“Ni Yadra Tiko!”

“Na ka au sa kaya vei kemudou, au sa kaya vei ira na tamata kece ga, ‘Ni yadra tiko!’”​—Marika 13:​37, VV.

1, 2. (a) Na cava a qai kila e dua na tagane me baleta na taqomaki ni nona iyau? (b) Na cava eda vulica mai na vosa vakatautauvata i Jisu me baleta na daubutako?

DAU maroroya e vale o Juan na nona iyau vakamareqeti. E biuta ena ruku ni nona idavodavo​​—⁠e nanuma ni oya e vanua vinaka duadua. Ia dua na bogi, ni rau moce toka vakaveiwatini, e yaqa lo yani e dua na daubutako. Kena irairai ni kila vinaka na vanua me vaqaqara kina. E taura na ka kece a biu tu e ruku ni loga kei na ilavo a biuta tu o Juan ena droa volekata nodrau imocemoce. Qai kilai na butako ena mataka a dua. Ena sega vakadua ni guilecava o Juan na tikina oqo: Na tamata e moce tu ena sega ni taqomaka rawa na nona iyau.

² Vakayalo, e dina tale ga oqori. Eda na sega ni taqomaka rawa na noda inuinui kei na vakabauta nida moce. E kaya kina o Paula: “Me da sa kakua gona kina ni moce tiko me vakataki ira na tani; ia me da yadra tiko ga ka yalo matua.” (1 Cesalonaika 5:​6, VV) A cavuta o Jisu na ivakatautauvata me baleta na daubutako me vakabibitaka na yaga ni yadrayadravaki. E vakamacalataka na veika ena yaco taumada ni se bera ni tadu ena nona itutu vakaturaganilewa, qai tauca na ivakasala oqo: “O koya gona mo dou yadra tiko, ni dou sega ni kila na gauna e na yaco mai kina na nomudou Turaga. Ia mo dou kila oqo: kevaka sa kila tiko na i taukei ni vale na gauna e na lako mai kina na daubutako, e na yadra tiko ka na sega ni laiva tu ga na nona vale me mai basu. O koya gona mo dou tu vakarau tale ga, ni na yaco mai na Luve ni Tamata e na dua na gauna dou sega ni namaka.” (Maciu 24:​42-​44, VV) Ena sega ni vakarogotaka e liu na daubutako na siga ena butako kina. Ena lako yani ena gauna e sega ni namaki. E vaka tale ga kina na icavacava ni vuravura makawa oqo, ni a kaya o Jisu ni na yaco ‘ena dua na gauna eda sega ni namaka.’

“Ni Yadra Tiko, Ni Tudei e na Vakabauta, Ni Kaukauwa ka Qaqa”

3. E vakaraitaka vakacava o Jisu na bibi ni yadrayadravaki ena nona vosa vakatautauvata me baleti ira na dauveiqaravi era waraka na suka yani ni nodra turaga mai na soqo ni vakamau?

³ Ena vosa vakatautauvata i Jisu ena Kosipeli i Luke, era vakatauvatani kina na lotu Vakarisito nira vaka na tamata dauveiqaravi era waraka tiko nodra turaga a lako tu ena soqo ni vakamau. E bibi mera kua ni sosovu, mera yadra tiko mera kidavaki koya ni sa tadu yani. Ena vakasama vata ga oqori, a kaya kina o Jisu: “[E]na yaco mai na Luve ni Tamata e na dua na gauna ko dou sega ni namaka.” (Luke 12:​40, VV) E so sa vicasagavulu na yabaki nodra qaravi Jiova sa vaka mera weletaka nodra sokalou ena gauna bibi eda sa donuya tu oqo. Rawa ni votu sara na vakasama ni se yawa tale na icavacava. Ia na rai vaka oya e rawa ni vakacalai keda meda guta kina na veika vakayago qai kena itinitini na sosovu vakayalo.​​—⁠Luke 8:​14; 21:​34, 35.

4. Na noda vakadinata na cava ena vukei keda meda yadra tiko ga, ia e kauta cake mai vakacava o Jisu na tikina oqo?

⁴ Dua tale na ka eda vulica mai na vosa vakatautauvata i Jisu. Dina nira sega ni kila na dauveiqaravi na gauna ena tadu kina nodra turaga, ia e kena irairai nira kila na kena bogi. Ena dredre mera saga mera yadra tiko ena dua na bogi taucoko ke ra nanuma ni na tadu nodra turaga ena dua tani tale na bogi. Ia era kila na bogi e lako tiko yani kina o koya, ra qai saga mera kua ni moce. E matata tale ga ena parofisai vakaivolatabu nida sa bula tiko ena iotioti ni veisiga; ia e sega ni macala na siga se aua sara ga ena yaco kina na icavacava. (Maciu 24:36) Eda vakatawa tiko baleta nida vakabauta ni sa voleka na icavacava, ia na ka e sa na qai vakayadrati keda ga vakalevu na noda vakadinata mai vu ni yaloda ni sa voleka sara ga na siga i Jiova.​​—⁠Sefanaia 1:​14.

