O ‘Vutuniyau Beka Ena Ka Ni Kalou’?

“Sa vakakina ko koya sa daubinia nai yau me nona, a sa sega ni vutuniyau e na ka ni Kalou.”​—LUKE 12:21.

1, 2. (a) Na cava era bolea kina e levu mera vakuai ira ena vuqa na ka? (b) Na ka ni bolebole kei na leqa cava era sotava na lotu Vakarisito?

ENA veitabagauna sa sivi era buno ra qai cakacaka vakaukaua na tamata mai na veivanua nira via vakaiyau. Kena ivakaraitaki, na ika19 ni senitiuri na gauna vakairogorogo ni keli koula e Ositerelia, Sauca Aferika, Kenada, kei Mereke. Era uqeti na tu yawa mera biuti ira na wekadra kei na nodra itikotiko mera lai qara iyau ena vanua vovou qai vakarerevaki ena so na gauna. Era bolea kina e levu na veituvaki rerevaki, ra qai vakuai ira mai na levu na veika bibi mera rawa iyau ga kina.

² Ena levu gona ni nodra via vakaiyau, era buno ena cakacaka mera bula kina. Ena ka ni bolebole, dredre, qai veivakaocai toka nida sa bula tu oqo ena iotioti ni veisiga. Rawarawa sara me kauaitaki vakalevu na kakana, isulu, kei na vale, sa vakawaleni kina se guilecavi sara ga na veika e bibi cake. (Roma 14:17) Vakayagataka kina o Jisu e dua na vosa vakatautauvata me vakavotuya na kena dau malele vaka oqori na lomada. E vakamacalataki oqo ena Luke 12:​16-​21.

3. Vakamacalataka mada vakalekaleka na ivakatautauvata i Jisu ena Luke 12:​16-​21.

³ A cavuta na vosa vakatautauvata oqo o Jisu ena gauna vata ga a veivakasalataki tiko kina me qarauni na kocokoco, me vaka eda dikeva ena ulutaga sa oti. Ni oti ga nona veivakasalataki ena kocokoco, a talanoataka sara o koya e dua na turaga vutuniyau e sega ni lomavakacegu ena nona lololo se vale e maroroi kina na nona lewe ni were, mani talaraka me tara tale e so e lelevu cake. Ia na gauna sara ga e nanuma kina ni sa bula vakacegu tu qai marau, e tukuna vua na Kalou ni na mate, ena qai taukena nona iyau e duatani tale. Tinia kina o Jisu ena vosa oqo: “Sa vakakina ko koya sa daubinia nai yau me nona, a sa sega ni vutuniyau e na ka ni Kalou.” (Luke 12:21) Na cava eda rawa ni vulica ena ivakatautauvata oqo? Eda rawa ni bulataka vakacava na ka eda vulica kina?

Nona Leqa na Turaga Vutuniyau

4. Na cava e rawa ni tukuni baleta na turaga ena ivakatautauvata i Jisu?

⁴ E kilai levu na ivakatautauvata oqo i Jisu. A tekivuna ena nona kaya: “Sa dua na tamata vutuniyau sa vakalewe vinaka sara na nona vanua.” Sega ni tukuna o Jisu ni a rawata vakailoa se vakatawadodonu na turaga oya na nona iyau. A sega tale ga ni vakalewa me turaga ca. Ia e tauri rawa ena ivakamacala i Jisu ni a cakacaka vakaukaua na turaga oqo. Na ka e kilai me baleti koya na turaga oqo ni a lalawa qai binia na veika me baleta na gauna se bera mai, de dua a vakasamataka tiko nodratou bula nona vuvale. Mai na rai ni vuravura, e rawa ni tukuni ni turaga gugumatua, e sega ni vakawalena nona itavi.

5. Na cava e nona leqa na turaga ena vakatautauvata i Jisu?

⁵ Se mani cava e kilai, a tukuna ga o Jisu ni turaga vutuniyau, kena ibalebale ni sa levu rawa tu na ka e taukena. Ia me vaka nona ivakamacala o Jisu, e dua tiko nona leqa na turaga vutuniyau oqo. Sa rui sivia na vakalewe ni nona qele, sa sega ni taqea rawa se me qarava vinaka kina. Na cava e dodonu me cakava?

6. Na vakatulewa cava mera cakava e levu na dauveiqaravi ni Kalou nikua?

⁶ E tautauvata sara ga na ivakaraitaki ni turaga vutuniyau kei na ka era sotava tiko e levu na dauveiqaravi i Jiova nikua. Era saga na lotu Vakarisito dina mera kua ni dau lasu, ra gumatua, ra qai dau cakacaka. (Kolosa 3:​22, 23) Se ra mani cakacaka vua e dua se ra vakabisinisi, era na maqosa ena ka era cakava, ra bau kenadau tale ga. Ke toroi cake nodra itutu, se soli vei ira na cakacaka vou, ena gadrevi mera vakatulewa. Mera ciqoma beka se ra saga mera rawaka kina? Oqori tale ga na ka era vakila na gonevuli iVakadinadina e toso vinaka nodra vuli. Ena rairai soli vei ira e so na icocovi kei na sikolasivi mera vuli torocake kina ena koronivuli rogo. Mera vakatotomuri ira beka e so tale ena nodra ciqoma?

