Taro na Dauwiliwili

Na cava e vakaibalebaletaki ena matavosa, “me bula vakai koya ga”?

E kaya na iVolatabu me baleti Jisu Karisito ni “bula vakai koya ga,” e kaya tale ga me baleti ira na nona imuri nira ‘bula vakataki ira ga.’ (Joni 5:​26; 6:​53, NW) Ia, e duidui na kedrau ibalebale na tikinivolatabu e rua oqo.

“Me vaka sa bula vakai koya ga ko Tamana; sa solia talega vua na Luvena me bula vakai koya ga,” e kaya o Jisu. Ia ni bera ni cavuta na vosa vakasakiti oqo, a kaya taumada: “E dina, e dina, au sa kaya vei kemudou, O koya sa rogoca na noqu vosa, ka vakabauti koya sa talai au mai, sa rawata na bula tawa mudu . . . Sa lako mai na gauna, ia sa yaco edaidai, me ra rogoca na domo ni Luve ni Kalou ko ira na mate: ia ko ira sa rogoca era na bula.” E vakaibalebaletaka e ke o Jisu na kaukaua levu e solia vua o Tamana​—ni rawa sara mada ga mera vakadonui na tamata ena mata ni Kalou ke ra rogoci Jisu. Rawa sara tale ga vei Jisu me vakabulai ira na mate ena nona vakaturi ira. O koya gona, na nona “bula vakai koya ga” o Jisu e dusia na kaukaua sa vakatautaki tu vua. Se dua tale na kena ibiubiu, oya ni tu vua na kaukaua me solia ‘vaka i koya na isolisoli ni bula,’ me vakataki Tamana ga. (Joni 5:​24-​26) Ia, vakacava o ira na nona imuri?

Ni oti e dua na yabaki na nona cavuta o Jisu na nona vosa mai cake, a kaya vei ira na vakarogoci koya toka: “E dina, e dina, au sa kaya vei kemudou, Kevaka dou sa sega ni kania na lewe ni Luve ni tamata, ka gunuva na nona dra, sa sega vei kemudou na bula [se, “dou sa sega ni bula vakataki kemudou,” NW]. O koya sa kania na lewequ, ka gunuva na noqu dra, sa rawata na bula tawa mudu; ia ka’u na vakaturi koya cake e na siga maimuri.” (Joni 6:​53, 54) E semata e ke o Jisu na “bula vakataki kemudou” kei na “rawata na bula tawa mudu.” Na vakasama vata e koto ena matavosa na “bula vakataki kemudou” e kune ena so tale na vanua ena iVolatabu Vakirisi Vakarisito. Oqo e rua na kena ivakaraitaki, “Dou tuituina tiko . . . vakai kemudou” kei na, ‘sa yaco vei ira [“vakai ira,” NW] na cakacala na kedra isau dodonu.’ (Marika 9:​50, VV; Roma 1:​27) Macala ni sega ni vakaibalebaletaki e ke ni soli na dodonu vei ira na tisaipeli mera lai vakatuituinataka na nodra bula e so tale, se mera lai lewa na isau ni nodra cakacala. Ia, e dusia toka na taucoko ni bula, se, vei ira na cakacala​—na nodra vakila vakataki ira ni taucoko se dodonu vakaoti na isau ni nodra cakacala. O koya gona, na matavosa na “bula vakataki kemudou” e cavuti ena Joni 6:​53, e kena ibalebale ga na kena sa taucoko na bula.

Ena nona kaya o Jisu vei ira na nona imuri nira bula vakataki ira ga, a cavuta tale ga na yagona kei na nona dra. E muri, ni tauyavutaka na iVakayakavi ni Turaga, se baci cavuta tale o Jisu na yagona kei na nona dra, qai sureti iratou na nona imuri eratou na okati ena veiyalayalati vou me ratou kania na madrai ka gunuva na waini vakaivakatakarakara. Kena ibalebale beka oqo ni o ira ga na lotu Vakarisito lumuti, o ira na wili ena veiyalayalati vou kei koya na Kalou o Jiova ena yaco me taucoko na nodra bula? E sega. E sivi e dua na yabaki na nona a cavuta taumada o Jisu na yagona kei na nona dra, a qai tokaruataka tale ena iVakayakavi ni Turaga. Macala gona ni o ira na rogoca taumada na vosa i Jisu ena Joni 6:​53, 54, era sega ni kila na kena qai mai tauyavutaki e muri e dua na ivakananumi me vakayagataki kina na madrai kei na waini me vakatakarakarataka na yago kei na dra i Karisito.

Kaya na Joni wase 6, ni o Jisu a vakatauvatana na yagona ina mana ena nona kaya: “Sa kania na mana mai na veikau ko ira na nomudou qase, a ra sa mate ga. Sai koya oqo na madrai, sa lako sobu mai lomalagi, me ra kania na tamata, ka sega ni mate. Koi au na madrai bula sa lako sobu mai lomalagi; kevaka sa dua e kania na madrai oqo, ena bula ka tawa mudu.” Ia, e uasivita na mana na yago kei na dra i Jisu. Ena sala cava? Ni a soli na yagona “me bula kina ko ira na kai vuravura,” me rawa kina na bula tawamudu.a Ni tukuni gona ena Joni 6:​53 na ‘bula vakataki ira ga,’ era okati kina o ira kece era na bula tawamudu​—e lomalagi se e vuravura.​—Joni 6:​48-​51.

E naica era na bula kina vakataki ira ga na imuri i Karisito, se me taucoko kina na nodra bula? Vei ira na lumuti era lewe ni Matanitu vakalomalagi, ena yaco oqo ena gauna era vakaturi kina ina bula vakayalo tawamate rawa. (1 Korinica 15:​52, 53; 1 Joni 3:2) Ia, o ira na ‘so tani tale na sipi’ i Jisu era na qai vakila na taucoko ni nodra bula ni sa na lai cava na duanaudolu na yabaki ni veiliutaki i Jisu. Era sa na vakatovolei oti, ia ni laurai na nodra yalodina, era na vakadonui mera bula tawamudu ena Paraitaisi e vuravura.​—Joni 10:16; Vakatakila 20:​5, 7-​10.

[iVakamacala e ra]

[iYaloyalo ena tabana e 31]

E rawa vei ira kece na lotu Vakarisito dina mera na ‘bula vakataki ira ga’