Rawata Vinaka Nona iTavi na ‘Dauveiqaravi Yalodina’!

‘Sa yaco mai na gauna me tekivutaki kina na veilewai vei ira na tamata ni Kalou.’​—1 Pita 4:17, VV.

1. Cava e raica o Jisu ena gauna e lai dikevi koya kina na “dauveiqaravi”?

A DIGI koya nona “dauveiqaravi” o Jisu ena Penitiko 33 S.K., me vakarautaka na kakana vei ira na “matavuvale” ena kena gauna dodonu. Ena 1914, a buli me Tui o Jisu, sega ni dede sa kena gauna me dikevi koya kina na “dauveiqaravi.” Vakalevu ga, e raica ni “yalo dina ka vuku” na dauveiqaravi oqo. Mani lesi koya me lewa na “veika kece e tu vua.” (Maciu 24:45-47, VV) Ia e tiko tale ga na dauveiqaravi ca e sega ni yalodina, e sega tale ga ni vuku.

“Na Dauveiqaravi Ca”

2, 3. E lako mai vei na “dauveiqaravi ca,” e tekivu vakacava?

² Ni vakamacalataka koya oti na “dauveiqaravi yalo dina ka vuku” o Jisu, sa qai tukuni koya na dauveiqaravi ca. E kaya: “Kevaka e mani kaya ga e lomana na dauveiqaravi ca ko ya, ‘E na yaco vakaberabera toka mai na noqu turaga,’ ka sa mani tekivu kina me vakayaviti ira na nona i tokani, ka kana, ka gunu, ka mateni. Ni na qai yaco mai na nona turaga na tamata ko ya e na dua na siga e sega ni bau namaki koya kina, e na dua na gauna e sega ni kila, ka na totogitaki koya, ka biuti koya vata kei ira na dauveivakaisini: e na qai dau tagi kina ka vakasequruquru bati.” (Maciu 24:48-51, VV) Na vosa “dauveiqaravi ca” eda lai nanuma tale kina na vosa i Jisu me baleta na dauveiqaravi yalodina. Io, na “dauveiqaravi ca” oqo e tukuni ira tiko e so na lumuti era dau yalodina tu e liu.a Era lai ca vakacava o ira oqo?

³ Ni bera na 1914, e levu vei ira na lumuti yalodina era vakanamata mera na lai sota kei na tagane vakawati ena yabaki oya i lomalagi, ia e qai sega ni yaco na ka era namaka. Ena vuku ni ka oqo kei na so tale na veiveisau, e levu era lomararawa, qai vica era lomaca kina. E so vei ira era ‘yaviti’ ira tale na tacidra vakayalo ena vosa, ra qai tokoni ira na “daumateni,” oqo o ira na veimatalotu ni Veivanua Vakarisito.​—Aisea 28:1-3; 32:6.

4. Sala cava e totogitaki koya kina na “dauveiqaravi ca” o Jisu, o cei era vakaraitaka na yalo vata ga oya?

⁴ O ira oqo era lotu Vakarisito e liu era vakatakarakarataki koya na “dauveiqaravi ca,” qai “totogitaki” vei Jisu. Ena sala cava? Era sega ni vakadonui, qai kau tani vei ira na nodra inuinui ni bula e lomalagi. Ia era sega ni vakarusai ena gauna vata ga oya. Taumada, era na tagi tu qai vakasequruquru bati ena “butobuto etautuba” ni ivavakoso Vakarisito. (Maciu 8:12) Ena gauna oya, e so tale ga na lumuti era vakaraitaka na yalo vata ga oqori, era vakatakilakilataki me “dauveiqaravi ca,” vaka tale ga kina e so vei ira na ‘so tani tale na sipi.’ (Joni 10:16) Era tini kece ga ena “butobuto etautuba” vakayalo o ira kece na meca oqo i Karisito.

5. Ni vakatauvatani kei na “dauveiqaravi ca,” e vakacava na nona rai na dauveiqaravi yalodina ka vuku?

⁵ E tautauvata ga na veivakatovolei e sotava o koya na dauveiqaravi yalodina ka vuku kei na ka e sotava na “dauveiqaravi ca.” Ia e sega ni lomaca kina na dauveiqaravi yalodina ka vuku, e veisautaka ga na nona rai. (2 Korinica 13:11, NW) E kaukaua na nona lomani Jiova kei na nona lomani ira na tacina. E yaco kina me “duru kei na yavu ni vakavuvuli dina” ena gauna rarawataki ni “iotioti ni veisiga” oqo.​—1 Timoci 3:15; 2 Timoci 3:1, NW.

