Lako ena Vakabauta, Sega ena Raica na Ka!

“Keitou sa lako voli e na vakabauta, ka sega ga e na raica [na ka].”​—2 KORINICA 5:7.

1. Na cava e vakaraitaka ni a lako voli ena vakabauta, sega ena nona raica na ka na yapositolo o Paula?

ENA yabaki 55 S.K. sa sivi kina e rauta e 20 na yabaki na nona mai lotu Vakarisito e dua na turaga a dau vakacacani ira na lotu Vakarisito, e yacana o Saula. E sega ni vakatara na toso ni gauna me vakamalumalumutaka na nona vakabauta na Kalou. E kaukaua tiko ga na nona vakabauta dina ga ni sega ni raica rawa na veika mai lomalagi ena matana vakayago. Ni volavola vei ira na lotu Vakarisito lumuti e nodra inuinui na bula e lomalagi, e vola na yapositolo o Paula: “Keitou sa lako voli e na vakabauta, ka sega ga e na raica [na ka].”​—2 Korinica 5:7.

2, 3. (a) Eda vakaraitaka vakacava nida lako tiko ena vakabauta? (b) Na cava na ibalebale ni noda lako ena raica na ka?

² E gadrevi ena noda lako ena vakabauta meda vakabauta dina ni lewa na noda bula na Kalou. Meda vakabauta dina ni kila vinaka o koya na veika e yaga dina vei keda. (Same 119:66) Nida vakatulewataka na veika me baleta na noda bula da qai bulataka na veika oqori, meda vakasamataka tale ga na veika “eda sega ni raica.” (Iperiu 11:1, VV) Oqo e okati kina na veika e baleta na “lomalagi vou kei na vuravura vou” e yalataki. (2 Pita 3:13) Ia ke da lako voli ena raica na ka, e kena ibalebale oya ni veika eda cakava ena noda bula e vakatau sara ga ina veika eda raica ena matada vakayago. E rerevaki sara oqori baleta e rawa ni vakavuna meda sega ni kauaitaka na veika e vinakata na Kalou.​—Same 81:12; Dauvunau 11:9.

³ Se eda “qele-ni-sipi lailai,” e noda inuinui na bula e lomalagi, se eda ‘so tani tale na sipi’ e noda inuinui na bula e vuravura, e dodonu meda taura dei na ivakasala me baleta noda lako ena vakabauta, sega ena raica na ka. (Luke 12:32; Joni 10:16) Meda raica mada na kena taqomaki keda na ivakasala oqo mai na noda ‘marautaka vakalekaleka na ivalavala ca,’ na domodomoiyau, kei na kena rawa meda sega ni kauaitaka na ivakataotioti. Eda na dikeva tale ga na rerevaki ni noda lako ena raica na ka.​—Iperiu 11:25, VV.

Kua ni ‘Marautaka Vakalekaleka na iValavala Ca’

4. Na cava e digitaka o Mosese, ena vuku ni cava?

⁴ Vakasamataka mada na bula a rawa ni marautaka o Mosese, na luve i Amirami. Ni susugi vata kei ira na kawa vakatui e Ijipita makawa, a rawa sara ga vua me taura na itutu ni veiliutaki, me turaga vutuniyau, qai rogo. A rawa me kaya o Mosese: ‘Au sa vakavulici ena vuku torocake duadua kei Ijipita, au tamata kaukaua ena vosa kei na cakacaka. Keu kabita tiko ga na vuvale vakatui, au na rawa ni vakayagataka na noqu itutu me yaga vei ira na taciqu Iperiu era vakabobulataki tiko!’ (Cakacaka 7:22) Ia, e digitaka o Mosese me “vakararawataki vata kei ira na tamata ni Kalou.” Baleta? Na cava e uqeti Mosese me vakanadakuya na veika kece e rawa ni solia vua o Ijipita? E sauma na iVolatabu: “Na vakabauta, e a biuti Ijipita kina ko koya [Mosese] ka sega ni rerevaka na cudru ni tui; e vaka ga e a sa raici koya sara tiko na Kalou sa tabogo.” (Iperiu 11:24-27, VV) Na nona vakabauta dei o Mosese ni na saumi ira na caka dodonu o Jiova e vukei koya me vakanadakuya na ivalavala ca kei na marau e lekaleka ga.

