iDusidusi Nuitaki ni Bula Marau

“NA QARAI ni bula Marau” e noda dodonu na tamata kece. Oqori na nodra rai o ira na bulia na Yavu ni Vakavulewa ni matanitu levu o Mereke. Ia, e macala ni noda tekia e dua na isausau, e sega ni kena ibalebale nida na rawata. Levu na itabagone era qara rogo ena buturara ni veivakamarautaki se qito, ia e le vica sara mada vei ira e rawata na isausau era vinakata oqori? “O na rairai sega ni rawata,” e kaya e dua na daunilagasere rogo e kila vinaka na dredre e dau sotavi me yaco e dua me daunilagasere rawaka.

Ke o nanuma ni o na sega ni rawata na marau, kua ni yalolailai. Ni donu na sala o qara kina na marau, e macala ga ni o na kunea. Na cava e tukuni kina oqori? Na imatai ni ulutaga e vakatokai Jiova me “Kalou mamarau.” (1 Timoci 1:​11, NW) E vakarautaka tu gona na Kalou ena iVolatabu na idusidusi matata me kua kina ni lai tini ena yalolailai na nomu qara na bula marau. O Jiova e rawa ni vukei iko mo valuta na veika e kilai tu ni dau vakavuna na rarawa. Me kena ivakaraitaki, dikeva mada na veivakacegui e dulaka tu vei iko o Jiova ni takali e dua na wekamu lomani.

Ni Takali e Dua na Wekamu Lomani

E sega ni dua na ka vinaka eda rawa ni kaya me baleta na mate. Ni mate e dau vakavuna na nodra veitawasei na veitinani se veitamani. Dau tawasei ira na veitokani voleka, e vakavuna tale ga na lomanuiqawaqawa ena kedra maliwa e dua na itikotiko era veivolekati na lewena. Ni takali e dua ena vuvale mamarau, eratou na bikai ena rarawa.

Eda kila kece ni mate e dua na ituvaki rarawataki. Ia, e so ena nodra sega ni via vakabauta oqori, era lai ciqoma kina na vakasama ni ka ni veivakalougatataki na mate. Taura mada na ka a yaco ena gauna a ravuta kina na Toba kei Mexico na cagilaba o Katrina, ena Okosita 2005. A kaya na italatala ni lotu ena siga a bulu kina e dua vei ira a vakaleqai: “E sega ni vakamatei koya o Katrina. Na Kalou e kacivi koya i lomalagi.” Ena dua tale na ituvaki, e dua na vunivola e valenibula a via vakaceguya na nona rarawa e dua na goneyalewa a takali o tinana, qai mani tukuna vua me kua ni lomaleqa baleta na Kalou sa kauti tinana i lomalagi. Sa qai tagi o goneyalewa ena nona taroga: “Na cava e kauti tinaqu kina na Kalou?”

Matata e ke, ni levu na gauna na vakasama cala vaka oqo e sega ni vakacegui ira na lolosi tu. Na cava na vuna? Ni vakasama vaka oqori e sega ni tukuna na ka dina me baleti ira na mate. Na kena e ca sara, ni vaka e tiko kina na vakasama ni Kalou e kaliraki ira tani na wekada lomani mai vei keda na nodra vuvale, kei na nodra itokani ena sala vakadomobula qai rarawataki dina. Sa sega gona ni yaco na Kalou me ivurevure ni veivakacegui, sa beitaki ga ni vakavuna na mate. Ia, na Vosa ni Kalou e vakamacalataka na ka dina me baleti ira na mate.

Na iVolatabu e vakatoka me dua na meca o mate. E vakatauvatani mate kei na dua na tui e liutaka na kawatamata. (Roma 5:​17, NW; 1 Korinica 15:26) Na meca o mate e tu vua na kaukaua e sega ni dua na tamata e rawa ni vakamalumalumutaka, qai o ira kece na wekada lomani era sa takali era lai tomani ira na iwiliwili levu e sa rawai ira o mate. E dina sara ga na ka e tukuna oqo na iVolatabu, sa rauta meda vakila na rarawa, kei na galili ni takali e dua na wekada lomani. Kena ibalebale ni sa dodonu ga meda vakila na ivakarau ni yalo vaka oqori. Ia, e vakayagataka beka na Kalou na meca o mate me kauti ira kina na wekada lomani i lomalagi? Ena sauma ga vei keda na iVolatabu.

E kaya na Dauvunau 9:​5, 10: “Ko ira na mate era sa sega ni kila e dua na ka . . . ni sa sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.” Matata gona e ke, ni o ira na tu ena ibulubulu era sega ni cakava rawa e dua ka, sega ni yavala, sega ni vakila se vakasamataka e dua na ka. E vaka sara ga nira moce lutu no. Na iVolatabu e vakamatatataka tale ga ni Kalou e sega ni dau kauti ira na wekada lomani era sa takali mera lai bula vata kei koya e lomalagi. Nira sa mate, e sega tale ni dua na ka era vakila ena ibulubulu.

