Taro na Dauwiliwili

E rawa vakacava me okati tiko ga me Nasaraiti o Samisoni, ni oti nona tara na yagodra na tamata a vakamatea?

E Isireli makawa, e rawa ni soli koya e dua me vosa bubului me Nasaraiti ena loma ni dua na gauna.a Oqo gona e dua vei ira na vakatatabu ena lavaki vua e bubului: “Me kakua ni torova e dua na yago sa mate ko koya, e na veisiga kecega sa tawasei koya kina me nei Jiova. Me kakua ni vakatawasavasavataki koya ko koya e na vuku i tamana se tinana, e na vuku ni tuakana se tacina, se na ganena, ni sa mate e dua vei ira.” Ia vakacava ke mate “e dua na tamata ni sa tiko voleka vua”? Dina ni sega ni nakita me tara na yagonimate, ia sa na vakatawayagataka ga nona bubului me Nasaraiti. E tukuni gona kina: “Ia na veisiga eliu sa na sega ni wili.” Ena gadrevi me vakasavasavataki me qai rawa ni tekivuna tale kina nona itutu ni Nasaraiti.​​—⁠Tiko Voli mai na Lekutu 6:​6-​12.

Ia, e duatani o Samisoni ena nona yaco me Nasaraiti. Ni bera nona sucu a tukuna vei tinana na agilosi i Jiova: “Raica, ko na kunekune, ka vakasucuma e dua na gonetagane; ia ena sega ni tasi na uluna: ka ni na tawase me nona na Kalou ko koya na gone ni sa qai sucu: ia ena vakatekivu me vakabulai ira na Isireli mai na ligadra na kai Filisitia.” (Dauveilewai 13:⁠5) E sega ni vosa bubului o Samisoni me Nasaraiti. E lesi koya kina na Kalou, ena okati me Nasaraiti ena nona bula kece. Ena sega ni vauci ena vakatatabu me kua ni tarai na yagonimate. Ke mani tara vakacalaka e dua na yagonimate, sa macala ni sega ni rawa ni lai tekivuna vou tale na nona Nasaraiti, ni oya a nona ilesilesi ni se bera mada ga ni sucu. Sega ni vakabekataki gona, ni duidui toka e so na ka e vauci ira na vakatabui vakalou mera Nasaraiti kei ira era soli ira ga kina.

Vakasamataka mada na ivakaro e solia o Jiova vei ratou na lewe tolu e cavuti ena iVolatabu eratou vakatabui me Nasaraiti ena nodratou bula taucoko​​—⁠o Samisoni, o Samuela, kei Joni na Dauveipapitaisotaki. Me vaka sa cavuti oti, a vakaroti o Samisoni me kua ni tasia na uluna. A bubului tale ga o Ana me baleta na luvena e se bera ni kunekunetaki​​—⁠o Samuela: “Ka’u na qai soli koya vei Jiova e na veisiga kecega sa bula kina, ia ena tabu tasi ko koya.” (1 Samuela 1:​11) E kaya na agilosi i Jiova me baleti Joni na Dauveipapitaisotaki: “Ka na sega ni gunu waini se na yaqona.” (Luke 1:​15) Kena ikuri, “Ko Joni oqo sa vakaisulu e nai sulu vuti ni kameli, ka vau na tolona e na wa kuli-ni-manumanu; ka sa kena kakana na vodre kei na oni ni veikau.” (Maciu 3:⁠4) Dikeva ni a sega vakadua ni bau vakaroti me ratou kua ni torova na yagonimate.

A sega wale ga ni Nasaraiti o Samisoni, a dua tale ga vei ira na dauveilewai e vakatubura o Jiova me vakabulai ira na Isireli mai na ligadra era sa dauvakacacani ira. (Dauveilewai 2:​16) A tara gona kina na yagonimate ni a vakayacora tiko na itavi oqori. Dua na gauna a vakamatea o Samisoni e 30 na kai Filisitia qai luvata na nodra isulu. E muri, sa qai lai mokuti ira na meca “e na moku levu, ka sa ravusebetaki ira.” E kauta tale ga o koya e dua na kaunibati vou ni asa qai lai vakamatei ira kina e duanaudolu na tagane. (Dauveilewai 14:19; 15:​8, 15) E cakava kece oqo o Samisoni ena veivakadonui kei na veitokoni i Jiova. Sa rauta me dusi koya na iVolatabu ni ivakaraitaki vinaka ni vakabauta.​​—⁠Iperiu 11:32; 12:⁠1.

Ni tukuni ni a basuraka na laione o Samisoni “me vaka sa basuraka e dua na luve ni me,” e kena ibalebale beka ni ivalavala matau ni gauna oya na basuraki ni luve ni me?

E sega ni dua na ivakadinadina me vakaraitaka ni ivalavala matau ena nodra gauna na Dauveilewai i Isireli na basuraki ni luve ni me. E tukuna na Dauveilewai 14:6: “Sa curumi . . . [Samisoni] vakaukauwa na Yalo i Jiova, a sa basuraka ko koya [e dua na laione kaukaua] me vaka sa basuraka e dua na luve ni me, ka sa sega e dua na ka e ligana.” E rairai vosa vakatautauvata na itukutuku oqo.

E rawa ni rua na ibalebale ni matavosa “a sa basuraka ko koya.” A rairai basuraka na galegale ni laione o Samisoni, se a tiko na sala e basuraka kina na yago ni laione. Ke a basuraka na galegale ni laione, ena rawarawa sara me na cakava oqo vua na luve ni me, ni sega ni dredre oqo vua na tamata. E dusia tiko ni a rawarawa sara vei Samisoni me vakayagataka na ligana me vakamalumalumutaka kina na laione, me tauvata ga ke a dua na luve ni me. Ia, vakacava ke a basuraka o Samisoni na yago ni laione? Macala gona kina ni oqo e dua ga na vosa vakatautauvata. E dusia tiko ni a vakaukauataki Samisoni na yalo i Jiova me cakava na cakacaka ena gadrevi kina na kaukaua levu vakayago. Se mani cava a yaco, e matata ni ivakatautauvata na ka e tukuna na Dauveilewai 14:​6, e dusia tiko na veivuke i Jiova. E sega kina ni dua na ka vei Samisoni na laione kaukaua oya, ni tautauvata ga kei na ka e rawa ni cakava e dua na tamata uabula ina luve ni me.

[iVakamacala e ra]