Vosota Tiko ni o Waraka na Siga i Jiova

“Dou vakaikuritaka [e]na nomudou vakabauta . . . na vosota.”​—2 PITA 1:​5, 6.

1, 2. Na cava na ibalebale ni vosota, kei na cava e gadrevi kina vei ira na lotu Vakarisito?

SA VOLEKA sara na siga i Jiova. (Joeli 1:​15; Sefanaia 1:​14) Meda vakadeitaka mada ga na lotu Vakarisito nida na yalodina tiko ga vua na Kalou, da qai vakanamata ina gauna ena vakacerecerei kina na veiliutaki cecere i Jiova. Ia, eda se sotava tiko na veicati, veivakasewasewani, veivakacacani kei na mate ena vuku ni noda vakabauta. (Maciu 5:​10-​12; 10:22; Vakatakila 2:​10) Ena gadrevi kina na vosota​—oya nomu rawa ni bolea na veika dredre. E uqeti keda na yapositolo o Pita: “Dou vakaikuritaka [e]na nomudou vakabauta . . . na vosota.” (2 Pita 1:​5, 6) E gadrevi meda vosota, me vaka e kaya o Jisu: “Ko koya ena vosota me yacova nai vakataotioti, ena vakabulai ko koya.”​—Maciu 24:13.

² Eda dau vakila tale ga na tauvimate, noda lolositaki ira na wekada lomani, kei na levu tale na leqa. Sa na wacava na marau nei Setani ke malumalumu na noda vakabauta! (Luke 22:​31, 32) Ena veivuke i Jiova, ena rawa nida vosota na veika dredre. (1 Pita 5:​6-​11) Dikeva mada oqo e so na ivakaraitaki e vakadinadinataka ni rawa nida waraka na siga i Jiova ena vosota kei na vakabauta dei.

Sega ni Vakalatilati na Tauvimate

3, 4. Tukuna e dua na ivakaraitaki ni rawa nida qaravi Jiova ena yalodina, dina ga nida tauvimate.

³ E sega ni vakabulai keda vakacakamana ena gauna oqo na Kalou, ia e dau solia na kaukaua meda vosota kina na keda mate. (Same 41:​1-3) “Au nanuma lesu,” e kaya o Sharon, “niu dau dabe toka ga ena idabedabe qiqi. Na gauna au sucu kina, e tauvi au na cerebral palsy, se na mavoa ni mona, e vakaleqa sara ga noqu marautaka na bula vagone.” Ia, e vakacegui Sharon nona vulica na veika baleti Jiova kei na nona vosa ni yalayala me baleta na bula uasivi. Dina ni dredre me lako se vosa, e dau taleitaka ga na cakacaka vakavunau vakarisito. E kaya o Sharon ena 15 na yabaki sa oti: “Sa torosobu tiko ga na noqu bula, ia e tosoi au tu ga na noqu veiwekani kei na Kalou kei na noqu nuitaki koya. Au marautaka dina noqu mai maliwai ira na tamata i Jiova kei na nona veitokoni!”

⁴ A uqeti ira na lotu Vakarisito mai Cesalonaika o Paula mera “vakacegui ira era sa yalolailai.” (1 Cesalonaika 5:​14) E levu na ka e rawa ni vakavuna na lomabibi me vaka na levu ni rarawa. Ena yabaki 1993, e vola o Sharon: “Niu vakasamataka na kequ ituvaki, au . . . yalolailai sara ga me tolu na yabaki. . . . Ra dau vakacegui au ra qai vakasalataki au na qase. . . . Dau vakarautaka vakayalololoma vei keda o Jiova ena Vale ni Vakatawa na ivakasala me yaga vei ira na lomabibi vakalevu. Io, e dau kauaitaki keda nona tamata qai kila vinaka na veika e tu e lomada.” (1 Pita 5:​6, 7) Se qaravi Jiova voli ga ena yalodina o Sharon ni waraka tiko na siga levu ni Kalou.

