Nida sa Mate, e Bula Tale Tiko na Yaloda?

EDA tamata vakayago beka ga? Se dua tale na ka e bula tiko e yagoda? Eda bula tiko beka ga nikua, da yali nimataka? Se dua na ka tawarairai ena bula tiko nida sa mate?

Levu sara na ivakamacala veicalati era vakavulica na lotu me baleta na bula ni oti na mate, ia era duavata ena dua na vakasama: Ni dau bula tiko ga e dua na ka e tiko e loma ni tamata ena gauna e sa mate kina. Era vakabauta gona e levu ni “dua na ka” oya na yalo ni tamata. Cava o vakabauta? Na cava na yalo? Vakaevei, e tiko dina vua na tamata e bula tiko e dua na yalo, rau qai veikalikali beka kei na yagona ni sa mate? Ke vaka kina, sa qai tini e vei na yalo?

“Sa Mate na Yalo ni sa Takali na Yago”

Ena iVolatabu, e vakadewataki ena vosa vakaIperiu kei na vosa vaKirisi na “yalo” me “icegu” se “cagi.” Ia, oqo e sega ni baleta ga na noda cegu tiko. Kena ivakaraitaki, e kaya na iVolatabu: “Sa mate na yago ni sa takali na yalo.” (Jemesa 2:​26) Na yalo gona na ka e vakavuna na yavala ni yago. Yaco me icegunibula se igu e yavalata na tamata.

Na yalo oqo e sega ni icegu se cagi e dau curuma yani na yatevuso. Ena matata na tikina oqo nida dikeva na kena ituvaki e dua e se qai cavuka ga na nona icegu. Ni oti ga vakalailai na cavuka ni nona icegu ena rawa ni vakabulai tale. Baleta? Nira se bula tiko ga vakalekaleka na sela ni yago ena gauna e mudu kina na icegu. Ia ni rau sa veikalikali ga na sela ni yago kei na igunibula sa na dreve na sasaga kece e vakayacori me vakabulai kina o koya e sa ciba. Se mani vakacava na levu ni icegu se cagi e ceguvi vua, ena sega ga ni bula rawa kina e dua na sela ni yagona. Na yalo gona na igunibula tawarairai e bula rawa tiko kina na sela kei na tamata. Oqo sara ga na igunibula era solia na itubutubu vei ira na luvedra ena gauna era kunekunetaki kina, qai vakania tiko na igunibula oqo na icegu.​—Jope 34:​14, 15.

Vakacava, e duidui beka na yalo e tiko vei ira na tamata yadua se tautauvata na igunibula vei ira kece? E sauma na iVolatabu na taro oqori. Ni vakaraitaka tiko o Tui Solomoni ni tiko na yalo oqo vei ira na ka bula kece, e kaya: “Ni sa yacovi ira na tamata na ka sa yacova na manumanu; ni sa tautauvata ga na ka sa yacovi ira: me vaka sa mate oqo, sa mate vaka talega kina ko ya; io, sa dua vata ga na nodrai cegu. . . . Era sa lako kece ki na dua bauga na tikina; era sa kuvu-ni-soso kecega, ka ra sa suka tale kecega me kuvu-ni-soso. Ko cei sa kila na yalo ni tamata sa lako kicake, kei na yalo ni manumanu sa lako sobu vaka ki vuravura?” (Dauvunau 3:​19-​21) E tautauvata vinaka gona na yalo se igunibula e tiko vei keda na tamata vaka kina o ira na manumanu.

Na yalo e tiko ena yago e rawa ni vakatauvatani ina livaliva e yavalata e dua na misini se iyaya. Duidui na ka ena rawa ni vakayacora na livaliva tawarairai oqo ni sa yavalata na misini, ena vakatau tale ga ena ka e buli me cakava. Kena ivakaraitaki, na livaliva e rawa ni waqa kina e dua na cina se yavala kina e dua na irinicagi, rogo na retio, saravi na retioyaloyalo se kompiuta. Ia ena sega ga ni vuki na livaliva oqori me iyaya se misini. E igu wale ga na livaliva. E vaka sara ga kina na yalo, se igunibula. Ena sega ni vuki me ka bula se me yavala vaka na tamata. E sega ni vakasama se me vakanananu rawa​—e igu wale ga. Tautauvata vinaka na yalo se icegu e tiko vei keda na tamata kei ira na manumanu. Koya gona ni rau mate, ena sega ni lai bula tale tiko na yalodrau ena dua na vanua.

Cava Dina e Yaco Nida sa Mate?

