Na iVakananumi e Tara Nomu Bula

NI SE bula e vuravura o Jisu Karisito, a tauyavutaka e dua na ivakananumi e dokai kina na Kalou. Oqo na soqo duadua ga vakalotu a vakaroti ira kina nona imuri mera dau vakananuma. E vakatokai me iVakayakavi ni Turaga.

Kaya mada ke o raica na veika kece a yaco. Sa ratou mai tiko ena dua na tabavale e cake e Jerusalemi o Jisu kei iratou na nona yapositolo me ratou solevutaka na Lakosivia era dau vakananuma na Jiu. Ratou sa vakayagataka oti na kakana e vakarautaki ena Lakosivia, e okati e ke na sipi tavu, co gaga, madrai sega ni vakaleveni, kei na waini damudamu. E vakatalai na yapositolo sega ni yalodina o Jutasa Isikarioti, o koya ena qai soli nona Turaga. (Maciu 26:17-25; Joni 13:21, 26-30) Sa qai vo ga o Jisu kei iratou na le 11 nona yapositolo yalodina. E dua vei iratou o Maciu.

A raica o Maciu nona tauyavutaka o Jisu na iVakayakavi ni Turaga, oqo na ka e vola: “Sa taura na madrai [sega ni vakaleveni] ko Jisu, ia ni sa lotutaka oti, sa dovia, ka solia vei ira na tisaipeli, ka kaya, Taura, kania; oqo na yagoqu. Sa qai taura na bilo [waini] ko koya, ia ni sa vakavinavinaka oti, sa solia vei ira, ka kaya, Dou gunu kece kina; Oqo na noqu dra ni veiyalayalati vou sa liviraki e na vukudra e lewe vuqa, me bokoci nai valavala ca.”​—Maciu 26:26-28.

Na cava a tauyavutaka kina o Jisu na iVakayakavi ni Turaga? Na cava a vakayagataka kina na madrai sega ni vakaleveni kei na waini damudamu? E dodonu beka mera vakayagataka na madrai kei na waini na imuri kece i Karisito? Me vakayacori vakavica na iVakananumi oqo? E vakaibalebale beka ena nomu bula?