iTabagone Era Taleitaka na Ka Dina

“ENA vakasavasavataka vakaevei na nonai valavala na cauravou?” a taroga na daunisame ni Iperiu ena vica vata na udolu na yabaki sa sivi. (Same 119:9) E taro vinaka dina oqo vei ira na itabagone era sotava tu nikua e levu na leqa e vuravura. Era tauvi AIDS e vuqa na itabagone nira dau veiyacovi vakaveitalia, rauta ni veimama vei ira oqo era tiko ena yabaki ni bula mai na 15 ina 24. Levu tale na leqa e vu mai na kena vakayagataki na wainimate gaga, yaco me tinidole kina na nodra bula e so na itabagone. E dau vakaleqai ira tale ga na itabagone na ivakatagi torosobu; iyaloyalo ni itovo voravora kei na itovo dukadukali, e vakaraitaki ena porokaramu ni retioyaloyalo kei na vidio; kei na iyaloyalo ni luvaiwale ena Internet. Ena dodonu gona mera vakasamataka sara vakabibi e vuqa na itubutubu kei ira na itabagone nikua na nona taro na daunisame.

A sauma ga na daunisame na nona taro: “Ni sa qarauna ga me vaka na nomuni vosa.” Io, na Vosa ni Kalou, na iVolatabu, e koto kina na ivakasala vinaka vei ira na itabagone, nira muria, sa vakainaki kina na nodra bula e vuqa na itabagone. (Same 119:105) Meda dikeva mada na nodra ivakaraitaki e so na itabagone era lomana na Kalou, ra qai saga mera kaukaua tiko ga vakayalo ena vuravura ni vaqara marau kei na domodomoiyau oqo.

Rau Marautaka Nodrau Veituberi na iTubutubu

O Jacob Emmanuel e dua a cakacaka vakaitalatala vakatabakidua ena vica na yabaki, ni bera ni qai lai veiqaravi ena valenitabana ni iVakadinadina i Jiova mai Mexico. A nanuma lesu ena marau na sala a bucina me taleitaka kina na veiqaravi vua na Kalou: “Erau dau vakauqeti au sara ga na noqu itubutubu, vaka tale ga kina o ira na taciqu vakayalo keimami veitokani vinaka. Era vakamuai au meu taleitaka na cakacaka vakavunau. Ra dusimaki au vakamalua meu muria na sala dodonu; era sega vakadua ni bau vakasaurarataki au.”

A nanuma lesu o Tevita, e dua sa veiqaravi vakatabakidua voli mai ena vica vata na yabaki, na nona drukataka na nodrau a tekivu painia lavotaki rawa na nona itubutubu ni rau se lalai sara kei tacina. Gauna a mate kina o tamana, a cakacaka tiko ga vakapainia lavotaki o tinana. A susugi rau voli qai dau vunautaka tale tiko ga na itukutuku vinaka. “Rau a sega ni vakasaurarataki au meu painia,” e kaya o Tevita, “ia keitou dau marautaka vakalevu vakavuvale na cakacaka vakapainia, na veitokoni kei na ituvaki au sotava kina e uqeti au meu cakava na cakacaka vata ga oqo.” Me vakaraitaka na bibi ni nodrau veituberi kei na nodrau veikauaitaki na itubutubu, e kaya o Tevita: “Veibogi e dau wilika vei keirau o Nana na italanoa mai na ivola From Paradise Lost to Paradise Regained.a Na ivalavala ni nona vakamacalataka, e vukei keirau me keirau taleitaka na kakana vakayalo.”

Taleitaka na Tiko ena Soqoni

E dredre vei ira e so na itabagone mera taleitaka na lako ina soqoni vakarisito. Era lako ga ni kauti ira na nodra itubutubu. Ia, ke ra lako tiko ga, yaco na gauna era na rairai taleitaka kina na tiko ena soqoni. Dikeva mada na ivakaraitaki i Alfredo, a tekivu cakacaka vakaitalatala vakatabakidua ni se qai yabaki 11. E tukuna ni gauna se qai yabaki lima kina, e dau nona iulubale me calata kina na soqoni oya ni dau lai via moce tiko. Ia erau a sega ni vakalaivi koya na nona itubutubu me moce ena gauna ni soqoni. A nanuma lesu: “Niu qase cake mai, sa tekivu meu taleitaka cake tiko na soqoni, vakauasivi sara na gauna au sa kila kina na volavola kei na wilivola baleta au sa tekivu saumitaro ena noqu vosa ga.”

