Kilai na Sokalou Dina

LEVU na lotu era kaya ni vu vakalou na ka era vakavuvulitaka. Ena vinaka kina meda muria na veika e cavuta na yapositolo i Jisu o Joni, ni vola: “O i kemuni na wekaqu lomani, ni kakua ni vakadinati ira kece ga era kaya ni sa tiko vei ira na Yalo Tabu, ia ni vakatovolei ira ga me laurai kina se sa mai vua na Kalou na yalo ka tiko vei ira se sega; ka ni ra sa lako yani ki vuravura e lewe vuqa na parofita lasu.” (1 Joni 4:1, VV) Eda na kila vakacava na veika e vu mai vua na Kalou?

Na ka kece e vu mai vua na Kalou ena vakatakilai koya ga, vakabibi nona itovo uasivi na loloma. E vakaraitaki na loloma ni Kalou ena isolisoli meda rawa ni dau boica kina na ka, eda rawa gona ni marautaka kina na iboi ni co era ivakaboi, senikau, se madrai e se qai vakabutari ga. Noda rawa tale ga ni raica na dromu ni siga, na bebe, se nona matadredredre e dua na gonelailai e votu kina nona lomani keda na Kalou. E vaka kina noda rawa ni rogoca na ivakatagi rogo vinaka, sere ni manumanu vuka, se nida rogoca na domona e dua eda dau lomana. O keda mada ga na tamata ivalavala ca eda dau vakavotuya na loloma ni Kalou. Oya na vuna eda vakila kina na dina ni vosa i Jisu: “A ka ni veivakalougatataki vakalevu me soli ka, ka vakalailai ga me taura na ka.” (Cakacaka 20:35) Eda dau marau ni vakaraitaka noda loloma baleta nida a buli ga meda ‘itovo vata kei na Kalou.’ (Vakatekivu 1:27) E tu vei Jiova e levu tale na itovo, ia e kilaitani ga ena nona loloma.

Na veika e vola na Kalou e dau vakatakilai kina na nona loloma. E tu gona vei ira na veimatalotu e vuravura e levu sara na ivola makawa. Ia, era vakavotui beka ena ivola oqori na loloma ni Kalou?

Na kena dina ni levu na ivola makawa ni lotu era sega ni vakamacalataki kina vakalevu na veika me baleta na nona lomani keda na Kalou kei na noda rawa ni lomani koya. Sega gona ni saumi rawa na nodra dau taroga e vica vata na milioni na tamata, “Na cava eda rawa ni raica kina na loloma ni Kalou ena nona ibulibuli, ia e sega ga ni oti rawa na rarawa kei na veika ca eda sotava tiko?” Na iVolatabu, e ivola makawa duadua ga ni lotu e rawa ni vakamacalataka vakamatata na loloma ni Kalou. E rawa tale ga nida vulica kina meda vakaraitaka na loloma.

Na iVola me Baleta na Loloma

Na Vosa ni Kalou, na iVolatabu, e vakatakilai Jiova ni “Kalou ni loloma.” (2 Korinica 13:11) E vakamacalataki tale ga kina na kena uqeti Jiova na nona loloma me solia vei rau na imatai ni tamata na bula e sega kina na tauvimate kei na mate. Ia, na kena beci ga na lewa ni Kalou, sa tekivu sotava kina na kawatamata na veika rarawa. (Vakarua 32:​4, 5; Roma 5:​12) E yavala gona o Jiova me vakalesuya mai na veika sa vakayali oya. E kaya na Vosa ni Kalou: “Sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:​16) E vakamatatataka tale ga na iVolatabu na loloma ni Kalou ena nona vakarautaka e dua na matanitu uasivi me veiliutaki kina o Jisu, mera rawata kina na bula vakacegu na tamata talairawarawa.​—Taniela 7:13, 14; 2 Pita 3:13.

Sa qai umana na iVolatabu na noda itavi na tamata ena veivosa oqo: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega. Ai matai ni vunau oqo, ka levu: a sa tautauvata na kenai karua, Mo lomana na kai nomu me vaka ko lomani iko. Sa vu ni vunau taucoko kei ira na parofita na vunau e rua oqo.” (Maciu 22:37-40) Na iVolatabu ga e vakadinadinataki ni vu vakalou. E cauraki tale ga kina na nona itovo na Kalou, e ivakadei kina vei keda ni vu dina ga mai vua na “Kalou ni loloma.”​—2 Timoci 3:16.

Nida raica oqori eda rawa sara ga ni kila se ivola makawa cava e vu dina mai vua na Kalou. Era kilaitani tale ga na dau sokalou dina nira dau loloma, nira vakatotomuria sara ga nona dau vakaraitaka na loloma na Kalou.

Nodra Kilai na Dau Lomana na Kalou

O ira na lomana dina na Kalou era kilaitani, vakauasivi nida sa bula tu oqo ena gauna e vakatoka na iVolatabu me “veisiga maimuri [“iotioti ni veisiga,” NW].” Sa qai levu ga nodra “dau lomani ira walega na tamata, era na dau vinakata nai lavo, . . . era na lomana vakalevu na marau a ra na lomani koya na Kalou vakalailai.”​—2 Timoci 3:​1-4.

