Qara na iVakasala Yaga Duadua
E DAU taleitaki dina na bula e marautaki. Na sala ga e rawati kina na bula oqori ena vuravura veilecayaki oqo, oya me lako vata na ivakasala yaga e soli kei na kena vakamuri. Ia, e kunei nira sega ni dau yalorawarawa na tamata mera muria na ivakasala yaga. Levu era kaya ni dodonu me vakatau ina tamata yadua na ivakarau ni bula e muria. Na kena dina, e kaya na ivolatukutuku ena iVolatabu, ni o Setani, na meca levu ni veiliutaki cecere ni Kalou, a dulaka vei rau na imatai ni tamata na bula ni lewai rau ga. E koto ena Vakatekivu 3:5 na ka a kaya o Setani vei Ivi: “Sa kila na Kalou e na siga drau na kana kina [kania na kau e kilai kina na ka vinaka kei na ka ca] ena qai yadra dina na matamudrau; ia drau na vaka na Kalou, ni drau na kila na ka vinaka kei na ka ca.”
Erau a bula marau beka o Atama kei Ivi, rau qai sega ni sotava na ca ni nodrau vakararavi vakatabakidua ina nodrau nanuma ga? Dravusakulukulu. Sega ni dede rau sa sotava na ca ni nodrau vakilakila na ka vinaka mai na ka ca. Erau lekata kina na veivakadonui ni Kalou rau qai tekivu sotava na bula dredre ena vuku ni ivalavala ca, e kena itinitini na mate. (Vakatekivu 3:16-19, 23) Ena yacovi keda kece na mate. Na iVolatabu e kaya: “Sa curu ki vuravura nai valavala ca e na vuku ni tamata e lewe dua [o Atama], kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.”—Roma 5:12.
Dina ni rau a sotava o Atama kei Ivi na ca ni nodrau digidigi, ia e levu era se sega ga ni raica rawa na vinaka ni kena muri na ivakasala i koya a buli keda. Na iVolatabu e kaya ni ‘a vakavuna na Kalou’ na kena volai me “yaga” tale ga, baleta ena vukei keda meda “vakarau tu, ni sa vakarautaki ki nai valavala vinaka kecega.” (2 Timoci 3:16, 17) Eda na marau vakalevu ke da muria na ivakasala ena iVolatabu. Na bula vakavuvale e dua na vanua ena gadrevi vakalevu kina na tikina oqo.
Veidinadinati ena Bula Vakawati
E tukuni ena iVolatabu ni a tauyavutaka na Kalou me dei na bula vakawati. (Vakatekivu 2:22-24; Maciu 19:6) Kuria, na iVolatabu e cavuta “nai mocemoce e sega ni veibutakoci,” e kena ibalebale me kua ni vakadukadukalitaki na bula vakawati ena veibutakoci. (Iperiu 13:4) Ia, o na rairai kila ni gauna oqo e levu na bula vakawati era sa sega ni muria na ivakatagedegede oqo. So e sa dau nodra itovo e valenicakacaka mera wedevi ira e sega ni kedra isa. So tale era lasutaki ira na lewe ni nodra vuvale me rawa nira lai gade vata kina kei na dua erau veidomoni, ia e sega ni watina. E so sara mada ga era biuta na watidra mera lai bula vata kei na dua e gone toka vei ira, e nodra ulubale ni vakamarautaki ira ra qai sega ni vakila kina nira sa qase, me vaka na ituvaki a sotava o Verónica, a cavuti ena ulutaga sa oti.
