Vuna Meda Masu Tiko ga Kina

“Dou masu tikoga ka kua ni mudu. Dou ia na vakavinavinaka e na vuku ni ka kecega.”​—1 Cesalonaika 5:​17, 18.

1, 2. E vakaraitaka vakacava o Taniela ni ka bibi dina vua na masu, ia e cakayaco vakacava ena nona veiwekani kei na Kalou?

SA ITOVO ni nona bula na parofita o Taniela me dau masu vakatolu vua na Kalou ena dua na siga. E dau lai tekiduru ena loqi ni nona tabavale e cake donuya na katubaleka e qara i Jerusalemi, me lai cabora kina nona masu. (1 Tui 8:​46-​49; Taniela 6:​10) Ni vakatabui vakamatanitu me masuti e dua tale, ia me masuti ga o Taraiase na tui ni Mitia, a sega ni veisautaki Taniela vakalailai. E sega ni via kauaitaka na turaga dau masu oqo na leqa e rawa ni sotava, e masuti Jiova tiko ga.

² E raici Taniela vakacava o Jiova? Ni lako mai na agilosi o Keperieli ena vuku ni dua na masu i Taniela, a vakamacalataki Taniela ni “tamata daulomani.” (Taniela 9:​20-​23) Ena parofisai i Isikeli, e tukuni Taniela o Jiova ni turaga yalododonu. (Isikeli 14:​14, 20) E vakabauti ni a bucina voli mai o Taniela e dua na veiwekani voleka sara kei na nona Kalou, me vaka e bau lai kila o Taraiase.​—Taniela 6:​16.

3. E rawa ni vukei keda vakacava na masu meda yalodina tiko ga me vaka e yaco vua e dua na daukaulotu?

³ E rawa tale ga nida tudei nida sotava na veika dredre kevaka eda dau masu. Me kena ivakaraitaki, vakasamataka na ka e sotava o Harold King, e dua a kaulotu i Jaina qai totogitaki me loka taudua ena dua na rumu me lima na yabaki. E kaya o Brother King ena vuku ni ka a sotava: “Au kau tani beka mai vei ira na taciqu, ia e sega ni dua e rawa ni kauti au tani mai vua na Kalou. . . . E rawa nira raici au o ira era tavali ena noqu lokamu niu dau tekiduru e veisiga meu masu vakadomoilevu vakatolu, ena noqu dau nanuma na ivakaraitaki i Taniela me vaka e tukuna na iVolatabu. . . . Vaka au vakila ena gauna vaka oya ni dau vakamua na noqu vakasama na yalo tabu ni Kalou ena veika e bibi, qai dau vakacegui au. Na masu e dau vakaukauataki au sara ga vakayalo, e solia tale ga vei au na lomavakacegu!”

4. Na taro cava soti me baleta na masu eda na dikeva ena ulutaga oqo?

⁴ E kaya na iVolatabu: “Dou masu tikoga ka kua ni mudu. Dou ia na vakavinavinaka e na vuku ni ka kecega.” (1 Cesalonaika 5:​17, 18) Ena vuku ni ivakasala oqo, meda dikeva mada e vica na taro oqo: Na cava meda raica kina vakabibi na noda masu? Na cava na vuna meda dau torovi Jiova kina vakawasoma ena masu? Kei na cava meda cakava ke da nanuma ni sega ni ganiti keda meda masu vua na Kalou ena vuku ni noda ivalavala ca?

Tara Cake Nomu Veiwekani kei Jiova ena Masu

5. Na veiwekani vakacava eda na rawata kevaka eda dau masu?

⁵ O vinakata me okati iko o Jiova mo wekana? O Jiova e okati koya na peteriaki o Eparama me wekana. (Aisea 41:8; Jemesa 2:​23) E vinakata tale ga o Jiova meda saga meda veiwekani kei koya. E sureti keda mada ga meda toro voleka yani vua. (Jemesa 4:8) Sega li ni uqeti keda na veisureti oya meda vakasamataka vakabibi na isolisoli uasivi ni masu? Sa bau dua na ka dredre mo saga mo drau veivosaki kei na dua na vakailesilesi levu vakamatanitu, mo qai saga li mo drau veitokani se me okati iko me vaka o wekana e sa qai yawa sara! Ia, o koya e bulia na lomalagi kei na vuravura e uqeti keda meda toro yani vua ena masu ena gauna ga eda vinakata. (Same 37:5) Na noda dau masu e sa idewadewa ni noda rawa ni veiwekani voleka sara kei Jiova.

