Sa Vakarau Oti na Rarawa Kece

“A Uluvatu! sa sega ni cala na nona cakacaka.”​—VAKARUA 32:4.

1, 2. (a) Na cava o diva kina na inuinui ni bula tawamudu? (b) Na cava e dredre kina vei ira e le levu mera vakabauta na Kalou e yalataka na veika vinaka?

O DAU taleitaka mo raitayaloyalotaka na bula ena Parataisi? De o na via vakadikeva na noda vuravura oqo kei na duidui ka bula era tu kina e sega ni wiliki rawa. Se o rairai raitayaloyalotaka na nomu lomavakacegu ena nomu cakacaka vata kei ira tale e so ena kena veisautaki na vuravura oqo me dua na were totoka. Se o rairai diva tu na gauna o na taukena kina na taledi ni droini, taravale, vakatagi, se so tale na taledi o sega ni taukena rawa ena vuravura osooso oqo. E kena ibalebale ni o vakanamata tu ina ka e vakatoka na iVolatabu me “bula dina,” na bula a nakita o Jiova meda marautaka me tawamudu.​—1 Timoci 6:​19, VV.

² E ka dina ni marau qai itavi dokai na noda lai wasea na inuinui e yavutaki vakaivolatabu oqo vei ira tale e so, se sega beka? Ia, e levu era sega ni kauaitaka na inuinui oqori. Era vakatoka me ka e vakanananutaki tu ga se ra tatadrataka tu na tamata era vakacalai. E rawa tale ga me dredre nodra vakabauta na Kalou e yalataka na bula tawamudu ena Parataisi e vuravura. Baleta? E so e dau vakaleqai ira na kena vakilai tiko ga na ca. Era vakabauta ni kevaka e bula tiko e dua na Kalou kaukaua duadua qai dauloloma, e sega ni dodonu me yaco tiko e vuravura oqo na ca kei na rarawa. Era kaya ni na sega ni rawa ni tiko e dua na Kalou e vakatara tiko na ca, ia kevaka e mani tiko, ena sega ni Kalou kaukaua duadua, e sega tale ga ni kauaitaki keda. Era vakabauta na rai oqori e so. E matai dina o Setani ena nona vakamatabokotaka na nodra vakasama na tamata.​—2 Korinica 4:​4, VV.

3. Na taro dredre cava eda rawa ni veivuke kina ena kena saumi, na cava e rawarawa kina vei keda meda sauma?

³ Nida iVakadinadina i Jiova, e rawa sara ga vei keda meda vukei ira na tamata e vakacalai ira o Setani kei na vuku vakavuravura. (1 Korinica 1:​20; 3:​19) Eda kila na vuna era sega ni vakabauta kina e lewe levu na veika e yalataka na iVolatabu. E baleta ga nira sega ni kilai Jiova. De ra sega ni kila na yacana se na kena ibalebale, de ra kila ga vakalailai se ra sega sara ga ni kila na itukutuku ni nona dau vakayacora na veika e yalataka. Eda kalougata nida kila vinaka tu o keda. Ena vinaka meda dau railesuva na sala eda rawa ni vukei ira kina na “vakabutobutotaki na nodra vakasama” mera kila na isaunitaro dredre oqo, “Na cava e vakatara tiko kina na Kalou na ca kei na rarawa?” (Efeso 4:​18, VV) Eda na raica taumada na sala eda na yavutaka vinaka kina na isaunitaro. Oti oya eda na qai veivosakitaka na kena vakilai na itovo i Jiova ena nona vakatara tiko na ca.

Sala Dodonu me Saumi Kina na Taro

4, 5. Na cava e rairai vinaka meda cakava taumada ni taroga e dua na vu ni nona vakatara tiko na Kalou na rarawa? Vakamacalataka.

⁴ Na cava meda kaya ke dua e taroga na vuna e vakatara tiko kina na Kalou na rarawa? De eda na vinakata meda vakamacalataka vakamatailalai na vuna nida tekivu vakamacala sara mai na ka e yaco ena were o Iteni. So na gauna eda rawa ni cakava oqori. Ia, oqo e dua na ivakasala. De na vinakati me vakamacalataki mada e so na kena yavu. (Vosa Vakaibalebale 25:11; Kolosa 4:6) Meda raica mada e tolu na tikina mai na iVolatabu eda na via vakamacalataka vakalekaleka ni bera nida sauma na taro oqori.

