E Dodonu Beka Mo Lewe ni Dua na Lotu?

‘E SEGA ni gadrevi meu lewe ni dua na lotu seu lai lotu wasoma meu na qai vakabauta kina na Kalou!’ Oqori na nodra nanuma e vuqa me baleta na nodra lewena na lotu, se mani lotu cava. So era kaya ni sega nira volekata na Kalou nira lai lotu, ia mai na nodra sarava ga na veika buli e tu yavoliti ira. Ena gauna oqo, e dua na vakasama e sa ciqomi raraba tu, oya ni sega ni gadrevi meda lewe ni dua na lotu meda qai vakabauta kina na Kalou.

Ia, e so tale e duidui na nodra rai. Era vakabauta ni bibi dina vua e dua me lewena e dua na lotu qai lakova tale ga, ni na vakatau kina na nona veivakadonui na Kalou. Macala e ke, ni noda lewena se sega e dua na lotu, e sega ni ka mera kauai ga kina na dauvakadidike ena nodra via kila na kedra iwiliwili era lako tiko i lotu se so tale na veika e vauca na lotu. Me vaka ni vauci kina na noda veiwekani kei na Kalou, sega li ni dodonu meda kila na rai ni Kalou ena vakasama oqo? Na cava gona eda vulica rawa mai na nona Vosa, na iVolatabu?

Sala e Veitaratara Kina na Kalou kei Ira na Tamata ena Veigauna sa Oti

Rauta ni 4,400 na yabaki sa oti, a vakasauri na kena luvuci na vuravura taucoko. E guiguilecavi dredre na ka e yaco oya, sa qai nodra itukuni tu na tamata ena veiyasa i vuravura. Dina ni na duidui beka vakalailai na kena italanoa, ia e tiko ga na ka era tautauvata kina, oya ni ratou a bula e le vica ga kei na so na manumanu.

Eratou a digitaki vakacalaka beka ga na tamata yadua oqo me ratou bulata na veivakarusai ni Waluvu? Na ivolatukutuku ena iVolatabu e vakamacalataka ni a sega ni vaka kina. E vakavure vakasama gona, ni Kalou a sega ni tukuna yadua vei ira ni na yaco na Waluvu. A tukuna ga vei Noa, sa qai vakarogoya o Noa vei ira na lewenivanua ena gauna oya.​—Vakatekivu 6:13-16; 2 Pita 2:5.

Ena rawata wale ga na bula e dua ke lewena na ilawalawa lailai oqo eratou a veitokoni, kei na nona tu vakarau me ciqoma na veidusimaki ni Kalou a soli vei Noa. O ira sara mada ga na manumanu era vodo tiko ena waqa, era a bula ga ena Waluvu nira a bula tikivi iratou na ilawalawa oqo. A soli vei Noa na ivakaro matata me vakarautaka na veika e gadrevi mera na bula tiko kina na manumanu.—⁠Vakatekivu 6:17–7:8.

Ni oti e vica vata na drau na yabaki, o ira na kawa i Noa mai vei Semi na luvena era a kau vakabobula i Ijipita. Ia, a nona inaki na Kalou mera sereki ra qai lako ina vanua a yalataka vei Eparama na tukadra. Eda raica ni a sega tale ga ni vakatakila vei ira na tamata yadua, ia a vakatakila taumada ga vei rau na digitaki me liutaki ira​—o Mosese kei na tuakana o Eroni. (Lako Yani 3:7-10; 4:27-31) Nira sa sereki vakailawalawa mai Ijipita na bobula oqo, sa qai soli vei ira na Lawa ni Kalou mai na ulunivanua o Saineai, mani yaco kina mera vakatokai me matanitu o Isireli.​—Lako Yani 19:1-6.

Era na rawata wale ga na bula na Isireli yadua nira dau veimaliwai kei ira na ilawalawa vakadonui vakalou, ra qai muria na nodra veidusimaki o ira era digitaki mera liutaka na ilawalawa oqo. O ira sara mada ga na kai Ijipita yadua era vakatarai mera veimaliwai kei ira na ilawalawa e vakadonuya na Kalou. Nira biuti Ijipita gona na Isireli era a tomani ira tale ga e so na kai Ijipita, yaco kina mera vakila na nona veivakalougatataki na Kalou.​—Lako Yani 12:37, 38.

Ena imatai ni senitiuri, a tekivu vunau o Jisu qai kumuni ira vata mai na tamata mera nona tisaipeli. A veitaratara kei ira vakailawalawa, dina ni a vakamua tale ga vakayalololoma na nona veikauaitaki vua na tamata yadua ena veika era gadreva. Vei ira na le 11 na yapositolo yalodina, a kaya o Jisu: “Oi kemudou ga, dou sa dautiko vata kei au e na noqu vosota na dauveivakatovolei. Ia ka’u sa solia vei kemudou e dua na matanitu me vaka sa solia mai vei au ko Tamaqu.” (Luke 22:28, 29) E muri, a sobuti ira na tisaipeli na yalo tabu ni Kalou ena gauna era soqo vata kina vakailawalawa.​—Cakacaka 2:1-4.

Na ivakaraitaki oqo e vakamatatataka ni Kalou e dau veitaratara kei ira na nona ilawalawa tamata ena veigauna sa oti. Na vuna ga a veitaratara kina na Kalou kei ira na tamata yadua—⁠o Noa, Mosese, Jisu, kei ira tale na so—⁠mera vakadewa na nona itukutuku ina dua na ilawalawa tamata. E sega gona ni vakabekataki ni tautauvata vinaka na sala e veitaratara kina na Kalou kei ira na nona tamata nikua. Ia e votu kina e dua tale na taro: Sa dodonu beka meda lewena e dua rawa ga na isoqosoqo ni lotu? Eda na veivosakitaka na taro bibi oqo ena ulutaga e tarava.

[iYaloyalo ena tabana e 4]

Ena veigauna sa oti, e dau veitaratara na Kalou kei ira na nona ilawalawa tamata