Nona saga e dua me vakamarautaki koya ga, se mani cava ena sotava, ena sega ni rawata kina na marau dina. A vakadinadinataka oqori o Ronald. Ena nona nanuma ni na toso vinaka kina nona bula, a biuti watina me lai tauyavutaka e dua tale na vuvale kei na marama erau a veidomoni lo voli ena ono na yabaki, e sa rua oti na luvedrau. Ia, ni oti toka vakalailai nona tinia nona bula vakawati, a biuti koya na yalewa e domona! Sa qai toki o Ronald me lai vakaitikotiko kei rau na nona itubutubu. A vakamacalataka o koya na ituvaki oqo me “bula lolovira.” Oqori e dua ga na ivakaraitaki. E votu ena itovo oqo na yalo ni tawaveinanumi qai kune kina na iwiliwili levu ni veisere kei na vuvale kavoro, era vakila kina e vuqa na bula rarawa—era sotava vakatautauvata na qase kei na gone.
Ena yasana adua, e rawati na bula marau dina ke muri na ivakasala ena iVolatabu. A vakayacora vaka kina o Roberto, a kaya: “Noqu muria na ivakasala ena iVolatabu, au a sega kina ni biuta na watiqu. Eda na sega ni rawata na bula marau dina ke da vakalaiva me temaki keda e dua e sega ni keda isa, veitalia sara mada ga ke rairai vinaka. Noqu vulica na iVolatabu e vukei au meu mareqeta na kequ isa e dau tokoni au voli ena vica vata na yabaki.” A cakayaco vakalevu ena bula i Roberto na ivakasala vakaivolatabu “me kakua ni cakacaka vakailasu kina e dua vua ka watina ni sa cauravou.” (Malakai 2:15) Na ituvaki ni bula cava tale e yaga kina na ivakasala vakalou?
Nodra Tuberi na Luveda
Me baleta na nodra tuberi na gone, a takalevu ena rauta ni vasagavulu na yabaki sa oti na vakasama ni sega ni dodonu vei ira na itubutubu mera kotora e levu na vakatatabu. E vinaka mera laiva na luvedra mera vakatulewataka ga na ka mera vakasamataka se cakava. Na kena inaki me kua ni tarova na nodra vakarabailevutaka nodra kilaka. Ena so sara mada ga na vanua, e vakarautaki na koronivuli e sega na kena ituvatuva dei me rawa nira lewa ga kina na gonevuli mera lai vuli se sega, vaka kina nodra rawa ni digia tale ga na levu ni ka ni veivakalasai se veidusimaki me soli vei ira, kei na veika tale e so. E dua na koronivuli vaka oqo e kena ivakarau tudei, oya mera “vakalaivi na gone mera cakava ga na ka era vinakata qai kua ni dua na qase e vakalewai ira se tarovi ira.” Nikua, e so na dauveivakasalataki ena itovo era veiletitaka na yaga ni so na itotogi e dau soli, ena so sara mada ga na ituvaki era raica na itubutubu ni dodonu me tau na itotogi ena vuku ni nodra loloma.
Na cava e sa kune kina? E levu era vakabauta na nodra vakalaivi tu ga na gone e solia vakalevu kina vei ira na galala. Oqo na ka era nanuma ni vakavuna tiko na tubu vakalevu ni itovo kaukaua kei na vakayagataki ni wainimate gaga. E vakaraitaka e dua na vakatataro mai Mereke ni voleka ni 70 na pasede vei ira na vakatarogi era nanuma ni sega nira cakava tiko na itubutubu na veituberi era gadreva na gone kei na itabagone. Ena nodra vakamacalataka na vuna e yaco tiko kina na veivana e koronivuli kei na itovo kaukaua tale e so era cakava na itabagone, e levu era beitaka ni “sega na veidusimaki ni itubutubu.” Kevaka mada ga e sega ni sotavi kina na ka vakaloloma sara, era vakila ga na itubutubu kei ira na gone na ca ni nodra sega ni tuberi vinaka na luvedra.
