Na Veivakavulici e Yaga Dina

NA VAKAVULICI ni gone e rawa ni vakatauvatani kei na dua na ilakolako marautaki, ia e sotavi kina e so na ka ni bolebole. Oqo e dua na ilakolako o na tomani ira sara tiko ga kina na luvemu. O na vakayaloqaqataki ira, o dusimaki ira vakayalololoma, o vukei ira mera muria tiko ga na sala ena basika ina bula. E levu sara na ka mera vulica!

Me rawa nira qai tamata yaco dina na luveda, ra marautaka tale ga na nodra bula, e bibi mera bucina na itovo vinaka kei na ivakarau ni bula e vinakata na Kalou, nira na vakaduiduitaka rawa kina na ka vinaka mai na ka e ca. Kevaka era kilai Jiova, ra lomani koya tale ga, sa na qai vakaibalebale na nodra vuli, ena tawamudu tale ga na nodra vakila na yaga ni ka era vulica. Ni o itubutubu, e vakatau vakalevu vei iko na ka e vulica o luvemu, na nona raica vakabibi na ka e vulica, kei na nona taura rawa na kena ibalebale.

Levu sara na ka ni bolebole ena sotava na itubutubu ni qarava tiko nona itavi ni veivakavulici. Era dau vakacalai rawarawa na gone, qai levu na ka torosobu e rawa nira vulica mai taudaku. Eda bula ena vuravura e sa vakacolasau tu kina o Setani na Tevoro. (1 Joni 5:​19) E kauai o koya ena nodra vuli na luvemu, ia na nona kauai e yavutaki ena levu ni nona loma ca. E kenadau sara ena veivakavulici o Setani, ia e dauniveivakavulici torosobu. E dau vukici koya me ‘agilosi ni rarama,’ ia na nona veivakararamataki e veivakacalai, e veisaqasaqa kei na Vosa i Jiova kei na nona inaki. (2 Korinica 4:4; 11:14; Jeremaia 8:9) E qaseta na veivakacalai na Tevoro kei ira na nona timoni, era dau bukana na yalo ni nanumi koya ga, cakacaka vakatawadodonu, kei na ivakarau torosobu.​—1 Timoci 4:1.

O na taqomaki ira vakacava na luvemu mera kua ni vakacalai? O na tuberi ira vakacava mera tutaka na dodonu kei na dina? Na imatai ni ka bibi mo na dikevi iko mada. Dodonu mo ivakaraitaki. E bibi tale ga mo colata na nomu itavi, oya mo vakavulici luvemu, qai bibi me tiko na gauna mo dau vakayacora kina. Ia, ni bera nida vakadeuca na tikina oqo, de vinaka meda raica mada se cava na yavu ni vuli e yaga dina.

Yavu ni Vuli e Yaga Dina

E rawa nida vuli vei Tui Solomoni e Isireli, e dua vei ira na tui vuku me bau bula. E kaya na iVolatabu: “A sa solia vei Solomoni na Kalou na vuku kei na loma sa daukila rawa na ka levu sara, kei na daulomasoli, me vaka na nuku mai matasawa. Ia na vuku i Solomoni, sa uasivi e na nodra vuku kecega na kai na tu-i-cake, kei na vuku kecega ni kai Ijipita.” E kila o Solomoni “e tolu na udolu na vosa vakaibalebale; a sa dua na udolu ka lima na nona sere.” E buta vinaka ena veika e baleta na kau kei na manumanu. (1 Tui 4:​29-​34) Dau liutaka tale ga o Tui Solomoni na taravale e Isireli, okati e ke na tara ni valenisoro lagilagi i Jiova e Jerusalemi.

Eda kila mai na ivola e vola o Solomoni, me vaka na Dauvunau, ni kila vinaka tale ga o koya na noda ivakarau na tamata. A uqeti koya na Kalou me dusia na yavu ni vuli e yaga dina. E kaya o Solomoni: “Na rerevaki Jiova sa vu ni lomavuku.” A kaya tale ga na tui vuku oqo: “A rerevaki Jiova na vu ni vuku; kei na kilai Koya sa Yalosavasava sa ka ni veivakayalomatuataki.”​—Vosa Vakaibalebale 1:7; 9:​10.

