Tukutuku Mai na Daukacivaka na Matanitu

E Lagiti o Jiova ena Nodra Dau Dina

ERA kilai na iVakadinadina i Jiova kece e veiyasa i vuravura ena nodra dau dina. Raica mada oqo na kena ivakaraitaki mai na tolu na duidui vanua.

E vakaitikotiko e Nigeria o Olusola, e dua na goneyalewa yabaki 17. Dua na siga ni lesu mai koronivuli me lako tiko i vale, e qai kunea e dua na baosi e gaunisala. Mani kauta vua na qasenivuli liu ni nona koronivuli, wilika sara o qasenivuli na levu ni ilavo qai raica ni ₦6,200 (rauta ni $75 na ilavo ni Viti). Sa qai vakasuka o qasenivuli liu vua na kena itaukei, e qasenivuli tale tiko ga. Ena levu ni nona vakavinavinaka, e solia o qasenivuli vei Olusola e ₦1,000 (rauta ni $12 na ilavo ni Viti) qai tukuna me sauma kina na nona icurucuru. Era vakalialiai koya na vo ni gonevuli nira rogoca na ka e cakava. Ni oti e vica na macawa, e lai tukuna e dua na gonevuli ni sa butakoci na nona ilavo, ra mani kerei na qasenivuli mera raica yadua na nodra taga na gonevuli. “Wawa toka e ke,” e kaya na qasenivuli vei Olusola. “Au kila ni o sega ni dau butako, me vaka ni o iVakadinadina i Jiova.” A qai kunei na ilavo vei rau e rua na cauravou, rau a vakalialiai Olusola taumada, rau mani totogitaki. E vola o Olusola: “Au marau vakalevu niu iVakadinadina i Jiova, au sega kina ni dau butako. Oqo e vakalagilagi sara ga kina o Jiova.”

Dua na siga ni biubiu mai vale o Marcelo, e dua na turaga itaukei kei Argentina, e kunea e dua na katoleta ena yasa ni nona vale. Kauta sara i vale, rau lai dolava kei watina. Rau kurabui ni rau raica e dua na uma ilavo levu, vica na credit card, kei na vica tale ga na jeke sa sainitaki oti tu, dua vei ira sa volai toka kina e duanamilioni na peso. E dua na naba ni talevoni e volai toka ena dua na dokete e tu e loma. Erau qirita sara na naba oqori vei koya na kena itaukei, ratou qai lokuca vata me gole yani ena valenicakacaka i Marcelo, me lai soli lesu kina vua na katoleta kei na ka kece e tu kina. Ni yaco yani o itaukei ni katoleta, e laurai sara ga vua na taqaya. Mani kaya na iliuliu ni cakacaka me kua ni taqaya, baleta ni iVakadinadina i Jiova o Marcelo. Me isau ni nona kunea na katoleta, e solia na kena itaukei e 20 wale ga na peso vei Marcelo (rauta ni $10 na ilavo ni Viti). E cudru sara ga kina na iliuliu ni cakacaka baleta ni qoroya vakalevu na ka a cakava o Marcelo. Vakayagataka sara na ituvaki oqo o Marcelo me vakamacalataka kina ni vinakata me dau dina ena veigauna kece ga, me vaka ni iVakadinadina i Jiova.

Oqo e dua na irogo mai Kyrgyzstan. E kunea e dua na baosi o Rinat, e dua na gonetagane yabaki ono. Na baosi oqo e nona e dua na marama eratou tiko veivolekati. E tiko kina e 1,100 na som (rauta ni $42 na ilavo ni Viti). Ni kauta lesu na baosi o Rinat vei koya na marama oqori, e wilika qai kaya vei tina i Rinat ni sa yali e 200 na som (rauta ni $9 na ilavo ni Viti). Kaya o Rinat ni a sega ni taura e dua na ilavo. Ra mani lai vaqaqara kece tale ena vanua ga a kune kina na baosi, ra qai kunea ni davo voleka toka ga kina. E kurabui sara ga na marama oya. E vakavinavinakataki Rinat kei tinana, imatai mada ga na nona vakasuka tale mai na ilavo e yali, kena ikarua na veituberi vakarisito nei tinana.