6. Na cava eda vulica ena ivakaraitaki i Jisu me baleta na kena gadrevi meda dau “masu tiko ga”?

⁶ Ia, e rawarawa sara nida vakawaletaka na masu! Noda ogaoga mada ga ena drakidrakita ni bula e veisiga e rawa ni taura vakalevu noda gauna meda sega kina ni saga meda vosa vua na Kalou. A uqeti iratou nona tisaipeli o Jisu me ratou “masu tiko ga,” oqo tale ga na ka e dau cakava. (Maciu 26:​41, NW) E dina ni dau osooso mai na mataka me yacova na bogi, ia e tiko ga na gauna e dau vosa kina vua na Tamana vakalomalagi. So na gauna e dau yadra ena “mataka caca” o Jisu me masu. (Marika 1:​35) So tale na gauna e dau lako o koya ena dua na vanua lala ni cava e dua na siga me lai masu vei Jiova. (Maciu 14:23) E dau vakatikitikitaka o Jisu na gauna me masu kina, e dodonu meda cakava tale ga oqo o keda.​—1 Pita 2:​21.

7. Na ituvaki cava e so e dodonu me uqeti keda meda masu vua na Tamada vakalomalagi e veisiga?

⁷ Eda dau sotava e veisiga na leqa, veitemaki, kei na vakatulewa, na gauna sara ga vaka oqo e yaga kina na masu. (Efeso 6:​18) Nida qara na veidusimaki ni Kalou ena veibasoga ni noda bula kece, ena qaqaco noda veiwekani kei koya. Ni rua na veitokani erau sotava vata e dua na leqa, sega ni vakabekataki ni na vaqaqacotaka nodrau veimaliwai. (Vosa Vakaibalebale 17:17) Oqo tale ga na ka ena yaco kevaka eda vakararavi vei Jiova me vukei keda.​—2 Veigauna 14:11.

8. Na cava eda vulica me baleta na balavu ni noda masu taudua mai na ivakaraitaki i Niemaia, Jisu, kei Ana?

⁸ Eda kalougata ni sega ni yalana na Kalou na balavu ni noda masu, se iwiliwili ni gauna meda masu kina! A masu lo vakalekaleka o Niemaia ni bera ni kerekere vua na tui kei Perisia. (Niemaia 2:​4, 5) A lekaleka tale ga na masu i Jisu ena gauna e kerei Tamana kina me solia vua na kaukaua me vakaturi Lasarusa. (Joni 11:​41, 42) Ena yasana kadua, a ‘masu tikotiko ga o Ana ena mata i Jiova’ ni talaucaka tiko na lomana vua. (1 Samuela 1:​12, 15, 16) E rawa ni lekaleka sara noda masu, rawa ni balavu tale ga, me vakatau ena ituvaki kei na ka e gadrevi.

9. Na cava me okati kina ena noda masu na noda vakacaucautaki Jiova kei na noda vakavinavinakataka na ka e cakava vei keda?

⁹ E levu na masu ena iVolatabu era masu ni veivakacaucautaki vei Jiova ena vuku ni nona itutu cecere kei na veika veivakurabuitaki e cakava. (Lako Yani 15:​1-​19; 1 Veigauna 16:​7-​36; Same 145) Ena dua na raivotu, e raica kina na yapositolo o Joni e 24 na qase​—e vakatakarakarataka na kedra iwiliwili kece na lotu Vakarisito lumuti ena nodra itutu mai lomalagi​—nira vakacaucautaki Jiova tiko ena nodra kaya: “Kemuni na neitou Turaga kei na neitou Kalou, sa dodonu me ia vei kemuni na vakarokoroko kei na veidokadokai, kei na kaukauwa: ni sai kemuni ka bulia na ka kecega, era sa buli ga ka tu dei talega e na nomuni lewa.” (Vakatakila 4:​10, 11) E tu tale ga na vuna vinaka meda dau vakacaucautaki Jiova kina. Erau na marau dina na itubutubu ni vakavinavinakataki rau o luvedrau ena vuku ni dua na ka erau cakava vua! Noda dau vakananuma na vinaka i Jiova kei na noda vakavinavinakataka, e dua na sala e rawa nida toroya cake kina na ivakarau ni noda masu.

