“E Kaukaua Dina na Vosa ni Kalou!”

“SA BULA na vosa ni Kalou, ka kaukauwa.” (Iperiu 4:​12) E ono na italanoa dina mai na veiyasa i vuravura e tabaki ena 2003 Calendar of Jehovah’s Witnesses, e dusia na kaukaua ni vosa ni Kalou. E vakaraitaki ena ivolanivula ena ruku ni ulutaga “Veisau na Bula,” na sala e sa veivuke tiko kina na nodra cakacaka ni veivakavulici na iVakadinadina i Jiova, e vakavinakataka nodra itovo na vakavulici, era biuta kina na lasa makawa, e vakaukauataka nodra bula vakavuvale, qai vakavinakataka nodra veiwekani kei na Kalou.

E sa ciqomi e vuqa na ivola ni vakavinavinaka me baleta na ivolanivula ni 2003. Oqo e so vei ira:

“Na ivolanivula oqo e ivakadinadina vei ira na lotu Vakarisito ni via tautauvata sara ga na nodra bula kei na ka era sotava tu e so tale nira sasagataka mera taqomaka na nodra vakabauta. Nodra raica na iyaloyalo e tu kina e rawa nira vakasamataka na nodra sa veisau e so.”​—Steven, Mereke.

“Au volavola yani meu vakaraitaka na sala e tarai au kina na ivolanivula ni 2003. E sega ni dua na ivolanivula e cakayaco vei au me vaka oqo. Au na kauta vata kei au ena cakacaka vakavunau, meu vakaraitaka na ivakadinadina kei na italanoa vakasakiti era tu kina me baleta na cakayaco ni iVolatabu vei ira oqo.”​—Marc, Belgium.

“E tarai au sara ga na ivolanivula. Dua na ka noqu luluvu niu wilika kei na noqu raica na sala e veisautaka kina nodra bula o Jiova. E uqeti au sara ga ena noqu na veisautaka tiko na ivakarau ni noqu bula. Au vakila na noqu sa qai volekati ira ga na mataveitacini e vuravura raraba.”​—Mary, Mereke.

“E tarai Jisu na nodra ituvaki vakayalo na lewevuqa. Vinaka vakalevu na nomuni vakadamurimuria na ivakaraitaki i Karisito ena italanoa e tabaki ena ivolanivula ni 2003. E sega vakadua ni dua na ivolanivula e tuturu kina na wainimataqu me vaka oqo.”​—Cassandra, Mereke.

“Au tekivu vakatavako niu se yabaki 11, toso na gauna au sa vakayagataka tale ga na wainimate gaga. Au dau vakasamataka meu sa tinia na noqu buIa. Au qai vukei meu kua ni cakava na veika vaka oqori ena gauna au sa mai kilai Jiova kina. E bibi gona vei au na ivolanivula oqo. E vakaukauataki au na nodra ivakaraitaki na taciqu vakayalo mai na veiyasa i vuravura. Au sa qai kila oqo niu sega ni vala taudua tiko, kei na kena e bibi oya na noqu lomani Jiova kei na noqu qaravi koya mai vu ni lomaqu.”​—Margaret, Poladi.

“Sa kaukaua dina na Vosa ni Kalou! Ena gauna au taura kina na ivolanivula ni 2003, au sega ni tarova rawa na wainimataqu. E vakaukauataka sara noqu vakabauta na vakasavuirogorogo kei na iyaloyalo era tabaki tu kina.”​—Darlene, Mereke.

“Na nodra bula makawa e so vei ira na tabaki ena ivolanivula e via tautauvata sara ga kei na noqu ivakarau ni bula makawa. E vakaukauataki au o Jiova meu biuta laivi kina na itovo ca. Vinaka vakalevu na tabaka mai na italanoa dina vaka oqo.”​—William, Mereke.