Ena “Vakadodonutaka” o Jiova na Ka Kece

“E na sega li ni na vakadodonutaka na Kalou na ka e baleti ira na nona digitaki era dau tagi vua e na siga kei na bogi?”​—LUKE 18:7, VV.

1. O cei era ivurevure ni yaloqaqa vei iko, ena vuku ni cava?

ENA veiyasa i vuravura, era marautaka na iVakadinadina i Jiova na nodra rawa ni veimaliwai kei ira na tukadra kei na budra vakayalo era sa qaravi Jiova tu mai ena dua na gauna balavu sara. O bau veikilai voleka kei ira e so na wekada lomani oqo? O na vakasamataka beka e dua na buda e sa kena marama sara, e papitaiso ena dua na gauna balavu sa oti, ia me yacova mai oqo e sega ni dau calata na soqoni ena Kingdom Hall. Se dua beka na tukada ena ivavakoso e sa kena turaga sara, ia e dau tokona na cakacaka vakavunau vakaivavakoso e veimacawa, qai vakayacora voli mai oqo ena vicasagavulu na yabaki sa oti. E levu vei ira na buda kei na tukada yalodina oqo era a rairai namaka me sa yaco oti na Amaketoni. Ia, na kena se tu ga na vuravura ca oqo, e sega sara ga ni vakamalumutaka na nodra nuitaka na vosa ni yalayala i Jiova, se vakaluluqataka nodra sa nakita dei mera “vosota me yacova nai vakataotioti.” (Maciu 24:13) Na qaqaco ni nodra vakabauta na dau qaravi Jiova yalodina oqo e vu ni yaloqaqa vei keda kece na lewe ni ivavakoso.​—Same 147:11.

2. Na cava eda dau rarawataka?

² Ia, so na gauna e dau yaco na kena veibasai. E so na iVakadinadina i Jiova era dau gumatua ena cakacaka vakaitalatala ena dua na gauna balavu, e sa yaco me luluqa na nodra vakabauti Jiova, ra sa sega tale ga ni dau tiko ena soqoni Vakarisito. Eda rarawataka na nodra sa biuti Jiova e so na noda itokani e liu, dau qai gu na yaloda meda vukei ira tiko ga na “sipi sa yali” oqo mera mai lewena tale na qelenisipi i Jiova. (Same 119:176; Roma 15:1) Ia, na nodra yaco e so mera malumalumu vakayalo e vakavure vakasama, baleta ena yasana kadua, e so e qaqaco vinaka tu ga nodra vakabauta. E rawa vakacava vei ira e levu na iVakadinadina i Jiova me dei tu ga nodra vakabauta na vosa ni yalayala i Jiova, ia e so e sega? Cava e rawa nida cakava yadua me rawa ni dei tu ga kina noda namaka na kena yaco mai “na siga i Jiova”? (Sefanaia 1:​14) Meda dikeva mada oqo e dua na vosa vakatautauvata e volai ena Kosipeli i Luke.

Mera Qaqarauni na Bula Tiko “ni sa Lako Mai na Luve ni Tamata”

3. Ena yaga vakalevu sara vei cei na vosa vakatautauvata e baleti koya na yada kei na turaganilewa, ena vuku ni cava?

³ E volai ena Luke wase 18 e dua na vosa vakatautauvata me baleta e dua na yada kei na dua na turaganilewa. E via tautauvata na vosa vakatautauvata oqo kei na kena eda dikeva ena ulutaga sa oti me baleti koya na turaga cikecike. (Luke 11:​5-​13) Ia, nida raica na veitikina e yavolita na kedrau itukutuku na yada kei na turaganilewa, eda na dikeva ni vosa vakatautauvata oqo e baleti ira sara ga na bula tiko “ni sa lako mai na Luve ni tamata” ena kaukaua ni Matanitu ni Kalou, me vaka e sa yaco oti ena 1914.​—Luke 18:8.a