5. Eda na ciqoma vakacava na veivakadreti i Paula meda “yadra tiko”?

⁵ A vakadreti ira mai Korinica o Paula: “Ni yadra tiko, ni tudei e na vakabauta, ni kaukauwa ka qaqa.” (1 Korinica 16:​13, VV) Io, o koya e yadra tiko ena tudei tale ga ena nona vakabauta vakarisito. Eda na yadra tiko ga vakacava? Mai na noda vakatitobutaka na noda kila na Vosa ni Kalou. (2 Timoci 3:​14, 15) Ena vaqaqacotaki noda vakabauta ke da dau vuli vakataki keda da qai lakova e veigauna na soqoni qai dua na tiki bibi ni noda vakabauta na kena vakasamataki e veigauna na siga i Jiova. Na noda taleva wasoma na ivakadinadina vakaivolatabu e dusia nida sa volekata na icavacava ni ituvaki oqo ena vukei keda meda nanuma matua tiko ga na yavu bibi e so me baleta na icavacava sa roro tiko mai oqori.a E yaga tale ga meda vakaraica na veika lelevu e tarai vuravura e salavata kei na parofisai ni iVolatabu. A vola e dua na tacida mai Jamani: “Veigauna kece au sarava ena retioyaloyalo na ivalu, itovo voravora, kei na kena benuci noda vuravura, sa vaka me qai voleka ga mai na icavacava.”

6. Na ivakatautauvata cava i Jisu e dusia ni rawarawa na sosovu vakayalo ena toso ni gauna?

⁶ Eda kunea ena Marika wase 13 e dua tale na veivakadreti i Jisu vei ira nona imuri mera yadra tiko. E vakatautauvatataka o Jisu na kedra ituvaki vei koya na ivakatawa ni katuba e waraka nona turaga me lesu yani ni a gole tu i vanuatani. A sega ni kila na ivakatawa ni katuba na gauna ena tadu kina nona turaga. Me sa na yadra tiko ga. Va na duidui gauna e cavuta o Jisu e rawa ni tadu kina na turaga. Na ikava ni gauna ni yadra e tekivu ena tolu na kaloko ena matakalailai me yacova ni sa cabe na matanisiga. Rawarawa sara vei koya na ivakatawa ni katuba me sosovu ena iotioti ni gauna ni yadra oya. E tukuni ni dau gauna vinaka vei ira na sotia mera vakidacalataki ira na kedra meca na matakacaca ni se bera ni kacabote na rarama. E vaka tale ga kina nikua, na kena sa voleka na icavacava qai moce lutu tu vakayalo o vuravura, e kena irairai ni oqo e gauna dredre duadua meda yadra tiko ga kina. (Roma 13:​11, 12) O koya gona, e uqeti keda vakavica o Jisu ena nona vosa vakatautauvata: “Qarauni kemudou vinaka, dou yadra tiko . . . O koya gona mo dou yadra tiko . . . Na ka au sa kaya vei kemudou, au sa kaya vei ira na tamata kece ga, ‘Ni yadra tiko!’”​​—⁠Marika 13:​32-​37, VV.

7. E rerevaki dina ke yacovi keda na cava, ia ni rivarivabitaki oqori, na cava eda dau vakauqeti kina e veigauna ena iVolatabu?

⁷ Levu na gauna, a vakabibitaka o Jisu ena nona cakacaka vakaitalatala vaka kina ni sa vakaturi mai na mate na yaga ni yadrayadravaki. Io, voleka ni gauna kece ga e vakamacalataki ena iVolatabu na icavacava ni vuravura makawa oqo, ena kunei na ivakasala meda yadra tiko ga se vakatawa.b (Luke 12:​38, 40; Vakatakila 3:2; 16:​14-​16) Matata e ke ni rerevaki dina na sosovu vakayalo. Sa yaga dina meda vakadreti!​​—⁠1 Korinica 10:12; 1 Cesalonaika 5:​2, 6.