Yalewa Vuku kei na Yalewa Lialia

6. (a) Na vosa vakatautauvata cava a tukuna o Jisu me vakaraitaka na nodra vuku na nona lumuti yalodina? (b) Ni bera na 1914, na itukutuku cava era vunautaka na lumuti lotu Vakarisito?

⁶ Ni sa tukuni koya oti na “dauveiqaravi ca,” sa qai cavuta o Jisu e rua na vosa vakatautauvata me dusia na vuna era yalodina ra qai vuku kina e so na lotu Vakarisito lumuti, e so tale era na sega.b Me baleti ira na vuku, e kaya: “Ena qai vakatautauvatataki na matanitu vakalomalagi kei na goneyalewa e lewe tini, eratou sa dui kauta na nona cina, ka laki veitata kei na tagane sa qai vakawati. Ka lewe lima vei iratou sa vuku, ka lewe lima sa lialia. O iratou na lialia eratou sa kauta na nodratou veicina, a ratou sa sega ni kauta vata kei na waiwai; ia ko iratou na vuku eratou sa kauta na waiwai e na nodratou tavaya, kei na nodratou cina.” (Maciu 25:1-4) E vakatakarakarataki ira na lotu Vakarisito lumuti na tini na yalewa ni bera na 1914. Era cakacakataka na nona sa na vakarau lako mai na tagane vakawati o Jisu Karisito. Era lako yani mera “laki veitata” kei koya, ena nodra vunautaka ena doudou ni na mai cava ena 1914 “nai vakataotioti ni nodra gauna na veimatanitu.”​—Luke 21:24.

7. Gauna cava era “moce” kina na lotu Vakarisito lumuti? Ena vuku ni cava?

⁷ E dina na ka era nanuma. E mai cava ena 1914 na nodra gauna na veimatanitu, qai tauyavu kina na Matanitu ni Kalou ena veiliutaki i Jisu Karisito. Na ka oqo e vakayacori ga mai lomalagi. Ia era tekivu sotava e vuravura na kawatamata na “ca” a parofisaitaki tu mai. (Vakatakila 12:10, 12) Sa tekivu sara ga kina na veivakatovolei. Nira se sega ni kila vinaka na lotu Vakarisito lumuti na ka e yaco tiko, era nanuma kina ni sa rui “dede mai na tagane sa qai vakawati.” Na nodra veilecayaki, salavata na nodra sotava tiko na veivakacacani e vuravura, era lai malumu sara kina, voleka sara ni tu vakadua na cakacaka vakavunau. Era “sosovu kecega ka moce” vakayalo me vakataki ira ga na yalewa ena vosa vakatautauvata, me vaka tale ga era a cakava na lotu Vakarisito tawayalodina ena gauna sa ratou mate yani kina na yapositolo.​—Maciu 25:5; Vakatakila 11:7, 8; 12:17.

8. Cava e yaco era tagicaka kina: “Raica, sa lako mai na tagane sa qai vakawati”? Cava sa kena gauna mera cakava na lotu Vakarisito lumuti?

⁸ A yaco e dua na ka e sega ni namaki ena 1919. Eda wilika: “Ni sa qai lomaloma-ni-bogi na vanua, sa ia na kacikaci, Raica, sa lako mai na tagane sa qai vakawati; dou laki veitatavaki kaya. Eratou sa qai tu cake kecega na goneyalewa oqo, a ratou sa vakarautaka na nodratou cina.” (Maciu 25:6, 7) Ni se vaka me dredre kece tu na veika, sa rogo mai na kacikaci mera yavala! Ena 1918, a lako mai ena valenisoro vakayalo i Jiova o koya “nai talatala ni veiyalayalati” me mai dikeva qai vakasavasavataka na ivavakoso ni Kalou. (Malakai 3:1) Ena gauna oya, ena gadrevi vei ira na lotu Vakarisito lumuti mera lako yani mera lai veitata kei koya ena lomanibai ni valenisoro vakayalo. Na lomanibai oqori e tiko e vuravura. Sa yaco mai na gauna mera vakatetea na “rarama.”​—Aisea 60:1; Filipai 2:14, 15.

