iTalanoa ni Nona Bula

Vu Ni Noqu Marautaka na Veivakatisaipelitaki

TALANOATAKA O PAMELA MOSELEY

Ni carubi tiko na ivalu e Igiladi ena 1941, a kauti au o tinaqu i Leicester e vakayacori kina na nodra soqo ni tikina na iVakadinadina i Jiova. Keirau rogoca na vunau i Joseph Rutherford ena soqo oqori ena dua na ulutaga e vakatabakidua vei ira na gone. Ni keirau papitaiso kei tinaqu ena soqo ni tikina oya, au raica votu na nodra marau o ira na vukei keirau me keirau toso vakayalo. Au se sega ni kila ena gauna oya na levu ni noda marautaka na noda vukei ira e so mera tisaipeli i Jisu Karisito.

NEIRAU toso me keirau tisaipeli a tekivu ena yabaki yani e liu. Au se nanuma tiko na siga rerevaki ena Sepiteba 1939 a tekivu kina na iKarua ni iValu Levu. Au raica ni drodro mai balu i tinaqu na wainimatana ni taroga, “Na cava e sega ni veisaututaki kina o vuravura?” Rau a curu ena mataivalu ena iMatai ni iValu Levu na noqu itubutubu, rau vakila sara ga na kena vakadomobula. E lai taroga na italatala ni lotu Jaji e Bristol ena taro oya o tinaqu. E sauma mai ena nona kaya: “Sa yaco tu ga mai na ivalu, ena yaco tiko ga.”

Sega ni dede mai na gauna oya, e gole mai ina neitou vale e dua sa kena marama. E iVakadinadina i Jiova o koya. E tarogi koya sara o tinaqu ena taro vata ga oya: “Na cava e sega ni veisaututaki kina o vuravura?” E vakamacalataka na iVakadinadina oya ni ivalu e ivakatakilakila ni noda sa bula tiko ena gauna ni ivakataotioti ni vuravura voravora oqo. (Maciu 24:​3-​14) Sega ni dede keirau sa vuli iVolatabu na veitinani kei luvenayalewa. Erau maliwai ira na marautaka na gauna ni neirau papitaiso na veiluveni oqo. Na cava e dau marautaki kina na veivakatisaipelitaki? Au qai kila e muri na vuna. Meu vakamacalataka mada e so na ka au vulica ena 65 vakacaca na yabaki au veivakatisaipelitaki voli kina.

Au Vakila na Marautaki ni Veivakavulici

Au tekivu vakaitavi ena kena vunautaki na Matanitu ni Kalou e Bristol niu se qai yabaki 11. E solia vei au e dua na tacida tagane e dua na qaramavoni kei na dua na tikidua e volai tu kina e dua na ivakamacala qai tukuna vei au: “Sikovi ira tiko mai na veivale ena tai ni gaunisala oya.” Au lako taudua sara ga. Dua na ka na noqu taqaya. Au vakatagitaka na qaramavoni au qai vakaraitaka na tikidua era sureti kina na itaukeinivale mera taura e so na ivola vakaivolatabu.

Mai na veiyabaki ni 1950, sa vakabibitaki kina me keimami wilika na iVolatabu ni keimami lai veisiko e veivale. A via dredre taumada na noqu vakamacalataka na iVolatabu baleta niu dau mamadua. Ia au qai matau cake tiko ga. E vakavuna tale ga na noqu qai marautaka na cakacaka vakavunau. E so era dau raici keimami me keimami dauvolitaki ivola, ia nira sa raica ni keimami wilika vei ira na tikinivolatabu qai vakamacalataki tale ga vei ira, era qai kila ni keimami dau vakavuvulitaka na Vosa ni Kalou. Ena levu ni noqu taleitaka na cakacaka oqo, au sa vinakata sara ga meu vakaitavitaki au kina vakalevu. Au tekivu painia sara ena Sepiteba 1955.

Saumi na Vosovoso

E dua vei ira na imatai ni ka au vulica oya ni rawa ni saumi na vosovoso. Dua na gauna au a solia toka e dua na ilavelave ni ivoladraudrau na Watchtower vua e dua na marama e yacana o Violet Morice. Niu sikovi koya lesu, e dolava na katuba qai mai vakarogoci au vinaka sara toka niu vakamacalataka vua na iVolatabu. E vaka e taleitaka na veika e rogoca ena veigauna kece au sikovi koya kina. Ia, niu sureti koya me keirau vuli iVolatabu, e kaya: “Sega. Mera levu cake mada na luvequ, oti oya au na qai vakasamataka.” E vakayalolailaitaki au dina oya! E tukuna na iVolatabu ni tiko na “siga me rawa kina nai yau, kei na siga me yali kina nai yau.” (Dauvunau 3:6) Au sa mani nanuma meu kua ni vakayalia na iyau oqo.