5. Na ivakadinadina cava e dusia ni rawa vua na lotu Vakarisito me vosota na nona lomabibi vakalevu?

⁵ E so na lotu Vakarisito era lomabibi vakalevu baleta na veika era sotava. O Harley a raica na veiraravui vakadomobula ena iKarua ni iValu Levu qai dau moce vakaca ni tadra na ivalu. Gauna e moce tu kina, dau qai kailavaka mai: “Qarauna! Qarauna!” Ni yadra mai, sa bunolevu tu. Yaco na gauna me vulica qai muria sara na ivakarau ni bula e salavata kei na vosa ni Kalou, yaco kina me mudu na veitaravi ni nona tadra.

6. E walia vakacava e dua na lotu Vakarisito na veilecayaki ni lomana?

⁶ Dua na lotu Vakarisito e tauvi koya na bipolar disorder, se veilecayaki vakalevu na lomana, e dau dredre kina na nona vunau e veivale. Ia, e sasaga tiko ga me cakava na cakacaka oqo, baleta ni na vakatau kina na nona bula kei ira tale ga era rogoci koya. (1 Timoci 4:​16) So na gauna ena sega mada ga ni rawa ni qiria na lali e katuba ia a qai kaya: “Vakalailai ga, au na tauri au vakamalua, meu tovolea na vale e tarava. E vakaukauataki au na noqu vakaitavi ena cakacaka vakaitalatala.” E ka ni bolebole tale ga vua me tiko ena soqoni, ia e kila ni bibi qai yaga na veimaliwai vakayalo kei ira na mataveitacini. Dau saga gona me kua ni calata na soqoni.​—Iperiu 10:​24, 25.

7. Dina nira rere e so mera vosa e matanalevu se tiko ena soqoni, ia era vakaraitaka vakacava na nodra vosota?

⁷ E so na lotu Vakarisito era dau rerevaka vakasivia e dua na ituvaki se dua mada ga na ka. Me kena ivakaraitaki, era na rere ni vosa e matanalevu se mera lai tiko ena soqoni. Qai wacava sara na nodra sasaga mera vakamacala ena gauna ni soqoni vakarisito se vakaitavi ena Koronivuli ni Vuli Vunau! Ia, era vosota tiko ga, qai uqeti keda nodra sasaga mera tiko qai vakaitavi ena soqoni.

8. Na cava e gadrevi vua e dua me vorata kina na veilecayaki ni lomana?

⁸ Na vakacegu kei na moce vinaka ena rawa ni yaga vua e veilecayaki na lomana. Ena vinaka tale ga me qara na ivakasala vakavuniwai. Ia, ena daumaka sara ke vakararavitaka vua na Kalou ena masu. “Mo biuta vei Jiova na nomui colacola bibi, ena tokoni iko ko koya,” e kaya na Same 55:22. “Ena sega ni laivi ira na yalododonu me ra vakayavalataki e na dua na gauna.” O koya gona, “mo vakararavi vei Jiova e na vu ni yalomu.”​—Vosa Vakaibalebale 3:​5, 6.

Vosota na Lolosi

9-11. (a) Eda na vosota vakacava na lomabibi ni takali e dua na wekada? (b) E vukei keda vakacava na ivakaraitaki i Ana meda vosota kina na lolosi?

⁹ E vakilai na rarawa levu ni sa takali e dua na lewenivuvale, ena rawa ni vakavuna na lomabibi. O Eparama a tagicaka na watina lomani o Sera ena gauna sa mate kina. (Vakatekivu 23:2) O Jisu mada ga a “tagi” ni sa mate na nona itokani o Lasarusa. (Joni 11:35) Io, sa dau kena ivakarau ga vei keda meda rarawataka vakalevu nona takali e dua na wekada lomani. Ia, era kila na lotu Vakarisito ni na yaco na veivakaturi. (Cakacaka 24:15) O koya gona, era sega “ni yalo bibi me vakataki ira na tani ka sega tu na nodra i nuinui.”​—1 Cesalonaika 4:​13, VV.

¹⁰ Eda na vosota vakacava na lolosi? De dua ena yaga na ivakatautauvata oqo. Eda sega ni dau rarawataka vakabalavu nona biuti keda e dua na noda itokani ni gole ena dua na ilakolako, nida namaka meda na sotavi koya tale. Ni tiko vei keda na rai vata oqori me baleta na nona takali e dua na lotu Vakarisito yalodina, ena vakamamadataka na noda rarawa nida kila ni nuitaka tu o koya na veivakaturi.​—Dauvunau 7:1.