5. E uqeti keda vakacava na ivakaraitaki i Mosese?

⁵ E dau levu tale ga na gauna e vinakati meda vakatulewataka na veika vaka oqo: ‘E dodonu beka meu biuta e so na itovo e sega sara ni salavata kei na ivakavuvuli vakaivolatabu? Meu taura beka na cakacaka e saulevu ia ena vakaleqa na noqu toso vakayalo?’ E uqeti keda na ivakaraitaki i Mosese me kua ni tiko vei keda na rai lekaleka ni vuravura oqo; ia, meda vakabauta ga na raiyawa ni nona vuku “na Kalou sa tabogo” o Jiova. Me vakataki Mosese, meda vakamareqeta tu mada ga na noda veiwekani kei Jiova me uasivia na ka kece e rawa ni solia na vuravura.

6, 7. (a) E vakaraitaka vakacava o Iso ni vinakata me lako voli ena raica na ka? (b) E idusidusi vakacava vei keda o Iso?

⁶ Vakatauvatani Mosese mada kei Iso, na luve i Aisake na peteriaki. A vinakata o Iso me vakacegui totolo na veika e gadreva. (Vakatekivu 25:30-34) A “beca na ka tabu” o Iso, e “volitaka na nona ulumatua e na kakana e dua bau.” (Iperiu 12:16) E sega ni bau vakasamataka ni nona volitaka na nona itutu vakaulumatua oya e vakaleqa na nona veiwekani kei Jiova kei na kena tarai ira tale ga na nona kawa. E sega ni tu vua na rai vakayalo. E sega ni kauaitaka o Iso na vosa ni yalayala ni Kalou, e raica tu ga vakamamada. E lako voli ena raica na ka, sega ena vakabauta.

⁷ E idusidusi vei keda ena gauna oqo na ka e cakava o Iso. (1 Korinica 10:11, VV) Me kua ni moica na noda vakatulewataka na veika lelevu se veika lalai, na rai ni vuravura i Setani e dau uqeta meda taura sara ga ena gauna oqo na veika eda vinakata. Meda dui tarogi keda mada: ‘Sa vakilai tiko beka ena noqu vakatulewa na rai a tu vei Iso? Keu vakaliuca na veika au vinakata ena gauna oqo, e kena ibalebale beka oya niu na biuta na veika vakayalo me ikarua ni ka? Ena vakaleqa beka na noqu veiwekani kei na Kalou kei na noqu rawata na bula e yalataki na noqu vakatulewa oqo? Na ivakaraitaki cava au sa vakaraitaka tiko vei ira tale e so?’ Ke vakaraitaka na noda taleitaka na veika tabu na veika eda digitaka, ena vakalougatataki keda o Jiova.​—Vosa Vakaibalebale 10:22.

Kua ni Coriti ena Domodomoiyau

8. Na ivakasala cava e soli vei ira na lotu Vakarisito mai Leotisea, na cava meda kauaitaka kina?

8 Ena raivotu a soli vua na yapositolo o Joni ni vakarau cava na imatai ni senitiuri, a tauca kina o Jisu Karisito sa vakalagilagi oti e dua na ivakasala ina ivavakoso o Leotisea, e Esia Lailai. E ivakasala me baleta na kena qarauni na domodomoiyau. Dina nira vutuniyau vakayago na lotu Vakarisito e Leotisea, ia era dravudravua ga vakayalo. Era sa sega ni lako tiko ena vakabauta baleta nira sa vakatara na iyau vakavuravura me vakaleqa na nodra rai vakayalo. (Vakatakila 3:14-18) E veivakaleqai tale ga na domodomoiyau ena gauna oqo. E vakamalumalumutaka na noda vakabauta qai tarova tale ga na noda ‘ciciva tiko ga’ na bula. (Iperiu 12:1) Kevaka eda sega ni qaqarauni, ena rawa ni yaco “na marau ni bula oqo” me vakaruguta na veika vakayalo se “vakamatea sara ga vakadua.”​—Luke 8:14, NW.

9. E taqomaki keda vakacava na noda lomavakacegu ena veika e tu vei keda kei na noda vakavinavinakataka na kakana vakayalo?

