Taro na Dauwiliwili

Na cava e tukuni kina ena Vakarua 31:2 ena ivakadewa na New World Translation ni o Mosese ena “sega tale ni vakatarai me curu yani se me curu mai” me nodra iliuliu na Isireli, ia ena so tale na ivakadewa e tukuni kina ni sa dredre vua me cakava oqori ena vuku ni kena ituvaki?

Na vosa vakaIperiu e lomatarotarotaki tiko oqo ena rawa ni vakadewataki ena dua tani tale na sala, ia e so na ivakadewa ni iVolatabu era vakamacalataka ni gauna e sa vakarau cava kina na nona bula, a malumalumu o Mosese qai sega vua na kaukaua me tomana tiko ga kina na nona itavi ni veiliutaki. Me kena ivakaraitaki, na iVolatabu vakaViti e tukuni Mosese ni kaya: “Sa dua na drau ka ruasagavulu na noqu yabaki e na siga oqo; sa dredre me’u daucuru tiko yani ka daucuru mai.” E tautauvata kei na New American Bible ni kaya: “Au . . . sa sega ni rawa ni veilakoyaki.”

E vakaraitaki ena Vakarua 34:7 ni dina ga e sa kena turaga sara o Mosese, a sega ga ni malumalumu. E tukuni kina: “Sa dua na drau ka ruasagavulu na yabaki i Mosese ni sa mate: sa sega ni buawa mai na matana, ka sa sega ni malumu sobu na nona kaukauwa.” A se kaukaua vinaka tiko ga o Mosese me liutaka na matanitu oya, ia e sa sega ga ni nona inaki o Jiova me vakayacora vaka kina o Mosese. E vakadinadinataki na tikina oqo ena nona tomana o Mosese: “Sa kaya vei au ko Jiova, O na sega ni qalo-kosova na Joritani oqo.” De dua a tokaruataka tiko o Jiova na ka vata ga a vakarota ena wai o Meripa.—Tiko Voli mai na Lekutu 20:9-12.

E talei dina na dede ni nona bula voli mai o Mosese. E rawa ni wasei vakatolu na ka e yaco ena nona bula. A ‘vakavulici ena nodra vuku kece ga na kai Ijipita’ ena loma ni 40 na yabaki a tiko voli kina e kea, qai “kaukauwa e na nona vosa kei na cakacaka.” (Cakacaka 7:20-22) Ena 40 na yabaki tale e tarava, a tiko kina e Mitiani. A bucina mai kina e so na itovo vakayalo e gadrevi me liutaki ira kina na tamata i Jiova. Ena iotioti ni 40 na yabaki, sa qai tuberi ira qai liutaki ira na Isireli. Ia, oqo sa qai vakatulewataka o Jiova me na liutaka na matanitu o Josua, sega ni o Mosese, ena nodra takosova na uciwai na Joritani mera yacova yani na Vanua Yalataki.—Vakarua 31:3.

O koya gona, na ivakadewa na New World Translation e vakavotuya vei keda na ibalebale dina ni Vakarua 31:2. Ena sega tale ni qai nodra iliuliu tiko na Isireli o Mosese, e sega ni vu oqo mai na nona malumalumu vakayago, ia sa sega ga ni qai vakatarai koya o Jiova.