¹¹ Noda vakararavi vakatabakidua vua na “Kalou ni veivakacegui kecega” ena vukei keda meda vosota na noda lolosi. (2 Korinica 1:​3, 4) Ena yaga tale ga vei keda na nona ivakaraitaki na yada o Ana a bula ena imatai ni senitiuri. Se qai vitu ga na yabaki na nona vakawati, sa yada tale. Ia, ni sa yabaki 84, se sokaloutaki Jiova tiko ga ena valenisoro. (Luke 2:​36-​38) Sega ni vakabekataki ni yalogu vaka oya e vosota rawa kina na lolosi kei na galili. Eda na vosota tale ga na lolosi nida vakaitavi vakalevu ena cakacaka vakarisito okati kina na cakacaka vakavunau.

Vosota e so Tale na Veivakatovolei

12. Na veivakatovolei cava era vosota voli e so na lotu Vakarisito ena nodra vuvale?

¹² E so na lotu Vakarisito era na vosota voli na veivakatovolei ena bula vakavuvale. Me kena ivakaraitaki, ke dua vei rau na veiwatini e veibutakoci, ena vakacacana sara ga na bula ni vuvale! Ena levu ni nona rarawa kei na vutugu o koya e dabuitaki, ena rairai sega ni moce vinaka qai levu ga na nona tagi. Na levu ni nona rarawa ena sega ni qarava vinaka kina e so na cakacaka rawarawa, ena vakavuna tale ga na leqa se vakacalaka. Ena rairai sega ni viakana o koya e dabuitaki, sa na lutu mai na yagona, qai bibivoro na lomana. Ena rairai dredre vua me vakaitavi ena cakacaka vakarisito. Sega ni vakabekataki nira na rarawa tale ga vakalevu na gone!

13, 14. (a) E vakayaloqaqataki iko vakacava na masu i Solomoni ena gauna e vakatabui kina na valenisoro? (b) Cava meda masuta kina na yalo tabu?

¹³ O Jiova e dau vakarautaka na ivukevuke eda gadreva nida sotava na veivakatovolei vaka oya. (Same 94:19) E vakaraitaki ena masu i Tui Solomoni ena gauna e vakatabui kina na valenisoro, ni dau rogoca na Kalou na nodra masu na nona tamata. A masuta na Kalou o Solomoni: “Na masu kecega kei na kerekere kecega sa na ia e dua na tamata, se ko ira kecega na nomuni tamata na Isireli, ni sa kila na tamata yadua ka kena ca ni yalona, a sa dodoka yani na ligana vaka ki na vale oqo; mo ni qai rogoca mai lomalagi, na yasana ko ni sa tiko kina, ia mo ni kakua ni cudruvi ira, ka mo ni ia ga ka solia vua na tamata yadua me vaka na nonai valavala kecega, ni kemuni sa kila, na yalona; (ni kemuni sa kila, io koi kemuni duaduaga, na yalodra kecega na luve ni tamata;) me ra rerevaki kemuni e na gauna kecega era na bula tiko kina e na vanua ko ni a solia vei ira na neimami qase eliu.”​—1 Tui 8:​38-​40.

¹⁴ Ena yaga vakalevu na noda masuta tiko ga na yalo tabu. (Maciu 7:​7-​11) E okati ena vua ni yalo tabu na reki kei na vakacegu. (Kalatia 5:​22, 23) Eda lomavakacegu sara ga ni sauma na Tamada vakalomalagi na noda masu​—e sosomitaki na rarawa ena reki, qai sosomitaki na nuiqawaqawa ena vakacegu!