O rawa ni kilai ira vakacava na tamata era lomana na Kalou? E kaya na iVolatabu: “Sai koya oqo na loloma vua na Kalou, me da muria na nona vunau.” (1 Joni 5:3) Nodra lomana na Kalou na tamata ena uqeti ira mera doka na ivakatagedegede ni bula savasava ena iVolatabu. Kena ivakaraitaki, e tiko na lawa ni Kalou e vauca na veiyacovi kei na vakamau. E vakadonui ga na veiyacovi vei tagane kei na watina yalewa erau vakamau, me tawamudu tale ga na vakamau. (Maciu 19:​9, VV; Iperiu 13:​4, VV) E dua na yalewa ni Sipeni e vuli cioloji a tiko ena nodra soqoni na iVakadinadina i Jiova qai raica nodra vulica tiko na ivakatagedegede ni bula savasava ena iVolatabu, e kaya: “Sega wale ga ni uqeti au na vosa ni veivakararamataki e yavutaki vakaivolatabu, e tarai au tale ga na nodra duavata, vaka kina nodra vakabibitaka na ivakatagedegede ni bula savasava, kei na nodra itovo vinaka.”

Me ikuri ni nodra lomana na Kalou, e kilaitani tale ga na nodra loloma na lotu Vakarisito dina ena nodra dau lomani ira na tiko veitikivi. E nodra cakacaka bibi duadua na nodra tukuna vei ira e so tale na inuinui duadua ga ni kawatamata, oya na Matanitu ni Kalou. (Maciu 24:14) Na nodra vakavulici o ira eda tiko veitikivi mera kila na Kalou ena yaga sara ga vakalevu. (Joni 17:3) Era dau vakaraitaka tale ga na lotu Vakarisito dina na nodra loloma ena levu na basoga. Era dau vukei ira na vakaleqai. Kena ivakaraitaki, na gauna e vakacaca kina mai Itali e dua na uneune, e vola e dua na niusiveva e kea ni o ira na iVakadinadina i Jiova era “dodoliga mera vukei ira na vakaleqai, ra sega ni leqataka se matalotu cava era lewena.”

Dina nira lomana na Kalou kei ira na tiko veitikivi, ia era dau veilomani sara ga vakataki ira na lotu Vakarisito dina. E kaya o Jisu: “E dua na vunau vou ka’u sa solia vei kemudou, Mo dou veilomani; me vaka ka’u sa lomani kemudou, mo dou veilomani talega vakakina. A ka oqo era na kila kina na tamata kecega ni dou sa noqu tisaipeli, kevaka dou sa veilomani.”​—Joni 13:34, 35.

E duatani beka na ivakarau ni nodra dau veilomani na lotu Vakarisito dina? E nanuma vaka kina o Ema, e dua na yalewa dau sasamaki. E cakacaka tiko e La Paz, mai Bolivia, ra qai dau vakaduiduitaki kina na dravudravua mai vei ira na vutuniyau ena vuku ni duidui vakayavusa. E kaya: “Ena imatai ni gauna au tiko kina ena nodra soqoni na iVakadinadina i Jiova, au raica ni dua na turaga e vakaisulu vinaka rau veitalanoa tiko kei na dua na marama ni Idia. Au se qai raica vakadua me yaco oya. Au kila sara ga ena gauna oya ni o ira oqo era tamata ni Kalou.” E kaya tale ga e dua na yalewa gone ni Brazil, o Miriam: “Au sega ni kila tu na marau, se meu vakila mada ga ena noqu loma ni vuvale. Ia, na imatai ni gauna au qai mai raica kina, oya na nodra vakaraitaka na loloma na iVakadinadina i Jiova.” Mai Mereke, e vola e dua na dairekita ni siteseni ni retioyaloyalo: “Kevaka wale ga era lewena na nomuni lotu e levu na tamata, ena sega ni vakilai ena noda vanua na ituvaki eda sa tu kina nikua. Au daunitukutuku, au kila tale ga ni yavutaki ena loloma na nomuni isoqosoqo, oni vakabauta dei tale ga na Dauveibuli.”

Vakasaqara na Sokalou Dina

Na sokalou dina ena kilaitani ga ena loloma. E vakatauvatana o Jisu na vakasaqarai ni sokalou dina ina kena vakasaqarai na gaunisala donu qai muri sara. Oqo duadua ga na gaunisala ena basika ina bula tawamudu. E kaya o Jisu: “Dou curu ki na matamata-ni-koro qiqo: ni sa lalaga na matamata-ni-koro, ka rabailevu na sala, sa basika ki na rusa, a ra sa lewe vuqa sa curu kina; ni sa qiqo na matamata-ni-koro, ka rabailailai na sala, sa basika ki na bula, a ra sa lewe lailai sa kunea.” (Maciu 7:13, 14) E dua wale ga na isoqosoqo ni lotu Vakarisito dina e duavata tiko kei na Kalou e muria na sala ni sokalou dina. E bibi gona na lotu o digia mo lewena. Ke o sa raica na sala oya o qai muria, o na rawata na bula vinaka duadua baleta ni tiko kina na loloma.​—Efeso 4:1-4.

Raitayaloyalotaka ga na marau levu o na vakila ni o muria na sala ni sokalou dina! Ena vaka sara ga ni o sa lako vata tiko kei na Kalou. O na vulica vua na Kalou na vuku kei na loloma mo marautaka kina nomu veimaliwai vinaka kei ira e so tale. O rawa ni vulica vua na inaki ni bula, o na kila tale ga na veika e yalataka na Kalou qai tiko nomu inuinui me baleta na gauna sa bera mai. O na sega vakadua ni veivutunitaka na nomu vakasaqara na sokalou dina.

[iYaloyalo ena tabana e 5]

Nira raici na ivola makawa kece ni lotu,

na iVolatabu ga e vakatakilai kina na loloma ni Kalou

[iYaloyalo ena tabana e 7]

Era kilaitani na lotu Vakarisito dina nira dau loloma