⁹ Ena taqomaki keda vakayalo na noda lomavakacegu ga ena veika e tu vei keda. Meda kua ni vakayagataka taucoko na veika e solia o vuravura ena noda lai vutuniyau vakayago. (1 Korinica 7:31; 1 Timoci 6:6-8) Eda na marautaka na parataisi vakayalo ena gauna oqo kevaka eda lako tiko ena vakabauta, sega ena raica na ka. Nida kania tiko na kakana vakayalo e bulabula, eda na sega li ni ‘sere ni sa marau na lomada’? (Aisea 65:13, 14) Eda marautaka tale ga na noda veimaliwai kei ira era vuataka na vua ni yalo ni Kalou. (Kalatia 5:22, 23) O koya gona e bibi meda marautaka na nona vakacegui keda tiko vakayalo o Jiova.

10. Na taro cava soti meda dui tarogi keda kina?

¹⁰ Oqo e so na taro meda dui tarogi keda kina: ‘E bibi vakacava na iyau vakayago ena noqu bula? Au vakayagataka tiko beka na noqu iyau vakayago ena marau se meu tokona kina na sokalou dina? Na cava au marautaka vakalevu duadua? Na vulici ni iVolatabu kei na veimaliwai ena gauna ni soqoni vakarisito, se na gade ena muanimacawa meu sega kina ni cakava na itavi ni lotu Vakarisito? Au dau lokuca e levu na muanimacawa me baleta na marau se au vakayagataka na gauna oqori ena cakacaka vakavunau kei na veicakacaka tale e so e baleta na sokalou savasava?’ Noda lako ena vakabauta e vauci kina na noda ogaoga ena cakacaka ni Matanitu ni Kalou da qai nuitaka dei na vosa ni yalayala i Jiova.​—1 Korinica 15:58, VV.

Nanuma Tiko na iVakataotioti

11. E vukei keda vakacava na noda lako ena vakabauta meda nanuma tiko na voleka ni ivakataotioti?

¹¹ Noda lako tiko ena vakabauta ena vukei keda meda kua ni vakabauta ni se yawa na ivakataotioti se ena sega na ivakataotioti. Nida sega ni vakataki ira na vakatitiqataka na parofisai ena iVolatabu, eda raica rawa ga ni veika e yaco tiko e vuravura ena gauna oqo sa parofisaitaki oti tu ena Vosa ni Kalou. (2 Pita 3:3, 4) Me kena ivakaraitaki, e sega li ni vakaraitaka na nodra rai kei na nodra itovo na tamata nida sa bula tiko ena “iotioti ni veisiga”? (2 Timoci 3:1-5, NW) Eda raica rawa ena noda vakabauta ni veika e yaco tiko e vuravura nikua e sega ni tokaruataki tiko kina na veika sa yaco oti. Ia era ‘ivakatakilakila ni nona sa tiko o Karisito, kei na ivakataotioti kei vuravura.’​—Maciu 24:1-14, NW.

12. E vakayacori vakacava ena imatai ni senitiuri na vosa i Jisu ena Luke 21:20, 21?

¹² Vakasamataka mada e dua na ka e yaco ena imatai ni senitiuri S.K. e via tautauvata kei na noda gauna. Ni se bula tiko e vuravura o Jisu Karisito, a vakasalataki ira na nona imuri: “Ni dou sa raica ni ra sa vakavolivoliti Jerusalemi na veimataivalu, dou kila sara ni sa voleka mai na kena vakarusai. Me ra qai dro ko ira na tiko e Jiutia ki na veiulunivanua; me ra qai laivi mai loma ni koro ko ira era tiko kina.” (Luke 21:20, 21, VV) E vakayacori na parofisai oqori ena nona vakavolivoliti Jerusalemi ena 66 S.K. na mataivalu ni Roma e liutaka mai o Cestius Gallus. Nodra vakasuka vakasauri na mataivalu oqori e solia na gauna vei ira na lotu Vakarisito mera ‘dro ina veiulunivanua.’ E lesu mai na mataivalu ni Roma ena 70 S.K. mai kaba na koro qai vakarusa na kena valenisoro. E vola o Josephus nira mate kina e sivia na duanamilioni na Jiu, ra qai kau vakabobula e 97,000. A tauca na nona lewa na Kalou ina ituvaki vakajiu ena gauna oya. O ira na lako ena vakabauta ra qai muria na ivakasala i Jisu era bula ena veivakarusai oya.

13, 14. (a) Na cava soti sa vakarau yaco? (b) Na cava meda kauaitaka kina na vakayacori ni parofisai ena iVolatabu?

