Ra iTubutubu Moni iVakaraitaki Vei Ira na Luvemuni

“SA RAWA nira muduka na dauvakadidike na nodra vaqara na sala uasivi me susugi kina e dua na gone vinaka​​—sega ni kena ibalebale oya nira sa kunea, ia baleta ga ni sega ni tiko e dua na sala uasivi.” E kaya oqori na ivola na Time ni railesuva e dua na ivola me baleta na susu gone. E kauta cake mai na ivola oya ni o ira na gone era vakadamurimuria vakalevu na nodra itovo o ira era tabavata, sega ni nodra itovo na itubutubu.

Eda sega ni vakabekataka ni kaukaua dina na idre ni veimurimuri. (Vosa Vakaibalebale 13:20; 1 Korinica 15:33) E kaya o William Brown, e dua na dauvolavola ni niusipepa ni ‘dua na igu e dredre mera vorata na itabagone oya mera duidui mai vei ira na nodra itokani. . . . Na ka ca duadua e rawa ni yacovi ira oya mera duidui, e vinaka cake vei ira na mate.’ Kevaka rau sega ni vakavinakataka na itubutubu na ivakarau ni bula e vale, se rau sega ni vakayagataka e levu na gauna kei ira na luvedrau​​—oqo e rua na ituvaki sa takalevu tu ena bula osooso nikua​​—vaka ga rau sa vakalaiva tiko na itubutubu na idre ni veimurimuri me vakaleqai luvedrau.

Kena ikuri, ena “iotioti ni veisiga” oqo sa vakaleqai sara vakalevu na bula vakavuvale, me vaka ga a sa tukuni tu mai ena iVolatabu nira na ogaoga vakalevu na tamata ena qarai ni ilavo, marau, kei na veika me baleti ira ga. E dodonu beka meda kurabui nida raici ira na gone era ‘talaidredre vei nodra qase, era sega ni vakavinavinaka, era sega ni yalosavasava, era caca veiwekani [“sega ni veilomani vakaveiwekani,” NW]’?​​—2 Timoci 3:​1, NW, 2, 3.

Na “veilomani vakaveiwekani” ena kena ivakavakayagataki ena iVolatabu, e dusia na veilomani ena vuvale. Na loloma oqo e uqeti ira na itubutubu mera karoni ira na luvedra, e uqeti ira tale ga na gone mera kabiti nodra itubutubu. Ia, na gauna era sega kina ni vakaraitaka na loloma oqo na itubutubu, era sa na qai vaqara tale na gone e so na vanua mera kauaitaki kina​​—vaka levu ga vei ira na nodra icaba, era na rairai vakamurimuria sara na nodra itovo kei na nodra rai. Me kua gona ni yaco oqo ena yaga vakalevu sara ke ra bulataka na itubutubu ena loma ni vuvale na idusidusi vakaivolatabu.​​—Vosa Vakaibalebale 3:​5, 6.

Tauyavutaka na Vuvale na Kalou

Ni rau sa vauci oti o Atama kei Ivi me rau veiwatini, e solia sara na Kalou vei rau na ivakaro oqo: “Drau vakaluveni, ka tubu me lewe vuqa, ka vakatawai vuravura.” Sa tauyavu gona e ke na matavuvale​​—o tama, tina, kei ira na gone. (Vakatekivu 1:​28; 5:​3, 4; Efeso 3:​14, 15, VV) E vakacolati vei ira na itubutubu na itavi ni veisusu. Macala ni so na itovo ni veisusu eda sa kila tu ga, e sega tale ni qai vulici. Ena sala oqo eda rawa ni kaya nida tautauvata kina kei ira na manumanu. Ia, vei keda na tamata e sega ni rauta na kila eda sucukaya mai oya​—e vakarautaka gona kina o Jiova e so na idusidusi e volai me vakarawarawataka na itavi bibi vakaitubutubu. Okati kina na idusidusi me baleta na itovo kilikili, na veika e vauca na qaravi Kalou, kei na nodra vakavulici vakadodonu na gone.​​—Vosa Vakaibalebale 4:​1-4.

