Vakayacora Tiko ga na Veika O Vulica

“Ni vakayacora na veika ko ni sa vulica ka raica vei au, koya mai na ka au tukuna kei na ka au cakava, ka na tiko vata kei kemuni na Kalou dau veivakacegui.”​—FILIPAI 4:​9, VV.

1, 2. Ni raici vakararaba, e bau yaga tiko na iVolatabu vei ira era kaya nira lotu? Vakamacalataka.

“E TOROCAKE Tiko na Lotu, ia e Torosobu Tiko na iTovo.” Oqori na ulutaga e tabaki ena niusiveva na Emerging Trends ni vakaraitaki kina na macala ni dua na vakatataro a vakayacori e Mereke raraba. E laurai e Mereke ni tubucake na iwiliwili ni tamata era curuma tiko na valenilotu ra qai kaya ni bibi vei ira na lotu. Ia, e kaya na niusiveva: “Dina ga ni tubu na iwiliwili oya, ia era vakabauta e levu na lewe i Mereke ni sega ni yaga na ivakavuvuli vakalotu vei ira yadudua se ina lewenivanua raraba.”

² E sega ni vakilai ga ena dua na vanua na leqa oqo. E levu na tamata ena veiyasa i vuravura era kaya nira vakabauta na iVolatabu ia era sega ni vakatara na iVolatabu me lewa na nodra bula. (2 Timoci 3:5) “Keimami doka na iVolatabu,” e kaya e dua na iliuliu ni dua na ilawalawa era vakatataro, “ia keimami sa sega ga ni dau wilika, vulica, se bulataka.”

3. (a) E yaga vakacava vei ira na lotu Vakarisito dina na iVolatabu? (b) Era muria vakacava na ivakasala i Paula ena Filipai 4:9 na imuri i Jisu?

³ Ia era duatani na lotu Vakarisito dina. Era sa veisautaka na nodra rai kei na nodra itovo baleta nira muria na ivakasala ni Vosa ni Kalou. Era vakila na tani na nodra sa veisautaka na nodra itovo. (Kolosa 3:​5-​10) O ira na imuri i Jisu era sega ni raica na iVolatabu me ivola e dau vuka tu ga ena vatanivola baleta ni sega ni dau vakayagataki. Me kena veibasai, e tukuna vei ira na lotu Vakarisito mai Filipai na yapositolo o Paula: “Ni vakayacora na veika ko ni sa vulica ka raica vei au, koya mai na ka au tukuna kei na ka au cakava, ka na tiko vata kei kemuni na Kalou dau veivakacegui.” (Filipai 4:​9,VV, neitou na matanivola kala.) Era sega wale ga ni vakabauta na veika dina mai na Vosa ni Kalou na lotu Vakarisito. Era bulataka sara ga na ivakasala era vulica mai na iVolatabu ena nodra vuvale, vanua ni nodra cakacaka, ena loma ni ivavakoso, kei na veibasoga kece ni nodra bula.

4. Na cava e ka ni bolebole kina na noda bulataka na lawa ni Kalou?

⁴ E sega ni ka rawarawa na bulataki ni lawa kei na ivakavuvuli ni Kalou. Eda se bula tiko ena vuravura e lewa tiko o Setani na Tevoro, e vakatokai koya na iVolatabu me “kalou ni vuravura oqo.” (2 Korinica 4:4; 1 Joni 5:​19) O koya gona, meda qarauna de dua na ka e vakaleqa na noda yalodina tiko ga vei Jiova. E rawa vakacava meda yalodina tiko?

“Taura Matua Nai Vakarau ni Vosa Dina”

5. Na cava na ibalebale ni vosa i Jisu: “Muri au tiko ga”?

⁵ Noda dei tiko ena sokalou dina nira vakacacani keda na tawavakabauta e sala tale ga ni noda bulataka tiko na veika eda vulica. E sasagataki na vosovoso. “Kevaka e dua sa via muri au,” e kaya o Jisu, “me kakua ni muria na lomana, ia me colata na nona kauveilatai, ka muri au [se, “muri au tiko ga,” NW].” (Maciu 16:24) E sega ni tukuna o Jisu meda muri koya ga ena dua na macawa, dua na vula, se dua na yabaki. E tukuna ga: “Muri au tiko ga.” E vakaraitaka o Jisu ni sega ni rawa meda nona tisaipeli ena loma ga ni dua na gauna lekaleka se meda sokalou nikua ia sa na sega nimataka. Noda dei ena sokalou dina e kena ibalebale meda yalodina tiko ga veitalia se cava e mani yaco. Eda na rawata vakacava oya?