¹³ Sa vakarau yaco ena gauna oqo e dua na ka vata vaka oqori. Ena vakaitavi na Matabose kei Vuravura ena kena vakatauci na lewa ni Kalou oqo. Me vaka ga ni a nakiti na mataivalu ni Roma me raica na kena rokovi na Pax Romana (Veisaututaki e Roma), na Matabose kei Vuravura nikua e nakiti tale ga me saga na veisaututaki. Dina ga ni a saga na mataivalu ni Roma me kauta mai na veisaututaki ena vuravura ena gauna oya, ia e qai vakarusai Jerusalemi tale. E vaka kina nikua, e vakaraitaka na parofisai ena iVolatabu ni o ira na mataivalu ena loma ni Matabose kei Vuravura era na raica ni veivakaleqai tiko na lotu ra na qai vakarusa na ka e vakatakarakarataki Jerusalemi tiko nikua, oya na lotu ni Veivanua Vakarisito kei na vo ni lotu era okati tale ga me Papiloni na Ka Levu. (Vakatakila 17:12-17) Io, sa voleka mera vakarusai na veilotu lasu kece ga.

¹⁴ Ni sa vakarusai na lotu lasu sa na qai tekivu na veivakararawataki levu. Ni vakarau cava na veivakararawataki levu, ena qai vakarusai na ivovo kece ni ituvaki ca kei vuravura. (Maciu 24:29, 30; Vakatakila 16:14, 16) Kevaka eda lako tiko ena vakabauta eda na kauaitaka na kena sa vakayacori tiko na parofisai ena iVolatabu. Eda na sega ni vakacalai meda vakabauta ni na vakayagataka na Kalou me kauta mai na bula veisaututaki e dua na isoqosoqo era vakaduria na tamata me vaka na Matabose kei Vuravura. O koya gona, e sega li ni dodonu meda vakaraitaka ena noda bula na noda vakabauta dina ni “sa voleka mai na siga i Jiova na siga ka uasivi”?​—Sefanaia 1:14.

Cava e Rerevaki Kina na Lako ena Raica na Ka?

15. Dina ga nira vakila na veivakalougatataki i Jiova, ia e coriti ina cava na matanitu o Isireli?

¹⁵ Na veika e sotava o Isireli makawa e vakaraitaka na rerevaki ni noda vakalaiva na lako ena raica na ka me vakamalumalumutaka na noda vakabauta. Dina ga nira raica na tau ni tini na kuita e vakamadualaki ira na kalou ni Ijipita ra qai vakabulai tale ga ena Wasa Damudamu, ia era vakaraitaka na Isireli na nodra talaidredre nira bulia na luve ni bulumakau koula ra qai qarava. Era oca ni waraki Mosese ni rui “berabera ni lako sobu mai na ulu-ni-vanua.” (Lako Yani 32:1-4) Na yalototolo e vakavuna mera lai qarava kina na matakau era rawa ni raica. E vakacudrui Jiova na nodra lako ena ka era raica, e vakavuna mera mate kina “e le tolu beka na udolu na tamata.” (Lako Yani 32:25-29) E rarawataki dina ke laurai ena nona dau vakatulewa e dua e qaravi Jiova tiko ena gauna oqo ni sega ni vakararavi vei Jiova qai sega ni nuitaki koya me vakayacora na veika e yalataka!

16. E vakaleqai ira vakacava na Isireli nodra raica ga na ka?

¹⁶ E vakaleqai Isireli e so tale na ka era dau raica. Era rerevaki ira na meca baleta nira lako voli ena raica na ka. (Tiko Voli mai na Lekutu 13:28, 32; Vakarua 1:28) E vakavuna mera bolea na veiliutaki e solia na Kalou vei Mosese ra qai lulevaka na ivakarau ni bula era sotava. Ni lailai na nodra vakabauta, sa vaka e vinaka cake vei ira o Ijipita, na vanua e lewa tiko na tevoro, mai na Vanua Yalataki. (Tiko Voli mai na Lekutu 14:1-4; Same 106:24) Sa wacava na cudru i Jiova ni raica tiko mai na nodra sega ni bau doka na nona tamata na nodra Tui tawarairai!