4. Na cava a tukuna rawa tiko yani o Jisu ni bera ni qai cavuta na vosa vakatautauvata e volai ena Luke wase 18?

⁴ Ni bera ni cavuta na kedrau vosa vakatautauvata na yada kei na turaganilewa, a tukuna rawa o Jisu ni na rawarawa ni kilai na nona sa na tiko tawarairai me veiliutaki ena Matanitu ni Kalou. Na kena rawarawa ena vaka ga na tibi ni “liva” baleta ni gauna e tibi kina, na kena rarama ena laurai “mai na dua na yasana ni lomalagi, ka cila yani ki na yasana kadua ni lomalagi.” (Luke 17:24; 21:​10, 29-​33) Ia, e levu era bula donuya na “gauna ni ivakataotioti” era na sega ni kauaitaka na ivakadinadina matata e sa tevuki sara tu ga e matada. (Taniela 12:​4, NW) Na cava na vuna? Na vuna vata ga era a sega ni kauaitaka kina na ivakasala i Jiova o ira na bula ena gauna i Noa kei Loti. Ena gauna oya, era wele voli na tamata ena ‘kana, gunu, veivoli, volivolitaki, teitei, kei na taravale, me yacova sara na gauna era vakarusai kina.’ (Luke 17:​26-​29) Era mate nira sa rui vakaogai ira ena ka ga ni veisiga vaka oya, ra sega ni kauaitaka na loma ni Kalou. (Maciu 24:39) Nikua tale ga, sa dua na ka nodra vakaogai ira na tamata ena ka ga ni bula ni veisiga, ra sega ni raica kina na ivakadinadina ni kena sa vakarau vakarusai na ituvaki ni bula tawavakalou ni vuravura ena gauna oqo.​—Luke 17:30.

5. (a) A vakamua tiko vei cei o Jisu na nona veivakaroti, ena vuku ni cava? (b) Cava e vakavuna me luluqa na nodra vakabauta e so?

⁵ Eda raica rawa e ke na nona kauaitaki iratou tiko nona imuri o Jisu baleta ni rawa tale ga ni vakawelei ratou na vuravura i Setani, rawa sara mada ga ni yaco me ratou ‘lesuva tale’ na veika eratou sa vakanadakuya mai. (Luke 17:​22, 31) E sa yaco oqo vei ira e so na lotu Vakarisito. A vica vata na yabaki nodra vakanamata tu ina gauna ena tinia kina o Jiova na vuravura ca eda bula tu kina oqo. Ia, e tuburi ira na yalolailai ni sega ni yaco na Amaketoni ena gauna era namaka. Tekivu buawa vakamalua nodra vakanamata ina siga ni veilewai i Jiova. Sa vakavudua nodra vakaitavi ena cakacaka vakaitalatala, lakolako sa ra vakaogai ira ena veika ga ni bula e veisiga, mai lailai yani kina na gauna era solia ena veika vakayalo. (Luke 8:​11, 13, 14) Yaco na gauna mera sa ‘lesuva tale’ na veika era a sa vakanadakuya mai​—sa dua dina na ka rarawa!

E Bibi Meda “Masu Tiko Ga”

6-8. (a) Vakamacalataka na vosa vakatautauvata baleti koya na yada kei na turaganilewa. (b) E vakamacalataka vakacava o Jisu na ibalebale ni vosa vakatautauvata oqo?

⁶ Na cava meda cakava me kua kina ni malumu sobu noda nuitaka na vosa ni yalayala i Jiova? (Iperiu 3:​14) Taro sara ga oqo e vakamacala kina vakabibi o Jisu ni oti toka ga nona vakasalataki iratou nona tisaipeli me ratou qarauna me ratou kua ni suka tale ina vuravura i Setani.