E vakadeitaka o Jisu na ka dina oqori ena gauna a mate kina na nona itokani o Lasarusa. A vakatauvatana o Jisu na mate me vaka e dua e moce. Ke lako cake i lomalagi o Lasarusa me lai tiko vata kei na Kalou Cecere Duadua, ena sega ni ka vakayalololoma ke vakaturi Lasarusa o Jisu me mai bula e vuravura, oti me qai mate tale. Na ivolatukutuku ena iVolatabu e kaya ni a kaci vakadomoilevu o Jisu ena ibulubulu: “Lasarusa, lako mai.” Tomana na iVolatabu: “Ia ko koya ka mate sa lako mai.” Io, a bula tale o Lasarusa. E kila vinaka tu o Jisu ni a sega ni bau biuti vuravura o Lasarusa. A moce tu ga ena ibulubulu.​​—⁠Joni 11:​11-​14, 34, 38-​44.

Na kena volatukutukutaki ena iVolatabu na ka e yaco oqo, e vukei keda meda kila kina ni sega ni vakayagataka na Kalou na mate me tokitaka kina na noda bula i lomalagi. Eda rawa gona ni masu vua na Kalou nida kila ni o koya e sega ni vakavuna na noda rarawa. Da vakadeitaka tale ga ni kila vinaka tu o koya na mosi e vakavuna vei keda na meca o mate kei na leqa e kauta mai ina noda bula. Na ka dina ena iVolatabu me baleta na kedra ituvaki na sa mate e vakadinadinataka nira sega ni lai vakararawataki tu i eli se puregatorio, nira sega sara ga ni vakila tu e dua na ka ena ibulubulu. Ena sega gona ni vakacaraka na noda nanumi ira na wekada lomani na noda cudruvaka na Kalou, se noda rere nida sega ni kila se ra tu e vei. Kuria, e dulaka tu o Jiova ena iVolatabu e so tale na sala e rawa kina nida vakacegui.

E Vu ni Marau na iNuinui

Na veitikinivolatabu eda sa veivosakitaka mai e dusimaki keda meda raica ni inuinui e dua na tiki bibi ni kena rawati na marau dina. Na vosa “[i]nuinui” me vaka e taurivaki ena iVolatabu, e tiko kina na vakasama ni sega ni vakataratututaki tale na kena na yaco dina na veika vinaka eda nuitaka. Da raica sara mada oqo na sala e cakayaco kina na inuinui ena kena rawati nikua na marau, ena noda railesuva na itukutuku ni nona vakaturi Lasarusa o Jisu.

E rua na vuna e cakava kina o Jisu na cakamana oya. iMatai, a vinakata o koya me vakaotia na rarawa i Marica, Meri, kei ira na nodratou itokani. Ena rawa kina nira marautaka tale na veimaliwai kei Lasarusa. Ia, a tukuna tale ga vei Marica o Jisu na ikarua ni vuna, o koya e bibi sara: “Au a sega li ni kaya vei iko, ni ko na raica na kaukauwa ni Kalou, kevaka ko sa vakabauta?” (Joni 11:40) Nona vakaturi Lasarusa o Jisu, e vakavotuya tiko na ka ena rawa ni cakava na Kalou o Jiova kei na ka ena qai cakava ena gauna se bera mai. So tale na veika matailalai me baleta “na kaukauwa ni Kalou” e vakamacalataki tarava.

Ena Joni 5:​28, 29, a kaya o Jisu: “Dou kakua ni kurabui e na ka oqo: ni sa lako mai na gauna era na rogoca kina na domona ko ira kecega e nai bulubulu, a ra na lako maikina.” Kena ibalebale ni o ira kece era mate tu ena ibulubulu, okati kina o ira na wekada lomani, era na vakaturi. Na Cakacaka 24:15 (VV), e tomana na kena vakamacalataki na gauna vakatubuqoroqoro oqo, e kaya: “Ni ra na tu cake tale mai na mate ko ira na yalododonu kei ira na sega ni yalododonu.” O ira “na sega ni yalododonu,” oqo o ira na le vuqa era a sega ni kilai Jiova se qaravi koya, ena soli sara mada ga vei ira na gauna mera rawata na veivakadonui ni Kalou.

Ena vakayacori e vei na veivakaturi oqo? Kaya na Same 37:29: “Era na taukena na vanua ko ira na yalododonu, ka tiko kina ka sega ni mudu.” Vakasamataka mada na ka e vakaibalebaletaka. O ira na vuvale kei na veitokani a tawasei ira tu o mate, era na veisotari tale ena vuravura oqo. Nida vakasamataka na gauna vinaka eda na marautaka tale kina na veimaliwai eda a dau mareqeta tu, e vakavumarau dina vei keda.

