Na iNaki ni Kalou me Baleta na Vuravura sa Voleka ni Vakayacori

NI RAU se bula voli e Parataisi o Atama kei Ivi, sa solia vei rau na Kalou na ivakaro oqo: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka; ka lewa na ika ni waitui, kei na manumanu vuka, kei na ka bula kecega sa qasi voli e dela i vuravura.”​​—⁠Vakatekivu 1:​28.

E matata ni nodrau vakamalumalumutaki vuravura e sega ni okati ga kina na nodrau na samaka e dua na yasana lailai me rau teivaka. A okati tale ga me nodrau itavi o Atama kei Ivi, kei ira na nodrau kawa na vakatetei ni Parataisi me robota na vuravura. Rau a mani ivalavala ca na imatai ni veiwatini, rau qai vakasavi tani mai na were o Iteni. (Vakatekivu 3:​23, 24) Ia, e sega ni kena ibalebale oya ni sa na sega vakadua ni vakamalumalumutaki na vuravura.

Ena nona veivakalougatataki na Kalou, ena rawa kina vei ira na tamata talairawarawa mera na vakamalumalumutaka na vuravura. Nona vakadonui ira na Isireli ena gauna makawa na Kalou, a lai vuavuaivinaka kina na kau vuata kei na qele era teivaka. Ena vakilai tale ga na ituvaki oqo ni sa na tete vakamalua na ituvaki parataisi me roboti vuravura taucoko. Ni sa yalataki oti tu ena iVolatabu, na nona Vosa uqeti na Kalou: “Ena qai vuataka na vuana ko vuravura; ena qai vakalougatataki keda na Kalou, io, na noda Kalou.” (Same 67:⁠6) Rawa gona ni tukuni nira na bau reki sara mada ga na veiwere, ulunivanua, vunikau kei na veisenikau, na uciwai kei na wasawasa. (Same 96:​11-​13; 98:​7-9) Ena bulabula na irairai ni noda vuravura ena veimataqali kau drokadroka, na dui roka ni manumanu vuka, kei na vakasakiti ni manumanu yavaiva. Kuria oqori, na nodra na tiko kina na tamata yaloyalovinaka.

Sa Voleka na Vuravura Vou!

Eda sa tiko oqo ena ilago ni vuravura vou e yalataka vei keda na Kalou o Jiova. “Me vaka na nona vosa ni yalayala, eda sa waraka na lomalagi vou kei na vuravura vou,” e vola na yapositolo o Pita, “sa tiko kina nai valavala dodonu.” (2 Pita 3:​13) Ia, ni so e wilika na veivosa oqori i Pita, era lai tini vakabauta kina ni noda vuravura oqo ena sega ga ni rawa ni parataisi. Nira nanuma ni na duatani tale na lomalagi kei na vuravura ena sosomitaka na kena eda bula tiko kina oqo. Oya beka na ka ena yaco?

Na cava “na lomalagi vou”? E sega ni lomalagi e bulia na Kalou se na maliwalala eda dau dagava cake. (Same 19:​1, 2) Ni bera na nona cavuta o Pita na veivosa ena tikina e 13, a cavuta tiko o koya ena vica na tikina e liu na “lomalagi” vakaivakatakarakara​​—⁠oya na matanitu vakatamata era vakacolasau kina na veiliutaki. (2 Pita 3:​10-​12) Ia, era sa guce na “lomalagi” oqo ena nodra veiliutaki, sa ra na kautani ga. (Jeremaia 10:23; Taniela 2:​44) “Na lomalagi vou” gona ena veisosomitaki, oya na Matanitu ni Kalou e lewena na kena Tui o Jisu Karisito kei ira era itaukei vata kaya, o ira na 144,000 era vakaturi ina bula vakalomalagi.​​—⁠Roma 8:​16, 17; Vakatakila 5:​9, 10; 14:​1, 3.

“Na vuravura vou” e cavuta o Pita e sega ni dua tale na vuravura. A bulia na vuravura oqo o Jiova me rawa ni bula tawamudu kina na tamata. (Same 104:⁠5) Ena so na gauna e dau taurivaki ena iVolatabu na vosa “vuravura” me dusia na tamata. (Vakatekivu 11:⁠1) Na vuravura gona sa na vakarau vakarusai, oya o ira na tamata era nakita mera tiki ni ituvaki ca oqo. Ena vaka ga na nodra a rusa na tamata era sega ni doka na Kalou ena Waluvu ena siga i Noa. (2 Pita 3:​5-7) Na cava gona “na vuravura vou”? E dua na isoqosoqo tamata vou​​—⁠era qarava dina na Kalou, qai “dodonu [tale ga] na yalodra.” (Same 125:4; 1 Joni 2:​17) Ena bulia na lawa kece ni “vuravura vou” oya, “na lomalagi vou.” Era na qai vakadeitaka o ira na turaga yalodina e vuravura na kena muri na lawa kece oqori.

