‘Meda Talairawarawa Vua na Kalou, me Kua ga Vua na Tamata’

“Sa Lewa Nai Valu ko Jiova”

RAU tu vakarau e rua na mataivalu dauveimecaki me rau vala ena dua na vanua bucabuca. E 40 na siga na nodra tu rerere na mataivalu ni Isireli ni vosavakacacataki ira tiko o Koliaci, na nodra toanivala na kai Filisitia.​​—1 Samuela 17:​1-4, 16.

E bolei ira na Isireli o Koliaci ena nona kaya vakadomoilevu: “Dou digitaka mada e dua na nomudou tamata, ka me lako sobu mai vei au. Kevaka sa rawata ko koya me keirau veivala, ka sa vakamatei au, keimami na qai qaravi kemudou: ia kevaka ka’u sa gumatua vua, ka vakamatei koya, dou na qai neimami tamata, ka dou na mai qaravi keimami. . . . Au sa bolei ira edaidai na nodra veimataivalu na Isireli; solia mada mai vei au e dua na tamata, me keirau vala kaya.”​​—1 Samuela 17:​8-​10.

E dau kena ivalavala ena gauna makawa me rau matataka na nodrau dui mataivalu e rua na toanivala. O koya e qaqa vei rau sa na okati me qaqa na mataivalu e matataka mai. Ia na toanivala e bolei ira tiko oqo na Isireli e duatani sara, e tuwawa​—e rerevaki qai voravora. Ena nona vakalialia tiko na mataivalu i Jiova, sa caqeta sara tiko ga na matanimoto.

Na veivala oqo e sega ni okati ga kina e rua na mataivalu, e vauci tale ga kina na Kalou o Jiova kei na nodra kalou na kai Filisitia. E dodonu me liutaka na nona mataivalu ena yaloqaqa o Tui Saula me valuta na meca ni Kalou, ia e sega ni rawa ena levu ni nona rere.​​—1 Samuela 17:11.

Nuitaki Jiova e Dua na Cauravou

Donuya na gauna oqori, e dua na cauravou sa lumuti oti tu me tui kei Isireli a lai sikovi ratou na tacina ena mataivalu i Saula. Na yacana o Tevita. Ni rogoca na vosa ni bolebole i Koliaci, e taro sara: “Sa tamata maivei ko la na kai Filisitia tawa cili oqo, me bolea na nona mataivalu na Kalou bula?” (1 Samuela 17:​26) Ena rai i Tevita, o Koliaci a matataki ira na kai Filisitia kei na nodra kalou. Nona via vakaraitaka o Tevita ni totaki Jiova kei ira na Isireli, e bolea me vala kei koya na tuwawa lotu butobuto oya. Ia e kaya o Tui Saula: “O sa sega ni rawata mo lako vua na kai Filisitia oqo, mo drau vala kaya; ni ko sa cauravou ga.”​​—1 Samuela 17:33.

E duidui vakalevu na nodrau rai o Saula kei Tevita! E raica ga o Saula ni o Tevita e dua na ivakatawanisipi cauravou e vinakata tiko me vala kei na dua na tuwawa yalokaukaua. Ia o Tevita e raici Koliaci me dua ga na tamata e vorata tiko na Turaga Cecere o Jiova. E yavutaki na yaloqaqa i Tevita ena nona vakabauta ni Kalou ena totogitaki ira era vakalialia na yacana kei ira nona tamata. E nuitaka ga na nona kaukaua o Koliaci, ia o Tevita e nuitaki Jiova, ni tiko vua na rai vakalou.

“Ka’u sa Lako Mai Vei Iko e na Yaca i Jiova”

E tiko na vuna vinaka me nuitaki Jiova kina o Tevita. E nanuma lesu na nona vukei koya na Kalou me vakabula na nona sipi mai na dua na pera kei na dua na laione. E kila deivaki na ivakatawanisipi cauravou oqo ni na vukei koya o Jiova me vala kei koya na meca rerevaki ni Filisitia. (1 Samuela 17:​34-​37) Na iyaragi e vakayagataka o Tevita me lai vala kei Koliaci e dua ga na irabo kei na lima na vatu yagoyagovinaka.

A ciqoma na bolebole oqo na cauravou o Tevita ena kaukaua e solia o Jiova. E tukuna ena yaloqaqa vua na tuwawa ni Filisitia: “Ko sa lako mai vei au ka vakaiseleiwau, ka vakamoto, ka vakaisasabai: ia koi au, ka’u sa lako mai vei iko e na yaca i Jiova ni lewe vuqa; o koya na Kalou ni nodra mataivalu na Isireli, o ira ko a daubolea. E na siga oqo ena soli iko ko Jiova ki na ligaqu; . . . me ra kila ko ira kecega na kai vuravura ni sa dua na nodra kalou na Isireli: ka me ra kila talega kina ko ira nai vavakoso taucoko oqo ni sa sega ni ia na veivakabulai ko Jiova e nai seleiwau kei na moto; ni sa lewa nai valu ko Jiova.”​​—1 Samuela 17:​45-47.

Na cava e qai yaco? E kaya na kena itukutuku: “Sa gumatua ko Tevita vei koya na kai Filisitia e nai rabo kei na vatu; ka mokuta na kai Filisitia, ka vakamatea; ia ka sa sega nai seleiwau e na liga i Tevita.” (1 Samuela 17:50) Dina ni sega vua na iseleiwau, ia a tokoni koya tiko na Kalou o Jiova.a

E sega ni vakanuinuikara o Tevita ena nona nuitaki Jiova me tokoni koya. O koya gona, kevaka eda sotava e dua na ituvaki e gadrevi kina meda vakatulewa, eda na rerevaka beka na tamata, se da na vakararavi ena kaukaua ni Kalou me vakabulai keda? E macala vakasigalevu nida na ‘talairawarawa ga vua na Kalou, me kua vua na tamata.’ (Cakacaka 5:​29) Kena ikuri, kevaka eda raica na ituvaki dredre eda sotakaya mai na rai i Jiova, eda na sega ni veilecayaki se yalolailai baleta na ka e dredre vei keda e rawarawa vua.

[iVakamacala e ra]

[Kato/​iYaloyalo ena tabana e 9]

E VAKACAVA NA LEVU I KOLIACI?

E volai ena 1 Samuela 17:​4-7 ni sivia e ono na kiupiti, se rauta ni tolu na mita na balavu kei Koliaci. Rawa nida kila na kena levu kei na nona kaukaua nida dikeva na nona isulunivalu e buli ena parasa. Na kena bibi e 57 na kilokaramu! Na dia ni nona moto e vaka e dua na tolonikau, na yame ni moto kaukamea e 7 na kilokaramu na kena bibi. Kena irairai ni bibi na iyaragi i Koliaci, mamada o Tevita!