O Cintia, e dua na goneyalewa yabaki 17 e veiqaravi tiko vakapainia tudei, a vakamacalataka ni a vukei koya vakalevu na veimaliwai vinaka, e buli koya cake me taleitaka kina na nona veiqaravi vua na Kalou. A kaya: “Noqu veimaliwai vinaka kei ira na mataveitacini vaka kina na noqu tiko wasoma ena soqoni, au sega ni calati ira kina na itokani vakavuravura kei na ka ni veivakamarautaki era lasama vakalevu na itabagone, me vaka na lai danisi. Noqu dau rogoca na ivakamacala kei na vakasavuirogorogo e cauraki mai ena soqoni, e uqeti au kina meu solia vei Jiova na ka kece au taukena. Au kila ni ka vinaka duadua au rawa ni solia vua oya na noqu bula vakaitabagone. Au mani vakatulewataka meu vakayagataka oya ena noqu qaravi koya.”

Ia, a kaya o Cintia: “E liu ni bera na noqu papitaiso, e dau rawarawa vei au meu calata na soqoni, niu vakaiulubaletaka ni tiko na noqu lesoni mai koronivuli se so tale na cakacaka ni vuli. Au calata e levu na soqoni, mani leqa kina noqu bula vakayalo. Au lai veitokani sara tu kei na dua na cauravou e sega ni vulica na iVolatabu. Ia, au vakavinavinaka ga vei Jiova, ni a vukei au meu vakadodonutaka na noqu sala.”

Vakatulewa Yadudua

Ni tarogi vei Pablo, e dua tale na itabagone e veiqaravi tiko vakatabakidua vei Jiova, na tikina bibi cava e dikeva e rawa ni bucini kina na taleitaki ni ka dina mai na Vosa ni Kalou, a kaya: “E rua na ka au vakabauta e vauci kina: me wasoma na noda vuli vakataki keda kei na noda gumatuataka na cakacaka vakavunau. Au vakavinavinakataki rau na noqu itubutubu ena nodrau a vakavulici au ena ka dina me baleti Jiova, au kila ni qo na ka totoka duadua erau rawa ni solia vei au. Ia, ena gadrevi meu vakadeitaka vakataki au na vuna au lomani Jiova kina. Me rawa oya, ena gadrevi meu kila ‘na kena raraba kei na kena titobu’ ni ka dina mai na iVolatabu. Ena sala oqo eda vakila kina nida gadreva na Vosa i Jiova, e vaka tiko ‘na bukawaqa’ e lomada meda tukuna vei ira na tani. Na noda gumatuataka na cakacaka vakavunau vaka oya, ena vukea me vakabulabulataka tiko ga na noda taleitaka na ka dina.”​—Efeso 3:​18; Jeremaia 20:9.

A nanuma tale ga o Jacob Emmanuel, a cavuti taumada ena ulutaga oqo, na bibi ni noda vakatulewataka yadudua na qaravi Jiova. A kaya ni rau a sega vakadua ni vakasaurarataki koya na nona itubutubu me papitaiso. “Au vakabauta ni yaga sara ga oqo baleta au raica kina na kena vinaka. Me kena ivakaraitaki, era vakatulewataka e so na itabagone au dau vakailala vata vakalevu mera papitaiso vata. E dua na ka vinaka oya, ia au raica ni so era cakava ga ena veimurimuri, qai katakata vakurokava na nodra gumatuataka na kena vakayacori na cakacaka ni Matanitu ni Kalou. Ia, o yau, rau a sega ni vakasaurarataka na noqu itubutubu meu yalataki au vei Jiova. E noqu vakatulewa sara ga.”

iTavi ni iVavakoso

So na itabagone era a vulica vakataki ira ga na ka dina mai na Vosa ni Kalou, a sega ni vukei ira kina na nodra itubutubu. Ena ituvaki vaka oqo, e sega gona ni ka rawarawa me vulici na ka e dodonu me caka qai sagai me muri tiko ga.