Tolu na Yapositolo Eratou Sega ni Yadra Tiko Ga

8. Ni sa kerei ratou na nona yapositolo o Jisu me ratou yadra tiko ena were o Kecisemani, na cava eratou qai cakava?

⁸ So na gauna eda dau via yadra tiko ga, ia eda tini sosovu tale me vaka eda na raica ena ivakaraitaki i Pita, Jemesa, kei Joni. Eratou tagane matua vakayalo oqo, eratou imuri yalodina i Jisu ratou qai lomani koya vakalevu. Ia eratou sega ni yadra tiko ga ena bogi ni 14 Naisani, 33 S.K. Ni ratou sa vakananuma oti na Lakosivia, eratou biuta na tabavale e cake ratou qai muri Jisu ina were o Kecisemani. A kaya e kea o Jisu vei iratou: “Sa rui rarawa vakalevu na yaloqu, me vaka au sa na mate; dou toka e ke, ka me datou yadra vata tiko.” (Maciu 26:​38, VV) A masu vakatolu vua na Tamana vakalomalagi o Jisu, qai vakatolu nona kunea ni ratou moce lutu tu nona itokani ni sa suka yani.​​—⁠Maciu 26:​40, 43, 45.

9. Na cava beka e vu ni nodratou sosovu na yapositolo?

⁹ Na cava eratou sega ni muria rawa kina na tagane yalodina oqo na kerekere i Jisu ena bogi oya? Dua oqo ni ratou sa rui oca. Sa bogilevu, kena irairai ni sa sivi na bogilevu tutu qai “bibi ga na matadratou.” (Maciu 26:​43, VV) Ia a kaya o Jisu: “Dou yadra tiko ka masu, mo dou kakua kina ni tacori e na vere; sa gu tiko na yalo, ia sa malumalumu ga na yago.”​​—⁠Maciu 26:​41, VV.

10, 11. (a) E dina ni oca, na cava e vukei Jisu me yadra tiko ga ena were o Kecisemani? (b) Na cava eda vulica mai na veika e yacovi iratou na tolu na yapositolo ni sa kerei iratou o Jisu me ratou yadra tiko?

¹⁰ Sega ni vakatitiqataki ni a oca tale ga o Jisu ena bogi vakairogorogo oya. Ia na gauna lekaleka a galala voli kina a sega ni bau vakayagataka me gauna ni nona moce, e masu ga kina vagumatua. Vica wale ga na siga yani e liu, a uqeti ira nona imuri mera masu ena nona kaya: “O koya oqo mo dou qai yadra tiko ga kina, ka masu me soli vei kemudou na kaukauwa mo dou kakua ni rawai e na veika oqo, ka mo dou na tu sara e na mata ni Luve ni Tamata.” (Luke 21:​36, VV; Efeso 6:​18) Ke da muria na ivakasala kei na ivakaraitaki i Jisu ena ka me baleta na masu, ena qai vukei keda meda yadra tiko ga vakayalo na noda masu mai vu ni yaloda vei Jiova.

¹¹ Me yacova mai na gauna oya, sa kila tiko o Jisu na ka era sega ni kila nona tisaipeli​​—⁠sa voleka ni vesu qai lewai me vakamatei. Na veika dredre e sotava ena qai tini sara ena nona mate mosimosi ena kaunirarawa. Sa tukuna oti na veika oqo o Jisu vei iratou nona yapositolo, ia eratou lecava na kena ibalebale. O koya gona, eratou moce lutu ena gauna a yadra tiko kina o koya qai masu voli. (Marika 14:​27-​31; Luke 22:​15-​18) Me vakataki iratou ga na yapositolo, e malumalumu tale ga na yagoda qai tiko na veika eda se sega ni kila ena gauna oqo. Ia, kevaka eda sega ni raica vakabibi na gauna eda sa bula donuya oqo, ena rawarawa sara nida moce vakayalo. Eda na yadra tiko ga vakayalo kevaka e yadra tiko noda vakasama.

Tolu na Ka Bibi

12. Na cava na tolu na ka e kauta cake mai o Paula e yaga ena noda yadra tiko ga vakayalo?

¹² Cava meda cakava meda yadra tiko ga kina vakayalo? Eda sa raica oti mai na bibi ni masu kei na bibi ni kena nanumi matua na siga i Jiova. Ia e tolu tale na ka bibi e cavuta o Paula meda teivaka. E kaya: “Ia koi keda, eda sa gone ni siga, me da yalomatua, me da vauca na vakabauta kei na loloma mei sasabai ni lomasereda: kei na vakanuinuitaka na bula, mei vakaruru ni uluda.” (1 Cesalonaika 5:⁠8) Meda raica mada vakalekaleka na yaga ni vakabauta, inuinui, kei na loloma ena noda yadra tiko ga vakayalo.