Ke da rerevaka na Kalou, eda na dokai koya, eda na sega ni via cakava e dua na ka me rarawa kina. Eda kila ni o koya ga e Cecere Duadua, ni dodonu tale ga meda vakamalumalumutaki keda vua. E so era sega ni via kauaitaki koya na Vunibula ena nodra nanuma beka nira sa vuku, ia na nodra vuku e “ka sesewa vua na Kalou.” (1 Korinica 3:​19) E bibi mera vuli na luvemu, ia ena yaga duadua vei ira na vuli e yavutaki ena “vuku maicake.”​—Jemesa 3:​15, 17.

O koya e sega ni via cakava e dua na ka me rarawa kina o Jiova e vakaraitaka ni lomani koya. Oya na ka e vinakata o Jiova, mera dokai koya na nona tamata, mera lomani koya tale ga. A kaya o Mosese: “Kemuni na Isireli, a cava na ka sa taroga vei kemuni ko Jiova na nomuni Kalou, mo ni rerevaki [“dokai,” NW] Jiova ga na nomuni Kalou, ka mo ni lako e na nona sala kecega ka lomani koya, ka qaravi Jiova na nomuni Kalou, e na lomamuni taucoko kei na yalomuni taucoko, mo ni vakabauta nai vakaro i Jiova, kei na ka sa lesia ko koya, ka’u sa vakarota vei kemuni e na siga oqo, me yaco vei kemuni na ka vinaka?”​—Vakarua 10:​12, 13.

Ke da vakavulici ira na luveda mera dokai Jiova, eda sa yavutaki ira tiko ena dua na vuli era na vuku dina kina. Nira vaqaqacotaka tiko ga na veidokai oya, e sa na qai toro cake na nodra vakacaucautaki koya na Dauveibuli, na iVurevure ni vuku dina. Oqo ena vakarawarawataka na nodra taura na luveda na ibalebale ni ka era vulica kei na kena inaki. Era sa na qai rawa ni “vakaduiduitaka na vinaka mai na ca.” (Iperiu 5:​14, VV) Na yavu oqo ena yaga dina nira na yalomalumalumu tiko ga kina, era na sega ni douvaka tale ga na ca.​—Vosa Vakaibalebale 8:​13; 16:6.

Era Raici Iko Tiko na Luvemu!

Eda na vakavulici ira vakacava na luveda mera lomani Jiova, mera dokai koya? Na isau ni taro oqo eda na raica ena Lawa i Jiova a vakadewataka o Mosese vei ira na Isireli. E tukuni vei ira na itubutubu e Isireli: “Mo ni lomani Jiova na nomuni Kalou e na lomamuni taucoko, kei na yalomuni taucoko, kei na nomuni kaukauwa taucoko. Ia na vosa oqo, ka’u sa vakarota vei kemuni e na siga oqo, me tiko ga e na lomamuni: ia mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.”​—Vakarua 6:​5-7.

Era vulica e ke na itubutubu e so na lesoni bibi. E dua oqo: Ni o itubutubu, e dodonu mo ivakaraitaki. Me rawa nira vulica na luvemu mera lomani Jiova, o iko mada ga mo lomani Jiova, na nona vosa tale ga e dodonu me tara na lomamu. Cava e bibi kina oqo? Ni o iko ga o na vakavulici ira tiko vakalevu na luvemu. Era na raica tiko na nomu ivakaraitaki. Qai nomu ivakaraitaki ga era na vuli vakalevu duadua kina.

Na veika o dau vinakata, na veika o sasagataka, na ka o vakabibitaka, kei na veika e dau malele kina na yalomu ena kilai ena vosa o cavuta, kei na ka o cakava. (Roma 2:​21, 22) Nira se gone dramidrami na luvemu, era sa vuli makawa tiko ena nodra dau vakaraici iko. Era na raica na gone na ka e bibi vei rau na itubutubu, qai vakalevu mera yaco na gone mera lai vakabibitaka tale ga na veika oya. Ke o lomani Jiova dina, era na raica oqori na luvemu. Kena ivakaraitaki, era na raica ni ka bibi ena nomu bula na wili iVolatabu kei na vuli iVolatabu. Era na siqema rawa ni o dau vakaliuca na Matanitu ni Kalou. (Maciu 6:​33) Era na kila mai na nomu sega ni calata na soqoni, kei na vunautaki ni itukutuku vinaka ni Matanitu ni Kalou, ni ka bibi duadua ena nomu bula na nomu veiqaravi tabu.​—Maciu 28:​19, 20; Iperiu 10:​24, 25.

