iTabagone Era Vakamarautaki Jiova

Na ulutaga oqo kei koya e tarava e vakarautaki vakatabakidua vei ira na itabagone iVakadinadina i Jiova. Oni uqeti kina ra itabagone mo ni vulica vakavinaka sara ni qai vakamacala vakalevu ni vulici na ulutaga e rua oqo ena Vuli Vale ni Vakatawa ena ivavakoso.

“Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.”​—VOSA VAKAIBALEBALE 27:11.

1, 2. (a) Ke o dau malele ena so na gauna ena veika ni vuravura, e kena ibalebale beka ni sega ni veiganiti mo lotu Vakarisito? (Roma 7:​21) (b) Na cava o vulica ena ivakaraitaki i Esafa? (Raica na kato, ena tabana e 13.)

KAYA mada ke o via volia e dua na nomu isulu. Ni o vaqaqara tiko, e dreta sara na matamu e dua na isulu. O kauaitaka na rokana kei na kena iculacula qai kena ikuri ni sau vinaka. Ia, ni bera ni o volia o na digova mada vakavoleka. O sa qai raica ni mamare na isulu qai tasere tu na kena wa. E dina beka ni rairai vinaka, ia e sega ni isulu vinaka qai cula vakaca. O na vakalusia beka nomu ilavo ena isulu ca vaka oya?

² Vakatauvatana oqo kei na ituvaki o na rairai sotava ni o itabagone lotu Vakarisito. Ni o dikeva ena imatai ni gauna na veika ni vuravura​—me vaka na isulu oya​—ena rairai dreta na matamu. Kena ivakaraitaki, era na lako beka ena soqo ni marau nomu icaba e koronivuli, era tauri wainimate gaga, ra gunu, veibuku, ra qai veiyacovi vakaveitalia. O dau malele beka ena so na gauna ena ivakarau ni bula vaka oqo? O dau diva mo tovolea ga vakalailai na ka era vakatoka me nodra galala? Ke vaka kina, kua ni kaya sara ni o ca qai sega ni veiganiti mo lotu Vakarisito. Nanuma tiko, ni kaya na iVolatabu ni rawa ni kaukaua sara na idre ni vuravura​—vei koya mada ga e via vakamarautaka na Kalou.​—2 Timoci 4:​10.

3. (a) Na cava e tawayaga kina na qarai ni veika vakavuravura? (b) E vakamacalataka vakacava e dua na lotu Vakarisito na ca ni guti ni bula vakavuravura?

³ E kerei mo digova vakavoleka na vuravura, me vaka ga nomu digova vakavoleka na isulu o a via volia. Taroga mada, ‘E vinaka beka na bula vakavuravura, se vaka ga na isulu mamare oya e tataseresere tu na kena wa?’ E kaya na iVolatabu: “Ko vuravura sa lako tani yani.” (1 Joni 2:​17) Ke mani kamikamica vakacava o vuravura, ena lekaleka ga nomu marautaka. Kena ikuri, ni na mosimosi sara na vua ni itovo tawavakalou. E sega sara ga ni dua na kena vinaka. E dua na lotu Vakarisito e sotava tu oqo na ka e vakatoka me “vua ni nona a vakamaumautaka na nona bula vakaitabagone” e kaya: “De na rairai vinaka qai veisiwati tu o vuravura. E vinakata tale ga o vuravura mo nanuma ni rawa ni o marau qai sega ni o sotava na kena rarawa. Ia e dravusakulukulu me qai dina oqori. Ena vakayagataki iko o vuravura, gauna e oti kina na kemu yaga, ena kolotaki iko tani.”a Na cava gona mo vakalusia kina nomu gauna ni itabagone ena ivakarau ni bula torosobu vaka oqo?

Maroroi “Mai na Vu-ni-ca”

4, 5. (a) Ni bera vakalailai ni mate o Jisu, na cava a kerea ena nona masu vei Jiova? (b) Na cava na vuna e veiganiti kina na kerekere oqo?

⁴ Na nodra kila na itabagone iVakadinadina i Jiova ni sega ni dua na ka vinaka e dulaka na ituvaki ni bula oqo, era sega kina ni via veivinakati kei vuravura. (Jemesa 4:4) O dua beka vei ira na itabagone yalodina oqo? Ke vaka kina, e dodonu mo vakacaucautaki. E sega ni rawarawa na vorati ni veimurimuri kei na nomu kilai ni o duatani, ia e tiko e dua e rawa ni vukei iko.