Ena Yaco na Veisau Vovou Qai Vakasakiti!

E totoka vakaoti na noda itikotiko e solia vei keda o Jiova ena nona a vakarautaka na vuravura me rawa nida bula kina. Ni a tukuna sara mada ga na Kalou ni “sa . . . vinaka sara” na veika a bulia. (Vakatekivu 1:​31) O Setani na Tevoro a vakavuna me rau talaidredre o Atama kei Ivi. (Vakatekivu 3:​1-5; Vakatakila 12:⁠9) Ia, sa voleka oqo me yavala na Kalou me rawa kina vei ira na tamata yalododonu mera rawata “na bula dina.” Oqori “na bula tawa mudu” e Parataisi, na ituvaki ena sega ni vakamelei rawa. (1 Timoci 6:​12, 19) Eda na dikeva mada e so na ka marautaki ena vakalougatataki kina na kawatamata ena gauna oya.

Ena gauna ni nona veiliutaki o Karisito ena duanaudolu na yabaki, ena vesu tu o Setani, ena sega gona ni rawa ni vakararawataki ira na kawatamata. E laurai oqo ena ka e kaya na yapositolo o Joni: “Ka’u a raica e dua na agilose [na agilosi uasivi o Maikeli, se o Jisu Karisito] sa lako sobu mai lomalagi, sa taura e na ligana nai dola kei bulubulu sa sega ni vakabotona ka dua na sinucodo levu. A sa laki taura na gata levu, a gata makawa, o koya oqo na Tevoro, kei Setani, a sa vesuki koya me oti mada e dua na udolu na yabaki, a sa biuti koya ki bulubulu sa sega ni vakabotona, a sa sogolati koya eloma, a sa dregata nai sogo vei koya, me kakua ni temaki ira tale na veivanua ko koya, ka me oti mada na yabaki e dua na udolu.” (Vakatakila 20:​1-3; 12:12) Matata e ke, ni gauna ena vesu tu kina o Setani, era na marautaka na tamata na nodra galala mai na nona veivakamuai, ia e levu tale na ka era na vakalougatataki kina ena ruku ni veiliutaki ni Matanitu ni Kalou.

Ena oti vakadua na ca, itovo voravora, kei na ivalu. E yalataka na iVolatabu: “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina. Era na taukena na vanua ko ira na yalododonu, ka tiko kina ka sega ni mudu.” (Same 37:​10, 11, 29) Io, na Kalou o Jiova ena ‘vakaotia na ivalu ina iyalayala kei vuravura.’ (Same 46:⁠9) E vakasakiti na veivakadeitaki oqo ni na yaco dina na sautu kei na vakacegu!

Ena binikasauru na kakana maleka qai bulabula. “Ena . . . tu e vuravura e na dela ni veiulu-ni-vanua na sila e qumi rawarawa ga; ena kurekure na vuana,” a lagata na daunisame. (Same 72:16) Ena gauna oya, ena sega tale ni dua e kolaiciba ena viakana.

Ena sega na tauvimate. Io, “na lewe ni koro ena sega ni kaya, Ka’u sa tauvi mate.” (Aisea 33:24; 35:​5, 6) Ni bula o Jisu Karisito e vuravura, a vakabulai ira na vukavuka, na lokiloki, vaka kina o ira na mataboko. (Maciu 9:​35; Marika 1:​40-​42; Joni 5:​5-9) Macala ga ni sa na qai matalau sara na veivakabulai ena cakava ena vuravura vou! Vakasamataka mada na levu ni marau nira sa na vakabulai na mataboko, didivara, lokiloki kei ira sara tale ga na galu.

Nira yacova na bula uasivi o ira na tamata talairawarawa, na qase sa na gonegone tale. Sa na sega ni yaga na matailoilo, na ititoko, idabedabe qiqi, valenibula se wainimate. Sega ni tukuni rawa na veisau ena yaco ena noda bula nida sa na vuki meda cauravou se goneyalewa tale! (Jope 33:25) Ena veimataka yadua nida yadra, sa na dua na ka na bulabula vinaka ni yagoda, da qai gu meda cakava na cakacaka eda na rekitaka.

Eda na marautaka na nodra na vakaturi na wekada lomani kei ira tale na so. (Joni 5:​28, 29; Cakacaka 24:15) Sa na dua dina na ka marautaki meda kidavaki Epeli, Noa, Eparama, Sera, Jope, Mosese, Ruci, Tevita, Ilaija, Esiteri, kei na vuqa tale! Io, era na vakaturi e lewe vica vata na milioni. Levu oqori era a sega ni se bau kilai Jiova, ia era na kidavaki ena marau, vakauasivi mai vei ira na guta mera na vakatavulici ira na vakaturi oqori mera kila na Kalou, na nona inaki, kei na Luvena, o Jisu Karisito. Na nodra kilai koya na Dauveibuli o ira na vakaturi, sa na qai roboti vuravura dina kina na veikilai kei Jiova.