⁵ Kena imatai, kevaka e rarawataka dina e dua na ca e yaco tiko e vuravura, de dua sa tarai koya sara ga se na wekana e so na ca. Ena vinaka mo vakaraitaka vua na nomu veinanumi. E vakaroti ira na lotu Vakarisito na yapositolo o Paula: “Tagi vata kei ira era sa tagi.” (Roma 12:15) E rawa ni tarai koya na nomu “veinanumi.” (1 Pita 3:​8, VV) Ke vakila nida kauaitaki koya, ena rawarawa me rogoci keda.

6, 7. Na cava meda vakacaucautaka kina e dua e taroga e dua na taro vakaivolatabu e vakaleqai koya tiko?

⁶ Kena ikarua, de vinaka meda vakacaucautaki koya ena nona taroga na taro. So era nanuma ni nodra taroga na taro oqori e ivakaraitaki ni nodra tawavakabauta se ra sega ni doka na Kalou. De tukuna vaka kina na nodra italatala ni lotu. Ia, na tarogi ni taro oya e sega ni ivakaraitaki ni tawavakabauta. Era taroga tale ga na veitaro vaka oqori e so na tamata yalodina era cavuti ena iVolatabu. Me kena ivakaraitaki, e taroga na daunisame o Tevita: “I Jiova, ko ni sa tu vakayawa e na vuku ni cava? Ko ni sa vunitaki kemuni e na veisiga ni rarawa e na vuku ni cava?” (Same 10:1) E taroga tale ga na parofita o Apakuki: “A cava na kena dede, kemuni Jiova, me’u sa tagi, ka kemuni sa sega ni rogoca? au sa tagi vei kemuni e na vuku ni valavala kaukauwa, ia ko ni sa sega ni ia na veivakabulai? A cava ko ni sa vakatakila kina vei au na ca, ka vakaraitaka talega vei au na ka rarawa? ia na veikove kei na veivakacacani sa tu ga e mataqu, a sa ia tiko na veileti, ka sa tubu mai na veivala.”​—Apakuki 1:​2, 3.

⁷ O rau na turaga yalodina oqo erau doka vakalevu na Kalou. Erau cudruvi beka baleta ni rau taroga na taro oqori? Sega, ni vakatara ga o Jiova me volai ena nona Vosa na nodrau taro. O koya tale ga e sotava voli na ca nikua ena rairai viakana tu vakayalo ena nona via kila se sauma vakacava na iVolatabu na nona taro. Nanuma tale ga ni o Jisu a vakavinavinakataki ira na viakana tu vakayalo, se “kauaitaka na nodra gagadre vakayalo.” (Maciu 5:​3, NW) E itavi dokai dina na noda vukei ira oqori mera rawata na kalougata se marau e yalataka o Jisu!

8. Na ivakavuvuli veicalati cava e vakavuna me vakabauti kina ni vakavuna tiko na Kalou na veika rarawa eda sotava, eda na vukei ira vakacava?

⁸ Kena ikatolu, ena rairai gadrevi tale ga meda vukei koya e taro me kila ni sega ni vakavuna tiko na Kalou na ca e vakayacori tiko e vuravura. E vakatavulici vei ira e levu na tamata ni Kalou e liutaka tiko na vuravura eda bula tiko kina oqo, ni sa lewa rawa tale ga na Kalou na veika kece e yacovi keda, da qai sega ni kila na vuna e vakararawataki keda tiko kina na tamata. Na veivakavuvuli oqo e lasu. E rogorogo ca kina na Kalou baleta ni vaka e vakavuna tiko na rarawa eda sotava tiko e vuravura oqo. Ena vinakati kina meda vakayagataka na Vosa ni Kalou meda vakadodonutaka kina na ivakavuvuli cala oqori. (2 Timoci 3:​16) E sega ni lewa tiko na vuravura ca oqo o Jiova, e lewa tiko o Setani na Tevoro. (1 Joni 5:​19) E sega ni sa lewa rawa tu o Jiova na veika ena yacovi ira na nona ibulibuli vuku; e solia ga vei ira na dodonu mera dui digia na ka vinaka se na ka ca, na ka e dodonu se na ka e cala. (Vakarua 30:19) E sega vakadua ni vakavuna o Jiova na veika ca; e cata ga na veika ca qai dau kauaitaki ira na vakaleqai vakatawadodonu.​—Jope 34:10; Vosa Vakaibalebale 6:​16-​19; 1 Pita 5:7.