A nanuma lesu o Noé na kena yaga vua na ka dina. Ni se gonetagane lailai sara, e dau cudrucudru qai dau voravora nona itovo. A tekivu vuli iVolatabu ni se qai yabaki 14, sa qai sega soti kina ni cudrucudru. Dina ga ni rau se sega kina ni taleitaka na nona itubutubu na veika vakaivolatabu, ia rau a marautaka dina na nona veisau. Nona toso vakayalo o Noé, a vinakata me vakayagataka vinaka na nona bula ena veiqaravi vua na Kalou. Ena gauna oqo e sa cakacaka tiko vakaitalatala vakatabakidua.

E vaka tale ga kina o Alejandro, a tekivu taleitaka na ka dina vakarisito ena gauna se gonetagane lailai kina, dina ga ni rau a sega ni taleitaka na nona itubutubu. A kaya ena nona vakavinavinakataka tiko na ka dina: “Au a susu mai na dua na vuvale e lotu Katolika kaukaua. A sega ni sauma rawa na lotu na veika au dau lomatarotarotaka tu niu se lailai, mani tubu kina na noqu galeleta na ivakavuvuli vakominisi ni sega ni bula na Kalou. E qai vukei au na isoqosoqo i Jiova meu rawata na kilaka me baleta na Kalou. E vakabulai au dina, baleta keu a sega ni vulica na iVolatabu, au na rairai coko beka ina itovo vakasisila, bobula ena gunu, se vakayagataki ni wainimate gaga. Au rawa sara mada ga ni lai lewena tu e so na ilawalawa dauveitusaqati, e sotavi kina na ituvaki rarawataki.”

E rawa vakacava vua e dua na itabagone me qara vagumatua na ka dina qai kabita dei, ke rau sega ni veitokoni kina na nona itubutubu? E matata vinaka, nira veitokoni kina na qase kei ira na lewe ni ivavakoso. A nanuma lesu kina o Noé: “Au sega ni bau galili vakadua, ni o Jiova e dau voleka sara ga vei au. Kuria, era tokoni au e levu na tacida dau loloma era vaka na tamaqu, tinaqu, kei na taciqu vakayalo.” Ena gauna oqo e sa veiqaravi tiko o koya e Peceli qai vakayagataka tiko na nona gauna ena veiqaravi vua na Kalou. E vaka tale ga kina na ka a nanuma lesu o Alejandro: “Dua na ka au vakavinavinakataka vakalevu, oya na yaga ni noqu mai lewena e dua na ivavakoso era dau kauaitaki au dina na kena ilawalawa qase. Au vakavinavinakataka sara ga baleta ena noqu tekivu vuli iVolatabu niu se qai yabaki 16, au sotava tale ga na bula veilecayaki era dau sotava vakalevu na itabagone. Era sega vakadua ni guilecavi au na veivuvale ena ivavakoso. Ena tiko ga e dua ena kauaitaki au qai sega wale ga ni wasea vei au na nona vale kei na kakana, ia ena wasea tale ga na lomana.” E sa sivia oqo e 13 na yabaki na nona veiqaravi voli mai vakatabakidua o Alejandro.

So era nanuma ni lotu e nodra ga na itaba qase. Ia, era sa vulica e levu na itabagone na ka dina mai na iVolatabu nira se gonelailai sara, era lomani Jiova ra qai yalodina tiko ga vua. E rawa ni cavuti vei ira na itabagone oqo na malanivosa i Tevita e volatukutukutaki ena Same 110:3: “O ira na nomuni tamata era na via vakacabori ira mei madrali e nai ukuuku ni yalosavasava e na siga ni nomuni kaukauwa; era na lewe vuqa na nomuni cauravou ka lailai na mata ni tegu mai na kete ni mataka.”

E ka ni bolebole vei ira na itabagone mera vulica na ka dina ra qai kabi dei kina. Ia e ka marautaki nira kabita voleka na isoqosoqo i Jiova e levu, tiko wasoma ena soqoni, ra qai vulica vagumatua na iVolatabu. Nodra cakava oqo, era bucina kina na nodra taleitaka dina na Vosa ni Kalou kei na nona cakacaka!​—Same 119:​15, 16.

[iVakamacala e ra]