9, 10. Ena 1919, cava era “vuku” kina e so na lotu Vakarisito qai “lialia” e so tale?

⁹ Ia ni bera mada oya, era sotava na leqa e so na yalewa ena vosa vakatautauvata oqo. E kaya o Jisu: “A sa kaya ko iratou na lialia vei iratou na vuku, Solia mai vei keitou e dua na nomudou waiwai; ni sa boko na neitou cina.” (Maciu 25:8) Ke sega na waiwai ena boko na cina. Na waiwai e vakatakarakarataka na Vosa dina ni Kalou kei na yalo tabu, e vakaukauataki ira na dausokalou dina mera kauta tiko ga na rarama. (Same 119:130; Taniela 5:14) Ni bera na 1919, era saga vakaukaua na lotu Vakarisito lumuti mera kila na ibalebale ni loma ni Kalou vei ira, dina ga nira malumalumu tu. Ia era tu vakarau ga ena gauna era kacivi kina mera vakatetea na rarama.​—2 Timoci 4:2; Iperiu 10:24, 25.

¹⁰ E so vei ira na lumuti era sega ni tu vakarau mera soli ira—⁠dina ga nira vinakata mera na lai sota kei koya na tagane vakawati. Era sega tu ni vakarau ena gauna sa dodonu me tekivu kacivaki tale kina na itukutuku vinaka. (Maciu 24:14) Era bau saga mera vakataotaki ira nodra itokani era cakacaka tiko vagumatua, oqo e vaka nira kerea e so na nodra waiwai. Ena vosa vakatautauvata i Jisu, cava era cakava na yalewa vuku? Era kaya: “De se sega ni takiveilevu vei keda: e vinaka mo dou lako ga vei ira na dauveivoli, ka volia na nomudou.” (Maciu 25:9) Ena 1919, era sega ni via cakava e dua na ka na lotu Vakarisito lumuti yalodina me vakataotaka na nodra sasaga ni vakatetea na rarama. Era sa rawata vinaka kina na nodra itavi.

11. Cava e yacovi iratou na yalewa lialia?

¹¹ Sa qai tinia o Jisu: “Ni ratou sa lako [na yalewa lialia] me ratou volivoli, sa tadu mai na tagane sa qai vakawati; ia ko iratou sa vakarau oti tu, eratou sa curu vata kaya ki na kana magiti ni vakawati: a sa qai sogo na katuba. Sa qai lako talega mai emuri ko iratou na goneyalewa ko ya, ka kaya, Noqu Turaga, Noqu Turaga, dolavi keitou. A sa vosa ko koya, ka kaya, Au sa kaya vakaidina vei kemudou, au sa sega ni kilai kemudou.” (Maciu 25:10-12) E so gona era sega tu ni vakarau ena gauna e yaco mai kina na tagane vakawati. Era sega ni rawata na nodra itavi, era sega ni vakadonui mera tiko ena kana magiti ni vakamau e lomalagi. Sa vakalololoma dina!

Na Vosa Vakatautauvata me Baleta na Taledi

12. (a) Na vosa vakatautauvata cava ni yalodina a tukuna o Jisu? (b) O cei na tamata a lako i “vanua tani”?

¹² Ni sa tukuna oti o Jisu na vosa vakatautauvata me baleta na vuku, sa qai tukuna na vosa vakatautauvata ni yalodina. E kaya: “Sa tautauvata ko koya kei na dua na tamata sa lako ki na dua na vanua tani, ka sa kacivi ira mada na nona tamata, ka solia vei ira na nonai yau: sa solia vua e dua e lima na taledi, vua tale e dua e rua, vua tale e dua e dua bauga: vei ira yadua me vaka sa dui rauti ira yadua: a sa qai lako sara yani.” (Maciu 25:14, 15) O Jisu ga na tamata a lako i “vanua tani” ena nona lesu i lomalagi ena 33 S.K. Ia ni bera ni lako, a solia vei ira nona tisaipeli yalodina na “nonai yau.” Ena sala cava?