Na kena ilutua, oya ni sa na tawamudu na noda qarava na Kalou dina duadua. E itavi dokai dina na noda na “qaravi Jiova e na marau,” eda na qai veitauriligataka na taravaki ni veivale totoka, na qaravi ni qele, me yacova sara nida sa na vakamalumalumutaka na vuravura. (Same 100:​1-3; Aisea 65:​21-​24) Sa na wacava na bula tawamudu ena vuravura e bulabula na kena irairai qai kune kina na vakacegu, na parataisi totoka e vakacerecerei kina na yaca tabu i Jiova!​​—⁠Same 145:21; Joni 17:⁠3.

Na iOtioti ni Veivakatovolei

Ena loma ni duanaudolu na yabaki ni nona veiliutaki o Jisu, ena vakayagataka vei ira yadua era talairawarawa na yaga ni nona isoro ni veivoli. Yaco na gauna ena cavuraki kina na ivalavala ca kece me vueti na tamata ina bula uasivi. (1 Joni 2:2; Vakatakila 21:​1-4) Ni oti vakadua na revurevu ni ivalavala ca a dewa mai vei Atama, ena yacova tale na ivakatagedegede ni Kalou na bula ni kawatamata, oya ni sa na uasivi vakayago, vakayalo, qai mai savasava yani na noda vakasama kei na noda itovo. Io, sa na qai taucoko vakaoti na “bula” ena gauna era na yacova kina na ituvaki uasivi oya. (Vakatakila 20:⁠5) Me qai sega vakacava ni na lagiti o Jiova ena kena yaco oqo, vaka kina na kena sa na yaco na vuravura me Parataisi!

Ni cava toka vakalailai na duanaudolu na yabaki ni veiliutaki i Karisito, ena sereki o Setani na Tevoro kei ira na nona timoni se agilosi ca mai na ibulubulu e sega ni vakabotona, era a sogolati tu kina ena loma ni duanaudolu na yabaki oya. (Vakatakila 20:​1-3) Oqori na gauna era na vakatarai tale kina vakadua mera vagolea tani na tamata mai vua na Kalou. Io, e so ena rawai ira na nodra gagadre ca, ia ena guce na talaidredre oqori. Ni o Jiova ena vakarusai ira na tamata era dau nanumi ira ga, vaka kina o Setani kei ira na nona timoni. Dravusakulukulu gona me qai cadra tale na ca. Sa ra na kawaboko vakadua na daucaka ca, ra qai tauca na daucaka dodonu na bula tawamudu.​​—⁠Vakatakila 20:​7-​10.

O na Bula Tale Beka ga Kina?

E tawamudu na gauna marautaki e waraki ira tu era lomana na Kalou o Jiova. Ena sega vakadua ni na vakavucesa na bula tawamudu e Parataisi. Na kena veibasai, ni sa na qai matalau ga na bula ni toso tiko na gauna, vakauasivi ni sega ni katumi rawa na ka e kila na Kalou o Jiova. (Roma 11:33) Dua na ka na levu ni veika vovou mo na vulica, qai sega ni yalani na dede ni gauna mo na vulika kina. Baleta? O na sega ni yabaki 70 se 80 ga, ia, sa na tawamudu na nomu bula.​​—⁠Same 22:26; 90:10; Dauvunau 3:​11.

Ke o lomana na Kalou, o na marautaka tale ga na cakava na lomana. Ni a vola na yapositolo o Joni: “Sa i koya oqo na lomana na Kalou, me da muria na nona i vakaro; a sa sega ni i colacola bibi na nona i vakaro.” (1 Joni 5:​3, VV) O koya gona, kua ni vakalaiva e dua na ka me tarova na nomu vakamarautaka na Kalou o Jiova ena nomu cakava na ka e dodonu. Mo nanuma deivaki na inuinui totoka e dulaka tu vei iko na Vosa ni Kalou, na iVolatabu. Saga mai vu ni lomamu mo cakava na loma i Jiova, qai toka dei ga ena sala oqori. Ke o cakava, o na rawa ni bula tale ga ena gauna sa na vakayacori kina na inaki ni Kalou e vuravura, sa na qai yaco na noda vuravura oqo me parataisi tawamudu.

[iYaloyalo ena tabana e 4]

A sega ni caka rawa na levu ni kakana era tamusuka na Isireli mai na nodra iteitei ni a vakalougatataki ira na Kalou

[iYaloyalo ena tabana e 7]

Na cava o bau nuitaka tu mo na vakalougatataki kina ena Parataisi?