⁷ E vola o Luke na nona tukuna o Jisu “e dua na vosa vakatautauvata, me ra dau masu tiko ga kina ka kakua ni cegu koso.” E kaya o Jisu: “E a tiko e na dua na koro e dua na turaganilewa ka sega ni dau rerevaka na Kalou se dokai ira na tamata. E tiko tale ga e na koro ko ya e dua na yada ka dau lako wasoma yani mai vua, ka kaya, ‘Mo ni vakadinadinataka mada na noqu dodonu vua na noqu meca.’ E na dua na gauna balavu e a sega ni via cakava kina ko koya e dua na ka, ia e muri sa qai kaya e lomana, ‘E dina ga ni’u sega ni rerevaka na Kalou se doka na tamata, ia e na nona vakasosataki au ga na yada oqo, au sa na vakadodonutaka kina na ka e baleti koya, de na qai vakaocai au ga e na nona lakolako tiko ga mai.’”

⁸ Ni cavuta oti o Jisu na vosa vakatautauvata oqo, sa qai tukuna na kena ibalebale: “Dou rogoca vinaka na ka e kaya na turaganilewa tawa dodonu ko ya. Ia e na sega li ni na vakadodonutaka na Kalou na ka e baleti ira na nona digitaki era dau tagi vua e na siga kei na bogi? E na berabera li na nona veivuke? Au sa kaya vei kemudou, e na vakadodonutaka vakatotolo sara na ka e baleti ira. Ia ni sa lako mai na Luve ni Tamata e na kunea li e vuravura na vakabauta?”​—Luke 18:​1-8, VV.

“Ni Vakadinadinataka Mada na Noqu Dodonu”

9. Na cava beka e vakabibitaki tiko ena vosa vakatautauvata me baleti koya na yada kei na turaganilewa?

⁹ E matata vakasigalevu na ka e vakabibitaki ena vosa vakatautauvata oqo. Erau cavuta ruarua na yada kei na turaganilewa, e cavuta tale ga o Jisu. E vakamamasu na yada ena nona kaya: “Mo ni vakadinadinataka mada na noqu dodonu.” A kaya na turaganilewa: “Au sa na vakadodonutaka . . . na ka e baleti koya.” Taroga o Jisu: “E na sega li ni na vakadodonutaka na Kalou?” Sa qai kuria tale o Jisu, ena nona kaya me baleti Jiova: “E na vakadodonutaka vakatotolo sara.” (Luke 18:​3, 5, 7, 8, VV) Ia, na gauna cava ena qai ‘vakadodonutaka kina na ka’ kece o Jiova?

10. (a) Gauna cava a vakadodonutaka kina o Jiova na veika a yaco tiko ena imatai ni senitiuri? (b) Ena gauna cava, kei na sala cava, ena qai vakadodonutaka kina o Jiova na veika kece vei keda na tamata ni Kalou ena gauna oqo?

¹⁰ Na “gauna ni veisausaumi” ena imatai ni senitiuri se gauna me vakadodonutaka kina o Jiova na veika ena gauna oya, a yaco ena 70 S.K., e vakarusai kina o Jerusalemi kei na kena valenisoro. (Luke 21:22) Vei ira na tamata ni Kalou ena gauna oqo, ena qai vakadodonutaki na ka kece ena “siga i Jiova.” (Sefanaia 1:​14; Maciu 24:21) Sa na qai yavala ena gauna oya o Jiova me ‘saumi ira vakararawa na vakararawataki’ ira na nona tamata ni sa na taurivaki Jisu Karisito “me cudruvi ira era sa sega ni kila na Kalou, a sa sega ni vakabauta nai tukutuku-vinaka ni noda Turaga ko Jisu Karisito.”​—2 Cesalonaika 1:​6-8; Roma 12:19.