13. Sala cava e vakarautaka kina o Jisu na yalava levu ni cakacaka, qai vakaroti ira nona “tamata” mera veivoli kina?

¹³ Ni se bula tu e vuravura o Jisu, a vakarautaka tu na yalava levu ni cakacaka ena nona vunautaka na itukutuku vinaka ni Matanitu ni Kalou ena veivanua e Isireli. (Maciu 9:35-38) Ni bera ni lako i “vanua tani,” a tataunaka vei iratou na nona tisaipeli yalodina na yalava ni cakacaka oya, e kaya: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.” (Maciu 28:18-20, VV) Ena vosa oqo, e sa vakaroti ira kina nona “tamata” o Jisu mera veivoli tiko me yacova ni lesu mai, “me vaka sa dui rauti ira yadua.”

14. Cava na vuna ena sega ni tautauvata kina na veika era veivolitaka na lotu Vakarisito kece?

¹⁴ Na vosa “me vaka sa dui rauti ira yadua” e vakaraitaka ni sega ni tautauvata na kedra ituvaki kei na nodra itavi na lotu Vakarisito kece ena imatai ni senitiuri. E so me vakataki Paula kei Timoci era galala tu mera cakava vakatabakidua na cakacaka vakavunau kei na veivakavulici. E so e lailai ga na ka era rawata ena vuku ni kedra ituvaki. Kena ivakaraitaki, e so vei ira na lotu Vakarisito era bobula, e so era tautauvimate, e so tale era sa qase, e so tale e tu nodra itavi vakavuvale. E vaka tale ga kina na itavi ni ivavakoso, era sega ni vakaitavi kece kina na tisaipeli. Era sega ni veivakavulici ena ivavakoso o ira na yalewa lumuti kei na so na tagane lumuti. (1 Korinica 14:34; 1 Timoci 3:1; Jemesa 3:1) Se mani vakacava na dui ituvaki era tu kina, o ira kece na tisaipeli lumuti i Karisito—⁠tagane kei na yalewa—⁠e soli vei ira na itavi mera veivoli, oya na nodra vakayagataka vinaka na ituvaki era tu kina mera vakayacora na cakacaka vakavunau. Era cakava tale ga vaka kina na tacidra era bula tu nikua.

Tekivu na Gauna ni Veidikevi!

15, 16. (a) Gauna cava ena ia kina na veilewai? (b) Era “veivoli” vakacava ena sala vovou na yalodina?

¹⁵ E tomana na vosa vakatautauvata: “Sa dede sara sa qai lako mai na nodra turaga na tamata oqori, a sa tarogi ira.” (Maciu 25:19) Sa qai tiko tawarairai o Jisu Karisito ena 1914—⁠oqo e sivi e dua na gauna balavu mai na 33 S.K. Ena 1918 ni oti e tolu veimama na yabaki, a lako mai o Jisu ena valenisoro vakayalo ni Kalou, qai vakayacori kina na vosa i Pita: ‘Sa yaco mai na gauna me tekivutaki kina na veilewai vei ira na tamata ni Kalou.’ (1 Pita 4:17, VV; Malakai 3:⁠1) Sa yaco dina mai na gauna ni veilewai.

¹⁶ Cava era cakava ena nona “taledi” na Tui o ira na tamata se o ira na lumuti era taci Jisu? Me tekivu ena 33 S.K., okati kina na veiyabaki ni bera na 1914, e levu era gumatua ni ‘veivolitaka’ na taledi i Jisu. (Maciu 25:16) Ena gauna mada ga e cabolo tu kina na iMatai ni Valu Levu, era gu ga ni qarava na Turaga. E veiganiti kina mera “veivoli” ena so tale na sala vovou o ira na yalodina. Sa yaco mai na gauna ni ivakataotioti. Sa dodonu me vunautaki e vuravura taucoko na itukutuku vinaka. Me tamusuki “na vuata kei vuravura.” (Vakatakila 14:6, 7, 14-16, VV) Mera vakasaqarai o ira na iotioti ni ilawalawa era vaka na witi, ra qai vakasoqoni tale ga “nai soqosoqo levu” se o ira na so tani tale na sipi.​—Vakatakila 7:9; Maciu 13:24-30.

