Taro na Dauwiliwili

Na cava e vakatarai Tomasi kina o Jisu me tarai koya ni sa vakaturi oti, ia e sega ni vakatarai Meri Makitala me cakava vaka kina?

E so na ivakadewa makawa ni iVolatabu era vakaraitaka ni tukuna o Jisu vei Meri Makitala me kua ni tarai koya. Me kena ivakaraitaki, e kaya na noda iVolatabu Vakaviti: “Kakua ni tarai au; ni’u sa bera ni lako cake vei Tamaqu.” (Joni 20:17) Ia na vosa vakirisi e dau vakadewataki me “tarai” e kena ibalebale na “vesuka, kukuva, toboka kei na qumia.” A sega ni cata o Jisu me tarai koya o Meri Makitala, baleta ni oti ga oya e vakatarai iratou e vica na marama me ratou “taura na yavana.”​—Maciu 28:9.

E levu na ivakadewa vovou me vaka na New World Translation of the Holy Scriptures, The New Jerusalem Bible, kei na New English Bible, era vukei keda meda kila na ka e tukuna dina nira vakadewataka na vosa i Jisu oya me “kua ni vesuki au.” Cava e cavuta kina na vosa oqori o Jisu vei Meri Makitala, e dua nona itokani voleka?​—Luke 8:1-3.

De dua e lomaleqataka o Meri Makitala na nona sa vakarau gole cake i lomalagi o Jisu. Ni vinakata me tiko ga kei na nona Turaga, e mani vesuki koya toka, e sega ni via laivi koya. Ni vakadeitaka vua ni se bera na gauna me biubiu kina, e tukuna o Jisu vei Meri me kua ni vesuki koya toka, ia me lai tukuna ga vei ira na nona tisaipeli na nona sa vakaturi.​—Joni 20:17.

E duidui na nodrau veivosaki o Jisu kei Tomasi. Ni rairai o Jisu vei ira e so nona tisaipeli, a sega ni tiko o Tomasi. E muri e qai vakatitiqataka o Tomasi ni sa vakaturi o Jisu, ni kaya ni na sega ni vakabauta vakavo ga ke raica sara ga na we ni ivako qai daramaka na ligana ina sarisari i Jisu e laucoka. E rairai tale o Jisu vei ira nona tisaipeli ni oti e walu na siga. E tiko ena gauna oya o Tomasi, mani sureti koya o Jisu me tara na we ni nona mavoa.​—Joni 20:24-27.

E matata e ke ni a vosa o Jisu vei Meri Makitala baleta ni cala na nona via tarovi koya; ia me baleti Tomasi, o Jisu e vukea tiko e dua e vakatitiqa. Ena gauna ruarua oqo, e tiko na vuna vinaka e cakava kina o Jisu na ka e cakava oya.