⁵ Ni bera vakalailai ni mate o Jisu, a masuta me “maroroi” ira nona tisaipeli o Jiova “mai na vu-ni-ca.” (Joni 17:15) A tiko na vuna vinaka a kerea kina oqo o Jisu. E kila ni na sega ni rawarawa vei ira nona imuri mera yalodina tiko ga, se mani vakacava na nodra yabaki ni bula. Na vuna? Dua, ni kila o Jisu nira na sota nona tisaipeli kei na meca kaukaua tawarairai​—“na vu-ni-ca,” o Setani na Tevoro. Na iVolatabu e kaya ni kabula vakayalo ca oqo e “veilakoyaki voli . . . me vaka na laioni sa tagi, a sa vakasaqara eso me tiloma.”​—1 Pita 5:8.

6. Eda kila vakacava ni sega ni lomani ira na itabagone o Setani?

⁶ Ena veitabagauna sa sivi, e marautaka o Setani me vakalolomataki ira vakaca sara na kawatamata. Dikeva mada na leqa levu a vakavuna o Setani vei Jope kei na nona vuvale. (Jope 1:​13-​19; 2:7) De dua o na rawa ni nanuma lesu e so na itukutuku ni veika lolovira e yaco e donui iko, e vakavotui kina na ca ni yalo i Setani. Ni veilakoyaki voli qai vakasaqaqara na Tevoro me tiloma e dua, e sega gona kina ni na lomani ira na itabagone. Ena itekivu mada ga ni imatai ni senitiuri S.K., me kena ivakaraitaki, a lewa o Eroti mera vakamatei kece na gonetagane e Peceliema era yabaki rua se lailai sobu. (Maciu 2:​16) E rairai vakauqeti Eroti o Setani me rawa kina ni vakamatei na gone ena qai yaco ena dua na siga me Mesaia yalataki ni Kalou, ena vakatauca tale ga na lewa ni Kalou vei Setani! (Vakatekivu 3:​15) Macala ni o Setani e sega ni lomani ira na itabagone. E nona inaki dei me tiloma na levu ga ni kawatamata e rawata. E dina taucoko oqo nikua, ni o Setani sa biu tani mai lomalagi, sa tiko oqo e vuravura, “sa cudru vakalevu, ni sa kila ko koya ena sega ni dede na nona gauna.”​—Vakatakila 12:​9, 12.

7. (a) E duatani vakacava o Jiova vei Setani? (b) E vakaraitaka vakacava o Jiova ni vinakata mo marautaka na bula?

⁷ E “cudru vakalevu” gona o Setani, ia e duatani sara o Jiova, ni Kalou ‘yalololoma.’ (Luke 1:​78, VV) E vatuka sara ga ni loloma. E laurai vua noda Dauveibuli na itovo qoroi oqo ni kaya na iVolatabu: “Sa loloma na Kalou.” (1 Joni 4:8) Sa dua na duidui levu e kune vua na kalou ni ivakarau ni veika ni gauna oqo kei na Kalou e nomu itavi dokai mo qarava! E saga o Setani me tilomi ira e so, ia o Jiova e “sega ni vinakata me rusa e dua.” (2 Pita 3:9) E vakamareqeta na bula ni tamata kece​—okati kina o iko. Ni uqeti iko gona o Jiova ena nona Vosa mo kua ni tiki kei vuravura, e sega ni kena ibalebale ni via muduka nomu marautaka na bula se tarova nomu galala. (Joni 15:19) Na kena dina, ni via maroroi iko mai na vunica. Na Tamamu vakalomalagi e vinakata mo taukena na ka e uasivia sara na marau lasu wale ni vuravura. E vinakata mo rawata “na bula dina”​—na bula tawamudu ena vuravura parataisi. (1 Timoci 6:​17-​19) O Jiova e vinakata mo tamata yaco, qai uqeti iko mo rawata na isausau oya. (1 Timoci 2:4) Kena ikuri, o Jiova e sureti iko tiko. Na veisureti cava beka oya?

“Vakamarautaka na Lomaqu”

8, 9. (a) Na iloloma cava o rawa ni solia vei Jiova? (b) E beitaki Jiova vakacava o Setani, me vaka e laurai ena ka a sotava o Jope?

