Sala e Saumi Kina na Nodra Taro

E LEVU era dau masu, qai so era vakadeitaka ni na saumi na nodra masu. So tale era veinanuyaka se dau rogoci na nodra masu se sega. E so era qara na isau ni nodra taro, ia e sega ni bau lako mai nodra vakasama mera masulaka vua na Kalou.

Na iVolatabu e tukuna ni “daurogoca na masu” na Kalou dina. (Same 65:2) O koya gona, ni o masu, o vakadeitaka li ni vakamuai tiko vua na Kalou dina? Ena sauma beka o koya na ka o masulaka?

E vuqa na tamata e veiyasa i vuravura, era na sauma ena Io! Na sala cava e saumi kina vei ira? Na cava era vulica kina?

O Cei na Kalou?

A yalodina ina nona lotu e dua na qasenivuli a vuli vei ira na bete kei na sisita mai Potukali. Ia ni yaco na veiveisau ena nona lotu, kei na kena biu tani tale ga e so na ivalavala ni sokalou a vulica ni bibi, a veilecayaki kina o koya. Nona lako tu vagade, a lai vulica kina na ivalavala ni sokalou vakaesia, sa qai veinanuyaka se tiko beka na Kalou dina, se sega. Ena sokaloutaki koya vakacava? A taroga na nona bete ena so na ka mai na iVolatabu, ia a vakalecalecava ga o koya, mani vakavuna na nona yalolailai na qasenivuli oqo.

E dua na ivola era a veisoliyaka voli na lotu Katolika ena korolevu e vakaitikotiko kina o qasenivuli, era vakaroti kina na lewenilotu mera kua ni veitalanoa kei ira na iVakadinadina i Jiova. Ia a sega ni guilecava rawa na qasenivuli oqo na nona taro. Dua na siga a tukituki yani e nona vale e dua na iVakadinadina, a vakarorogo vinaka qai taleitaka vakalevu na ka e rogoca. Oqo e sa qai imatai ni gauna me veivosaki kina kei ira.

Mani tekivu vulica na iVolatabu kei ira na iVakadinadina, a saumi tale ga kina e vuqa na nona taro. Veimacawa, ena vakarautaka tu e levu na taro me tarogi ira kina. A vinakata o koya me kila se o cei na yaca ni Kalou, e dua beka ga na Kalou dina, e vakadonuya beka na qaravi matakau, kei na vuqa tale. A raica o koya ni saumi kece tiko vakaivolatabu na nona taro, a sega ni saumi ena vakasama vakatamata, e kurabuitaka qai marautaka tale ga na veika e sa vulica tiko. Toso na gauna, sa qai saumi e levu tale na nona taro. Nikua, e sa qaravi Jiova tiko vakayalo qai vakaidina, me vaka e kaya o Jisu Karisito nira na cakava o ira na “lotu dina.”​—Joni 4:​23.

Eratou dau wili iVolatabu vakawasoma e dua na vuvale mai Sri Lanka, ia a sega ni sauma rawa e levu na nodratou taro bibi. Dina ni ratou gadreva na veivuke, ia a sega ni vukei iratou rawa na nodratou bete. Era a veisikovi yani na iVakadinadina i Jiova qai solia vei iratou e so na ivola vakaivolatabu me vukei iratou. E muri, era a sauma vakamatata na iVakadinadina i Jiova na nodratou taro vakaivolatabu, mani ratou vakadonuya kina me ratou vuli iVolatabu. Ratou a taleitaka vakalevu na veika eratou vulica tiko.

Ia, ena vuku ni ivakavuvuli ni lotu a tuberi kina o tinadratou ni se gone, e lai vakabuawataka na nona vakabauta ni o koya “na Kalou dina duaduaga,” e Tama i Jisu Karisito, ni o Jisu Karisito ga a kaya. (Joni 17:​1, 3) A vulica tale ga o koya ni se gone, ni rau tautauvata o Jisu kei Tamana, kei na ivakavuvuli “vuni” oqo a sega ni nanumi me na kilai. E veilecayaki, ia a gadreva dina me kila, mani masu qai cavuta sara ga na yaca i Jiova, qai kerea tale ga me vakatakilai vua se o cei o Jisu. Oti oya, sa qai dikeva vakavinaka tale na kena veitikinivolatabu. (Joni 14:28; 17:21; 1 Korinica 8:​5, 6) E vaka me sa qai rai vinaka na matana, sa qai matata sara ga vua ni o Jiova​—na Dauveibuli ni lomalagi kei vuravura, qai Tama i Jisu Karisito​—e Kalou dina.​—Aisea 42:8; Jeremaia 10:​10-​12.

Na Cava e Sotavi Kina na Rarawa?

