Na Qaciqacia kei na Yalomalumalumu
E DUA na ka a yaco ena bula i Tui Tevita eda na vulica kina e dua na lesoni bibi me baleta na yalomalumalumu kei na qaciqacia. A yaco na ka oqo ni oti nona vakamalumalumutaki Jerusalemi qai cakava me nona koroturaga. Ia, o Tevita e raici Jiova me Tui dina kei Isireli, mani tuvanaka me kau mai ina koroturaga na Kato ni Veiyalayalati e vakatayaloyalotaka nona sa tiko o Jiova ena kedra maliwa. Na ka e yaco oqo e bibi dina vei Tevita, e vakaraitaka e matanalevu na nona marau ni muri iratou tiko na bete eratou colata na Kato. Era raica na lewe i Jerusalemi “ni sa ladelade” qai “tabalaka na meke” na nodra tui.—1 Veigauna 15:15, 16, 29; 2 Samuela 6:11-16.
Ia, o Maikali na wati Tevita a sega ni veitomani ena tayabe ni marau oya. A vakararai toka ga mai katubaleka qai votivoti vua na sala e vakalagilagi Jiova kina o Tevita, a tekivu me “beci koya e lomana.” (2 Samuela 6:16) Na cava e vaka kina oya na rai nei Maikali? Rairai a qaciqaciataka na nona itutu ni o koya na luve i Saula na imatai ni tui e Isireli, qai mai watina tale ga na ikarua ni tui. De dua e nanuma o Maikali ni watina e tui, e sega ni dodonu me vakalolovirataki koya me tautauvata kei ira na tauvanua me qai lai vakaitavi ena ivalavala ni marau vaka oya. A vakavotui na nona viavialevu ena sala e kidavaki Tevita kina ni tokatu yani i vale. E kaya ena veivakalialiai o Maikali: “Sa lagilagi na tui Isireli edaidai, ne! o koya ka luvata na nonai sulu e matadra na vada ni nona tamata, me vaka sa luvata votu na nonai sulu e dua vei ira na tamata lialia.”—2 Samuela 6:20.
Na cava e cakava o Tevita ena vosa ni veivakalialiai i Maikali? E vunauci koya ena nona kaya ni sa digitaki Tevita me tui o Jiova me sosomitaki Saula na tama i Maikali. E kuria o Tevita: “Ka’u na beci au vakalevu cake, ka’u na vakamalumalumutaki au sara: ia ko ira na vada ko sa vosa kina, era na vakarokorokotaki au tiko.”—2 Samuela 6:21, 22.
Io, a loma i Tevita me qaravi Jiova tiko ga ena yalomalumalumu. Na rai vaka oya eda kila kina na vuna e vakatokai Tevita kina o Jiova me “tamata e vinaka e lomaqu.” (Cakacaka 13:22, VV; 1 Samuela 13:14) O koya gona o Tevita e vakatotomuria tiko ga na Kalou o Jiova, o koya na ivakaraitaki uasivi duadua ni yalomalumalumu. E vakavure vakasama na matavosa “ka’u na vakamalumalumutaki au” a cavuta o Tevita vei Maikali, baleta e vu na matavosa oqori mai na dua na vosa vakaiperiu e vakayagataki tale ga me vakamacalataka na rai ni Kalou me baleta na kawatamata. Dina ni o Jiova e Kabula cecere duadua ena lomalagi kei na vuravura, ia na Same 113:6, 7, e kaya ni dau “vakamalumalumutaki koya [kauti koya sobu mai na nona itutu cecere me mai veitaratara kei na dua e lolovira] me raica na ka mai lomalagi kei na ka e vuravura! Sa vueta cake ko koya na dravudravua mai na kuvu-ni-soso, ka vueta na tamata wale mai nai sovasova ni benu.”
Ni Kalou yalomalumalumu o Jiova, sa rauta me cata na ‘matadra viavialevu’ na tamata qaciqacia. (Vosa Vakaibalebale 6:16, 17) Na nona vakaraitaka o Maikali na itovo ca oqori kei na nona beca na tui e digitaka na Kalou, e kalouca kina ni a sega ni vakaluveni vei Tevita me yacova nona mate. E ka ni vuli vinaka vei keda oqo! O ira kece era vinakata me vakadonui ira na Kalou mera muria na veivosa oqo: “Dou vakaisulu e na yalomalumalumu: ni sa vorati ira na viavialevu na Kalou, ia sa solia nai solisoli loloma vei ira na yalomalumalumu.”—1 Pita 5:5.