E kaya na Kalou vei ira na tama: “Na vosa oqo, ka’u sa vakarota vei kemuni e na siga oqo, me tiko ga e na lomamuni: ia mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.” (Vakarua 6:​6, 7; Vosa Vakaibalebale 1:​8, 9) Dikeva ni vinakati taumada vei ira na itubutubu mera tugana e lomadra na lawa ni Kalou. Na cava e bibi kina oqo? Baleta na mataqali veivakavulici e veiuqeti dina e sega ni tukuni wale ga ia e vu sara ga mai lomada. Kevaka e vu mai lomadra na itubutubu na nodra veivakavulici, sa na qai rawa ni tara na lomadra na luvedra. O ira na itubutubu vaka oqo era ivakaraitaki vinaka vei luvedra. E bibi oqo baleta ni dau totolo na nodra vakila na gone ke veicalati na ka era kaya kei na ka era cakava na itubutubu.​​—Roma 2:​21.

E tukuni vei ira na itubutubu lotu Vakarisito mera vakavulica na luvedra ena “i vakarau kei na i vakavuvuli ni Turaga” nira se gonelailai. (Efeso 6:​4, VV; 2 Timoci 3:​15) E rawa beka ni vakavulici na gonelailai? Io! E vola e dua na tina: “So na gauna eda nanuma na itubutubu nira se yalowai na gone, ia e rawa nira vulica na ka. O keda sara ga na itubutubu meda vakavulici ira vinaka.” Io, era taleitaka na gone na vuli, ra qai vulica mera dau loloma nira vakavulici vei rau na itubutubu erau qarava na Kalou. O ira na gone vaka oqo era na lomavakacegu ra qai talairawarawa ena vakatatabu e kotori me baleti ira. O koya gona, o ira na itubutubu vinaka era saga vagumatua mera itokani dauloloma, mera dauveivosaki, ra qai yalovosovoso ia era dei ena nodra veivakavulici. Ena sala oqo era vakarautaka e dua na ivakarau ni bula mera tubu vinaka kina na luvedra.a

Taqomaka na Luvemu

A vakaraitaka na nona kauai e dua na qasenivuli liu mai Jamani ena dua na ivola vei ira na itubutubu, a vola: “Keimami uqeti kemuni na itubutubu mo ni kauaitaka vakalevu na nomuni itavi ena nomuni tuberi luvemuni, mo ni kua ni vakalaiva na retioyaloyalo se nodra ilala me vakamuai luvemuni.”

Kevaka era vakalaiva na itubutubu me vakamuai luvedra na retioyaloyalo se na nodra ilala, e vaka ga nira sa vakalaiva tiko na yalo ni vuravura me lewa na nodra susugi na gone. (Efeso 2:​1, 2, VV) E saqata na yalo ni Kalou na yalo ni vuravura, me vaka na cagi kaukaua e kauta tiko na vakasama ‘vakavuravura, e vakayalomakawa, e vakatevoro,’ qai tugana ena nodra vakasama kei na lomadra o ira era sega soti ni qaseta na bula se era se yalowai. (Jemesa 3:​15) Na mataqali vakasama vaka oqo e vakacaraka na loma ni tamata me vaka na co ca. A vakamacalataka o Jisu na ka e yaco ena ka e tei e lomada, e kaya: “A tamata vinaka sa kauta mai na ka vinaka mai na lololo vinaka ni lomana: kei na tamata ca sa kauta mai na ka ca mai na lololo ca ni lomana: ni sa vosataka na gusuda na ka sa oso vakalevu kina na lomada.” (Luke 6:​45) E vakamasuti keda gona na iVolatabu: “Mo vakatawa vakavinaka sara na yalomu [“lomamu,” NW]; ni sa taka maikina nai vurevure ni bula.”​​—Vosa Vakaibalebale 4:​23.

Ia, o ira na gone era na vukivuki ga vaka na gone, so era na dau vakadrecike, era na murilomadra sara mada ga. (Vakatekivu 8:​21) Na cava era rawa ni cakava na itubutubu? “A ka lialia sa vauci e lomana na gone; a kuita ni veivakatavulici ena vakaseva tani vua,” e kaya na iVolatabu. (Vosa Vakaibalebale 22:15) E so era kaya ni oqo e ivalavala kaukaua qai sega ni ganita na gauna oqo. Na iVolatabu e sega ni vakadonuya na itovo kaukaua se na ivalavala voravora cava ga. Na “kuita” e tukuni e ke e dusia tiko na nodrau lewa na itubutubu. Ke rau mani vakatauitotogi vei luvedrau ena so na gauna, e dodonu me tau na nodrau lewa ena dela ni loloma, vaka kina ena nodrau na kauaitaka dina na nodra bula mai muri na luvedrau.​​—Iperiu 12:​7-​11.

