:​15) Ke da yalomalumalumu da qai veidokai, ena rawa nida vakayarayarataki ira na tamata vua na Kalou eda qarava.

17, 18. (a) Meda raica vakacava na noda vakalewai me baleta noda rawata na ivakatagedegede ni italatala? (b) Na cava e sega ni vinakati kina vei ira na gonevuli ni iVolatabu mera kila na vosa e volai taumada kina na iVolatabu?

¹⁷ E sega ni gadrevi meda raqataka na levu ni ka eda kila se na noda vuli vinaka. Ke so ena noda yalava era sega ni via rogoci ira na sega ni vakoroi mai na univesiti se o ira na kilaitani ena so na icavuti, kua ni yalolailai. A sega ni kauaitaka o Jisu na nodra kaya e so ni a sega ni vuli ena nodra koronivuli na rapai ena nona gauna; se vakaduiduitaki koya mera kila na tamata ni levu na ka e kila.​—Joni 7:​15.

¹⁸ E bibi cake na yalomalumalumu kei na loloma vua na italatala ni lotu Vakarisito mai na vuli vinaka. E vakarautaki keda ga meda italatala na Dauniveivakavulici Levu, o Jiova. (2 Korinica 3:​5, 6) Veitalia se cava era kaya e so na italatala ni lotu ni Veivanua Vakarisito, e sega ni vinakati sara meda vulica na vosa e volai taumada kina na iVolatabu me qai rawa nida vakavuvulitaka na Vosa ni Kalou. O Jiova e vakavuna me volai na iVolatabu me matata vinaka me rawa kina vei keda kece meda kila na ka dina uasivi e tu kina. E sega ni veisau na ka dina oqo ena kena vakadewataki ena vica vata na drau na vosa. O koya gona, dina ni yaga ena so na gauna, ia e sega ni vinakati sara meda kila na vosa e volai taumada kina na iVolatabu. E rawa tale ga ni vakavuna me dredre noda vakavulici baleta nida na rairai qaciqaciataka na noda kila se eda kenadau ena veivosa e so.​—1 Timoci 6:4.

19. Eda veiqaravi vakacava nida cakacaka vakavunau?

¹⁹ E vinakati dina na yalomalumalumu ena cakacaka vakavunau vakarisito. Eda dau tusaqati, vakawaleni, da qai vakacacani vakalevu. (Joni 15:20) Ia, eda sa cakava tiko e dua na cakacaka bibi kevaka eda yalodina ena noda cakacaka vakavunau. Kevaka eda yalomalumalumu nida qaravi ira na tani ena cakacaka oqo, eda sa vakadamurimuri Jisu tiko ena nona lomani ira na tamata. Vakasamataka: Ke vinakati meda vunau vei ira e duanaudolu na tamata era sega ni kauai se era dau veitusaqati meda kunea kina e dua e vaka na sipi, ena sega beka ni sasaga yaga oya? E vaka kina! Kevaka gona eda tomana tiko na noda cakacaka, eda sa qaravi ira tiko na tamata era vaka na sipi era se bera ni kune. E sega ni vakabekataki ni rau na raica o Jiova kei Jisu mera kune ra qai qaravi o ira na tamata domoni oqori ni bera na icavacava.​—Akeai 2:7.

20. Na cava e so na sala eda ivakaraitaki kina ena noda veivakavulici?

²⁰ Na noda ivakaraitaki e kilai kina nida marau ni vakavulici ira tale e so. Me kena ivakaraitaki, eda dau vakavulici ira tale e so ni noda qaravi Jiova, “na Kalou mamarau,” e ivakarau ni bula uasivi qai yaga duadua. (1 Timoci 1:​11, NW) Nira raica na noda itovo nida veimaliwai kei ira eda vakaitikotiko vata, noda icaba e koronivuli, kei na noda itokani vakacakacaka, era raica li nida marau da qai lomavakacegu? Eda vakavulici ira tale ga eda vuli iVolatabu kei ira ni vakilai ga na veilomani ena ivavakoso vakarisito, sega ni vuravura yalokaukaua oqo. Era raica li o ira eda vakavulici ira tiko ena iVolatabu nida lomani ira kece na lewe ni ivavakoso da qai saga meda taqomaka tiko ga na veilomani oqori?​—1 Pita 4:8.

21, 22. (a) Na cava tale e rawa nida vakaitavi kina nida dikeva na noda cakacaka vakavunau? (b) Na cava ena vakamacalataki ena itabataba ni Vale ni Vakatawa e tarava?

²¹ Noda mamakutu ena cakacaka vakavunau ena uqeti keda meda dau dikevi keda. Nida cakava dina oqori de dua eda rawa ni vakalevutaka na noda cakacaka meda dauveiqaravi vakatabakidua se toki ina vanua e gadrevi vakalevu kina na cakacaka. E so era vulica na nodra vosa na sa mai vakaitikotiko ena nodra vanua. Ke rawa mo cakava na veika oqori, vakasamataka vinaka qai masulaka. Eda na marau vakalevu da qai lomavakacegu ke da digia na bula ni veiqaravi.​—Dauvunau 5:​12.

²² Meda tomana tiko mada ga na noda vakadamurimuri Jisu Karisito nida taleitaka na ka dina kei na noda lomani ira na tamata eda vakavulici ira. Ke da bucina i lomada da qai vakaitovotaki keda ena rua na ka oqo ena yavutaki vinaka noda veivakavulici me vakataki Karisito. Eda na tomana vakacava na veika eda sa tekivuna oqo? Na itabataba ni Vale ni Vakatawa e tarava ena vakamacalataka e so na iwalewale ni veivakavulici e vakayagataka o Jisu.

[iVakamacala e ra]

O Sauma Vakacava?

• Eda vakadeitaka vakacava ni ivakarau ni veivakavulici cecere i Jisu e sega ni dredre meda vakadamurimuria?

• Eda vakaraitaka vakacava nida taleitaka na ka dina eda vulica ena iVolatabu?

• Na cava e bibi kina meda yalomalumalumu tiko ga ni tubucake na noda kila?

• Na cava e so na sala eda vakaraitaka kina nida lomani ira na tamata eda saga meda vakavulici ira?

[iYaloyalo ena tabana e 16]

Saga mo dau vakavakarau vinaka

[iYaloyalo ena tabana e 17]

Ke o raica me iyau na ‘kila me baleta na Kalou,’ o na vakayagataka vinaka na iVolatabu

[iYaloyalo ena tabana e 18]

Eda lomani ira na tamata ke da wasea vei ira na itukutuku vinaka