⁸ O sa bau volia e dua na iloloma vua nomu itokani, o qai raica ni matadredredre qai vakavinavinakataka ni sa taura? Sega ni vakabekataki ni o a vakasamataka vinaka sara ga na mataqali iloloma ena ganiti koya. Ia dikeva mada na veitaro oqo: Na mataqali iloloma cava o rawa ni solia vua nomu Dauveibuli, na Kalou o Jiova? Ena rairai rogorogo lasa toka. Vakalevu ke da vakasamataka se cava e gadreva na Kalou Kaukaua Duadua vua na tamata wale? Na iloloma cava e rawa ni bau yaga vua? E sauma na iVolatabu ena Vosa Vakaibalebale 27:11: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.”

⁹ O sa na rairai kila mai na nomu vulica na iVolatabu ni o Setani e beitaki Jiova. E kaya ni o ira na qarava na Kalou, era sega ni veiqaravi ena loloma, ia ena kocokoco ga. Ke ra sotava na leqa, e kaya o Setani, ena totolo sara nodra biuta na sokalou dina. Me kena ivakaraitaki, dikeva na ka e kaya o Setani vei Jiova baleta na tamata yalododonu o Jope: “Ko ni sa sega beka ni viribaiti koya, kei na nona vale, kei na nona ka kece e na veiyasana kecega? ko ni sa vakalougatataka na cakacaka ni ligana, ka sa tubu kina me ka levu na nonai yau e na vanua. Ia mo dodoka mada na ligamuni, ka tara na nona ka kecega, ena qai vosavakacacataki kemuni ki matamuni.”​—Jope 1:​10, 11.

10. (a) Eda kila vakacava ni sega ni o Jope taudua a taroga o Setani na nona yalodina? (b) O vauci vakacava ena bolei ni veiliutaki cecere duadua?

¹⁰ Me vaka e tukuni ena iVolatabu, e sega ni o Jope taudua a taroga o Setani na nona yalodina, ia era vauci tale ga kina o ira kece era qarava na Kalou, okati kina o iko. Ni tukuna tiko vakararaba na kawatamata, e kaya vei Jiova o Setani: “Na nona ka kecega ena solia na tamata [sega ni o Jope wale ga] me bula kina.” (Jope 2:4) O sa qai raica nomu itavi ena bolebole oya? Me vaka e tukuni ena Vosa Vakaibalebale 27:​11, e kaya o Jiova ni rawa ni o solia vua e dua na ka​—na ivakadinadina me vakalasui kina na nona veibeitaki o Setani. Vakasamataka​—na Turaga Sau ni lomalagi kei vuravura e sureti iko mo vakaitavi ena saumi ni bolebole levu duadua. Sa dua dina na itavi cecere qai dokai! O rawa ni vakayacora na ka e kerei iko tiko kina o Jiova? A vakayacora o Jope. (Jope 2:​9, 10) Vaka kina o Jisu kei ira tale e so ena veigauna sa oti, era sega ni wili rawa, okati kina e levu na itabagone. (Filipai 2:8; Vakatakila 6:9) O rawa tale ga ni vakayacora. Ia mo kila deivaki tiko ni o na to ga ena dua vei rau na yasana, sega ena yasana ruarua. Na veika gona o vakayacora, o na vakaraitaka kina ni o tokona na veibeitaki i Setani, se o tokona nona vakalasui koya o Jiova. Na ito cava o na digitaka?

O Jiova e Nanumi Iko!

11, 12. Ke o digitaka mo qaravi Jiova se sega, e cakayaco beka vua oya? Vakamacalataka.

¹¹ E bibi beka vei Jiova na nomu digidigi? Sega beka ni sa veirauti vinaka na nodra yalodina e lewe levu me sauma lesu kina o Jiova na veibeitaki i Setani? Dina ni sa vakalasui na veibeitaki i Setani ena nona kaya ni tamata kece era sega ni qaravi Jiova ena loloma, ia o Jiova e se vinakata tiko ga mo to ena nona yasana ena ile me baleta na kena vakadinadinataki se o cei e dodonu me veiliutaki, baleta ni nanumi iko. E kaya o Jisu: ‘Na Tamaqu e tiko mai lomalagi, e sega ni vinakata me yali e dua vei ira na lalai oqo.’​—Maciu 18:14.