Na cava e tukuna na iVolatabu me baleta na tikina oqo? E kaya na ivakasala vakaivolatabu ni dodonu me veivakavulici na itubutubu ena loloma qai dei tale ga. Na iVolatabu e kaya: “A ka lialia sa vauci e lomana na gone; a kuita ni veivakatavulici ena vakaseva tani vua.” (Vosa Vakaibalebale 22:15) Na veivakavulici kece e cakava o itubutubu e dodonu me veiganiti kei na cala e cakava o gone. Ia, e dodonu me yavutaki na veivakavulici cava ga e soli ena lewavinaka, yalomalua, kei na veinanumi. Ni oqori e ivakaraitaki ni loloma. Ena rairai cakayaco sara ke rau veivakavulici vakayalololoma na itubutubu, qai sega ni voravora.
E sa laurai vei ira e so na yaga ni kena muri na ivakasala oqo. E dua na turaga ni Mexico o Arturo e yabaki 30, e se qai vakamau oti ga, e kaya: “E vakamatatataka vei keitou vakaveitacini o tama i keitou ni tu vei rau kei Nau na dodonu ni veivakavulici ena neitou vuvale. Erau sega vakadua ni tu vakasuka ni vakavulici keitou. Ia, e dau tiko tale ga na gauna keitou dau veitalanoa kina. Niu sa uabula, au mareqeta na ivakarau ni bula e dei, au kila ni rawa ga oqo ena vuku ni veidusimaki vinaka au a tuberi kina.”
Muria na iVakasala Yaga Duadua
E kune ena Vosa ni Kalou, na iVolatabu, na ivakasala yaga duadua vua na kawatamata. Na veidusimaki e koto kina e sega ni ganita wale ga na bula vakavuvale. E vakarautaki keda tale ga ena vuqa na sala ni veivakavulici ena ka meda cakava ena vuravura era bula kina e levu era sega ni via ciqoma na iVurevure ni vuku, me dusimaka nodra bula mera vinaka kina.
Na Kalou o Jiova, na Dauveibuli, a vakadeitaka ena gusu i koya na daunisame o Tevita: “Au na vakavulici iko ka vakatakila vei iko na sala mo lako kina: ka’u na rai tiko vei iko ka tuberi iko.” (Same 32:8) Rawa beka ni o raitayaloyalotaka na kena tukuni ni wanonovi keda tiko na Dauveibuli me kua ni yacovi keda e dua na leqa? O koya gona na taro meda dui tarogi keda kina oqo: ‘Au na yalomalumalumu beka meu muria na nona veidusimaki meu na taqomaki kina?’ E tukuna vakayalololoma vei keda na nona Vosa: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.”—Vosa Vakaibalebale 3:5, 6.
Na veikilai kei Jiova e gadrevi kina na sasaga kei na yalodina, ia e rawa ni rawata oqori na kawatamata ena veivuke ni iVolatabu. Na ivakarau ni bula e vakatura o Jiova e “yalataki kina na ka ni bula oqo, kei na ka ni bula talega ena muri mai.” Oqori e dua na iyau levu nida vakasamataka na veika totoka ena sotavi kina.—1 Timoci 4:8; 6:6.
Ke o taleitaka na kilaka e volai tu ena iVolatabu kei na veivakalougatataki e sotavi ni bulataki, mo vakaliuca ena nomu bula na wiliki kei na nomu vakananuma vakatitobu na Vosa ni Kalou. Nomu cakava oqori ena vukei iko mo vorata rawa kina na ituvaki dredre nikua kei na kena o na sotava ena dua na gauna e muri. Kena ikuri, o na vulica na inuinui ni bula ena vuravura vou ni Kalou, na vanua ena vakavulici ira kece kina na tamata o Jiova qai levu tale ga na nodra vakacegu.—Aisea 54:13.
[iYaloyalo ena tabana e 5]
Na ivakasala ena iVolatabu e rawa ni vaqaqacotaka na ivau ni vakawati
[iYaloyalo ena tabana e 6]
Na ivakasala vakaivolatabu e yavu ni veidusimaki vinaka, ia e solia tale ga na galala meda marau
[iYaloyalo ena tabana e 7]
O ira na muria na ivakasala vakaivolatabu era na marautaka na ivakarau ni bula e veiraurau