E Tiko Dina Li na Tevoro?

NA CAVA na nomu nanuma? O raica beka na Tevoro me dua na kabula e dau temaki ira na tamata mera cakava na ka ca, se o raica me vakaibalebaletaka ga na veika ca kece? Meda rerevaka li na Tevoro, se meda kua ni kauai ni oqori e dua ga na vakabauta butobuto se vatavatairalago? E dusia beka na vosa “tevoro” e dua na kaukaua tani e dau veivakarusai? Rawa beka ni tevoro ga na ca e tiko e loma ni tamata, me vaka era kaya e levu na daunicioloji ni gauna oqo?

E sega ni kurabuitaki na duidui ni vakasama ni tamata me baleti koya na Tevoro. Vakasamataka mada na dredre ni kena sagai me kilai na itukutuku dina me baleta e dua e sa matai ni dau vakalecalecavi koya! Vakauasivi ni saga vakaukaua tiko o koya me kua sara ga ni kilai na kena itukutuku dina. Ia, na iVolatabu e vakamacalataka ni oqori sara ga na ka e cakava tiko na Tevoro. E vakatokai koya tale ga na iVolatabu me o Setani, e kaya: “Sa vakamataliataki koya ko Setani me agilose ni rarama.” (2 Korinica 11:14) E dau vakavuna na ca na Tevoro, dau qai vukici koya me agilosi ni rarama me vakacalai ira kina na tani. Kevaka gona e vakacala rawa na tamata me vakabauta ni o koya e sega ni bula tiko, e sa qai rawa vinaka ga kina na nona inaki.

O koya gona, o cei sara mada na Tevoro? A bula vakacava? Gauna cava a tekivu kina na nona bula? E vakacalai ira tiko vakacava na tamata ena gauna oqo? Na sala cava eda rawa ni vorati koya kina? E volai tu ena iVolatabu na itukutuku dina me baleta na gauna a tekivu bula kina na Tevoro, qai sauma tale ga vakadodonu na veitaro e sa cavuti oti mai.

[iYaloyalo ena tabana e 3]

E dredre me kilai na kena itukutuku dina e dua e saga vakaukaua sara tiko me kua ni vakatakilai!