A sotava o Jope na rarawa mosimosi dina. Era a mate kece na luvena ena dua na cava, qai vakayalia kece na ka e taukena. A tauvi koya tale ga e dua na mate mosimosi, qai vosota na nodratou veibeitaki na nona itokani vakailasu. Nona sotava na veika kece oqo, a cavuta kina o Jope e so na vosa vakariri. (Jope 6:3) Ia a dikeva rawa na Kalou na ituvaki e tu kina. (Jope 35:15) A kila o koya na loma i Jope qai solia na ivakasala e gadreva. E cakava vaka tale ga kina vei ira na tamata nikua.

Mai Mozambique, ni se qai yabaki tini o Castro sa mate o tinana. Dua na ka na nona rarawa. A taroga: “Cava e mate kina o Nana qai biuti keitou tu mai?” Dina ni se susu lailai o Castro vei rau na itubutubu erau rerevaka na Kalou, ia e se veilecayaki ga. Na cava ena vakaceguya na nona vakasama kei na lomana? A vakacegui koya na nona wilika e dua na iVolatabu lailai vaka Chichewa, kei na nona veivosakitaka vata kei rau na tuakana.

Yaco na gauna, sa qai kila o Castro ni sega ni vu ni mate nei tinana na nona sega ni lewadodonu na Kalou, ia e vakavuna ga na ivalavala ca e dewavi keda mai. (Roma 5:​12; 6:​23) A vakacegui koya dina na vosa ni yalayala mai na iVolatabu me baleta na veivakaturi, ena yavu oqo e kila deivaki kina ni na rawa ni raici tinana tale. (Joni 5:​28, 29; Cakacaka 24:15) E ka ni rarawa, ni oti tale e va na yabaki, a mate o tamana. Ia na gauna oqo sa kila rawa o Castro na iwali ni nona lolosi. Edaidai, sa qarava tiko na Kalou ena yalodina me ivakaraitaki ni nona lomani Jiova. Era raica votu vua na kilai koya na nona marau.

E levu e mate tale ga na wekadra lomani, ra mani kune vakacegu ena nodra mai kila na ka dina vakaivolatabu a vakacegui Castro. So era sotava na ituvaki dredre ena vuku ni nodra itovo ca na tamata, me vakataki Jope era taroga: “A cava era sa bula tiko kina nai valavala ca?” (Jope 21:7) Nira muria na ka e kaya na Kalou ena nona Vosa, era na vakila na kena vinaka ni wali na leqa ena sala vakalou.​—2 Pita 3:9.

A susu o Barbara mai Mereke, a sega ni bau sotava na bula rarawa ni ivalu. Ia a susu ena gauna era veiraravui sara tu ga kina na veivanua e vuravura. E tabaki ena niusiveva e veisiga na itukutuku veivakalolomataki ni ivalu. Na gauna e vuli voli kina, a lomatarotarotaka o Barbara ni vulica na yaco ni veika lelevu ena itukutuku makawa kei vuravura, ena sala e sega ni vakamacalataki rawa. Na cava e vakavuna? A kauaitaka li na Kalou na veika a yaco tiko? E vakabauta o Barbara ni tiko na Kalou, ia e se lomatarotarotaka ga e levu na ka me baleti koya na Kalou.

Yaco na gauna, na nona veimaliwai o Barbara kei ira na iVakadinadina i Jiova e veisautaka kina na nona rai me baleta na bula. A vakarorogo qai vuli iVolatabu tale ga vata kei ira. A tiko ena soqoni e vakayacori ena Kingdom Hall. A tiko tale ga ena dua na nodra soqoni levu. Kuria, ni gauna e dau tarogi ira kina na iVakadinadina i Jiova, e raica ni tautauvata ga na nodra isaunitaro, e sega ni veisaqasaqa. E vakavuna oya nira yavutaka nodra kila mai na iVolatabu.

Era vakayagataka na iVolatabu na iVakadinadina me dusia ni curuma tu na vuravura oqo na yalo i Setani na Tevoro, ni kena iliuliu, qai lewa sara tu ga. (Joni 14:30; 2 Korinica 4:4; Efeso 2:​1-3; 1 Joni 5:​19) Era vakamacalataka tale ga ni sa tukuni oti tu ena iVolatabu ni na yaco na veika lelevu e vuravura, na kena e se lomatarotarotaka voli o Barbara ni se vuli. (Taniela, wase 2, 7, kei na 8) Sa tukuna mai vakailiu na Kalou, baleta ni tu vua na kaukaua me kila na veika ena yaco ena gauna se bera mai, oya ke lewa me cakava vaka kina. So na ituvaki a yaco oya a vakavuna ga na Kalou. So tale a vakatara me yaco. Era vakamacalataka vei Barbara na iVakadinadina ni a tukuna tale ga na iVolatabu ni na yaco ena gauna oqo na ituvaki vinaka kei na ituvaki ca, qai vakamacalataka tale ga na kedra ibalebale. (Maciu 24:​3-​14) Era vakaraitaka vua na vosa ni yalayala ena iVolatabu me baleta na vuravura vou era na bula ga kina na tamata yalododonu, kei na kena sa na sega tale na rarawa.​—2 Pita 3:​13; Vakatakila 21:​3, 4.