E Vinakata o Jiova Meda Marau

Eda sa dikeva oti mai e rua na sala e vakuria kina o Jiova na noda marau, dina nida sotava na bula dredre. iMatai, e vakarautaka tu o Jiova ena iVolatabu na kilaka kei na veidusimaki e rawa ni vukei keda meda vosota na veituvaki dredre. Ia, e sega ni vukei keda wale ga na iVolatabu ena gauna ni noda lolosi. Na ivakasala e koto kina e rawa ni vukei keda tale ga meda walia kina na leqa vakailavo eda dau sotava, se na noda tautauvimate. Rawa ni vakaukauataki keda meda vosota na noda raica na veivakaduiduitaki vakamatatamata kei na veilecayaki ni bula vakapolitiki. Kevaka gona eda muria na veidusimaki ni iVolatabu ena noda bula yadua, ena rawa ni vukei keda meda walia na leqa tale e so eda dui sotava tu.

Kena ikarua, nida vulica na iVolatabu eda sa mai rawata kina na inuinui e uasivita na ka kece e dulaka tu vei keda na bula ni kawatamata. Na nodra vakaturi na noda itokani kei ira na lewe ni noda vuvale era sa takali, e tiki ni inuinui e vakatavulica na iVolatabu. Na Vakatakila 21:​3, 4, e tasereka sara vakamatailalai: “Ko koya na Kalou ena tiko vata kei ira [na kawatamata] . . . Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” Kena ibalebale oqo ni sa vakarau oti vakadua na ka kece e dau vakavuna na noda rarawa. Na veika e yalataka tu na iVolatabu ena yaco dina ga, e macala ga ni o na marautaka na kena sa na vakayacori. E veivakacegui dina na noda kila ni sa tu oqo e matada na gauna vinaka. Na nomu kila ni o na sega ni vakararawataki tawamudu tiko ni o mate, e vu dina ni marau.

Me kena ivakaraitaki: Vica na yabaki sa oti a raica voli mai o Maria na lutusobu vakamalua ni bula i watina kei na mosi e dau sotava me yacova na nona takali. A tauvi watina na kenisa. Ni oti vakalailai ga oqori, ratou sa vagalala tani mai nodratou vale o Maria kei na tolu na luvena yalewa ena vuku ni leqa vakailavo. Rua na yabaki e tarava, a qai kila o Maria ni sa tiko tale ga vua na kenisa. A caka vua e rua na veisele levu qai dua na ka na mosi e yacovi koya e veisiga. Dina ni vaka tu oqori na leqa e sotava, a donu tu ga na nona rai, e uqeti koya gona me vakayaloqaqataki ira tale kina na so. E rawa vakacava vua me marau tiko ga?

E kaya o Maria: “Niu sotava e dua na leqa, au na saga meu kua ni vakasamataka vakasivia. Au na sega tale ga ni laiva me votu ena noqu vakasama e so na taro me vaka: ‘Na cava e yacovi au kina na leqa oqo? Na cava meu rarawa kina vaka oqo? Na cava mada au mai tauvimate tu kina?’ Na vakasama cala e dau vakayalolailaitaki keda. Oya na vuna, au dau vakayagataka kina na noqu igu meu qaravi Jiova qai vukei ira tale ga na tani. Oqori na ka e vakamarautaki au.”

A cakayaco vakacava ena bula i Maria na nona inuinui? E dei tu vua na gauna ena vakaotia kina o Jiova na tauvimate kei na veileqa tale e so eda sotava tu na kawatamata. Ni dau lai raici i valenibula, ena wasea tale ga na nona inuinui vei ira era tauvi kenisa vata qai sega ni tiko nodra inuinui. E bibi vakacava vei Maria na nona inuinui? Kaya o Maria: “Au dau vakasamataka na ka e tukuni ena Iperiu 6:​19, e vakatauvatana e kea o Paula na inuinui me vaka na ikelekele ni yaloda. Ke sega na ikelekele oya, eda na ciri me vaka na waqa e veitosoyaki voli ena dua na cagilaba. Ia ke o vakelei vinaka toka ena ikelekele oya, se mani ituvaki dredre cava o sotava, o na lomanuidei ga.” Vukei Maria gona me marau tiko ga na ‘inuinui ni bula tawamudu’ e yalataka tu na Kalou e sega ni daulasu. E rawa tale ga ni vukei iko ke o nuitaka oqori.​​—⁠Taito 1:⁠2.

Ni o vulica na iVolatabu, dina ni o sotava na leqa, o na kune marau ga. Ia, o na rairai via kila se na yaga vakacava vei iko na nomu vulica na iVolatabu. Era tu vakarau na iVakadinadina i Jiova mera sauma vakaivolatabu vei kemuni na tikina oqori ke oni vinakata mo ni rawata na marau dina. Ni o waraka voli na kena vakayacori na inuinui e dulaka tu vei keda o Jiova, o rawa ni wili kei ira era vakamacalataki ena sala oqo: “Era na taukena na reki kei na marau, ia na rarawa kei na tagi ena dro tani yani.”​​—⁠Aisea 35:⁠10.

[iYaloyalo ena tabana e 5]

Na ka dina ga ena iVolatabu ena rawa ni veivakacegui

[iYaloyalo ena tabana e 7]

Na inuinui ni veivakaturi e cavuti ena iVolatabu e rawa ni vakavumarau