11. Sala cava ena “vakadodonutaka vakatotolo sara” kina o Jiova na veika e baleti ira na tamata ca?

¹¹ Ia, na cava na ibalebale ni nona vakadeitaka vei keda o Jisu ni na “vakadodonutaka vakatotolo sara” na ka o Jiova? E kaya na Vosa ni Kalou ni dina e ‘dau vosota vakadede [o Jiova],’ ia ena vakadodonutaka vakatotolo sara na ka ni sa yaco na kena gauna. (Luke 18:​7, 8; 2 Pita 3:​9, 10) Ni yaco mai na Waluvu ena gauna i Noa, e sega tale ni wawa na nodra vakarusai na tamata ca. A vaka tale ga oqo na ka a yaco ena siga i Loti, era rusa na tamata ca ena gauna e tau kina mai lagi na bukawaqa. E kaya o Jisu: “Ena vaka talega kina e na siga ena rairai kina na Luve ni tamata.” (Luke 17:​27-​30) Vei ira na tamata ca, ena “yaco vakidacala vei ira na rusa.” (1 Cesalonaika 5:​2, 3) Io, eda nuidei ni o Jiova ena sega ni vakatara me tiko ena dua tale na siga na vuravura ca i Setani, ke sa yacova na kena gauna me muduki kina.

Ena “Vakadodonutaka” na Ka Kece

12, 13. (a) Na cava eda vulica ena vosa vakatautauvata i Jisu me baleti koya na yada kei na turaganilewa? (b) Na cava eda kila deivaki kina ni o Jiova ena rogoca noda masu, qai raica me na vakayacori na lewadodonu?

¹² E so tale na ka bibi eda vulica ena vosa vakatautauvata me baleti koya na yada kei na turaganilewa. Ni vakamacalataka na ibalebale ni vosa vakatautauvata oqo o Jisu, a kaya: “Dou rogoca vinaka na ka e kaya na turaganilewa tawa dodonu ko ya. Ia e na sega li ni na vakadodonutaka na Kalou na ka e baleti ira na nona digitaki?” E macala ni o Jisu a sega ni vakatauvatani Jiova tiko kei na turaganilewa, me kaya beka ni o Jiova e yalodredre tale ga me vakataki koya na turaganilewa. Ia, a vakavulici ira tiko nona imuri ena dua na lesoni bibi me baleti Jiova ena nona kauta cake mai na kedrau duidui na Kalou kei na turaganilewa. Cava e so na ka erau duidui kina?

¹³ Na turaganilewa ena vosa vakatautauvata i Jisu e tamata “tawa dodonu,” ia na Kalou e dau ‘lewai ira vakadodonu na tamata.’ (Same 7:​11; 33:5) Na turaganilewa a sega ni bau kauaitaki koya na yada, ena yasana kadua o Jiova e kauaitaka na tamata yadua. (2 Veigauna 6:​29, 30) Na turaganilewa a sega sara ga ni via vukei koya na yada, ia o Jiova e tu vakarau​—io, e vinakata sara ga​—me vukei ira na qaravi koya. (Aisea 30:​18, 19) Na cava eda vulica e ke? Ke sa rawa vua na turaganilewa tawayalododonu me rogoca na kerekere ni yada, sa na qai wacava sara o Jiova ni na rogoca na nodra masu na nona tamata, qai raica me tau vei ira na lewadodonu!​​—Vosa Vakaibalebale 15:29.

14. Na cava meda kua ni vakabekataka kina na kena yaco mai na siga ni veilewai i Jiova?

¹⁴ O koya gona, era cala sara ga o ira e sa mai luluqa nodra nuitaka na siga ni veilewai i Jiova sa roro tiko mai. Ena vuku ni cava? Ena nodra sega tale ni qai kauaitaka ni sa voleka na “siga i Jiova,” era sa vakaraitaka tiko kina ni sega ni nuitaki na vosa ni yalayala i Jiova. Ia, e sega ni rawa ni dua e vakalewa na yalodina i Jiova. (Jope 9:​12) E kilikili kina me tarogi na taro oqo, Vakacava o keda, eda na yalodina tiko ga? Oya tale ga na tikina e kauta cake mai o Jisu ena icavacava ni nona vosa vakatautauvata me baleti koya na yada kei na turaganilewa.

