Eda Vakaraitaka Vakacava Nida Lomana na Kalou?

NA NODA lomana na Kalou e sega ni yalani wale ga ena noda vulica na veika e baleti koya. Me vaka era sa vakadinadinataka na tamata ni Kalou e vuravura raraba, eda na lomana dina ga na Kalou nida kila vinaka na nona itovo. Ena qai dei sara na loloma oqori nida kila vinaka na veika e cata, na veika e taleitaka, kei na veika e vinakata.

E vakarautaka vakayalololoma o Jiova na nona Vosa na iVolatabu, me vakatakilai koya kina vei keda. Eda vulica gona ena ivola oya na ka e dau cakava ena duidui ituvaki e yaco. Me vaka ga na kena vakamarautaki keda na nona ivola e dua eda lomana, eda marautaka tale ga na iVolatabu ni vakamacalataki kina na veika vovou me baleta na itovo i Jiova.

Ia, me vaka eda dau raica ena noda cakacaka vakavunau, nona vakavulici e dua ena veika me baleta na Kalou e sega ni kena ibalebale ni sa na lomani koya sara kina. E kaya o Jisu vei ira e so na Jiu yalodredre ena nona gauna: “Dou sa vakasaqaqara e nai Vola Tabu; ni dou sa nanuma dou sa rawata kina na bula tawa mudu: . . . Ia ka’u sa kilai kemudou, ni sa sega ni tiko e na lomamudou na loloma vua na Kalou.” (Joni 5:39, 42) E so e vakayabaki na nodra vulica na yalololoma ni Kalou ia e sega ni levu na ka era cakava mera vakaraitaka kina nira lomani koya dina. Na vuna? Era sega ni vakasamataka vakatitobu na ibalebale ni veika dina era vulica tiko. Me kena veibasai, era sa vakadinadinataka e vica vata na milioni na tamata yalomalumalumu era vulica na iVolatabu ni sa qai tubu tiko ga nodra lomana na Kalou. Na vuna? Ni ra sa vakatotomuria tiko na ivakaraitaki i Esafa, me vaka ga eda sa cakava tiko. Ena sala cava?

Dau Vakasamataka Vakatitobu na Ka

E vakadeitaka e lomana o Esafa me lomani Jiova. E vola: “Au sa vakanananu e lomaqu.  . .  Au na nanuma na cakacaka i Jiova: au na nanuma na nomuni cakacaka mana mailiu. Au na veinanuyaka talega ki na nomuni cakacaka kecega, ka veivosakitaka na nomuni valavala.” (Same 77:6, 11, 12) Me tubu na nona lomana na Kalou e dua, sa dodonu me vakasamataka vakatitobu na sala i Jiova me vakataki koya ga na daunisame oqori.

Me kena ikuri, ena vakaukauataka na noda veiwekani kei Jiova na noda dau vakasamataka e so na ka talei eda sa sotava oti mai nida qaravi koya. E kaya na yapositolo o Paula nida “daucakacaka vata” kei na Kalou, qai talei dina na veitokani e bucini kina. (1 Korinica 3:9) E taleitaka o Jiova na noda vakaraitaka nida lomani koya, qai vakamarautaka na lomana. (Vosa Vakaibalebale 27:11) Nida kere veivuke tale ga vua qai dusimaki keda ena so na noda leqa, eda kila sara ga ni tiko vata kei keda, qai vaqaqacotaki na noda lomani koya.

Ena bucini ga na veitokani ena kedrau maliwa e rua ke rau talaucaka na veika e tu e lomadrau. Sa vaka tale ga kina nida vakaraitaka vei Jiova na vu ni noda qaravi koya, ena vaqaqacotaka na noda lomani koya. E votu mai kina vei keda na vosa i Jisu: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece, kei na nomu kaukauwa kece.” (Marika 12:30) Na cava meda cakava me dei tu ga kina na noda lomani Jiova mai vu ni lomada, vu ni yaloda, noda nanuma, kei na noda kaukaua kece?

Lomani Jiova ena Lomada Taucoko

Na lomada me vaka e vakamacalataka na iVolatabu e wili kina na ka eda gadreva, na ivakarau ni noda rai kei na ka sara ga e malele kina na lomada. O koya gona nida lomani Jiova mai vu ni lomada, eda na gadreva sara ga kina meda vakamarautaki koya vakatabakidua. (Same 86:11) Eda na vakaraitaka ni tiko vei keda na loloma oya nida veisautaka na noda itovo me salavata kei na lomana. Eda na saga tale ga meda vakatotomuria na Kalou ena noda ‘cata na ca kei na noda taura matua na ka vinaka.’​—Roma 12:9, VV.

E tara tale ga na ivakarau ni noda rai na noda lomana na Kalou. Kena ivakaraitaki, eda na rairai taleitaka na noda cakacaka se na gauna eda vakayagataka kina, ia e sa na vakabi beka kina na lomada? E sega. Me vaka nida lomani Jiova mai vu ni lomada, ena liu tiko ga na noda itavi vakaitalatala. E dina nida na via vakamarautaki ira tale ga na noda itubutubu, na watida, kei ira na noda boso ni cakacaka, ia eda na vakaraitaka noda lomani Jiova mai vu ni lomada taucoko nida vakaliuca na veika e vakamarautaki koya. Sa dodonu ga kina meda vakaliuci koya mai vu ni lomada.​—Maciu 6:24; 10:37.