17. Sala cava era ‘marau kina vata kei koya na turaga’ o ira na lotu Vakarisito lumuti yalodina?

¹⁷ E gauna marautaki na gauna ni tatamusuki. (Same 126:6) E veiganiti dina ena gauna oya na nona vakacolati ira na tacina lumuti yalodina o Jisu ena so tale na itavi ena 1919, e kaya: “Ko sa dina e na ka e vica ga, au na lesi iko mo lewa na ka e vuqa: curu ki na marau ni nomu turaga.” (Maciu 25:21, 23) Kuria oya, e sega ni katumi rawa na nona marau na Turaga ena gauna sa Tui kina ni Matanitu ni Kalou. (Same 45:1, 2, 6, 7) E marau tale ga na dauveiqaravi yalodina ni matataki koya tiko na Tui, qai tomana tiko na kena vakalevutaki na nona cakacaka e vuravura. (2 Korinica 5:20) Na nona marau e parofisaitaki ena Aisea 61:10: “Au na rekitaki Jiova vakaidina; na yaloqu ena rekitaki koya na noqu Kalou; ni sa vakasulumi au e nai sulu ni bula.”

18. Cava era sega ni rawata kina e so na nodra itavi, cava e qai yacovi ira?

¹⁸ Ka ni rarawa ni so era sega ni rawata na nodra itavi. Eda wilika: “Ko koya ka taura na taledi e dua bauga, sa lako mai ka kaya, Noqu Turaga, au sa kilai iko, ni ko sa tamata lawaki dredre, ko sa tamusuka e na vanua ko a sega ni kaburaka kina, ka kumuna mai na vanua ko a sega ni veibiuyaka kina: ia ka’u a rere kina, ka laki vunia na nomu taledi e na qele: raica, oqo na nomu sa tu tale vei iko.” (Maciu 25:24, 25) Era sega ni “veivoli” e so na lotu Vakarisito lumuti. Ni bera na 1914, era sega ni yalogu ni wasea yani vei ira na tamata na nodra inuinui, era sega tale ga ni via cakava ena 1919. Cava e qai cakava vei ira o Jisu? E kauta laivi kece na nodra itavi dokai. Era biu ena ‘butobuto e tautuba, ra tagi ra qai vakasequruquru bati’ tu kina.​—Maciu 25:28, 30.

Toso ga na Veidikevi

19. Sala cava e tomani tiko ga mai kina na veidikevi, ia na cava era vakadeitaka mera cakava na lotu Vakarisito lumuti?

¹⁹ Ni lako mai o Jisu me mai veidikevi ena 1918, e levu vei ira na lotu Vakarisito lumuti era se bera ni qaravi Jiova ena gauna oya. Era sa calata beka kina na veidikevi? E sega. A tekivu na veidikevi ena gauna era sa rawata vinaka kina vakailawalawa na lumuti na nodra itavi ena 1918/19. Ia era se dikevi tiko ga vakayadudua na lotu Vakarisito lumuti me yacova sara na gauna e sa vakataudeitaki kina ena iotioti ni gauna na nodra dregati. (Vakatakila 7:1-3) Nira kila oqo na taci Karisito lumuti, sa dei tu na lomadra mera na “veivoli” tiko ga ena yalodina. Era vakadeitaka mera vuku, me levu tiko ga na nodra waiwai me rawa ni waqa vinaka tiko ga kina na nodra cina. Era kila ni na ciqomi ira o Jisu mai lomalagi kevaka era yalodina tiko ga me yacova na nodra mate.​—Maciu 24:13; Joni 14:2-4; 1 Korinica 15:50, 51.

20. (a) Cava sa lomadra tu na so tani tale na sipi mera cakava? (b) Cava era kila na lotu Vakarisito lumuti?

²⁰ Era vakadamurimuri ira tale ga na tacidra lumuti o ira na isoqosoqo levu se o ira na so tani tale na sipi. Era kila ni salavata kei na dua na itavi bibi na nodra mai kila na loma ni Kalou. (Isikeli 3:17-21) Ena veivuke gona ni Vosa i Jiova kei na yalona tabu, e levu tiko ga kina na nodra waiwai ena nodra dau vuli vakataki ira kei na nodra dau tiko ena soqoni Vakarisito. Era vakatetea na rarama ena nodra vakaitavi ena cakacaka vakavunau kei na veivakavulici, ena ka oqo, era sa vukei ira tiko kina na tacidra lumuti ena “veivoli.” Ia era kila vinaka na lotu Vakarisito lumuti ni soli ga vei ira na taledi. Era na saumitaro ena sala era qarava tiko kina na iyau ni Turaga e vuravura. Dina ga nira le lailai sara, era na sega ni vakacolata vei ira na isoqosoqo levu na itavi oya. Oqori na vuna e liutaka tiko ga kina o koya na dauveiqaravi yalodina ka vuku na qaravi ni nona iyau na Tui, qai marautaka na nodra veitokoni kina na isoqosoqo levu. Era kila tale ga na isoqosoqo levu na nodra itavi na tacidra lumuti, e ka dokai kina vei ira mera cakacaka ena ruku ni nodra veidusimaki.