Ni oti e dua na vula au sikovi Violet tale meu lai vakamacalataka e so tale na tikinivolatabu. Sega ni dede sa vuli iVolatabu o koya e veimacawa ena nona matanivale. Dede vakalailai sa qai kaya: “Au nanuma ni na vinaka cake mo sa curu mai vale, se vakacava?” E qai yaco o Violet me noqu itokani vinaka ena vakabauta. Io, e qai papitaiso o Violet me iVakadinadina i Jiova.

E kidacala o Violet ena dua na siga ni sa volitaka o watina na nodrau vale qai biuti koya tale ga. E qai vukei koya e dua na tacida iVakadinadina me kunea e dua na vale ena yakavi tiko ga ni siga oya. Me vakaraitaka nona vakavinavinaka vei Jiova, e vakatulewataka o Violet me sa na painia ena vo ni nona bula. Niu raica na kena uqeti koya na yalo i Jiova me gugumatua ena sokalou dina, au vakila sara ga kina na kena marautaki na cakacaka ni veivakatisaipelitaki. Io, ena noqu cakacaka tudei tale ga oqo.

Keirau a lesi kei Mary Robinson ena 1957 me keirau lai painia ena koro ni cakacaka o Rutherglen e Glasgow, mai Sikoteladi. E yaga vakalevu na neirau vunau ni kabu na vanua, ni cagicagi, kei na gauna e lutu kina na ucacevata. Keirau veitalanoa kei Jessie ena dua na siga. Au marautaka dina na neirau qai vuli iVolatabu. E Kominisi o watina, o Wally, a sega ni taleitaka taumada me keirau veitalanoa. E duatani na nona marau ni sa qai kila mai na nona vulica na iVolatabu ni Matanitu ni Kalou duadua ga ena kauta mai na bula vinaka vei ira na tamata. Erau qai yaco me rau dau veivakatisaipelitaki tale ga.

Rawa ni Veivakacalai na Ka e Yaco Taumada

Keirau lesi tarava i Paisley, e Sikoteladi tiko ga. Niu vakamacala tiko vua e dua na marama e kea, sa sogota mai na katuba o koya niu se vakamacala tiko. Sega ni dede sa vaqarai au tale yani me lai kere veivosoti. Niu sikovi koya ena macawa e tarava, e tukuna vei au: “Na ka au cakava oya e vaka sara ga au sogota na katuba e matana na Kalou. Oya na vuna au vaqarai iko tale kina.” E yaca ni marama oqo o Pearl. E tukuna vei au ni rui rarawataki ira vakalevu na nona itokani kei ira na wekana. E mani masuta na Kalou me dua na nona itokani vinaka. “Oti ga oya o sa basika sara mai,” e kaya o koya. “Au kila ni o iko sara ga na itokani vinaka oya.”

E sega ni ka rawarawa na veitokani kei Pearl. E tiko na nona vale ena dua na delana cecere e dau taubaletaki ga. Niu lai kauti koya mai ena nona vale ena imatai ni gauna e lako kina ena soqoni, e voleka niu vukataki ena kaukaua ni cagi kei na bi ni uca. Au kolotaka laivi na noqu ivakaruru ena gauna e kabasu kina. Ni oti ga e ono na vula mai na gauna e sogota kina vei au na katuba, sa papitaiso o Pearl me ivakaraitaki ni nona yalataki koya vua na Kalou.

Sega ni dede sa via vuli iVolatabu tale ga o watina, sega tale ga ni dede sa tomani au ena cakacaka vakavunau e veivale. E baci tau na uca ena siga oya. “Kua ni leqa,” e kaya o koya. “E dau vica na aua na noqu tucake tu ena draki vaka oqo niu sara soka, au rawa tale ga ni tauvi uca niu cakava na cakacaka i Jiova.” Dua na ka na noqu dau doka na nodra gugumatua na kai Sikote.

Au marau dina ni gauna au suka mai kina ni oti e vica vata na yabaki era se tiko ga ena dina e levu vei ira au vuli iVolatabu kei ira. Oya sara ga e dua na ka e marautaki kina na veivakatisaipelitaki. (1 Cesalonaika 2:​17-​20) Ena 1966, ni oti e walu na yabaki na noqu painia voli e Sikoteladi, au sureti meu lai vuli daukaulotu ena Watchtower Bible School of Gilead.

E Vanuatani

Au lesi sara i Bolivia, ena tauni tunumaka o Santa Cruz, ina dua na ivavakoso e 50 na kena dautukutuku. Na tauni oqo e vaka toka vei au na tauni era dau vakaraitaki ena iyaloyalo yavala mai Hollywood. Niu raica lesu na veika au sotava, au dua ga na daukaulotu. E sega ni se cemuri au se kati au na korokotaile, se sagai meu buturaki, meu yali ena vanualiwa, se voca na waqa au vodo tiko kina. Ia, e cakacaka marautaki ga vei au na veivakatisaipelitaki.