13. E yaga vakacava na vakabauta ena noda yadra tiko ga?

¹³ Dodonu meda vakabauta deivaki ni bula tiko o Jiova qai dau “saumi ira talega era sa dauvakasaqarai koya.” (Iperiu 11:⁠6) Nida raica lesu na yaco ni parofisai i Jisu me baleta na icavacava ena imatai ni senitiuri, eda na qai vakabauta deivaki ga na kena vakayacori oqori ena ivakatagedegede levu cake ena noda gauna. Ena vuku tale ga ni noda vakabauta, eda nanamaki vakalevu ina siga i Jiova da qai sega ni vakatitiqataka ni na “yaco vakaidina ga” na raivotu vakaparofisai, “ena sega ni berabera sara.”​​—⁠Apakuki 2:⁠3.

14. E yaga vakacava na inuinui meda yadra tiko kina?

¹⁴ Na noda vakanuinui dei e vaka na ‘ikelekele ni yaloda,’ eda vosota rawa kina na veika dredre nida waraka voli me vakayacori na veika e yalataka na Kalou. (Iperiu 6:​18, 19) E kaya oqo o Makereta, e dua na lumuti, sa yabaki 90 vakacaca qai papitaiso ena sivia na 70 na yabaki sa oti: “Ni sa voleka ni mate o watiqu ena 1963 ena vuku ni kenisa, au nanuma sara ni na totoka dina ke yaco totolo na icavacava. Ia au sa qai kila oqo niu a nanumi au tiko ga. Sega sara ga ni tadrai ena gauna oya na levu ni vanua e vuravura e sa na tete kina na cakacaka. Ena gauna mada ga oqo, e se levu ga na vanua e se qai tatadoladola tiko me ia kina na cakacaka. O koya gona, au marau dina ni yalovosovoso voli mai o Jiova.” E kaya kina vei keda o Paula: “Na dauvosota sa vakavuna me da vakadeitaki kina mai vua na Kalou, ia na noda vakadeitaki sa tara cake na noda i nuinui. Na i nuinui oqo e na sega ni vakamaduataki keda.”​​—⁠Roma 5:​3-5, VV.

15. Ena uqeti keda vakacava na loloma kevaka mada ga sa vaka me dede na noda wawa voli?

¹⁵ Na itovo uasivi na loloma vakarisito baleta ni yavu ni ka kece ga eda cakava. Eda qaravi Jiova nida lomani koya se mani berabera vakacava nona gauna. Eda vunautaka na itukutuku vinaka ni Matanitu vei ira na tamata kece ga nida lomani ira, se mani vakacava na dede ni nona vinakata vei keda o Jiova meda cakava oqori, se vakacava na levu ni noda lesu ina veivale vata ga eda sa vunau oti kina. Me vaka ga a vola o Paula: “Ia oqo, sa tu na vakabauta, nai nuinui, na loloma, a ka tolutolu oqo; a sa uasivi cake vei iratou na loloma.” (1 Korinica 13:13) Na loloma ga e tosoi keda tiko qai vukei keda meda yadra tiko ga. “Sa vakabauta na ka kecega [na loloma], sa vakanuinuitaka na ka kecega, sa vosota na ka kecega. Sa sega ni mudu na loloma.”​​—⁠1 Korinica 13:​7, 8.

“Taura Matua na Ka sa Tu Vei Iko”

16. Na rai cava me tu vei keda meda kua kina ni vakasavuliga?

¹⁶ Eda bula tu ena gauna vakairogorogo. Na veika e yaco e vuravura e dusia nida sa volekata sara na icavacava. (2 Timoci 3:​1-5) Sega ni qai kena gauna oqo meda vakasavuliga, ia meda ‘taura matua ga na ka sa tu vei keda.’ (Vakatakila 3:​11) Mai na noda “dauyadrava na masumasu” kei na noda teivaka na vakabauta, inuinui, kei na loloma, eda sa na vakarautaki keda vinaka kina ina gauna ni veivakatovolei. (1 Pita 4:⁠7) E levu tu na ka meda vakayacora ena cakacaka ni Turaga. Eda na yadra tiko ga ke da vakaogai keda e veigauna ena noda sokalou.​​—⁠2 Pita 3:​11.

17. (a) Na cava me kua kina ni vakayalolailaitaki keda ni sega ni yaco e so na ka eda dau namaka? (Raica na kato ena tabana e 21.) (b) Eda na vakatotomuri Jiova vakacava, ia era na vakalougatataki vakacava o ira era cakava oqori?