Vuna Meda “Masu Tikoga” Kina

10. Ena vaqaqacotaka vakacava noda vakabauta na masu?

¹⁰ E bibi meda dau masu tiko ga ke da vinakata me qaqaco noda vakabauta. Ni vakaraitaka oti ena vosa vakatautauvata o Jisu na kena bibi meda “daumasu tiko ka kakua ni ceguoca,” sa qai taroga: “Ni sa lako mai na Luve ni tamata, ena kunea beka na vakabauta e vuravura, se segai?” (Luke 18:​1-8) Io, na masu ni vakekere e vu mai lomada e vaqaqacotaka noda vakabauta. Ni sa qase mai na peteriaki o Eparama ia se sega ga ni vakawa, sa qai masu vua na Kalou ena vuku ni ka oqo. Ni sauma o Jiova nona masu, sa qai kerei koya me rai cake i lomalagi me wilika na kalokalo ke rawata. Sa qai vakadeitaka na Kalou vei Eparama: “Sa na vakakina na nomu kawa.” Cava e qai yaco? “A sa vakabauti Jiova ko koya; a sa wilika vua ko koya me nonai valavala dodonu.” (Vakatekivu 15:​5, 6) Kevaka eda dolava na lomada vei Jiova ena masu, da ciqoma nona veivakadeitaki mai na iVolatabu, da qai talairawarawa vua, ena vaqaqacotaka o koya noda vakabauta.

11. E yaga vakacava na masu ena wali ni noda leqa?

¹¹ E yaga tale ga na masu ena wali ni noda leqa. E tarabi beka nomu bula ni veisiga qai bibi nomu icolacola? E kaya na iVolatabu: “Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.” (Same 55:22) Nida sotava e so na vakatulewa dredre, e rawa nida vakatotomuria na ivakaraitaki i Jisu. Bogi taucoko nona masu taudua voli ni bera ni digitaki ratou na 12 nona yapositolo. (Luke 6:​12-​16) Ena bogi tale ga me qai mate kina, dua na ka nona masuti Tamana vagumatua, mani “yaco me vaka na titiri ni dra na nona buno ni sa titiri ki na qele.” (Luke 22:​44, VV) Cava e qai yaco? “E na vuku ni nona yalomalumalumu kei na nona yalodina, e a rogoca kina na nona masu na Kalou.” (Iperiu 5:​7, VV) Na noda masu vagumatua tale ga ena vukei keda meda tudei nida sotava na veika dredre se veivakatovolei mosimosi.

12. Eda kila vakacava mai na isolisoli ni masu ni o Jiova e kauaitaki keda yadua?

¹² E dua tale na vuna meda toro voleka kina vei Jiova ena masu, oya ni na qai toro voleka mai kina o koya vei keda. (Jemesa 4:8) Nida talaucaka na lomada vei Jiova ena masu, sega li nida vakila ni kauaitaka o koya na ka eda gadreva, e dau nanumi keda tale ga? Eda na vakila yadudua sara ga na loloma ni Kalou. E sega ni lesia na Tamada vakalomalagi o Jiova e dua tale me rogoca na masu eda cabora yani vua na nona tamata. (Same 66:​19, 20; Luke 11:2) Qai sureti keda meda ‘biuta vua na noda lomaocaoca kece ga ni sa daunanumi keda o koya.’​—1 Pita 5:​6, 7.

13, 14. Na cava meda dau masu tiko ga kina?

¹³ Na masu e rawa ni vakayaloqaqataki keda ena cakacaka vakaitalatala, vakaukauataki keda tale ga meda dei ena cakacaka oqo ke da sa via soro ena vuku ni noda sega ni kauaitaki se vakacacani. (Cakacaka 4:​23-​31) Na masu e rawa tale ga ni vukei keda meda “vorata nai lawaki ni tevoro.” (Efeso 6:​11, 17, 18) Nida saga tiko meda vosota na veika dredre eda sotava e veisiga, e rawa nida dau masu vua na Kalou me vakaukauataki keda. A okati ena ivakarau ni masu e vakavulica o Jisu na noda kerei Jiova me ‘vakabulai keda’ mai vei koya na vunica, o Setani na Tevoro.​—Maciu 6:​13.

