Na iVoli​—Votu Kina na Yalododonu ni Kalou

NI OTI nodrau talaidredre o Atama kei Ivi, a tukuna o Jiova nona inaki me na vakatubura e dua na Kawa ena butuqaqi na bukubukuniyavana. (Vakatekivu 3:15) A vakayacori oqo ena gauna era vakarubeci Jisu Karisito kina ena kaunirarawa na meca ni Kalou. (Kalatia 3:13, 16) A sega ni sucukaya na ivalavala ca o Jisu, me vaka ni a kunekunetaki vakacakamana ena kaukaua ni yalo tabu ena kete ni dua na yalewa e se bera ni taratagane. Na dra vakadavei i Jisu e rawa gona ni sereki keda mai na ivalavala ca kei na mate e dewa mai vei Atama.—Roma 5:12, 19.

E sega ni dua na ka e rawa ni tarova na Kalou Kaukaua Duadua me vakayacora na nona inaki. O koya gona, mai na rai i Jiova, ena gauna e valavala ca kina na imatai ni tamata, e vaka ga sa saumi oti tu na ivoli, e rawa gona ni veitaratara kei ira era vakabauta ni na vakayacora na nona vosa ni yalayala. E rawa kina vei ira na kawa i Atama ivalavala ca me vakataki Inoki, Noa, kei Eparama, mera lako vata kei Jiova, e rawa sara tale ga mera nona itokani, ia ena sega ga ni vakaleqa na nona savasava.—Vakatekivu 5:24; 6:9; Jemesa 2:23, VV.

E so era vakabauti Jiova era a cakava e so na ivalavala ca bibi. Dua na kena ivakaraitaki o Tui Tevita. O na rairai taroga, ‘E rawa vakacava me vakalougatataki Tui Tevita tiko ga o Jiova ni a veibutakoci kei Pacisepa, oti oya qai vakavuna nona vakamatei o Uraia na wati Pacisepa?’ Dua na vuna bibi oya ni a veivutuni dina o Tevita qai tamata vakabauta. (2 Samuela 11:1-17; 12:1-14) A rawa vua na Kalou me vosota na ivalavala ca i Tevita ni yavutaki ena isoro ena qai mai cabora o Jisu Karisito, ia ena gauna vata oqori e sega ni vakaleqa na nona lewadodonu kei na nona yalododonu. (Same 32:1, 2) Me vakadinadinataka oqo, e vakamacalataka na iVolatabu na ka uasivi duadua e rawata na ivoli i Jisu, oya “me vakatakila na nonai valavala dodonu [na Kalou] ni sa sega ni sauma nai valavala ca sa caka oti,” kei na kena e vakayacori “e na gauna oqo.”—Roma 3:25, 26.

Io, e levu na veika totoka e sobuti keda na kawatamata ena vuku ni dra i Jisu. Ena vuku ni ivoli oqo, e rawa kina ina tamata ivalavala ca mera veivutuni, ra qai veiwekani voleka kei na Kalou. Kena ikuri, na ivoli ena dolava na sala mera na vakaturi na mate ena vuravura vou ni Kalou. Era okati kina o ira na dauveiqaravi yalodina ni Kalou era a mate ni se bera ni sauma na ivoli o Jisu, vaka kina o ira era mate tu ena dela ni lecaika ra qai sega ni a qarava na Kalou. E kaya na iVolatabu: “Ni na tu cake tale ko ira . . . na yalododonu kei ira na sega ni yalododonu.” (Cakacaka 24:15) Ena gauna oya, ena yavutaki ena ivoli na nona solia na Kalou na bula tawamudu vei ira kece na tamata talairawarawa. (Joni 3:36) A vakamacalataka sara ga o Jisu: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:16) Ena sobuti keda na kawatamata na veivakalougatataki kece oqo ena vuku ni isoro ni veivoli e vakarautaka na Kalou.

Ia, na ka e vakasakiti kina na ivoli, e sega ni baleta na veika vinaka eda rawata kina. Koya e bibi duadua, oya na ka e cakava na ivoli i Karisito me baleta na yaca i Jiova. E vakadinadinataka ni o Jiova e Kalou ni lewadodonu, e rawa ni veitaratara kei ira na tamata ivalavala ca ia ena gauna vata oya e savasava tiko ga. Kevaka a vakatulewataka na Kalou me kua ni vakarautaka na ivoli, ena sega ni dua na kawa i Atama mera lako vata kei Jiova se mera nona itokani, sega mada ga ni o Inoki, o Noa, se o Eparama. E vakadinadinataka oqo na daunisame ni vola: “Kevaka ko ni sa nanuma, Jiova, nai valavala ca o cei kemuni na Turaga, me na bula rawa?” (Same 130:3) Meda vakavinavinaka gona vei Jiova ena nona tala mai e vuravura na Luvena lomani, kei na nona lomasoli o Jisu ni solia nona bula me keda ivoli!—Marika 10:45.