Yaco na gauna, sa qai tekivu kila o Barbara ni o Jiova e sega ni vakavuna na noda rarawa na kawatamata, ia e sega tale ga ni tarova na kena yaco ena nona vakasaurarataki keda meda talairawarawa ina nona ivunau. (Vakarua 30:​19, 20) Sa vakarautaka tu na Kalou na sala me tawamudu kina na noda bula marau, ia e se solia tiko vei keda edaidai na galala meda vakaraitaka ni salavata na noda bula kei na nona ivalavala dodonu. (Vakatakila 14:​6, 7) A mani vakatulewataka o Barbara me vulica na loma ni Kalou qai bulataka sara ga. A kunea tale ga ena kedra maliwa na iVakadinadina i Jiova na loloma a kaya o Jisu ni na vakatakilakilataki ira na nona imuri.​—Joni 13:​34, 35.

Ena rawa ni yaga tale ga vei iko na veika a vukei Barbara.

Na Bula e Vakainaki

O ira mada ga era rawati ira tu era na rairai qara na isau matata ni nodra lomatarotaro. Me kena ivakaraitaki, a gadreva sara ga o Maciu, e dua na cauravou ni Peritania, me kunea na Kalou dina qai kila na inaki ni bula. A mate o tamana ni se qai yabaki 17. E muri, sa qai vakoroi ni ivakatagi mai na univesiti. Yaco me vakila vakalevu na kena tawayaga na nona bula vutuniyau. A mani biuta mai na nona koro me toki sara i Lodoni, sa qai tekivu e kea na nona vakayagataka na wainimate gaga, nona lakova na valenidanisi, vulica na raikalokalo, vakacuru, kei na nona lai vakabauta na nodra ivakavuvuli na ilawalawa ribatani ni lotu Buddha era vakatokai na Zen Buddhism, kei na so tani tale na vuku ga vakatamata​—ena nona qara voli na bula e veivakacegui. Nona gadreva vakalevu na veivuke a tagi kina vua na Kalou me vukei koya me kunea na ka dina.

Ni oti tale e rua na siga a sotava e dua na nona itokani makawa o Maciu qai vakamacalataka vua na nona nuiqawaqawa. Na nona itokani oqo sa vuli iVolatabu kei ira na iVakadinadina i Jiova. Gauna e wiliki kina vei Maciu na 2 Timoci 3:​1-5, a drukataka o koya na kena vakamacalataki tu vakamatata ena iVolatabu na ituvaki ni vuravura eda sa bula donuya tu oqo. Koya li ni wilika na Vunau ena Ulunivanua, a tarai koya sara ga. (Maciu, wase 5-7) Na imatai ni gauna e sureti kina me tiko ena soqoni, a vakataratutu ni a wilika o koya e so na itukutuku era vosa vakacacataki tu kina na iVakadinadina i Jiova, ia e muri sa qai vakatulewataka me lako ina Kingdom Hall e voleka duadua.

A marautaka o Maciu na ka a rogoca qai tekivu vuli iVolatabu sara kei na dua na qase ni ivavakoso. Dede vakalailai a dikeva rawa o koya ni veika e vulica tiko, na ka sara ga a vaqara voli mai, na isau ni nona masu taumada vua na Kalou. A vakila na kena vinaka na nona biuta tani na ivalavala e vakacudrui Jiova. Ni bucina na rere vakalou, a tosoi koya me veisautaka na nona bula me salavata kei na ivakaro ni Kalou. A kunea o Maciu ni oqo sara ga na bula e vakainaki.​—Dauvunau 12:13.

A sega ni lewai tu mai vakailiu me na marautaka na nona bula o Maciu kei na so tale era cavuti ena ulutaga oqo. Ia, era a vulica ni Kalou o Jiova e vakarautaka vakayalololoma e dua na inaki vei ira e lomadra mera talairawarawa ina nona ivunau. (Cakacaka 10:​34, 35) Na inaki oya e vauci kina na bula tawamudu ena vuravura e sega kina na ivalu, vakabulai mai na ivau ni tauvimate kei na waloloi​—sereki sara mada ga mai na mate. (Aisea 2:4; 25:​6-8; 33:24; Joni 3:​16) Oya beka na ka o taleitaka? Ke vaka kina, o rawa ni vulica e levu tale na ka mo kunea kina na idola ni bula marau, ena nomu tiko ena soqoni e yavutaki ena iVolatabu ena nodra Kingdom Hall na iVakadinadina i Jiova. Oni sureti mo ni tiko kina.

[iYaloyalo ena tabana e 7]

Masu vagumatua vua na Kalou, mo cavuta na yacana

[iYaloyalo ena tabana e 7]

Vuli iVolatabu kei ira era vakatavulica na ivakavuvuli dina e koto kina

[iYaloyalo ena tabana e 7]

Tiko ena soqoni ena Kingdom Hall

[iTaba ni Credit Line ena tabana e 4]

Dua na dautaubale: Chad Ehlers/Index Stock Photography