¹⁴ Ke da kerei Jiova tiko ga me vukei keda meda lewa vinaka na yagoda ivalavala ca, eda na vakila na nona veivuke. E vakadeitaki vei keda: “Sa yalodina na Kalou o koya ena sega ni laivi kemudou mo dou dauveretaki vakalevu cake, me vaka ga na nomudou kaukauwa; ka na cakava talega kei na vere na sala mo dou dro kina, mo dou vosota rawa.” (1 Korinica 10:13) E levu sara na ituvaki a vakila kina na yapositolo o Paula na veivakaukauataki i Jiova kei na nona veitaqomaki. A kaya o koya: “Au rawata na ka kece ena vuku i koya e vakaukauataki au.”​—Filipai 4:​13, NW; 2 Korinica 11:​23-​29.

Kua ni Soro ena Masu, Kevaka Mada ga O Cala

15. Na cava e rawa ni yaco ke da cakava e dua na ka e sega ni vinakata o Jiova?

¹⁵ Meda kua ni cata na ivakasala ena Vosa ni Kalou ke da vinakata me rogoci noda masu. E vola na yapositolo o Joni: “Na ka kecega eda sa kerea, eda sa rawata maivei koya, ni da sa muria na nona vunau, ka kitaka na veika sa vinaka vua.” (1 Joni 3:​22) Ia, na cava e rawa ni yaco ke da cakava e dua na ka e sega ni vinakata o Jiova? Ni rau sa ivalavala ca ena were o Iteni o Atama kei Ivi, erau qai vunitaki rau. O keda tale ga e rawa nida nanuma meda ‘vunitaki keda mai na mata i Jiova’ ena so na gauna. Meda sa kua tu ni masu. (Vakatekivu 3:8) E kaya o Klaus, e dua na ivakatawa dauveilakoyaki gugumatua: “Au sa raica ni dau imatai sara ga ni kalawa cala era cakava o ira era ciri tani mai vei Jiova, oya nodra sa sega ni qai masu.” (Iperiu 2:1) Na ka sara ga oqo a yacovi José Ángel. E kaya o koya: “Tu tu yadua sara meu qai masu vei Jiova. Via vaka tu oqo me walu na yabaki. E dina niu se okati koya tiko ga me Tamaqu vakalomalagi, ia au vakila ni sa sega ni ganiti au meu vosa vua.”

16, 17. iVakaraitaki cava e dusia ni noda dau masu ena vukei keda nida malumalumu vakayalo?

¹⁶ E so vei keda ena nanuma ni sega ni ganiti ira mera masu ena vuku ni nodra malumalumu vakayalo, se na vuku ni nodra sikalutu ena ca. Ia, na gauna sara ga vaka oqo e sa qai bibi kina meda vakayagataka na isolisoli uasivi oqo ni masu. A drotaka o Jona na nona ilesilesi. Ia, ‘a tagi vei Jiova e na vuku ni nona rarawa, mai na loma i etesi a qoqolou, a rogoca o Jiova na domona.’ (Jona 2:2) A masu o Jona, e rogoca o Jiova na nona masu, mai bulabula tale yani vakayalo o koya.

¹⁷ A qai veisau o José Ángel me sa qai sega ni cegu ena nona masuta na veivukei i Jiova. E qai nanuma lesu: “Au dolava na lomaqu au qai masuti Jiova me vosoti au. E qai vukei au o koya. Ke a sega na masu, keu a sega ni lesu tale mai ena dina. Gauna oqo au sa dau masu vakawasoma e veisiga, e gauna talei vei au na gauna vaka oqo.” E dodonu me dau rawarawa noda tukuna yani vua na Kalou na noda cala, da qai kerea ena yalomalumalumu nona veivosoti. A talaucaka o Tui Tevita na nona ivalavala ca, mani vosoti koya o Jiova. (Same 32:​3-5) E sega ni dau beitaki keda o Jiova se me vakayalolailaitaki keda. (1 Joni 3:​19, 20) Kena ikuri, ni nodra masu na qase ena ivavakoso e rawa ni vukei keda vakayalo, ni masu vaka oqo e dau “mana” sara vakalevu.​—Jemesa 5:​13-​16, VV.