“Ena Kunea Beka na Vakabauta Vaka Oqo e Vuravura?”

15. (a) Taro cava a taroga o Jisu, ena vuku ni cava? (b) Taro cava meda dui tarogi keda kina?

¹⁵ A taroga na taro vakavure vakasama oqo o Jisu: “Ni lako mai na Luve ni tamata, ena kunea beka na vakabauta vaka oqo e vuravura?” (Luke 18:​8, ivakamacala e ra ni NW) Na matavosa, “vakabauta vaka oqo” e dusia ni sega ni vakamacalataka raraba tiko o Jisu na vakabauta, ia e vakaibalebaletaka tiko e dua na mataqali vakabauta​​—na mataqali vakabauta a vakaraitaka na yada. A sega ni sauma nona taro o Jisu. E taroga ga ena nona vinakata mera vakasamataka na tisaipeli na nodra dui vakabauta. E sa luluqa tiko beka mai, leqataki kina de ra lesuva tale na veika era sa vakanadakuya? Se tu vei ira na mataqali vakabauta a vakaraitaka na yada? E dodonu meda tarogi keda tale ga ena taro oqori nikua, ‘Na vakabauta vakacava e raica vei au na “Luve ni tamata”?’

16. Mataqali vakabauta vakacava e laurai vua na yada?

¹⁶ Ke da vinakata meda vakila tale ga na vakatauci vakadodonu ni lewa i Jiova vei keda, meda muria na nona ivakaraitaki na yada oya. Na mataqali vakabauta vakacava a laurai vua? A vakaraitaka nona vakabauta ena nona “lako wasoma yani [vua na turaganilewa]” ena nona kaya, “Mo ni vakadinadinataka mada na noqu dodonu.” A cike toka na yada me yacova sara ni sa vakadodonutaka na turaganilewa tawadodonu oya na ka e kerea. O ira tale ga na tamata ni Kalou nikua e rawa nira nuidei ni na vakadodonutaka o Jiova na veika kece ena vukudra​​—veitalia mada ga ke ra nanuma ni sa rui dede na nodra sotava voli na ka ca. Kena ikuri, era vakaraitaka nodra nuitaka na vosa ni yalayala ni Kalou ena nodra masu wasoma vua​​—ena nodra ‘tagici koya ena siga kei na bogi.’ (Luke 18:​7, VV) Ke sa muduka e dua na lotu Vakarisito nona masuti Jiova tiko me vakatauca na lewadodonu, sa na vakaraitaka oya ni sa sega ni qai nuitaki Jiova me na vakabulai ira na nona tamata.

17. Na cava e so na vuna meda kua kina ni oca ena masu, me qaqaco tale ga noda nuitaka na yaco mai ni siga ni veilewai i Jiova?

¹⁷ Eda vulica mai na kena ituvaki na yada ni dodonu meda uasivi sara o keda ena noda dau kerekere vakawasoma vei Jiova. Dikeva e so na ka eda duidui kina mai vei koya na yada. Na yada oya e lai kerekere tiko ga vei koya na turaganilewa, e dina ni sega ni dua e vakauqeti koya me vakayacora vaka kina. Ia, vei keda, na Vosa ni Kalou e vakauqeti keda meda “ia tikoga na masu.” (Roma 12:12) E sega ni vakadeitaka na yada se na rogoci nona kerekere se sega, ia o Jiova e sa vakadeitaka tu vei keda ni na vakatauca dina ga na lewadodonu. A kaya o Jiova ena gusu i koya nona parofita: “Kevaka ena berabera, mo waraka ga; ena yaco vakaidina ga, ena sega ni berabera sara.” (Apakuki 2:3; Same 97:10) E sega ni dua na dauveivuke e tu me tokoni koya na yada, me vakarawarawataka na rogoci ni nona kerekere. Ia o keda e tiko na noda dauveivuke kaukaua sara, o Jisu, “sa tiko talega e na liga i matau ni Kalou, ka sa masulaki keda.” (Roma 8:​34; Iperiu 7:​25) O koya gona, ke sa rawa vua na yada me vakamasuti koya tiko ga na turaganilewa ena nona nuitaka tiko me na yaco na lewadodonu e dina ni sega ni rawarawa na ka e sotava, sa qai dodonu me qaqaco cake sara noda nuitaka o keda na yaco mai ni siga ni veilewai i Jiova!