21. Na vosa cava e yaga vei ira na lotu Vakarisito kece ni bera na 1919 me yacova mai nikua?

²¹ Na rua na vosa vakatautauvata oqo e vukei keda meda kila na veika e yaco volekata na yabaki 1919 vaka kina ni sa oti, ia na kena vakasama e vakaibalebale tale ga vei ira kece na lotu Vakarisito dina ena iotioti ni veisiga oqo. Na ka a tukuna o Jisu ena icavacava ni vosa vakatautauvata me baleti iratou na yalewa, taumada e vakaibalebaletaki vei ira na lotu Vakarisito lumuti ni bera na 1919, ia e yaga vei ira kece na lotu Vakarisito na kena ivakavuvuli. Meda nanuma matua mada ga na vosa i Jisu: “Mo dou qai vakatawa, ni dou sa sega ni kila na siga, se na tiki-ni-siga.”​—Maciu 25:13.

[iVakamacala e ra]

O se Nanuma Tiko?

• Gauna cava e dikevi ira kina nona imuri o Jisu, ia na cava e raica kina?

• Cava e kune kina vei ira e so na lotu Vakarisito lumuti na yalo i koya na “dauveiqaravi ca”?

• Sala cava eda na vakaraitaka kina nida vuku vakayalo?

• Na noda muria na nodra ivakaraitaki ni yalodina na lumuti i Jisu, sala cava eda rawa tale ga kina ni “veivoli” tiko ga?

[Katona ena tabana e 16]

LESU MAI NI NAICA O JISU?

E duidui na sala e “lako mai” kina o Jisu me vaka e cavuti ena Maciu wase e 24 kei 25. E sega ni kena ibalebale oqo me “lako” sara ga mai vakatamata e vuravura. E lako mai ena nona raica na ka era cakava na kawatamata se o ira na nona imuri, mera qai lewai kina. A “lako mai” ena 1914 ena gauna sa mai tiko tawarairai kina ena nona idabedabe vakatui. (Maciu 16:28; 17:1; Cakacaka 1:11) A “lako mai” ena 1918 me vaka na italatala ni veiyalayalati, a qai mai lewai ira kina era kaya tiko nira qaravi Jiova. (Malakai 3:1-3; 1 Pita 4:17) Ena Amaketoni, ena “lako mai” me vakarusai ira na meca i Jiova.​—Vakatakila 19:11-16.

Na lako mai (se, na nona yaco mai) e tukuni ena Maciu 24:29-44 kei na 25:31-46, e dusia tiko na “veivakararawataki levu.” (Vakatakila 7:14) Ena yasana adua, na “lako” mai e tukuni ena Maciu 24:45 ina 25:30, oya na nona lewai ira na kaya tiko nira tisaipeli me tekivu mai na 1918 me lako mai. Ena sega gona ni ka vakayalomatua me tukuni, ena dua na kena ivakaraitaki mada, ni nona vakaicovitaki na dauveiqaravi yalodina, na nodra lewai na yalewa ca, kei na nona lewai o koya na dauveiqaravi gogo e vunitaka na nona taledi na Turaga, ena yaco ena gauna sa “lako mai” kina o Jisu ena rarawa levu. Sa na rawa ni kena ibalebale oya ni levu vei ira na lumuti era na sega ni yalodina, ena gadrevi kina mera sosomitaki. Ia e vakaraitaka na Vakatakila 7:3 (VV), nira sa na ‘vakatakilakilataki’ oti kece na lumuti ena gauna oya.

[iYaloyalo ena tabana e 14]

A sega ni vakalougatataki na “dauveiqaravi ca” ena 1919

[iYaloyalo ena tabana e 15]

Eratou vakarau tu na yalewa vinaka ena gauna e yaco mai kina na tagane vakawati

[iYaloyalo ena tabana e 17]

E vakaitavi tiko ena “veivoli” na dauveiqaravi yalodina

E sega ni cakava vaka kina o koya na dauveiqaravi gogo

[iYaloyalo ena tabana e 18]

Era vakatetea tiko ga na rarama o ira na lumuti kei “nai soqosoqo levu”