9. Na cava e so na ivukevuke e vakarautaka na “dauveiqaravi yalodina ka vuku” mera vukei kina na tamata mera kila na vuna e vakatara tiko kina na Kalou o Jiova na rarawa?

⁹ Ni o sa vakamacalataka oti na yavu oqori, de dua o na vakila ni sa tu vakarau o koya e rogoci iko tiko me vulica na vuna e vakatara tiko kina na Kalou na rarawa. Sa vakarautaka na “dauveiqaravi yalodina ka vuku” e levu na ivukevuke me vukei iko. (Maciu 24:​45-​47, VV) Me kena ivakaraitaki, ena Soqo ni Tikina “Talairawarawa Vua na Kalou” e vakayacori ena yabaki 2005/06, a soli kina e dua na ivolacebaceba e kena ulutaga Sa Vakarau Oti na Rarawa Kece! O uqeti mo wilika na ivolacebaceba oqori mo rawa ni kila vinaka kina na veika e tukuni kina. E dua taucoko na wase ni ivola Na Cava Sara Mada e Kaya na iVolatabu?, sa tabaki ena gauna oqo ena 157 na vosa, e sauma na taro bibi oqo. Vakayagataka vinaka na ivukevuke oqori. E vakamacalataki vinaka kina na kena vakalewai mai Iteni na nona liutaka o Jiova na lomalagi kei na vuravura kei na veika e qai cakava kina na Kalou. Nanuma tiko ni o vakamacalataka na ulutaga oqo o sa vakaraitaka tiko e dua na ivakavuvuli bibi sara, oya na veika e baleti Jiova kei na nona itovo uasivi.

Vakabibitaka na iTovo i Jiova

10. Na cava e dredre kina vei ira na lewe levu mera kila na vuna e vakatara tiko kina na Kalou na rarawa, ia na cava ena vukei ira?

¹⁰ Ni o vukei ira na lewenivanua mera kila na vuna e vakatara tiko kina o Jiova mera veiliutaki na tamata ena veiuqeti i Setani, tovolea mo vakatakila na itovo uasivi i Jiova. E levu era kila ni kaukaua na Kalou; sa matau na nodra rogoca ni dau kacivi me Kalou Kaukaua Duadua. De dredre mera kila na vuna e sega ni vakayagataka kina na kaukaua e tiko vua me vakaotia totolo kina na veika tawadodonu kei na rarawa. De era sega ni kila vinaka na itovo i Jiova tale e so me vaka na nona dodonu, lewa matau, vuku, kei na nona loloma. E veiraurau vinaka na nona vakayagataka o Jiova na nona itovo oqori. E kaya kina na iVolatabu: “Sa sega ni cala na nona cakacaka.” (Vakarua 32:4) O na vakamacalataka vakacava na nona itovo oqori ni o sauma na taro e dau tarogi me baleta na ulutaga oqo? Meda raica mada e so na kena icakacaka.

11, 12. (a) Na cava e sega ni ganiti kina me vosoti na nodrau valavala ca o Atama kei Ivi? (b) Na cava ena sega ni vakatara kina o Jiova na ivalavala ca me tawamudu?

¹¹ Ke a rawa beka vei Jiova me vosoti rau o Atama kei Ivi? E sega tale ni veiganiti me rau vosoti. Ni rau sega ni tamata ivalavala ca, erau nakita sara ga o Atama kei Ivi na nodrau cata na veiliutaki ni Kalou ni lomalagi kei na vuravura, ia erau vakadonuya ga na veidusimaki i Setani. E sega ni kurabuitaki na nodrau sega ni veivutuni o rau na veitusaqati oqo. Nira vaqaqa e so na vuna e sega ni vosoti rau kina o Jiova, e rawa nira taroga tale tiko ga se cava e sega ni toroya sobu kina o Jiova na nona ivakatagedegede me vakatara kina na ivalavala ca kei na veitusaqati. Na isau ni ka e vaqaqai oqo e vauci kina nona dodonu o Jiova.​—Lako Yani 28:​36, NW; 39:​30, NW.