18. E yaga vakacava na masu ena vaqaqacotaki ni noda vakabauta kei na kena tau vei keda na lewadodonu?

¹⁸ Eda vulica mai na ivakatautauvata me baleti koya na yada ni rau veiwekani voleka sara na vakabauta kei na masu. Na noda masu wasoma tale ga e rawa ni sabaya na veika e so e rawa ni vakamalumalumutaka noda vakabauta. Ena yasana kadua, na masu e caka ga vakarairai e sega ni itatarovi ni luluqa ni vakabauta. (Maciu 6:​7, 8) Ni uqeti na lomada meda masu vua na Kalou ena noda vakila nida sa na vakararavi sara tu ga vakatabakidua vua, na masu vaka oqo e sa na qai vakavolekati keda vua na Kalou, vaqaqacotaka tale ga noda vakabauta. E bibi tale ga na vakabauta me rawa nida vakabulai kina, oya tale beka ga na vuna e uqeti iratou kina nona tisaipeli o Jisu me ratou “dau masu tiko ga . . . ka kakua ni cegu koso”! (Luke 18:​1, VV; 2 Cesalonaika 3:​13) Io, eda kila ni yaco mai ni “siga i Jiova” e sega ni vakatau ena noda masu​​—ena yaco ga mai se da masulaka se sega. Ia, na kena tau vei keda yadua na lewadodonu kei na noda bula sivia yani na ivalu ni Kalou ena vakatau sara ga ena noda vakabauta, kei na noda moica noda bula meda cakava tiko ga na ka dodonu me salavata kei na noda dau masu.

19. Eda na vakaraitaka vakacava nida vakabauta dei ni na qai “vakadodonutaka na Kalou na ka” kece?

¹⁹ Eda kila ni a taroga o Jisu: “Ni lako mai na Luve ni tamata, ena kunea beka na vakabauta vaka oqo e vuravura?” Na cava na isaunitaro vakavure vakasama oqo? Eda marau ni vica na milioni na dau qaravi Jiova ena yalodina e veiyasa i vuravura nikua era sa vakadinadinataka ena nodra dau masu, vosota, kei na nodra dau wawa tiko ga ni tiko vei ira na vakabauta vaka oqo! E rawa kina nira vakaio sara ga ena taro i Jisu. E dina ni yaco voli vei keda na veika tawadodonu ena vuravura i Setani eda se tu kina oqo, eda vakabauta dei ni na qai “vakadodonutaka [ga] na Kalou na ka e baleti ira na nona digitaki.”

[iVakamacala e ra]

O se Nanuma?

• Cava e vakavuna me luluqa na nodra vakabauta e so na lotu Vakarisito?

• Na cava e rawa nida vakabauta kina ni na yaco dina ga na siga ni veilewai i Jiova?

• Na cava e so na vuna meda kua kina ni oca ena masu?

• Ena yaga vakacava na noda dau masu me kua ni luluqa kina noda vakabauta?

[iYaloyalo ena tabana e 26]

Ka bibi cava eda vulica ena vosa vakatautauvata me baleti koya na yada kei na turaganilewa?

[iYaloyalo ena tabana e 29]

Vica na milioni nikua era vakabauta dei ni na qai “vakadodonutaka na Kalou na ka” kece