6. Na ivakarau ni vosa dina cava era vulica vei Paula na lotu Vakarisito ena imatai ni senitiuri?

⁶ E uqeti Timoci o Paula: “Mo taura matua nai vakarau ni vosa dina ko a rogoca maivei au, e na vakabauti Karisito Jisu kei na loloma.” (2 Timoci 1:​13) Na cava e tukuna tiko o Paula? Na vosa vakirisi e vakadewataki me “[i]vakarau” e kena ibalebale na droini taumada nei koya e dau droini. Dina ga ni droini oya e se sega ni matailalai sara, ia sa rawa ni kilai na ka e droinitaki. E vaka kina na ivakarau ni ka dina e vakavuvulitaka vei Timoci kei ira tale e so o Paula, e sega ni sauma na veitaro matailalai kece. Na ivakavuvuli e toka kina e idusidusi ga, e via vaka na droini taumada, me dusia ga vei ira na tamata lomadina na veika e vinakata o Jiova mera cakava. E vinakati mera taura dei na ivakarau ni ivakavuvuli dina oya ena nodra vakayacora tiko na veika era vulica, me qai rawa nira vakamarautaka na Kalou.

7. Era na taura dei vakacava na ivakarau ni vosa dina na lotu Vakarisito?

⁷ Ena imatai ni senitiuri, eratou a vakavuvulitaka o Imeneo, Alekisada, kei Filito na ivakavuvuli e sega ni salavata kei “nai vakarau ni vosa dina.” (1 Timoci 1:​18-​20; 2 Timoci 2:​16, 17) Era taqomaki ira vakacava na lotu Vakarisito taumada mai na nodra veivakamuai cala na vukitani? Ena nodra vulica vinaka na iVolatabu ra qai bulataka na kena ivakavuvuli. O ira na muria na ivakaraitaki i Paula kei na so tale na tamata yalodina era sega ni muria na ivakavuvuli e sega ni salavata kei na ka dina era vulica. (Filipai 3:​17; Iperiu 5:​14) Era sega ni “dauvinakata na veileti kei na veibataka na vosa,” ia era tomana tiko ga na nodra sokalou. (1 Timoci 6:​3-6) Eda na vakataki ira tale ga nida bulataka tiko na ka dina eda vulica. E vakaukauataka na noda vakabauta nida raici ira na vica na milioni era qaravi Jiova tiko e veiyasa i vuravura ra qai taura dei toka na ivakarau ni ivakavuvuli dina mai na iVolatabu era vakavulici kina.​—1 Cesalonaika 1:​2-5.

Cata “Nai Tukutuku Wale”

8. (a) E saga vakacava o Setani ena gauna oqo me vakarusa noda vakabauta? (b) Na ivakasala cava i Paula e tiko ena 2 Timoci 4:​3, 4?

⁸ E tovolea o Setani meda kua ni yalodina vua na Kalou ni sagai keda meda vakatitiqataka na veika eda vakavulici kina. Me vaka ena imatai ni senitiuri, era saga tale ga na vukitani ena gauna oqo mera vakarusa na nodra vakabauta na tamata dodonu. (Kalatia 2:4; 5:​7, 8) So na gauna era vakayagataka na sala ni vakauitukutuku se era lasutaka bulabula sara ga na veika era cakava kei na nodra inaki na tamata i Jiova. Sa tukuna oti o Paula ni so era na vagolei tani mai na ka dina. E vola: “Ni na yaco na gauna era na sega ni vosota kina nai vakavuvuli dodonu; ia ena vaka na nodra gagadre ca, era na vakalewevuqataki ira kina na nodrai vakavuvuli, ni sa qasikanunu na daligadra; a ra na vagolea tani na daligadra mai na ka dina, ka lesu ki nai tukutuku wale.”​—2 Timoci 4:​3, 4.