¹⁷ “Sa noqui votavota ko Jiova,” e vola o Jeremaia, “o koya oqo ka’u na nuitaki koya kina. Sa yalovinaka ko Jiova vei ira era sa waraki koya, io ki na yalo sa qarai koya. Sa kilikili kaya na tamata me nuitaka, ka me waraka vakayalomalua talega na veivakabulai maivei Jiova.” (Lele i Jeremaia 3:​24-​26) E so vei keda e se sega ni dede na nodra wawa. E so tale sa vica vata na yabaki na nodra waraka voli na veivakabulai i Jiova. Ia nida vakatauvatana na gauna tawavakaiyalayala sa tu oqo e matada kei na gauna meda wawa tiko kina ena gauna oqo, e lekaleka sara na wawa oqori! (2 Korinica 4:​16-​18) Nida waraka tiko na gauna lokuci i Jiova, meda teivaka mada ga na itovo yaga vakarisito da qai vukea e so tale mera ciqoma na loloma i Jiova kei na ka dina. Meda yadra tiko mada ga. Meda vakatotomuri Jiova da qai wawa ga, meda vakavinavinakataka na inuinui e vakarautaka. Ia nida yadra tiko ena yalodina, meda taura matua mada ga na inuinui ni bula tawamudu. Ke da cakava oqori, ena qai dina vei keda na vosa ni yalayala vakaparofisai oqo: “Ena qai laveti iko cake [o Jiova] mo taukena na vanua: ni ra sa muduki tani na tamata ca, ko na raica.”​​—⁠Same 37:⁠34.

[iVakamacala e ra]

O Sauma Vakacava?

• Cava meda cakava meda qai nuidei ga kina vakalevu ni sa voleka na icavacava ni ituvaki makawa oqo?

• Na cava eda vulica rawa mai na ivakaraitaki i Pita, Jemesa, kei Joni?

• Na cava na tolu na ka ena vukei keda meda yadra tiko ga vakayalo?

• Na cava sa kena gauna kina oqo meda ‘taura matua na ka sa tu vei keda’?

[Kato/iYaloyalo ena tabana e 21]

“Sa Kalougata ko Koya sa Waraka.”​—Taniela 12:⁠12

Kaya mada ni kilakasami e dua na yadra ni na caka na butako ena vanua e yadra tiko kina. Ni sa buto, ena vakarorogo vinaka me rogoca e dua na tavasa. Dua na gauna balavu ena cakava tiko oqori. Sega ni dredre meda raica ni rawarawa ni vakacalai koya e dua ga na rorogo​​—⁠na liwa ni cagi ena tabanikau se qera ni dua na ka e vakavuna na pusi.​​—⁠Luke 12:​39, 40.

Na ka vata tale ga oqori e rawa ni yacovi ira era “waraka na kena vakarairaitaki ni noda Turaga ko Jisu Karisito.” (1 Korinica 1:⁠7) Eratou nanuma na yapositolo ni na “vakayacori ira na Isireli me ra matanitu tale” o Jisu ni oti ga nona vakaturi mai na mate. (Cakacaka 1:⁠6) Vica tale na yabaki e muri, e gadrevi mera vakadreti na lotu Vakarisito mai Cesalonaika ni se yawa sara na gauna me na tiko tawarairai kina o Jisu. (2 Cesalonaika 2:​3, 8) Ia na kena sega ni yaco na veika era namaka na imuri taumada i Jisu me baleta na siga i Jiova a sega ni vakayalolailaitaki ira mera biuta kina na sala sa basika ina bula.​​—⁠Maciu 7:​13.

Ena noda gauna oqo, me kua ni vakayalolailaitaki keda na noda raica ni vaka me berabera tiko ga mai na icavacava ni ituvaki makawa eda bula donuya tu oqo. E rawa ni dau cala na nona nanuma o koya na yadra e vakatawa tiko, ia e vinaka me yadra tiko ga! E nona cakacaka oya. Sega ni duidui oqori vei keda na lotu Vakarisito.

[iYaloyalo ena tabana e 18]

O vakadeitaka e lomamu ni sa voleka dina na siga i Jiova?

[iYaloyalo ena tabana e 19]

E vukei keda meda yadra tiko ga na soqoni, masu, kei na dau vuli vakataki keda

[iYaloyalo ena tabana e 22]

Me vakataki Makereta, meda yadra tiko ga ena yalomalua da qai kua ni vakasavuliga