E kaya na Dauvunau 12:7 ni sa mate na tamata, “sa na qai lesu na kuvu-ni-qele me qele tale me vaka eliu: ia na yalo ena lesu tale vua na Kalou ko koya ka sa solia.” Sega ni kena ibalebale oqo ni vuka i maliwalala na yalo me lako vua na Kalou. Vakasamataka mada na ka e cavuta vei ira na Isireli talaidredre o Jiova ena gusu i Malakai, na parofita. “Dou lesu mai vei au,” e kaya, “au na qai lesu yani vei kemudou.” (Malakai 3:7) Nodra “lesu” na Isireli vei Jiova e kena ibalebale na nodra saumaki mai na nodra cala ra qai muria tale na ivakaro dodonu ni Kalou. Na nona “lesu,” o Jiova vei ira na Isireli e kena ibalebale ni na vakadonui ira tale na nona tamata. Ena ituvaki ruarua oqo na “lesu” e dusia wale tiko ga na veisau ni rai, sega ni nona toki e dua mai na dua na vanua ina dua tale. E vakaraitaka oqo ni veigauna e vakayagataka na iVolatabu na vosa “lesu” e sega ni kena ibalebale duadua ga nona toki e dua mai na dua na vanua ina dua tale.

E vaka kina ni sa mate e dua, na “yalo [icegu] ena lesu tale vua na Kalou ko koya ka sa solia” ena vakasama ni sa takali na igunibula vei koya e sa mate, na Kalou dina duadua ga ena rawa ni vakalesuya vua na igu oya. Kena ibalebale oqo ni sa na qai vakatau sara ga vua na Kalou na nona bula ena gauna sa bera mai.

Vakasamataka mada na ka e kaya na Kosipeli i Luke me baleta na mate i Jisu Karisito. E kaya na kena itukutuku: “Sa qai kaci e na domo levu ko Jisu, ka kaya, I Tamaqu, au sa solia na yaloqu ki na ligamuni! Ni sa cavuta oti ga ko ya, sa cavuka sara na nona i cegu.” (Luke 23:​46, VV) Kena lako tani mai vei Jisu na yalona se nona icegu, e sega ni kena ibalebale ni sa gole i lomalagi vei Tamana. A davo no ena ibulubulu​—sa mate tu​—me yacova na nona vakaturi ni oti e tolu na siga. (Dauvunau 9:​5, 10) Na gauna mada ga e vakaturi oti kina, a sega ni lako sara vakadodonu i lomalagi. Ia, ‘a vakadinadinataka’ vei ira nona tisaipeli ‘ena vasagavulu na siga ni sa bula tale’ oti “sa qai kau cake.” (Cakacaka 1:​3, 9) A nuidei o Jisu ena gauna e mate kina ni ‘biuta na yalona e liga i tamana,’ qai nuitaki Jiova vakaoti ni na vakabulai koya tale.

Na Cava na Yalo?

Vakamatatataka sara tu ga na iVolatabu na ibalebale ni yalo. Oqo na igunibula e bula rawa tiko kina e dua. Na igunibula oqo e gadreva na icegu, se cagi me kana tiko kina. Sega gona ni dua na ka e dau tiko e loma ni tamata me bula tale tiko ni sa mate.

Na inuinui ni bula ena gauna sa bera mai ena vakatau sara tiko ga ena veivakaturi, se tu cake tale. E yalataka na iVolatabu: “Dou kakua ni kurabui e na ka oqo: ni sa lako mai na gauna era na rogoca kina na domona [Jisu] ko ira kecega e nai bulubulu, a ra na lako maikina.” (Joni 5:​28, 29) Na yalayala ni veivakaturi oya e inuinui dina vei ira na sa mate​—e sega ni ivakavuvuli ni tawamate na yalo.

E bibi kina me kilai na veika titobu e vauca na veivakaturi kei na veika era na rawata kina na kawatamata! Bibi tale ga na nona kilai na Kalou kei Karisito. (Joni 17:3) Era na marau na iVakadinadina i Jiova ena nomuni yasayasa mera vakavulici kemuni ena iVolatabu me titobu kina nomuni kila na Kalou, na Luvena kei na nona yalayala. Oni sureti mo ni veitaratara kei ira, se volavola ina vanua e dau tabaki kina na ivoladraudrau oqo.

[iYaloyalo ena tabana e 4]

Tautauvata kece na nodra icegu

[Credit Line]

Me: CNPC​—Centro Nacional de Pesquisa de Caprinos (Sobral, CE, Brasil)