18. Ke mani vakacava nodra lako sese na tamata ni Kalou, na cava mera nuidei kina?

¹⁸ E sega ni dua na tama ena cata na luvena e kere veivuke vua ena yalomalumalumu, e kere ivakasala tale ga ni sikalutu ina ca. E macala ena vosa vakatautauvata i Jisu me baleti koya na gone cidroi ni marau na Tamada vakalomalagi nida lesu yani vua, veitalia se mani vakacava noda lako sese. (Luke 15:​21, 22, 32) O Jiova e uqeti ira kece na lako sese tu mera masuti koya, ni na ‘yalololoma vei ira.’ (Aisea 55:​6, 7) A cala vakalevu sara o Tevita, ia e masuti Jiova ena nona kaya: “Mo ni vakatu daligamuni, na Kalou, ki na noqu masu; ia mo ni kakua ni vunitaki kemuni mai na noqu kerekere.” E kaya tale ga o koya: “E na yakavi, kei na mataka, kei na siga levu, ka’u na masu, ka tagi vakadomoilevu: ka na rogoca na domoqu ko koya.” (Same 55:​1, 17) Sa veivakacegui dina!

19. Ke sega ni saumi tiko noda masu, na cava meda kua ni nanuma kina ni sa sega ni tokoni keda na Kalou?

¹⁹ Vakacava ke sega ni saumi totolo na noda masu? De dua e sega ni salavata kei na loma ni Kalou na ka eda kerea. De dua eda sega ni masu tiko ena yaca i Jisu. (Joni 16:23; 1 Joni 5:​14) A kaya tale ga na tisaipeli o Jemesa ni so na lotu Vakarisito a sega ni saumi nodra masu ‘ni cala na inaki ni nodra kerekere.’ (Jemesa 4:​3, VV) Ena yasana kadua, meda kua ni nanuma ni sa sega ni tokoni keda na Kalou ke sega ni saumi tiko noda masu. So na gauna e rawa ni vakalaiva o Jiova me balavu toka nodra masu voli na nona dauveiqaravi yalodina ni bera ni qai sauma. A kaya o Jisu: “Dou kerekere [“tiko ga,” NW], ka na soli vei kemudou.” (Maciu 7:7) O koya gona, e bibi meda “ia tikoga na masu.”​—Roma 12:12.

Masu Tiko Ga

20, 21. (a) Na cava e bibi kina meda ia tiko ga na masu ena “iotioti ni veisiga” oqo? (b) Na cava ena yacovi keda ke da dau toro yani ena veisiga ina itikotiko vakaturaga ni loloma i Jiova?

²⁰ Sa qai “lewalewai dredre” ga na “iotioti ni veisiga” oqo ena levu ni leqa kei na lomaocaoca. (2 Timoci 3:​1, NW) Na veivakatovolei tale ga e rawa ni vakabuawataka noda vakasama. Ia, noda masu tiko ga ena vukei keda me mua donu tiko ga noda bula vakayalo, veitalia ga na levu ni leqa, veitemaki, kei na veivakayalolailaitaki. Noda masu vei Jiova e veisiga e rawa sara ga ni noda ivakadei.

²¹ E “daurogoca na masu” o Jiova, e sega vakadua ni dau osooso me sega kina ni rogoci keda. (Same 65:2) Meda kua tale ga ni nanuma o keda nida sa osooso meda sega kina ni torovi koya ena masu. E bibi duadua ena noda bula na noda veiwekani kei na Kalou. Meda kua sara ni vakawaletaka. “Me da sa toro vakadoudou gona yani kina vua na Kalou ki na i tikotiko vakaturaga ni loloma, me da lomani kina ka kunea tale ga na kaukauwa vakayalo me vukei keda e na gauna e yaga kina.”​—Iperiu 4:​16, VV.

Cava Nomu iSaunitaro?

• Na cava eda vulica vua na parofita o Taniela me baleta na bibi ni masu?

• Cava meda cakava me qaqaco kina noda veiwekani kei Jiova?

• Na cava meda dau masu tiko ga kina?

• Na cava me kua ni tarovi keda kina ena noda masu vei Jiova noda nanuma ni sega ni ganiti keda meda masu vua?

[iYaloyalo ena tabana e 16]

A masu lo ga vakalekaleka o Niemaia ni bera ni vosa vua na tui

[iYaloyalo ena tabana e 17]

A ‘masu tikotiko ga o Ana ena mata i Jiova’

[iYaloyalo ena tabana e 18]

Dua taucoko na bogi nona masu voli o Jisu ni bera ni digitaki iratou na 12 nona yapositolo

[iYaloyalo ena tabana e 20]

Levu sara na ka e dau yaco e veisiga e bibi kina meda dau masu