¹² E dau tukuni ena iVolatabu na dodonu i Jiova. E ka ni rarawa nira lewe lailai ga na lewe i vuravura ca oqo era kila na itovo oqori. E savasava qai dodonu o Jiova, e tawasei koya tani mai na ivalavala ca. (Aisea 6:3; 59:2) E vakarautaka o koya na isoro me bokoci kina na ivalavala ca, ia ena sega ni vakatara tiko me tawamudu. Ke vakatara o Jiova na ivalavala ca me tawamudu, ena sega na noda inuinui me baleta na gauna e se bera mai. (Vosa Vakaibalebale 14:12) Ena nona gauna lokuci, sa na qai vakasavasavataki ira kina na veika bula kece o Jiova. Ena yaco dina oqori baleta e nona inaki o koya e Dodonu.

13, 14. Na cava e sega ni vakarusai iratou kina na dauveitusaqati mai Iteni o Jiova?

¹³ Na cava e sega ni vakarusai iratou ga kina na dauveitusaqati mai Iteni o Jiova me qai tekivu vinaka tale? A tu vua na kaukaua me cakava oqori; sa vakarau vakayagataka na kaukaua oqori me vakarusai ira kina na tamata ca. Era na taroga e so, ‘Na cava e sega ni cakava kina oqori ni ratou se lewe tolu ga eratou ivalavala ca ena lomalagi kei na vuravura? Ke a sega li ni tarovi kina na tete ni ivalavala ca kei na rarawa eda vakila ena vuravura oqo?’ Na cava e sega ni cakava vaka kina o Jiova? E kaya na Vakarua 32:4: “Sa dodonu na nonai valavala kecega.” E kauaitaka vakalevu o Jiova na dodonu. “Ni sa vinakata na ka dodonu ko Jiova.” (Same 37:28) E sega ni vakarusai iratou na dauveitusaqati mai Iteni baleta ni dodonu o koya. Ena vuku ni cava?

¹⁴ E lomatarotarotaki na dodonu ni nona veiliutaki na Kalou ena gauna e veitusaqati kina o Setani. Ni dodonu o Jiova, e vinakata me saumi vakadodonu na veibeitaki i Setani. Ke ratou vakarusai na dauveitusaqati oya, ni dodonu vinaka me ratou vakarusai, ke a sega ni saumi vinaka kina na veibeitaki. Ke a vakadinadinataki ga kina ni kaukaua duadua o Jiova, ia e sega ni veiletitaki tiko na nona kaukaua. Sa vakaraitaka oti tale ga o Jiova na nona inaki vei rau o Atama kei Ivi. A vinakati me rau vakaluveni me vakatawani kina o vuravura, me rau vakamalumalumutaka, me rau lewa tale ga na veika bula e vuravura. (Vakatekivu 1:​28) Ke a vakarusai Atama kei Ivi o Jiova, ke a sega ni vakaibalebale na nona inaki me baleti ira na tamata. Ena sega tale ga ni salavata kei na dodonu i Jiova baleta ni dau vakayacora kece na ka e nakita.​—Aisea 55:​10, 11.

15, 16. Meda vukei ira vakacava o ira na via vakatura e dua tale na “iwali” ni veitusaqati e yaco mai Iteni?

¹⁵ A rawa beka vua e dua mai lomalagi se vuravura me walia vinaka cake mai vei Jiova na veitusaqati oya? So era na rairai vakatura na ka era nanuma me “iwali” ni talaidredre mai Iteni. Era na vakatura beka e so na sala me a wali vinaka cake kina na leqa oya. De sega ni ca na nodra inaki, ia era sega ni bau kila na levu ni vuku kei na kila e tu vei Jiova. Ni volavola vei ira na lotu Vakarisito mai Roma, e vakadeuca na yapositolo o Paula na vuku ni Kalou, okati kina na “ka vuni” e baleta na nona vakayagataka o Jiova na Matanitu nei koya na Mesaia me vakabulai ira na tamata yalodina, me vakarokorokotaki tale ga kina na yaca i Jiova. Na cava e kaya o Paula me baleta na nona vuku na Kalou e nakita na veika oqo? E tinia na nona ivola na yapositolo ena nona vola: “Vua na Kalou sa vuku duaduaga, me ia na vakarokoroko e na vuku i Jisu Karisito, ka sega ni mudu. Emeni.”​—Roma 11:25; 16:​25-​27.