15. Na tikinivolatabu cava soti ena vukei keda nida dau lomaocaoca?

¹⁵ Meda namaka ni na tuburi keda na lomaocaoca nida sotava tiko na veika dredre. Ia, ena rawa ni bau mamada toka kevaka eda nanuma na vosa i Jisu: “Mo dou kakua ni lomaocaoca e na vuku ni nomudou bula, e na ka mo dou kania, se na ka mo dou gunuva: se e na vuku ni yagomudou, e na ka mo dou vakaisulu kina. . . . Ia dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo.” (Maciu 6:​25, 33, 34) E uqeti keda na yapositolo o Pita meda ‘biuta vua na Kalou na noda lomaocaoca kece ga, ni sa daunanumi keda o koya.’ (1 Pita 5:​6, 7) E dodonu meda saga meda walia na leqa. Ena vakacegui keda noda cakava na ka eda rawata ena leqa eda sotava da qai masulaka tale ga. “Laiva na nomu sala vei Jiova; vakararavi talega vua, ka na vakayacora ko koya,” e lagata na daunisame.​—Same 37:5.

16, 17. (a) Na cava eda sega ni galala vakadua kina mai na lomaocaoca? (b) Cava eda na vakila nida bulataka na ivakavuvuli e tiko ena Filipai 4:​6, 7?

¹⁶ E vola o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.” (Filipai 4:​6, 7) E macala nira sega ni galala vakadua mai na lomaocaoca na kawa ivalavala ca i Atama. (Roma 5:​12) O rau na yalewa ni Itaiti na wati Iso erau ‘vakararawataka na lomadrau’ na itubutubu i Iso o Aisake kei Repeka. (Vakatekivu 26:​34, 35) Na tauvimate e vakavu lomaocaoca vei ira e so na lotu Vakarisito me vakataki Timoci kei Tirofimo. (1 Timoci 5:​23; 2 Timoci 4:​20) O Paula e dau lomaleqataki ira era vakabauta vata. (2 Korinica 11:28) Ia, o koya e “daurogoca na masu” e dau volekati ira era lomani koya.​—Same 65:2.

¹⁷ Ena tiko vata kei keda “na Kalou ni veivakacegui” o Jiova, eda na vakila tale ga na nona veitokoni nida waraka tiko na nona siga. (Filipai 4:9) O Jiova e dau “yalololoma ka daulomasoli,” e “dauyalovinaka, qai tu vakarau me veivosoti,” qai ‘kila nida kuvunisoso.’ (Lako Yani 34:6; Same 86:​5, NW; 103:​13, 14) O koya gona, ‘meda vakatakila vua na noda kerekere,’ ena qai tiko vei keda “na vakacegu ni Kalou”​—na vakacegu e sega ni katuma rawa na tamata.

18. Me vaka e tukuni ena Jope 42:​5, ena rawa vakacava nida “raici” koya na Kalou?

¹⁸ Ni rogoci na noda masu, eda kila ni tiko vata kei keda na Kalou. Oti na nona vosota o Jope na veivakatovolei a sotakaya, e kaya: “Ka’u a rogoci kemuni [Jiova] e na daligaqu walega; ia sa qai raici kemuni na mataqu.” (Jope 42:5) Ena noda yalomatua, vakabauta, kei na vakavinavinaka, eda rawa ni vakananuma kina na veika sa cakava vei keda na Kalou, e vaka sara ga nida “raici” koya tiko. Sa na wacava na noda lomavakacegu ena vuku ni veikilai veivolekati oqo!

19. Cava ena yaco nida ‘biuta vua na Kalou na noda lomaocaoca kece ga’?

¹⁹ Ke da ‘biuta vua na Kalou na noda lomaocaoca kece ga,’ na vakacegu e solia ena yaga ena noda vosota na veivakatovolei, qai taqomaka tale ga na lomada kei na noda vakasama. Eda na vakila mai vu ni lomada nida galala mai na lomaocaoca, rere kei na kidroa, galala tale ga na noda vakasama mai na nuiqawaqawa.

20, 21. (a) Na vakacegu cava e vakila o Sitiveni ni sotava na veivakacacani? (b) Tukuna e dua na ivakaraitaki ni kena vakilai na vakacegu ena gauna ni veivakatovolei.