Veivakamarautaki Vakavuvale

Eda kila kece nira gadreva na gone na qito kei na veivakamarautaki me rawa nira tubu bulabula kina. Era na vakayagataka vinaka na itubutubu yalomatua na ituvaki veiganiti kece mera veilasamaki kina kei ira na luvedra. Koya gona, era na sega wale ga ni vukei luvedra mera digitaka na ka ni veivakalasai e kilikili, ia era na vakila tale ga na gone ni taleitaki ira na nodra itubutubu.

E kaya e dua na tama e iVakadinadina ni dau qito wasoma kei luvena tagane ni lesu mai na cakacaka. E dua na tina e kaya ni ratou dau taleitaka na luvena na veimau kau, se na qito me vaka na vidividi. A nanuma lesu e dua na marama na nodratou marautaka vakavuvale na vodo basikeli. Era sa uabula kece na gone oqo, ia na nodra lomana na nodra itubutubu​​—vaka kina o Jiova​​—e se kaukaua tiko ga.

Nodra dau vakaraitaka na itubutubu nodra lomani luvedra ena ka era tukuna, na ka era cakava, ra marautaka tale ga na tiko vata kei ira, na ka oqo era na guiguilecava dredre na luvedra ena nodra bula taucoko. Me kena ivakaraitaki, e dua na iwase levu ni gonevuli era a vuli ena dua na kalasi ni Watchtower Bible School of Gilead era kaya ni dua na vuna e nodra isausau kina mera vakaliuca na cakacaka vakaitalatala vakatabakidua oya na nodra ivakaraitaki na nodra itubutubu kei na nodra dau veivakauqeti. Sa ivotavota totoka dina vei ira na gone qai kalougata levu vei ira na itubutubu! E dina ni sega ni rawa kece vei ira na gone mera cakacaka vakaitalatala vakatabakidua nira qase mai, ia era na kalougata ke ra rokova na nodra itubutubu rerevaka na Kalou ivakaraitaki vinaka, ra qai nodra itokani tale ga.​​—Vosa Vakaibalebale 22:6; Efeso 6:​2, 3.

Rawa ni Vuavuaivinaka na Nodra Veituberi na iTubutubu Le Dua

Nikua, e levu na gone e susugi ira e dua ga na itubutubu. Dina ni vakadredretaka na susu gone, ia se rawa tiko ga ni vuavuaivinaka. Era rawa ni vuli na itubutubu le dua mai na ivakaraitaki vakaivolatabu nei Unaisi, e dua na lotu Vakarisito Jiu a bula ena imatai ni senitiuri. Ni vakawati kei na dua erau sega ni vakabauta vata, kena irairai ni a sega ni tokoni Unaisi o watina ena veika e vauca na sokalou dina. Ia, e ivakaraitaki vinaka o Unaisi ena nona vakavulici Timoci. Na nona dusimaki koya vinaka ni se gonelailai, vaka kina na veitokoni i Loi na tubu i Timoci, e yaga sara vakalevu vei Timoci, ni a vorata rawa kina na nodra veivakamuai ca na nona icaba.​​—Cakacaka 16:​1, 2; 2 Timoci 1:5; 3:​15.

E levu na itabagone nikua era vakaraitaka tale ga na itovo vinaka e tiko vei Timoci, dina ga ni susugi ira na itubutubu le dua se era susugi ena vuvale e dua ga na itubutubu e tiko ena dina. Kena ivakaraitaki, o Ryan e yabaki 22 e cakacaka tiko vakaitalatala vakatabakidua, na tuakana kei na ganena eratou susu ena vuvale itubutubu le dua. E daugunu alakaolo o tamadratou qai biuti ratou ni se yabaki va o Ryan. “E dei na loma i Na me keitou qaravi Jiova tiko ga vakavuvale,” e kaya o Ryan, “qai sega ni vakalaiva e dua na ka me vakalatilati.”