Colata Nomu iTavi

Oqo na ikarua ni lesoni e rawa ni vulica na itubutubu ena Vakarua 6:​5-7: E nomu itavi mo vakavulici luvemu. Dau nodra itavi na itubutubu ena gauna makawa mera vakavulica na dui luvedra. Yacova mai na imatai ni senitiuri, era se tomana tiko ga na itavi bibi oqo na itubutubu. (2 Timoci 1:5; 3:​14, 15) Ena ivola i Paula vei ira na nona itokani lotu Vakarisito, e vakaraitaka kina nira a vakaroti sara ga vakatabakidua na tama mera tuberi ira na gone ena “vunau kei nai vakavuvuli ni Turaga.”​—Efeso 6:​4, NW.

Ena vuku ni ogaoga ni bula ni veisiga, cakacaka, kei na itavi me qaravi, sa rawa ni vakavuna mera lai vakatautaka na itubutubu na nodra vakavulici na luvedra vei ira na qasenivuli kei ira na kenadau era saumi. Ia, sega ni dua vei ira oqo ena sosomitaka rawa na veiqaravi vakayalololoma vakaitubutubu. Kua ni raica vakamamada na nomu itavi, kei na ka vinaka e rawa ni vulica vei iko na luvemu. Ke o gadreva na veivuke, digidigi vinaka, kua ga ni guilecava ni se nomu icolacola tiko ga na nodra vakavulici na luvemu.

Me Tiko na Gauna Mo Tuberi Ira Kina na Luvemu

Oqo e dua tale na lesoni e rawa nira vulica na itubutubu ena Vakarua 6:​5-7: Nodra vakavulici na gone e gadrevi kina na gauna kei na sasaga. E nodra itavi na itubutubu ni Isireli mera “vakavulica” na ka dina mai na vosa ni Kalou vei ira na luvedra. Na vosa taumada vakaIperiu e vakadewataki e ke me vakavulica e kena ibalebale me “talevi,” me “cavuti tiko ga.” Oqo me vakayacori tiko ena siga taucoko, mai na kida ni mataka me lai yacova na dromu ni siga, ena “nomuni vale” vaka kina e ‘gaunisala.’ Ena vinakati dina na gauna kei na sasaga mera qai vakavulici rawa na gone, me bucini tale ga e lomadra na ivakarau ni rai kei na ivalavala e kilikili me rawa kina nira vakamarautaka na Kalou.

Na cava gona mo cakava me vakila kina o luvemu na vuli e yaga dina? Levu sara na ka. Vakavulici ira mera lomani Jiova, mera dokai koya. Mo ivakaraitaki vinaka. Colata na nomu itavi ena nomu vakavulici luvemu kei na nomu solia nomu gauna mo tuberi koya cake kina. Ni o tamata ga, o na cala ena so na gauna. Ia, ke lomamu dina mo cakava na loma ni Kalou, era na marautaka na luvemu na nomu sasaga, ena yaga vei ira. “Vakatavulica na gone e na sala e dodonu me lako kina,” e kaya na Vosa Vakaibalebale 22:6. “Ni sa qase mai, ena sega ni lako tani maikina.”

Na vuli e dua na ilakolako ena qai tinia ga o mate. Ke o lomana na Kalou ra lomani koya tale ga na luvemu, oqo e dua na ilakolako e rawa ni na tawavakaiyalayala. Ena vaka kina baleta ni levu sara tu na ka meda vulica me baleti Jiova kei na noda vakayacora tiko ga na lomana.​—Dauvunau 3:​10, 11.

[iYaloyalo ena tabana e 15]

O dau wili iVolatabu vei luvemu?

[iYaloyalo ena tabana e 16]

Me tiko na gauna mo vakavulici luvemu kina me kilai koya na Dauveibuli