Taro na Dauwiliwili

E veisaqasaqa beka kei na lawa ni Kalou ke culai me mate e dua na manumanu e ivakalasa ni vale, ni sa tauvimate se sa rui qase?

Lewe levu sara era dau taleitaki ira na manumanu. So na manumanu era ivakalasa vinaka ni vale. Kena ivakaraitaki, na koli era lomani ira vinaka na kedra itaukei, ra qai dau vakarorogo sara tale ga. Sa rauta meda dau volekati ira sara na ivakalasa ni vale vaka oqo, vakauasivi ke ra sa bula vakadede kei keda.

Ia, e lekaleka ga na bula ni dua na manumanu. Na koli ena rawa ni 10 ina 15 na yabaki, se sivita ga vakalailai oya na dede ni nona bula, vaka kina na pusi, qai vakatau tale ga ina mataqali koli se pusi vakacava. Ni sa qase e dua na manumanu e ivakalasa ni vale, macala ni na rawa ni tauvimate se malumalumu, ena rarawa tale ga kina o kena itaukei ni nanuma lesu na bulabula kei na kaukaua ni manumanu oqo ena gauna se gone kina. Ena cala beka ke lai culai me mate na ivakalasa ni vale oqo me mudu kina na nona rarawa?

Macala ni na cakava ga na lotu Vakarisito na ka e vinakata na Kalou me caka me baleti ira na manumanu. E cata na Kalou na nodra vakalolomataki na manumanu, ni kaya na nona Vosa: “Na tamata yalododonu sa maroroya na bula ni nona manumanu.” (Vosa Vakaibalebale 12:10) Ia, oqo e sega ni kena ibalebale ni dua ga na ivakatagedegede e biuti keda kina na Kalou kei ira na manumanu. Ena gauna ni veibuli, a vakaraitaka vakamatata na Kalou ni tiko na duidui ena maliwa ni tamata kei na manumanu. Kena ivakaraitaki na nona dulaka na inuinui ni bula tawamudu ina tamata, ia e sega ni dulaka vei ira na manumanu. (Roma 6:​23; 2 Pita 2:​12) Ia ni Dauveibuli, e tu vua na dodonu me lewa se me vakacava na nodrau veimaliwai na tamata kei na manumanu.

E tukuni vakamatata oqo ena Vakatekivu 1:​28. A kaya na Kalou vei rau na vuda: “Drau . . . vakamalumalumutaka; ka lewa na ika ni waitui, kei na manumanu vuka, kei na ka bula kecega sa qasi voli e dela i vuravura.” Duavata kina na Same 8:​6-8, ni kaya: “Ko ni sa vakamalumalumutaka e ruku ni yavana [yava ni tamata] na ka kecega; na sipi kecega kei na pulumokau, kei na manumanu talega ni vanua; na manumanu vuka, kei na ika ni waitui.”

E vakamatatataka na Kalou ni rawa vua na tamata me vakayagataka na manumanu ena sala e veiganiti, e rawa tale ga ni vakamatea. Kena ivakaraitaki ni rawa ni vakayagataka na kulinimanumanu me vakaisulu kina. Kuria, ni a vakadonuya tale ga na Kalou me kania na tamata na lewenimanumanu, ni oti na Waluvu ni siga i Noa, me ikuri ni draunikau drokadroka a tukuni taumada me kena kakana.​—Vakatekivu 3:​21; 4:4; 9:3.

Ia e sega ni kena ibalebale oqo me vakamatei vakaveitalia na manumanu me ka ni qito. Na iVolatabu ena Vakatekivu 10:9 (NW), e vakamacalataki Nimiroti me “dauvakasasa manumanu yavaiva.” Ia, na ikarua ni cegu ni tikinivolatabu oqo e kaya ni “tusaqati Jiova” kina.

O koya gona, e dina nida lewai ira na manumanu, ia me kua ni vakatanitaki, meda taurivaka na lewa oya me salavata kei na ivakavuvuli ni Vosa ni Kalou. Rawa gona ni okati e ke na nona qarauna o itaukei ni manumanu me kua ni laiva me rarawa wale na manumanu ni sa rui qase, mavoa se tauvimate. Ni sotavi gona na ituvaki vaka oqo, e nona itavi na lotu Vakarisito yadua me vakatulewa kina. Ke nanuma ni na vinaka cake me kua ni vakadedetaka na rarawa ni manumanu, ni macala tu ga ni na sega ni bula rawa tale, de sa na lewa ga me culai me mate.