9. Na cava e rairai vakasamataka tiko o Paula ni cavuta “nai tukutuku wale”?

⁹ So era sega ni taura dei na ivakarau ni vosa dina, nira sa taleitaka “nai tukutuku wale.” Na cava na itukutuku wale oqo? De vakasamataka tiko o Paula e so na itukuni ena ivola e vakabekataki na kena uqeti vakalou me vaka na Tobit.a Na itukutuku wale oya e rawa ni okati kina na italanoa era vakabekataki se ucumaiduru. ‘Ena nodra gagadre ca’ e so era sikalutu ina nodra veitemaki o ira na sega ni taura vakabibi na ivakatagedegede ni Kalou se ra dau vosa suruti ira na veiliutaki ena ivavakoso. (3 Joni 9, 10; Juta 4) Se mani veivakatarabetaki cava era sotava, e so era vinakata cake na veika lasu mai na veika dina e vakavuvulitaka na Vosa ni Kalou. Sega ni dede era sa sega ni vakayacora na veika era vulica, qai vakaleqai ira vakayalo sara.​—2 Pita 3:​15, 16.

10. Na cava e so na itukutuku wale ena gauna oqo, e vakabibitaka vakacava o Joni meda qaqarauni?

¹⁰ E rawa meda kua ni goleva na itukutuku wale nikua ke da qarauna da qai digia vinaka na veika eda rogoca se wilika. Me kena ivakaraitaki, e cuqena na sala ni vakauitukutuku na itovo vakasisila. E levu era vakatitiqataka se sega ni vakabauta na Kalou. So na dauveivakadiloi era vakacala ni a vakavuna na Kalou na iVolatabu. So era vukitani ena gauna oqo era tovolea ni bacani ira na lotu Vakarisito mera vakatitiqa. Me baleta e dua na leqa vata oqori a yaco ena imatai ni senitiuri era vakavuna na parofita vakailasu, e vakasala kina na yapositolo o Joni: “Oi kemudou sa lomani, kakua ni vakadinata na yalo kecega, ia dou vakatovolei ira na yalo se ra yalo mai vua na Kalou, se segai: ni ra sa lewe vuqa na parofita vakailasu era sa lako voli yani e vuravura.” (1 Joni 4:1) E dodonu meda qaqarauni.

11. Na cava e dua na sala eda rawa ni dikeva kina se eda tiko ena vakabauta se sega?

¹¹ E vola o Paula: “Dou dikevi kemudou, se dou tu e na vakabauta, se segai.” (2 Korinica 13:5) E uqeti keda na yapositolo meda dikevi keda se da sa muria tiko na vakabauta ni lotu Vakarisito se sega. Kevaka eda dau rogoci ira na dau vosa kudrukudru, e dodonu meda dikevi keda vinaka. (Same 139:​23, 24) Eda dau vakalewai ira beka na tamata i Jiova? Ke vaka kina, na cava e vuna? E vakararawataki keda beka na vosa e tauca e dua se nona ivakarau? Ke vaka kina, eda dau dikeva vakayalomatua na vuna? E sega ni tudei na rarawa eda sotava ena gauna oqo. (2 Korinica 4:​17) Ke mani dua e vakararawataki keda ena loma ni ivavakoso, na cava me tarova kina na noda qarava na Kalou? Ke vakaleqai keda e dua na ka, e sega beka ni vinaka cake meda walia na leqa oya da qai biuta ga ina liga i Jiova?​—Same 4:4; Vosa Vakaibalebale 3:​5, 6; Efeso 4:​26.

12. Era ivakaraitaki vinaka vakacava vei keda na kai Peria?

¹² Meda kua ni dau vakalelewa, ia meda ciqoma ga ena marau na veika eda vulica nida vuli vakataki keda kei na noda dau tiko ena soqoni vakaivavakoso. (1 Korinica 2:​14, 15) Meda kua ni vakacala na Vosa ni Kalou, ia meda vakataki ira ga na kai Peria ena imatai ni senitiuri nira dau vakadikeva vinaka na iVolatabu. (Cakacaka 17:​10, 11) Meda muria ga na veika eda vulica nida dei tiko ga ina ka dina da qai sega ni vakarogoca na itukutuku wale.