²⁰ A lomavakacegu na tisaipeli o Sitiveni ena gauna e vakatovolei vakaca kina na nona vakabauta. Ni bera ni solia na iotioti ni nona ivakadinadina, o ira kece na lewe ni Sanadrini era “raica na matana ni sa tautauvata kei na mata ni agilose.” (Cakacaka 6:​15) E laurai e matana na vakacegu​—vaka na mata ni agilosi, na italai ni Kalou. Nira rogoca na turaganilewa nona vakatakila o Sitiveni na cala ni nodra vakamatei Jisu, “sa laucoka na yalodra, a ra sa vakasequruquru bati vua.” “Ia ko koya ni sa sinai e na Yalo Tabu, sa rai matua ki lomalagi, a sa raica nai ukuuku ni Kalou, kei Jisu ni sa tu e na liga i matau ni Kalou.” A vakaukauataki Sitiveni na raivotu oya, qai yalodina me yacova na mate. (Cakacaka 7:​52-​60) Dina nida sega ni dau raica na raivotu, ia eda dau vakila na vakacegu ni Kalou nida sotava na veivakacacani.

²¹ Vakasamataka mada na ka era tukuna e so na lotu Vakarisito era mate ena nodra gauna na Nazi ena iKarua ni iValu Levu. A talanoataka e dua na turaga na veika e sotava ena valeniveilewai: “Sa tau na kequ itotogi mate. Niu vakarorogo tu qai oti na noqu cavuqaqataka ‘Dou gumatua mo dou yacova na mate,’ kei na vica tale na vosa ni noda Turaga, sa oti tale na veilewai. . . . Kua ni leqataka oya. Au sa vakila tiko na vakacegu oni dau tatadrataka tu ga!” Dua na itabagone lotu Vakarisito a totogi mate, oya me musuki na uluna, a vola vei rau na nona itubutubu: “Sa bogilevu tutu. Se vo levu na gauna meu veisautaka kina na lomaqu. Isa! au na kunea tale beka na marau ena vuravura oqo keu cakitaka noda Turaga? Sega sara! Ia, au vakadeitaka vei kemudrau niu na biuta na vuravura oqo ena marau kei na vakacegu.” Sega ni vakabekataki ni o Jiova e dau tokoni ira na nona tamata yalodina.

O Rawa ni Vosota!

22, 23. Cava meda vakadeitaka nida waraka tiko ena vosota na siga i Jiova?

²² Rairai o sega ni sotava e dua vei ira na ituvaki eda sa raica mai oqo. Ia, e dina na ka e kaya na tamata dau rerevaka na Kalou o Jope: “A tamata sa sucu maivua na yalewa sa vica walega na nona siga, ka sa vutu ni rarawa.” (Jope 14:1) Ke o itubutubu, de dua o saga tiko mo dusimaki ira na luvemu ena iVolatabu. Era na rairai sotava tiko na veivakatovolei mai koronivuli, ia sa na wacava nomu marau nira yalodina vei Jiova kei na nona ivakavuvuli dodonu! De dua o sotava tiko na ituvaki dredre kei na veitemaki ena vanua ni cakacaka. Ia, eda rawa ni vosota na ituvaki oqori kei na levu tale baleta o ‘Jiova e dau colata na noda icolacola ena veisiga.’​—Same 68:19.

²³ O na rairai nanuma ni o tamata wale, ia nanuma tiko ni o Jiova ena sega vakadua ni guilecava na nomu cakacaka kei na loloma o vakaraitaka ena yacana. (Iperiu 6:​10) Ena nona veivuke, o na vosota na vakatovolei ni nomu vakabauta. O koya gona, me lewe ni nomu masu kei na nomu inakinaki na vakayacori ni loma ni Kalou. O sa na qai nuidei ni na vakalougatataki iko qai tokoni iko na Kalou ni o waraka tiko ena vosota na siga i Jiova.

O na Sauma Vakacava?

• Cava mera vosota kina na lotu Vakarisito?

• Cava ena vukei keda meda vosota na tauvimate kei na lolosi?

• E yaga vakacava na masu nida vosota na veivakatovolei?

• Cava na vuna eda rawa ni vosota voli kina nida waraka na siga i Jiova?

[iYaloyalo ena tabana e 29]

Nida vakararavi vei Jiova eda na vosota kina na noda lolosi

[iYaloyalo ena tabana e 31]

E yaga na masu mai vu ni lomada ni vakatovolei noda vakabauta