Lomani Jiova Mai Vu ni Yalomu

Na “yalomu” e tukuni tiko oqori ena iVolatabu e vakaibalebaletaki sara tiko ga vei keda. Na noda lomani Jiova gona mai vu ni yaloda oya na noda vakacaucautaki koya ena noda bula da qai vakadinadinataka sara ga na noda lomani koya.

E dina ni tiko e so tale na ka eda taleitaka ni cakava, me vaka beka na vuli cakacaka, qaravi bisinisi, se na qaravi ni vuvale. Ena gauna vata oqori eda na vakaraitaka tiko ga na noda lomani Jiova mai vu ni yaloda ena noda muria na nona sala, qai biu vakatikitiki na gauna me caka kina na veika tale e so, eda na “vakasaqara taumada [kina] na matanitu ni Kalou, kei na nona yalododonu.” (Maciu 6:33) E gadrevi tale ga na gumatua meda sokalou kina mai vu ni yaloda. Eda vakaraitaka sara ga vei Jiova nida lomani koya nida gumatua ena vunautaki ni itukutuku ni Matanitu ni Kalou, e veiuqeti noda ivakamacala ena soqoni vakarisito, se nida vukei ira na tacida lotu Vakarisito. Se mani cava ga eda kitaka, meda ‘cakava tiko ga na loma ni Kalou mai vu ni yaloda.’​—Efeso 6:6.

E vakaraitaka o Jisu na nona lomana na Kalou mai vu ni yalona ena nona sega ni dau vakaunona. E vakaliuca na loma ni Kalou qai muri na veika e gadreva. E sureti keda meda vakatotomuri koya. E kaya: “Kevaka e dua sa via muri au, me kakua ni muria na lomana, ia me colata na nona kauveilatai, ka muri au.” (Maciu 16:24, 25) Nida sa sega gona ni muri lomada tale tiko, eda sa yalataki keda sara tiko ga kina vua na Kalou. E vakaraitaka oya nida sa rui lomani koya vakalevu eda sega ni qai lewai keda tale tiko, me vaka ga na ivakaraitaki ni dua na Isireli ena gauna vakaivolatabu, ni dau soli koya me nona bobula tawamudu na nona turaga ena levu ni nona lomani koya. (Vakarua 15:16, 17) Na noda yalataka gona noda bula vei Jiova e ivakadinadina ni noda lomani koya.

Lomani Jiova ena Nomu Nanuma Kece

Na noda lomani Jiova ena noda nanuma kece e kena ibalebale na noda saga ena noda igu taucoko meda kila na itovo i Jiova, nona inaki, kei na lomana. (Joni 17:3; Cakacaka 17:11) Eda vakaraitaka na noda lomani Jiova ena noda vakayagataka na kila sa tu vei keda meda vukei ira kina e so tale mera mai lomani Jiova tale ga, da qai vakavinakataka na iwalewale ni noda veivakavulici. E uqeti keda na yapositolo o Pita: “Me qai yadra tiko kina na nomuni vakasama.” (1 Pita 1:13, VV) Eda saga tale ga meda kauaitaki ira e so tale, vakauasivi o ira na tacida vakayalo. Eda na saga meda kila na veika era sotava tu, da qai vakacaucautaki ira ena gauna veiganiti se da vakacegui ira nira gadreva mera vakacegui.

Eda vakaraitaka vei Jiova nida lomani koya ena noda vakasama kece nida vakamalumalumutaka na ivakarau ni noda rai. Eda na saga me tautauvata na noda rai, eda raica na sala e vakatulewa kina o koya, da qai nuitaka ni vinaka vakaoti na nona sala. (Vosa Vakaibalebale 3:5, 6; Aisea 55:9; Filipai 2:3-7) Ia, nida sa vakaraitaka tiko na noda lomana na Kalou ena sala oqori, eda na vakayagataka vakacava na noda kaukaua?

Lomani Jiova ena Noda Kaukaua Taucoko

E levu na itabagone ena ivavakoso vakarisito era vakayagataka na nodra kaukaua mera vakacaucautaki Jiova kina. (Vosa Vakaibalebale 20:29; Dauvunau 12:1) Dua na sala era vakaraitaka kina e levu na lotu Vakarisito gone nira lomani Jiova ena nodra kaukaua taucoko, oya na nodra dau painia, na cakacaka vakaitalatala vakatabakidua. E levu na tina era cakacaka vakavunau nira lai vuli na luvedra. Era vakaraitaka na qase yalodina na nodra lomani Jiova ena nodra kaukaua taucoko nira dauveivakatawani vei ira na lewe ni ivavakoso ena gauna era qarava tale tiko ga kina na nodra vuvale. (2 Korinica 12:15) E solia na kaukaua o Jiova vei ira era nuitaki koya, me rawa kina nira vakaraitaka nodra lomani koya nira vakacaucautaki koya ena kaukaua kece ga e tu vei ira.​—Aisea 40:29; Iperiu 6:11, 12.

Ena tubu wale ga na loloma ke bucini vinaka. E gadrevi gona kina meda dau vakasama tiko ga vakatitobu. Me nanumi na veika sa cakava oti vei keda o Jiova, na cava tale ga e dodonu ga kina meda qaravi koya. Me vaka nida kawa ivalavala ca mai vei Atama, e sega vakadua ni ganiti keda na “veika sa vakarautaka na Kalou me nodra era sa lomani koya,” ia eda rawa ga ni vakaraitaka na noda lomani Jiova ena veika kece e tu vei keda. Me kua mada ga ni mudu na noda lomani koya!​—1 Korinica 2:9.

[iYaloyalo ena tabana e 20]

Eda vakaraitaka na noda lomana na Kalou ena noda itovo