“Me kena ivakaraitaki,” e kaya o Ryan, “e raica o Na me keitou vakailala ga kei ira na itabagone era ivakaraitaki vinaka. A sega ni vakatara me keitou veimaliwai kei ira e vakamacalataka na iVolatabu nira ilala ca, ena taudaku se ena loma ni ivavakoso. E vukei keitou tale ga me keitou bucina na rai dodonu ni vuli e koronivuli.” Dina ni dau osooso qai wawale ni lesu mai na cakacaka o tina i Ryan, ia e sega ga ni tarovi koya ena nona kauaitaki ratou na luvena. “E dau vinakata me keitou tiko vata, me keitou dau veivosaki,” e kaya o Ryan. “E dua na qasenivuli yalovosovoso ia e dei ena nona veivakavulici, a raica me caka wasoma na vuli iVolatabu vakavuvale. E dei tu ga ena veigauna kece na nona muria na idusidusi vakaivolatabu.”

Ni vakananuma lesu, e raica o Ryan ni cakayaco sara ga ena nona bula kei na nodrau bula na tacina na ivakaraitaki i tinadratou, na itubutubu le dua, e lomana dina na Kalou kei ratou na luvena. O koya gona, vei kemuni na itubutubu lotu Vakarisito​​—o ni vakawati se sa dawai, e tiko ena dina na kemu isa se sega​​—ni kua ni yalolailai se soro koso ena nomuni vakavulici ira na luvemuni. So na gauna, e so na itabagone era na rairai vakanadakuya na ka dina me vaka na gone cidroi. Ia ena gauna era raica kina ni tawaveinanumi qai sega ni kauaitaki ira o vuravura, era na rawa ni lesu mai. Io, “sa muria na nona yalodina na yalododonu: era sa kalougata na luvena era taravi koya.”​​—Vosa Vakaibalebale 20:7; 23:​24, 25; Luke 15:​11-​24.

[iVakamacala e ra]

[Kato/​iYaloyalo ena tabana e 11]

E Digi Rau na iTubutubu i Jisu na Kalou

Ni talai Luvena me mai bula vakatamata, a digi rau vinaka na itubutubu i Jisu o Jiova. E vakavure vakasama ni a digia e dua na veiwatini dravudravua, rau yalomalumalumu, rau qai rerevaka na Kalou. Rau sega ni vakamenemenei Jisu ia rau vakavulici koya ga ena Vosa ni Kalou, me gumatua ena cakacaka, me yalomatua tale ga. (Vosa Vakaibalebale 29:21; Lele i Jeremaia 3:​27) A vakavulici Jisu o Josefa ena cakacaka vakamatai, qai sega ni vakabekataki ni rau a kerei Jisu, na luvedrau ulumatua o Josefa kei Meri, me veivuke tale ga ena nodratou qaravi na vo ni tacina, ratou lewe ono beka.​​—Marika 6:3.

Raitayaloyalotaka mada ena gauna ni Lakosivia, ni ratou sa vakavakarau tiko na vuvale i Josefa me ratou lako i Jerusalemi, na ilakolako e caka e veiyabaki​​—e 200 taucoko na kilomita na ilakolako balavu oqo qai sega ni vakayagataki na motoka. Macala tu ga ni vuvale e le ciwa se sivia ena vakavakarau vinaka sara ga ena ilakolako balavu vaka oqo. (Luke 2:​39, 41) Dina ni dredre toka, ia e sega ni vakabekataki ni rau taleitaka sara ga vakalevu o Josefa kei Meri na gauna vaka oqori, de dua e gauna vinaka me vakavulici ratou kina na luvedrau me baleta na veika a yaco e volatukutukutaki tu ena iVolatabu.

Ni se tiko vata kei rau na nona itubutubu o Jisu, e “talairawarawa” tiko ga vei rau, ena gauna vata oya “sa tubu cake tiko ga me levu ko Jisu, ka sa toro cake tiko ga na nona vuku; a sa vinakati koya vakalevu na Kalou ka vaka tale ga kina ko ira na tamata.” (Luke 2:​51, 52, VV) Io, erau vakayacora vinaka o Josefa kei Meri na cakacaka a tataunaka vei rau o Jiova. Sa dua na ivakaraitaki vinaka dina vei ira na itubutubu nikua!​​—Same 127:3.