13. E rawa vakacava meda vakauitukutuku lasu?

¹³ E tiko e dua tale na mataqali itukutuku lasu meda qarauni keda kina. E vakaitamera dina na italanoa kei na vakasavurogorogo sa veikauyaki tu oqo ena E-mail. E vinaka meda qaqarauni ena italanoa vaka oqori, vakabibi nida sega ni kila na vanua era vu mai kina. Ke mani vakauta mai e dua na lotu Vakarisito e vinaka na kena irogorogo e dua na italanoa se vakasavuirogorogo, ia de sega ni kila o koya na ka dina e yaco. Oya na vuna e bibi kina meda qarauna vinaka na veikauyaka na itukutuku eda sega ni rawa ni vakadeitaka. Eda sega ni vinakata meda veikauyaka “na veitalanoa tawa vakalotu,” e “sega ni ganita me talanoataki.” (1 Timoci 4:7; VV) Ni dodonu meda tukuna ga na veika dina vei ira tale e so, eda na sega gona ni veikauyaka na itukutuku de vakavuna meda dau vakauitukutuku lasu.​—Efeso 4:​25.

Yaga ni Bulataki ni Ka Dina

14. Na cava e yaga ni noda bulataka na veika eda vulica mai na Vosa ni Kalou?

¹⁴ E yaga vakalevu noda bulataka na veika eda vulica mai na noda vuli iVolatabu vakataki keda kei na noda tiko ena soqoni vakarisito. Me kena ivakaraitaki, ena rawa ni vinaka cake na noda veimaliwai kei ira eda veitokani ena vakabauta. (Kalatia 6:​10) Ena vinaka na noda ivakarau nida bulataka na ivakavuvuli vakaivolatabu. (Same 19:8) Nida bulataka tale ga na veika eda vulica, ena ‘rogorogo vinaka kina na ivakavuvuli ni Kalou,’ ena dreti ira tale ga mai e so ina sokalou dina.​—Taito 2:​6-​10.

15. (a) E yaloqaqa vakacava e dua na itabagone me vunau e koronivuli? (b) Na cava o vulica mai na vakasavuirogorogo oqo?

¹⁵ E levu na itabagone iVakadinadina i Jiova era bulataka tiko na veika era vulica vakataki ira mai na iVolatabu kei na ivola vakarisito vaka kina na veika era vulica nira tiko wasoma ena soqoni vakaivavakoso. Nodra itovo vinaka e ivakadinadina levu vei ira na qasenivuli kei na nodra icaba e koronivuli. (1 Pita 2:​12) Vakasamataki Leslie mada, e dua na goneyalewa yabaki 13 mai Mereke. E dau rere ni vakamacalataka na nona vakabauta vei ira nona icaba e koronivuli, ia e qai vakamacala rawa ena dua na siga. “Era veivosakitaka nona lewenikalasi na nodra saga e so mera volitaka na ka vei ira. E laveliga e dua na goneyalewa qai cavuti ira na iVakadinadina i Jiova.” Ni iVakadinadina o Leslie, na cava e cakava? “Au taqomaka noqu vakabauta,” e kaya o Leslie, “au kila nira kurabui baleta niu dau galugalu e koronivuli.” Na cava e yaco ena vuku ni nona yaloqaqa? “Au solia rawa e dua na brochure kei na dua na ivolacebaceba vua na goneyalewa oya baleta ni taroga e so tale na taro,” e kaya o Leslie. Sa na duatani na marau i Jiova ni rawa vei ira na itabagone era bulataka na veika era vulica nira yaloqaqa mera vunau e koronivuli!​—Vosa Vakaibalebale 27:11; Iperiu 6:​10.

16. E yaga vakacava na Koronivuli ni Vuli Vunau vua e dua na iVakadinadina itabagone?

¹⁶ O Ilisapeci e dua tale na ivakaraitaki vinaka. Me tekivu ni se qai yabaki vitu me yacova ni vakacavara nona vuli ena paraimari, e dau sureti nona qasenivuli na goneyalewa oqo me lai rogoca na nona itavi ena Koronivuli ni Vuli Vunau ena Kingdom Hall. Ke sega ni rawa ni tiko ena soqoni o qasenivuli, e dau vakarogoya na nona itavi vei qasenivuli ni suka na vuli. Ena iotioti ni yabaki ni nona vuli ena sekenidri, e vola o Ilisapeci e dua na ripote e tini na tabaniveva e baleta na yaga ni Koronivuli ni Vuli Vunau vei iratou e va na qasenivuli. E sureti tale ga me vakaraitaka na icakacaka ni ivakamacala ena Koronivuli ni Vuli Vunau. Mani digitaka me vosa ena ulutaga, “Na Cava e Vakatara Kina na Veika Rarawa na Kalou?” Sa yaga sara vei Ilisapeci na nodra veivakavulici na iVakadinadina i Jiova ena Koronivuli ni Vuli Vunau. O koya e dua ga vei ira na vica vata na lotu Vakarisito itabagone era vakalagilagi Jiova nira bulataka na veika era vulica mai na nona Vosa.