O Antonia, e dua vei ira na imatai ni yalewa au vakavulica ena iVolatabu e Santa Cruz. E dredre sara vei au na veivakavulici ena vosa vakaSipeni. E kaya na luvenatagane lailai o Antonia ena dua na siga: “I Na, e dau nakita beka me calacala na nona vosa me vakadredrei keda kina?” E qai yaco me tisaipeli o Antonia kei na luvenayalewa o Yolanda. A nona itau voli o Yolanda, o Dito, e dua na tagane e vuli lawa tiko. E tekivu vulica tale ga na iVolatabu qai dau tiko ena soqoni o Dito. Au vulica e dua na ka me baleta na kena vakavuvulitaki na iVolatabu ena gauna keirau vuli tiko kina: so na gauna ena gadrevi mera biligi vakalailai e so.

Ni sa vakalutu tiko ena nona vuli iVolatabu o Dito, au mani tukuna vua: “Dito, e sega ni vakasaurarataki iko o Jiova mo tokona na nona Matanitu. E dodonu mo digitaka sara ga vakataki iko.” Ni tukuna ni vinakata me qarava na Kalou, au kaya sara vua: “E taba toka oqo e dua na iliuliu dauveitusaqati. Ke dua na nomu vulagi e raica na itaba oqo, ena vakabauta beka ni o sa digitaka mo tokona na Matanitu ni Kalou?” E gadreva sara ga na ibili lailai oya.

Ni oti ga e rua na macawa, a yaco e dua na veitusaqati ra qai veivanavanai kina na gonevuli ena univesiti kei ira na ovisa. “Daru dro!” e kailavaka o Dito vei nona itokani. “Sega! Oqo sara ga na siga eda waraka tiko,” e sauma mai na nona itokani, ni taura e dua na dakai balavu qai cici cake ina delanivale ni univesiti. Na nona itokani oqo e dua vei ira na walu na itokani i Dito era mate ena siga oya. Ni rawa beka ni vakasamataka na levu ni noqu marau ena noqu raici Dito, o koya a rawa tale ga ni mate, ke a se sega ni vakatulewataka me sa lotu Vakarisito dina?

Vakilai na Yalo Tabu i Jiova

Niu tavali ena dua na matanikatuba ena dua na siga baleta niu nanuma ni rairai sa sikovi oti na vale oya, e kacivi au mai o radinivale. Na yaca ni marama oqo o Ignacia. E kilai ira na iVakadinadina i Jiova o koya, ia e sega ni toso sara vakayalo baleta ni dautusaqati koya vakaukaua o watina, e dua na ovisa e yacana o Adalberto. Ni sega ni matata vinaka vua e so na ivakavuvuli vakaivolatabu, keirau mani vuli iVolatabu sara. E saga vakaukaua o Adalberto me tarova na neirau vuli. Ia keirau mani veitalanoataka sara vakabalavu kei Adalberto e so na ulutaga. Oya e imatai ni kalawa ni neitou veikilai.

Ni rawa ni vakasamataka na noqu marau ni sa lewe ni ivavakoso o Ignacia, kei na nona dau vukei ira vakayalo, vakayago tale ga o ira na gadreva na veivakadeitaki. Eratou qai iVakadinadina tale ga o watina kei na tolu na luvedrau. Ena gauna sa qai matata kina vei Adalberto na ibalebale ni itukutuku vinaka, e gole ina siteseni ni ovisa me lai vosa vei ira na ovisa. Me vakaraitaka na bulabula ni nona vakamacala, e rawata mai e 200 na ikere ni Watchtower kei na Awake!

Vakatubura o Jiova

Ni oti e ono na yabaki na noqu cakacaka voli e Santa Cruz, au lesi sara i La Paz, e dua na koro levu e Bolivia. E 25 na yabaki na noqu cakacaka voli e kea. Ena veiyabaki ni 1970 era lewe 12 ga era veiqaravi tiko ena tabana ni iVakadinadina i Jiova e La Paz. Ni sa tete na cakacaka vakavunau, sa gadrevi e dua na valenitabana e levu cake, mani tara sara e dua ena siti e tubu tiko vakatotolo o Santa Cruz. E tokitaki mai kina na valenivolavola ni tabana ena 1998, au qai sureti tale ga meu lai tomani ira na sivia na le 50 era cakacaka tiko kina.

Sa tubu na dua ga na ivavakoso ena 1966 e Santa Cruz me sa sivia na 50 na ivavakoso. Era sa tubu tale ga na 640 na iVakadinadina e Bolivia taucoko ina volekata na 18,000 nikua!

Au marautaka ni vuavuaivinaka sara na noqu cakacaka e Bolivia. Ia, e dau vakauqeti au na nodra yalodina tiko ga na noqu itokani iVakadinadina e veiyasa i vuravura. Eda marautaka kece na nona vakalougatataka tiko o Jiova na kena vunautaki na nona Matanitu. E marautaki vakaidina na vakaitavi ena cakacaka ni veivakatisaipelitaki.​—Maciu 28:​19, 20, VV.

[iYaloyalo ena tabana e 13]

Painia tiko mai Sikoteladi

[iYaloyalo ena tabana e 15]

Cakacaka tiko ena valenivolavola ni tabana e Bolivia; (itaba e loma) tuvaitutu ena ika42 ni kalasi e Gilead