Marautaka Noda Vuravura Totoka
ERA raica rawa na daudikeva na maliwalala ni somidi sara na noda vuravura ni vakatauvatani kei na lomalagi tawavakaiyalayala kei na kena veisoso kalokalo. E sega ni dua tale na vanua ena noda maliwalala e rawati kina na bula. E rawa wale ga ena noda vuravura oqo, baleta ni tu kina na veika kece e gadrevi me rawa kina na bula.
E rawa tale ga ni marautaki na bula ena vuravura totoka oqo. Sa bau veivakacegui dina nida vakila na katakata ni siga ena draki batabata! O cei me sega ni qoroya na totoka ni cadra ni matanisiga vaka kina na kena dromu? Na matanisiga e sega wale ga ni vakacegui keda, e vakatau sara tale ga kina na noda bula.
Sa vica vata na milioni na yabaki na kena vakataudeitaka toka na noda vuravura, kei na vuravura tale e so ena noda maliwalala na idre kaukaua e tiko ena matanisiga. Era vulica e koronivuli na gone, ni vuravura kece era tu e maliwalala era sowiri wavolita tiko na lomadonu ni noda isoso kalokalo e yacana na Milky Way. Ia na matanisiga e dua tale ga vei ira na 100 na bilioni vakacaca na kalokalo era sowiri vata tiko.
Era vakaisoso tu na kalokalo, ra tu na isoso lalai se galaxy, o ira na isoso lalai oqo era sa qai umani vata ena dua na isoso levu se cluster. Ena noda isoso kalokalo na Milky Way e tiko kina e rauta ni 35 na isoso lailai. So na isoso levu cake sara era umani vata tu kina e vica na udolu na isoso lalai. Ena sega gona ni dei na sowiri ni noda vuravura kevaka na vuravura era wavolita na matanisiga e koto ena vanua e veiosoosoti tu kina na isoso kalokalo lelevu sara. Ia, e donu vinaka na vanua e toka kina ni oqori e dua vei ira na vanua ena maliwalala e “ganita vinaka na bula ni veika vereverea e vauca na noda bula,” rau kaya o Guillermo Gonzalez kei Jay W. Richards ena nodrau ivola The Privileged Planet.
A basika tu beka ga mai vakacalaka na bula ena vuravura oqo ena vuku ni kena vakabauti ni a yaco e dua na kacabote levu? Se tiko e dua na inaki uasivi ni bula ena vuravura totoka oqo?
Levu na tamata era kaya ni a buli ga vakatabakidua na noda vuravura meda bula kina.a A kauaitaka na lomalagi kei na vuravura e dua na dauniserekali ni Iperiu ena vica na senitiuri sa oti, e kaya: “Ni’u sa vakananuma na nomuni lomalagi, na cakacaka ni qaqalo ni ligamuni, na vula kei na kalokalo ko ni sa lesia; a cava na tamata mo ni nanumi koya kina?” (Same 8:3, 4) E vakabauta na dauniserekali oqo ni tiko e dua na Dauveibuli. E vakabauti tale beka ga oqori ena itabagauna vakasaenisi eda sa bula donuya tu nikua?
[iVakamacala e ra]
[Kato/iYaloyalo ena tabana e 3]
“Ni raici mai vakayawa na noda vuravura, e vaka sara ga na vatutalei karakarawa e tatibi tu ena buto ni maliwalala,” e kaya na Illustrated Science Encyclopedia—Amazing Planet Earth.
[Credit Line]
Mape: U.S. Fish & Wildlife Service, Washington, D.C./NASA