17, 18. (a) Na cava na ivakasala ni iVolatabu me baleta na daudina? (b) E tara vakacava e dua na turaga na nona dina e dua na iVakadinadina i Jiova?

¹⁷ Na iVolatabu e vakaroti ira na lotu Vakarisito mera daudina. (Iperiu 13:18) Ena vakaleqa noda veimaliwai kei ira tale e so qai vakabibi kei Jiova kevaka eda sega ni dina. (Vosa Vakaibalebale 12:22) Na dodonu ni noda itovo e vakadinadinataka nida sa bulataka tiko na veika eda vulica, sa vakavuna tale ga mera dokai ira vakalevu na iVakadinadina i Jiova e levu na tamata.

¹⁸ Vakasamataka na ka e sotava o Filipe e dua na sotia. E vakayalia e dua na jeke sa sainitaka tu ia e sega ni volai vua e dua se na levu ni ilavo. E sega ni vakila ni sa yali na jeke me yacova ni sa vakasukai mai vua ena meli. E kunea na jeke e dua na iVakadinadina i Jiova, qai vola mai ena ivola e curu vata mai kei na jeke ni nona vakabauta vakalotu e uqeti koya me vakasuka mai na jeke. E ga balavu o Filipe. “Ke a rawa sara ga mera butakoca vei au e rauta e $20,000!” e kaya o koya. E rarawataka o koya ni a butakoci mai valenilotu na nona isala ena dua na gauna. E taura na nona isala e dua e kila, ia oqo e dua e sega ni kila e qai vakasuka mai vua na jeke e rawa ni volai kina e vica na udolu na dola! Io, era vakacaucautaki Jiova na lotu Vakarisito era daudina!

Bulataka Tiko ga na Veika O Vulica

19, 20. Ena yaga vakacava na noda bulataka na veika eda vulica mai na iVolatabu?

¹⁹ Era kalougata vakalevu o ira na bulataka na veika era vulica mai na Vosa ni Kalou. A vola na tisaipeli o Jemesa: “Ia ko koya sa vakaraica matua na vunau vinaka sara, na vunau ni veisereki, ka tu dei kina, sa sega ni daurogoca ka guilecava, ia sa kitaka talega na cakacaka, ena kalougata kina ko koya oqo e na nona cakacaka.” (Jemesa 1:​25) Io, kevaka eda bulataka na veika eda vulica mai na iVolatabu, eda na marau dina qai vinaka cake tale ga na noda valuta na bula dredre oqo. Qai vakauasivi, ena vakalougatataki keda o Jiova meda bula tawamudu!​—Vosa Vakaibalebale 10:22; 1 Timoci 6:6.

²⁰ Meda gumatua ni vulica tiko na Vosa ni Kalou. Meda soqoni wasoma kei ira na sokalou vei Jiova, da qai kauaitaka na veika eda rogoca ena soqoni vakarisito. Meda bulataka na veika eda vulica, ‘ena qai tiko vata kei keda na Kalou ni veivakacegui.’​—Filipai 4:9.

[iVakamacala e ra]

O se Nanuma?

• Na cava “nai vakarau ni vosa dina,” eda na taura matua vakacava?

• Na cava na ‘itukutuku wale’ meda kua ni vakabauta?

• Na veika yaga cava era na tauca na bulataka na veika era vulica mai na Vosa ni Kalou?

[iYaloyalo ena tabana e 17]

Era taqomaki ira vakacava na lotu Vakarisito taumada mai na nodra veivakamuai cala na vukitani?

[iYaloyalo ena tabana e 18]

E rawa nira sagai keda na sala ni vakauitukutuku, na Internet, kei ira na vukitani ena gauna oqo meda vakatitiqa

[iYaloyalo ena tabana e 19]

Sega ni dodonu meda veikauyaka na itukutuku eda sega ni vakadeitaka

[iYaloyalo ena tabana e 20]

Era bulataka na veika era wilika mai na Vosa ni Kalou na iVakadinadina i Jiova e vanua ni cakacaka, koronivuli, kei na vanua tale e so