17. Na cava e vakavuna mera besetaka kina na Isireli na veituberi i Jiova ena gauna i Samuela?

¹⁷ E coriti tale na matanitu o Isireli ina lako ena raica na ka ena gauna i Samuela na parofita. Era vinakata na tamata me dua na nodra tui era rawa ni raica. Dina ga ni vakaraitaka o Jiova ni o koya ga e nodra Tui, ia e sega ni uqeti ira oya mera lako ena vakabauta. (1 Samuela 8:4-9) Era qai sotava na ca ena vuku ni nodra cata na veidusimaki uasivi i Jiova, baleta nira vinakata mera vakataki ira na veimatanitu era tu yavoliti ira.​—1 Samuela 8:19, 20.

18. Na cava eda vulica me baleta na kena rerevaki na lako voli ena raica na ka?

¹⁸ Nida tamata i Jiova ena gauna oqo, eda vakamareqeta na noda veiwekani vinaka kei na Kalou. Eda marau ni vulica na veika sa yaco oti me rawa nida vuli kina. (Roma 15:4) Nira lako voli ga na Isireli ena ka era raica, era sa guilecava ni a tuberi ira tiko na Kalou ni vakayagataki Mosese. Kevaka eda sega ni qaqarauni, ena rawa tale ga meda guilecava ni o Jiova kei Mosese Levu Cake, o Jisu Karisito, erau liutaka tiko na ivavakoso vakarisito ena gauna oqo. (Vakatakila 1:12-16) Meda qarauna gona meda kua ni raica ga vakatamata na isoqosoqo i Jiova e vuravura. Ni rawa ni vakavuna meda dau vakalelewa da qai sega ni vakavinavinakataki ira na matataki Jiova tiko vaka kina na kakana vakayalo e vakarautaka na “dauveiqaravi yalo dina ka vuku.”​—Maciu 24:45, VV.

Vakadeitaka Mo Lako ena Vakabauta

19, 20. Na cava o sa vakadeitaka mo cakava, ena vuku ni cava?

¹⁹ E kaya na iVolatabu: “Ni da sa sega ni veivala walega kei ira na tamata, eda veivala talega kei ira era sa liu, kei ira era sa kaukauwa, kei ira era sa veitaliataka na butobuto kei vuravura oqo, kei ira na veivavakoso yalo ca e na veiyasana vakalomalagi.” (Efeso 6:12) E noda meca levu duadua o Setani na Tevoro. E nona inaki me vakarusa na noda vakabauti Jiova. Ena sega ni calata e dua na ka e rawa ni vakamuai keda tani mai na noda qarava tiko ga na Kalou. (1 Pita 5:8) Na cava ena taqomaki keda meda kua ni vakacalai ena veika e rairai ena vuravura i Setani? Noda lako ena vakabauta, sega ena raica na ka! Na noda nuitaka dei na vosa ni yalayala i Jiova ena dau taqomaki keda me kua ni ‘kasa na noda vakabauta.’ (1 Timoci 1:19) O koya gona, meda vakadeitaka mada ga nida na lako tiko ga ena vakabauta da qai nuitaka dina ni na vakalougatataki keda o Jiova. Meda masulaka tiko ga meda vakabulai mai na veika kece ga ena qai yaco.​—Luke 21:36.

²⁰ E tiko e dua e noda ivakaraitaki uasivi ena lako ena vakabauta, sega ena raica na ka. “A vakararawataki tale ga na Karisito e na vukumuni,” e kaya na iVolatabu, “sa laiva tu vei kemuni na kena i vakaraitaki, mo ni muria na we ni yavana.” (1 Pita 2:21, VV) Na ulutaga e tarava ena vakamacalataka se eda rawa ni lako vakacava me vakataki Jisu.

O se Nanuma Tiko?

• Na cava o vulica mai na nodrau ivakaraitaki o Mosese kei Iso me baleta na lako ena vakabauta, sega ena raica na ka? Rawa vakacava meda kua ni domodomoiyau?

• E vukei keda vakacava na lako ena vakabauta meda kua ni vakabauta ni se yawa na ivakataotioti?

• Cava e rerevaki kina na lako ena raica na ka?

[iYaloyalo ena tabana e 17]

E lako ena vakabauta o Mosese

[iYaloyalo ena tabana e 18]

Dau tarova beka noda cakava na cakacaka vakalou na noda dau gade vakalevu?

[iYaloyalo ena tabana e 20]

E taqomaki keda vakacava na noda muria na Vosa ni Kalou?