¹⁶ E kila o Paula ni o Jiova e “vuku duaduaga,” na vutu ni vuku e lomalagi kei vuravura. Na tamata ivalavala ca cava e rawa ni vakasamataka e dua na sala e vinaka cake me caka kina e dua ga na ka, se kua mada ni okati kina na vakatulewa dredre e cakava na Kalou me baleta na veitusaqati taumada? E vinakati vei keda meda vukei ira e so tale meda qoroya vata na Kalou e “vuku na lomana.” (Jope 9:4) Na levu ga ni noda kila na vuku i Jiova, na levu tale ga ni noda nuitaka ni vinaka duadua na nona vakatulewa.​—Vosa Vakaibalebale 3:​5, 6.

Taleitaka na iTovo Kilai Tani i Jiova

17. E vukei ira vakacava na lomaleqataka na nona vakatara tiko na Kalou na rarawa na nodra kila vinaka na nona dauloloma o Jiova?

¹⁷ “Sa loloma na Kalou.” (1 Joni 4:8) Na vosa ena iVolatabu oya e vakatakila na itovo duatani duadua i Jiova e vakacegui ira dina na tamata era lomaleqataka tiko na veika ca e yaco tu oqo. E vakaraitaka o Jiova na nona loloma ena nona walia na veileqa e vu mai na ivalavala ca era sotava na veika e bulia. Ena nona loloma o Jiova e solia kina na inuinui vei ira na kawa i Atama kei Ivi, me rawa tale ga nira torovi koya ra qai veiwekani kei koya. Ena nona loloma e vakarautaka kina na Kalou na kedra ivoli na tamata, e dolava tale ga na sala mera vosoti kina mai na nodra ivalavala ca mera rawata tale kina na bula tawamudu. (Joni 3:​16) Ena nona loloma e vosovoso kina vei ira na tamata me rawa kina nira vakanadakui Setani ra qai digitaki Jiova me nodra iliuliu.​—2 Pita 3:9.

18. Eda marau nida kila na cava, na cava ena vakamacalataki ena ulutaga e tarava?

¹⁸ Ni vosa e dua na italatala ni lotu ena gauna e vakananumi kina na nodra vakacaca na batikadi, e kaya o koya: “Eda sega ni kila na vuna e vakatara tiko kina na Kalou na ca kei na rarawa.” Sa bau vakaloloma dina! Eda sega li ni marau baleta nida kila na vuna? (Vakarua 29:29) Nida kila ni vuku, dodonu, qai dauloloma o Jiova, eda kila tale ga ni sa vakarau vakaotia vakadua na rarawa. E yalataka sara ga o koya. (Vakatakila 21:​3, 4) Ia, vakacava o ira na sa mate ena vica vata na senitiuri sa oti? Ena vuku ni ka e cakava o Jiova me baleta na veitusaqati e Iteni, sa mai sega beka kina na nodra inuinui o ira na mate? Sega. Ena nona loloma, ena vakaturi ira mai na mate. Ena vakamacalataki oqori ena ulutaga e tarava.

O na Sauma Vakacava?

• Na cava e rawa nida kaya vua e dua e taroga na vuna e vakatara tiko kina na Kalou na rarawa?

• E laurai vakacava na nona dodonu kei na nona lewa matau o Jiova ena nona lewai iratou na dauveitusaqati e Iteni?

• Na cava meda vukei ira kina na tamata mera kila vinaka na loloma i Jiova?

[iYaloyalo ena tabana e 21]

Vukei ira era vakaleqai ena rarawa e tarai vuravura tiko

[iYaloyalo ena tabana e 23]

Rau taroga na Kalou ena lomadina na turaga yalodina o Tevita kei Apakuki