‘Meda Talairawarawa Vua na Kalou, Me Kua Ga Vua na Tamata’

‘Sa Noqu Vunibula o Jiova’

E TU vei ira na tamata i Jiova na digidigi. Era na digia beka mera talairawarawa ena veika e lavaka na iliuliu ca kei Ijipita makawa? Se ra na talairawarawa vua na Kalou o Jiova, ena nodra biuta na vanua ni veivakabobulataki oya, ra qai lako yani mera lai vakaitikotiko ena Vanua Yalataki?

Ni sega ni via sereki ira na tamata i Jiova na Fero domoqa ni Ijipita, a vakatauca kina na Kalou ena vanua o Ijipita na Tini na Kuita. Sa ivakaraitaki vakasakiti dina ni nona kaukaua! Ra sega ni tarova rawa na ka e yaco oqori na nodra veikalou lasu na kai Ijipita.

Gauna e tukuni kina vei Fero me laivi ira na tamata ni Kalou mera lako, e kaya ena veibeci: “Ko cei ko Jiova, me’u vakarorogo ki na domona, me’u laivi ira kina na Isireli me ra lako? au sa sega ni kilai Jiova, au na sega talega ni laivi ira na Isireli me ra lako.” (Lako Yani 5:2) Yaco gona me sotava o Ijipita na tini na kuita: (1) vuki na wai me dra, (2) na boto, (3) na kutu, (4) na yavusa lago, (5) tauvi ira na manumanu na mate dau veitauvi, (6) na bo e tauva na tamata kei na manumanu, (7) na ucacevata, (8) na vodre, (9) na butobuto loaloa, kei (10) na nodra mate na ulumatua kece ni Ijipita, okati kina na luve i Fero tagane. Ena veika e yaco oqori, sa qai tini laivi ira na Iperiu o Fero mera lako. E vakauqeti ira sara ga mera biubiu!​​—Lako Yani 12:​31, 32.

Totolo ga nodra sa biubiu e rauta ni tolu na milioni​​—na tagane, yalewa, kei ira na gone ni Isireli, vaka kina e dua na ivavakoso levu era duikaikai. (Lako Yani 12:​37, 38) Ia, sega ni dede ga oya, sa cemuri ira yani o Fero kei na nona mataivalu kaukaua. Kena irairai ni vaka era sa mai tu na Isireli ena dua na vanua leqataki sara ena maliwa ni Wasa Damudamu, na vanua dravuisiga, kei na mataivalu i Fero. Ia, e kaya o Mosese vei ira na Isireli: “Ni kakua ni rere, ni tu vakadua, ka raica na veivakabulai i Jiova.”​​—Lako Yani 14:​8-​14.

Me rawa nira dro na Isireli, e wasea kina vakacakamana o Jiova na wai ena Wasa Damudamu. Ia, nira cici muri tiko ga yani na kai Ijipita, a vakavuna na Kalou me suka tale mai na wai. “[N]a qiqi-ni-valu nei Fero kei na nonai valu sa biuta ko koya [Jiova] ki na wasawasa.” (Lako Yani 14:​26-​28; 15:4) Nona sega ni via dokai Jiova, e tini kina ina leqa vakaloloma na Fero dokadoka oqo.

Na ka e yaco ena Wasa Damudamu, e vakadinadinataka kina o Jiova ni o koya ena ‘qaqa ena ivalu.’ (Lako Yani 15:3) E kaya tale ga na itukutuku uqeti vakalou, ni o ira “na Isireli sa kunea na cakacaka levu ko ya ka cakava ko Jiova kivei ira na kai Ijipita; a ra sa rerevaki Jiova na tamata, ka vakabauti Jiova.” (Lako Yani 14:31; Same 136:​10-​15) Era vakaraitaka mai vu ni lomadra na nodra vakavinavinaka vua na Kalou, nira tomani Mosese na tagane ena lagati ni sere ni qaqa, kei na nona liutaki ira na yalewa ena meke na gane i Mosese, o Miriama.a

Veivakabulai Tiko ga o Jiova

E levu na ka e vulici ena veivakabulai vakasakiti oya ni Kalou ni rawa ni vakaukauataka nodra vakabauta na dauveiqaravi i Jiova nikua. Dua, oya ni sega ni vakaiyalayala na kaukaua i Jiova, qai rawa sara ga ni tokoni ira na nona tamata. Ena nodra sere ni qaqa, era a lagata kina ena marau o Mosese kei ira na Isireli: “Kemuni Jiova, sa rogovaki e na kaukauwa na ligamuni matau: kemuni Jiova, sa musumusuka na meca na ligamuni matau.”​​—Lako Yani 15:6.

Dua tale na ka e vulici, oya ni vinakata sara ga na Kalou Kaukaua Duadua me taqomaki ira nona tamata. Era a lagata na Isireli: “Sa noqu kaukauwa ko Jiova ko koya ka’u sa seretaka, a sa noqu vu-ni-bula ko koya: sa noqu Kalou ko koya, ka’u na vakavinavinaka vua.” Ia e tiko e dua tale na ka e rawa ni vulici, oya nira na guce o ira kece era saga mera saqata na inaki ni Kalou o Jiova. Ena nodra sere ni qaqa, era lagata kina na tamata e vakabulai ira na Kalou: “Ko cei vei ira na kalou sa tautauvata kei kemuni Jiova? Ko cei sa tautauvata kei kemuni, sa vakaiukuuku e na savasava, sa dokai ni sa vakavinavinakataki, sa caka mana tiko?”​​—Lako Yani 15:​2, 11.

Me vakataki Fero e Ijipita makawa, o ira tale ga na iliuliu kei vuravura nikua era vakacacani ira na tamata i Jiova. E so mada ga vei ira na iliuliu dokadoka era “na daucavuta . . . na vosa ca vei Koya sa Cecere sara ka na dauvakacacani ira na yalosavasava nei Koya sa Cecere sara.” (Taniela 7:​25; 11:36) Ia e vakadeitaka o Jiova vei ira na nona tamata: “Nai yaragi kecega sa caka me kemu ena sega ga ni yaco; kei na yame kecega ena mai veilewai kei iko ko na vakacala ga. Oqo na nodrai votavota na tamata i Jiova.”​​—Aisea 54:17.

O ira era tusaqata na Kalou era na guce, me vaka ga na nodra guce o Fero kei na nona mataivalu. Na cakacaka ni veivakabulai i Jiova, me vaka na nodra sereki na Isireli mai Ijipita, e vakadinadinataka ni dodonu me muri na ivakavuvuli eratou a cavuta na yapositolo i Jisu: “Sa kilikili kei keitou me keitou talairawarawa vua na Kalou, me kakua ga vei ira na tamata.”​​—Cakacaka 5:​29.

[iVakamacala e ra]

[Kato/iYaloyalo ena tabana e 9]

O BAU KILA?

• A vakavuna o Jiova me liwa e dua na cagi kaukaua ena bogi taucoko, me vakadiva kina na wai ena Wasa Damudamu me rawa nira takoso na Isireli.​​—Lako Yani 14:​21, 22.

• E cakacakataki ni sivia e dua na kilomita na raba ni vanua mamaca era takosova kina na Wasa Damudamu na Isireli. E veiganiti dina oqo, baleta kevaka e sega, ena sega ni rawa nira takoso kece na vica vata na milioni ena dua ga na gauna lekaleka.

[iYaloyalo ena tabana e 9]

Era sega ni tarova rawa na veikalou lasu ni Ijipita na Tini na Kuita e vakatauca mai o Jiova

[Credit Line]

All three figurines: Photograph taken by courtesy of the British Museum