Na Totoka ni Veika e Bulia o Jiova

“I Jiova, sa Ka Levu Vakaidina na Nomuni Cakacaka!”

KE DA mani vakaitikotiko ena koro se ena siti, ena ulunivanua se e baravi, era wavoliti keda tu na ibulibuli vakasakiti. E veiganiti kina na iyaloyalo ni bulibuli vakatubuqoroqoro ni Kalou o Jiova, e tabaki ena 2004 Calendar of Jehovah’s Witnesses.

O ira gona era dau vakavinavinakataka na cakacaka ni Kalou era na vakaraitaka nodra taleitaka. Kena ivakaraitaki, meda dikevi Solomoni mada. Na nona vuku “sa uasivi e na nodra vuku kecega na kai na tu-i-cake.” E kaya tale na iVolatabu: “Sa vakamacalataka na kau ko koya, sa tekivu mai na sitari mai Lepanoni ka yacova na isopi sa tubu mai na dela ni bai: a sa tukuni ira talega na manumanu e yavai va, kei na manumanu vuka, kei na ka sa qasi voli, kei na ika.” (1 Tui 4:​30, 33) Na tamai Solomoni, o Tui  Tevita, e dau vakananuma tale ga na nona cakacaka vakasakiti na Kalou. E uqeti koya gona me kaya ena domoilevu vua na nona Dauveibuli: “I Jiova, sa ka levu vakaidina na nomuni cakacaka! Ka sa caka vakavuku kecega: sa roboti vuravura na nomuni yau.”​—Same 104:24.a

Ena vinaka tale ga meda dau kauaitaka da qai vakasamataka na veika buli. Kena ivakaraitaki, de rawa nida “ta cake” da qai taroga: “Ko cei ka bulia na ka oqori?” Na Kalou ga o Jiova, o koya “sa levu na nona kaukauwa” qai “daugumatua sara”!​—Aisea 40:26.

Ena tarai keda vakacava noda vakananuma na veika e bulia o Jiova? Tolu na sala ena tarai keda kina. Ena (1) vukei keda meda vakamareqeta noda bula, (2) uqeti keda meda vukei ira na tani mera kauaitaka tale ga na veika buli, (3) yavalati keda meda kilai koya vinaka sara da qai vakavinavinakataki koya na noda Dauveibuli.

Na noda bula na tamata e uasivia sara “na manumanu sega ni vakayalo,” e rawa gona vei keda meda vakadikeva da qai vakamareqeta na veika buli e vakasakiti. (2 Pita 2:​12, VV) E rawa kina nida sarava na totoka ni vanua. Rawa tale ga nida rogoca na memela ni nodra sere na manumanu vuka. Noda vakila na toso ni gauna kei na vanua eda bula kina, e rawa nida nanuma lesu kina e so na ka guiguilecavi dredre a yaco ena noda bula. Dina ga ni sega ni uasivi na noda bula ena gauna oqo, ia e ka talei na bula!

E rawa ni vakavureki vei ira na itubutubu nira raica nodra taleitaka na luvedra na veika buli. Nodra dau taleitaka na gone na tomi qanivivili e baravi, na nodra vakamenemenea e dua na manumanu, na kakaba e vunikau! Ena vinaka gona vei ira na itubutubu mera vakamacalataka vei ira na luvedra se rau semai vakacava na veika buli kei koya na Dauveibuli. Nodra doka kei na nodra vakamareqeta na gone na ibulibuli i Jiova, ena rawa ni cakayaco vei ira ena vo ni nodra bula taucoko.​—Same 111:​2, 10.

Ke da qoroya wale ga na veika buli da qai sega ni vakalagilagi koya kina na Dauveibuli, e vakaraitaka na qiqo ni noda rai. Na parofisai i Aisea e uqeti keda meda vakananuma vakatitobu na tikina bibi oqo ena nona kaya: “Ko sa sega beka ni kila? ko sa sega ni rogoca? ko koya sa Kalou ka tawa mudu, ko Jiova, ko koya ka bulia nai yalayala kei vuravura; ena sega ni malumalumu ko koya, ena sega ni oca; sa sega ni dikevi rawa na nona vuku.”​—Aisea 40:28.

Io, e votu ena cakacaka i Jiova ni sega ni katumi rawa na nona vuku, kaukaua, kei na titobu ni nona lomani keda. Nida raica na veika totoka e tu wavoliti keda, da qai vakasamataka ni votu e kea na nona itovo o koya e bulia na veika oqori, me uqeti keda mada ga meda duavata kei na veivosa i Tevita: “Sa sega e dua . . . sa vakataki kemuni na Turaga [Jiova]; ka sa sega na cakacaka me tautauvata kei na nomuni cakacaka.”​—Same 86:8.

Eda nuidei ni o ira na tamata talairawarawa era na tomana tiko ga nodra taleitaka na veika e bulia o Jiova. Ena tawamudu noda na vulica e levu tale na ka me baleti koya. (Dauvunau 3:​11) Na levu ga ni noda kilai koya, ena vakatitobutaka tale ga na noda lomani koya na noda Dauveibuli.

[iVakamacala e ra]

[Katona ena tabana e 9]

Ra Vakacaucautaka na Dauveibuli

Era vakabauta e levu na saenitisi ni dua na itavi levu a cakava na Kalou ena kena buli na veika. E vakadinati oqo ena ivakamacala e ra:

“Na ka au taleitaka, au marautaka tale ga ena noqu vakadidike vakasaenisi, oya, ni so na gauna ena kunei ena vakadidike e dua na ka vou, au dau kaya lo, ‘Kari bagi sa qai macala ni oya na sala a bulia kina na Kalou.’ Au kauaitaka ni noqu isausau meu bau kila mada ga vakalailai na veika e tuvana tu na Kalou.”​—O Henry Schaefer, e parofesa ni chemistry.

“Nida vaqaqa se cava e vakavuna me rabailevu na maliwalala, sa na laivi ga ina tamata yadua me vakatau vua na isaunitaro oqo. Ia, ena sega ni taucoko na isaunitaro ke da sega ni okati Koya [na Kalou] ena noda veinanuyaka na tikina oqo.”​—O Edward Milne, e turaga ni Peritania, e kenadau ni vulici ni maliwalala.

“E sega ni vakamelei rawa na nona vuku na daunifika e tuvana na veika buli me veisotari vinaka na nodra cakacaka vata. Ia sa rauta, ni oqo na maweniliga ni Kalou.”​—O Alexander Polyakov, e daunifika ni Rusia.

“Ena neimami vakadikeva na veika bula, e rawa ni tukuni ni keimami sa vakilakila sara tiko ga na nona vakasama na Dauveibuli, me tauri rawa kina na iwalewale ni nona bulibuli. Me rawa tale ga ni keimami kila vinaka kina na Nona ituvatuva, sega ni neimami.”​—O Louis Agassiz, e turaga ni Mereke, e kenadau ni vulici ni veika bula.

[iYaloyalo ena tabana e 8]

Na Gentoo penguin, ena iyarabale ni Antarctic

[iYaloyalo ena tabana e 9]

Na Grand Teton National Park, e Wyoming, mai Mereke

[Credit Line]

Jack Hoehn/Index Stock Photography