¹² Macala gona ni kauaitaka o Jiova na ito o digitaka. Koya e bibi sara, ni cakayaco vua. E vakamatatataka na iVolatabu ni o Jiova e dau kauaitaka dina na ka vinaka kei na ka ca era cakava na tamata. Me kena ivakaraitaki, nira talaidredre tiko ga na Isireli, e “vakacudrui” Jiova. (Same 78:​40, 41) Ni bera na Waluvu ena siga i Noa, ni sa “ka levu nai valavala ca ni tamata,” e ‘rarawa kina na loma’ i Jiova. (Vakatekivu 6:​5, 6) Vakasamataka mada na kena bibi. Ke o digitaka na veika cala, o rawa ni vakamosia na loma i nomu Dauveibuli. E sega ni kena ibalebale oqo ni malumalumu na Kalou, se sega ni lewa rawa na lomana. E kena ibalebale ga, ni lomani iko qai kauaitaka nomu bula. Ke o cakava gona na ka vinaka, ena marau o Jiova. Ni sa tiko tale e dua me to e yasana me saumi kina na veibeitaki i Setani, sa rawa tale ga ni saumi iko o koya. E vinakata dina na Kalou me vakayacora oqo. (Iperiu 11:6) Sa dua dina na Tama dau loloma na Kalou o Jiova!

Kalougata Levu ena Gauna Oqo

13. E kauta mai vakacava na veivakalougatataki ni qaravi o Jiova ena gauna oqo?

¹³ Ni qaravi o Jiova, na kena veivakalougatataki e sega ni baleta wale ga na gauna mai muri. Ena gauna sara ga oqo, era vakalougatataki ena marau kei na vakacegu e levu na itabagone iVakadinadina i Jiova. Sa rauta, ni vola na daunisame: “Sa dodonu nai lesilesi i Jiova, ka sa vakamarautaka na yalo.” (Same 19:8) O Jiova duadua ga e kila na veika e vinaka vei keda, sega ni dua tale. E vakayagataka na parofita o Aisea, o Jiova, me kaya: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova. De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.”​—Aisea 48:​17, 18.

14. Ena vukei iko vakacava na ivakavuvuli ena iVolatabu me levei kina na mosimosi ni dinau?

¹⁴ Na muri ni ivakavuvuli ena iVolatabu ena vakalailaitaka na mosi kei na lomararawa. Kena ivakaraitaki, na iVolatabu e kaya ni o ira kece era lomana na ilavo, “[e]ra sa cokai ira sara vakai ira e na yaluma vakavuqa.” (1 Timoci 6:​9, 10) Sa bau vakila e dua nomu icaba na dina ni tikinivolatabu oqo? E so na cauravou kei na goneyalewa era dinau vakasivia mera volia kina na isulu isau lelevu kei na iyaya vakalivaliva vovou. Sa dua na ka na kena tarabi na nomu na sauma lesu na veika o sega ni ceguva rawa, ena taura na gauna qai dau levu na kena tubu, sa rawa ni tukuni ni oqo e dua na iwalewale ni veivakabobulataki mosimosi!​—Vosa Vakaibalebale 22:​7, NW.

15. Ena sala cava e taqomaki iko kina na ivakavuvuli ena iVolatabu mai na rarawa e sotavi ena ivalavala dukadukali?

¹⁵ Dikeva tale mada ga na ka e vauca na ivalavala dukadukali. Ena veiyabaki e veiyasa i vuravura, e sega ni wili rawa na itabagone era bukete nira sega ni vakawati. E so era vakasucuma na gone era sega ni vinakata se ra sega ni susuga rawa. E so tale era nakita mera vakalutu qai mai vakacacana tu yani nodra lewaeloma. Sa qai tiko o ira na cauravou kei na goneyalewa e tauvi ira na mate e taka ena veiyacovi, me vaka na AIDS. O koya e kilai Jiova, na leqa levu duadua oya ni na vakacacani nona veiwekani kei Jiova.b (Kalatia 5:​19-​21) Oya na vuna e kaya kina na iVolatabu: “Kakua ni dau veibutakoci.”​—1 Korinica 6:​18, VV.

Qarava “na Kalou Mamarau”

16. (a) Eda kila vakacava ni o Jiova e vinakata mo marautaka nomu gauna ni itabagone? (b) Na cava e kotora kina o Jiova na idusidusi mo muria?

