Taro na Dauwiliwili

Na cava e dusia na rarama vakacakamana e dau vakatokai ena so na gauna me Shechinah, a laurai ena Loqi Tabu Sara ena valeniveitavaki kei na valenisoro e Isireli makawa?

O Jiova, na Tama dauloloma qai dau taqomaki ira nona tamata e vakaraitaka sara ga vei ira na Isireli nira na vakila nona tiko ena kedra maliwai. Dua na sala e vakaraitaka kina oqori na ramase ni o e dau tiko volekata na vanua e dau sokaloutaki kina.

Na rarama vakasakiti oqori e vakaraitaka nona tiko tawarairai o Jiova. A laurai na rarama oqo ena Loqi Tabu Sara e tiko ena valeniveitavaki kei na valenisoro a tara o Solomoni. Na rarama vakacakamana oqori e sega sara ni kena ibalebale ni sa tiko vakatamata e kea o Jiova. E sega ni rawa ni vakaitikotiko na Kalou ena vale era tara na tamata. (2 Veigauna 6:​18; Cakacaka 17:24) Na rarama vakasakiti a vakavuna na Kalou me laurai ena nona vale tabu e ivakadei vei koya na bete levu, ia o koya me qai vakadeitaka vei ira kece na Isireli ni nona tiko tawarairai o Jiova e taqomaki ira qai vakacegui ira.

Na gauna sa volai oti kina na iVolatabu ena vosa vakaaramea, sa qai vakatokai na rarama oqo me Shechinah (shekhi·nahʹ) qai kena ibalebale “o koya e sa tiko” se “nona itikotiko.” Ia, e sega ni kune ena iVolatabu na vosa oqo, e tiko ga ena iVolatabu Vakaiperiu e vakadewataki ena vosa vakaaramea, e kilai tale ga me Targums.

Ni veidusimaki tiko o Jiova ena tara ni valeniveitavaki e kaya vei Mosese: “Mo qai vakataqara nai cabocabo-ni-bulubulu e na dela ni kato; ia mo virinoca ki loma ni kato na vunau ka’u na solia vei iko. Ia ka’u na tavaki iko maikeri, ka veivosaki kei iko mai na dela ni cabocabo-ni-bulubulu, mai na maliwa ni jerupi ruarua sa tu e dela ni kato.” (Lako Yani 25:​21, 22) Na Kato e vakamacalataki tiko oqo e tiko ena Loqi Tabu Sara, e botani ena koula. E rua na jerupi koula erau toka ena kena isogo.

E vei beka na vanua ena vosa mai kina o Jiova? E sauma ga o koya ena nona kaya vei Mosese: “Ni’u na rairai e na o e na dela ni cabocabo-ni-bulubulu.” (Vunau ni Soro 16:⁠2) E nawa tu na o oqo ena dela ni Kato tabu donuya na kedrau tadrua na jerupi koula. E sega ni tukuni ena iVolatabu na kena rewa se na kena yawa mai na deladrau na jerupi.

Na serau ni o oqo e vakararamataka na Loqi Tabu Sara. Oya ga na ivurevure ni rarama ena vanua tabu oqori. Na bete levu tale ga e bau vakila na yaga ni rarama oqori ni curuma yani na Loqi Tabu Sara ena Siga ni Veibuluti. Sa wavu sara tu ga na bete ena tikina e tiko tawarairai kina o Jiova.

E vakaibalebale beka na rarama vakacakamana oqori vei ira na lotu Vakarisito? Ena nona raivotu na yapositolo o Joni a raica e dua na koro e “sega kina na bogi.” Na koro oqo o Jerusalemi Vou, era lewena na lotu Vakarisito lumuti era vakaturi mera veiliutaki kei Jisu. Ia, e sega ni vu mai na siga se na vula na rarama ni koro ivakatakarakara oqo. Na iukuuku sara ga ni Kalou o Jiova e vakararamataka na isoqosoqo oqo, me vaka ga na Shechinah se na serau ni o e vakavuna na rarama ena Loqi Tabu Sara. Na Lami tale ga, o Jisu Karisito, e “rarama” ni koro oqo. Sa qai drodro mai na “koro” oqo na rarama vakayalo kei na veivukei me dusimaki ira na kawatamata era vakabulai mai na veimatanitu.​—⁠Vakatakila 21:​22-​25.

Ena vuku ni nona dau vakalougatataki ira vaka oqo na Kalou, era rawa tale ga ni vakadeitaka na dauveiqaravi i Jiova ni o koya e nodra iVakatawa e dau veitaqomaki qai Tamadra dauloloma.