¹⁶ Na iVolatabu e tukuni Jiova me “Kalou mamarau.” (1 Timoci 1:​11, NW) E vinakata tale ga mo mamarau. E kaya nona Vosa: “Mo reki, ko iko na cauravou, ni ko sa cauravou tiko.” (Dauvunau 11:9) Ia, o Jiova e raiyawa, e rawa ni raica na veika o na sotava mai muri ena vinaka se ca ni nomu itovo. Oya na vuna e dusimaki iko kina: “Mo nanumi koya ka Buli iko ni ko sa cauravou tiko, ni sa bera ni yaco na veisiga ca, ka ni sa sega ni toro mai na veiyabaki, ko na kaya kina, Au sa sega ni vinakata na ka oqo.”​—Dauvunau 12:1.

17, 18. E vakamacalataka vakacava e dua na lotu Vakarisito gone nona mamarau ni qaravi Jiova? O na rawata vakacava na marau vata oya?

¹⁷ E levu na itabagone nikua era marautaka nodra qaravi Jiova. Me kena ivakaraitaki, e kaya o Lina sa yabaki 15: “E sega ni dua na ka meu madualaka se meu beci kina. Au bulabula vinaka niu sega ni kana tavako, au sega ni vakayagataka na wainimate gaga. Na veidusimaki au ciqoma ena ivavakoso e vukei au meu vorata na ibili kaukaua i Setani. Dau laurai sara ga e mataqu na noqu mamarau ena vuku ni veitaraicake ni veimaliwai ena Kingdom Hall. Kena e vinaka duadua, e sega ni dua na ka e uasivita, na noqu nuitaka na bula tawamudu e vuravura.”

¹⁸ Me vakataki Lina, e levu na itabagone lotu Vakarisito era vala vakaukaua ena vuku ni nodra vakabauta, e vakamarautaki ira tale ga. Dina nira vakila ena so na gauna na leqa kei na dredre, ia era kila ni vakainaki nodra bula ra qai vakanamata tu ina veisiga nimataka. Koya gona, qarava tiko ga na Kalou e kauaitaki iko. Vakamarautaka na lomana, ena qai vakamarautaki iko ena gauna oqo me yacova yani na gauna e sega ni mudu!​—Same 5:​11.

[iVakamacala e ra]

O se Nanuma Tiko?

• E rawa ni vakaleqa vakacava “na vu-ni-ca,” o Setani, na nomu bula?

• O na vakamarautaka vakacava na loma i Jiova?

• E vakaraitaka vakacava na iVolatabu ni kauaitaki iko o Jiova?

• Ni o qaravi Jiova, na cava soti na kena veivakalougatataki?

[Kato/iYaloyalo ena tabana e 13]

Voleka ni Tarabe e Dua na Turaga Yalododonu

O Esafa na Livai, e daunivakatagi kilai ena vale i Jiova e Isireli makawa. Ni a bulia sara ga e so na sere e dau lagati ena sokalou. Dina ni dokai na itavi e qarava, toso na gauna, sa lai malele o Esafa ena nodra itovo tawavakalou nona itokani, era voroka na Lawa ni Kalou ia e kena irairai nira sega ni sotava na ka ca. E muri sa qai tusanaka o Esafa: “Sa voleka ni lako sese na yavaqu; sa voleka ni tidara na noqui lakolako. Ni’u a vuvutaki ira na lialia, ni’u a raica na nodra tiko vinaka na tamata caka ca.”​—Same 73:​2, 3.

Mani lako o Esafa ena vale tabu ni Kalou qai masulaka nona leqa. Ni sa makare tale nona rai vakayalo, e raica rawa ni o Jiova e cata na ca, era na qai tauca ga ena kena gauna na tamata ca kei na tamata yalododonu na ka era dui kaburaka. (Same 73:​17-​20; Kalatia 6:​7, 8) Era tiko dina ena sala titidara na tamata ca. Ke mani sega ni sauti ira totolo na nodra ivalavala, era na vakarusai dina ni sa na vakarusa o Jiova na ituvaki oqo e sega ni vakalou.​—Vakatakila 21:8.

[iYaloyalo ena tabana e 15]

O Jiova e kauaitaki iko, ia o Setani e saga me tilomi iko

[iYaloyalo ena tabana e 16]

Levu na itabagone era marau vakalevu nira qaravi Jiova vata kei ira na nodra itokani vaKarisito