7. E walia vakacava nona leqa na turaga ena ivakatautauvata i Jisu?

⁷ Kevaka eda raica lesu na ivakatautauvata i Jisu, na cava a cakava na turaga vutuniyau ni sa sivia tale na lewe ni nona were qai sega na vanua me binia kina? A talaraka nona lololo, qai tara e so e lelevu sara mera maroroi kina kei na nona iyau. Nona lalawa vaka oya a rairai lomavakacegu qai nuidei kina, mani nanuma: “Au na qai kaya ki na yaloqu, Yaloqu, sa levu na nomui yau sa bini tu ena rauta na yabaki e vuqa; mo vakacegu mada, mo kana, mo gunu, mo marau tiko.”​—Luke 12:19.

Na Cava e “Lialia” Kina?

8. Na tikina bibi cava a sega ni kauaitaka na turaga ena ivakatautauvata i Jisu?

⁸ E vakaraitaka o Jisu ni a vakacalai koya na turaga vutuniyau oqo na ka a lalawataka ni nanuma ni sa na tiko vinaka kina. De na rairai vakasama vinaka, ia sa guilecavi e dua na tikina bibi​—na loma ni Kalou. E nanumi koya ga na turaga oya ena veika me bula vakacegu kina, kania, gunuva qai marautaka. A nanuma ni na ‘vuqa nona yabaki’ ena ‘levu ni nona iyau.’ Ka ni rarawa ni a sega ni vaka kina. E vaka ga e tukuna taumada o Jisu, “sa sega ni vakatau na bula ni tamata e na levu ni ka e tu vua.” (Luke 12:​15, VV) Ena bogi tiko ga oya, e tini botoilevu kina na nona cakacaka na turaga oya, ni kaya vua na Kalou: “Ko iko na lialia! e na bogi ga oqo ena tarogi tale vei iko na yalomu: ena qai nei cei na veika ko sa vakarautaka?”​—Luke 12:20.

9. Na cava e tukuni kina vua na turaga ena ivakatautauvata oqo ni lialia?

⁹ Meda dikeva mada oqo na tikina bibi ena vosa vakatautauvata i Jisu. E tukuna na Kalou vua na turaga oya ni lialia. E vakamacalataki ena Exegetical Dictionary of the New Testament ni vosa vaKirisi oqo e “dau dusia na lailai ni kilaka.” E vakamacalataka ni vosa e vakayagataka na Kalou ena ivakatautauvata e vakavotuya na kena dau “tawayaga na nodra lalawa na vutuniyau.” Sega ni vakaibalebaletaki na vosa oqori vua e sega ni vuku, ia vua ga “e cakitaka ni dodonu meda vakararavi vua na Kalou.” Na veika e tukuna o Jisu me baleta na turaga vutuniyau, eda lai nanuma sara kina na ka e qai tukuna ena imatai ni senitiuri vei ira na lotu Vakarisito ena ivavakoso o Leotisea, mai Esia Lailai: “Ko sa kaya tiko, Au sa vutuniyau, ka levu tu na noqui yau, ka sega na ka ka’u sa dravudravua kina; ia ko sa sega ni kila ni sai iko ga na ka lomani, ka vakaloloma, ka dravudravua, ka mataboko, ka luvawale.”​—Vakatakila 3:​17.

10. Na cava e sega kina ni ivakadei ni “yabaki e vuqa” na taukeni ni ‘levu na iyau’?

¹⁰ E ka vakayalomatua meda vuli ena ivakaraitaki oqo. Vakacava, eda na vaka beka na turaga ena ivakatautauvata​—meda buno ga ena cakacaka meda taukena kina ‘e levu na iyau,’ ia eda sa guileca na ka e bibi me rawati kina “na yabaki e vuqa”? (Joni 3:​16; 17:3) E kaya na iVolatabu: “Sa sega ni yaga nai yau e na siga ni cudru,” kei “koya sa vakararavi e na nonai yau ena bale.” (Vosa Vakaibalebale 11:​4, 28) Sa qai tinia o Jisu ena vosa vakatautauvata oya na veivakadreti oqo: “Sa vakakina ko koya sa daubinia nai yau me nona, a sa sega ni vutuniyau e na ka ni Kalou.”​—Luke 12:21.

11. Na cava e tawayaga kina meda yavutaka noda inuinui ena iyau vakavuravura?

¹¹ Na nona cavuta o Jisu na vosa “sa vakakina,” e dusia ni veika a yaco vua na turaga vutuniyau e rawa ni yaco tale ga vei ira na vakararavitaka vakatabakidua nodra bula kei na nodra inuinui ena iyau vakayago. E sega beka ni cala noda ‘binia na iyau,’ e cala ga ke da sega ni saga meda “vutuniyau e na ka ni Kalou.” E tautauvata tale ga kei na ivakasala ni tisaipeli o Jemesa: “Dou lako mai, oi kemudou sa daukaya, Edaidai se na mataka eda na lako ki na koro ko ya, ka tiko kina ka yabaki dua, ka veivoli kina, ka rawata nai yau: ia dou sa sega ni kila na ka sa na yaco e na mataka.” Na cava e dodonu mera cakava? “Oqo mo dou kaya, Kevaka sa vinaka vua na Turaga, eda na bula, ka kitaka na ka oqo, se na ka ko ya.” (Jemesa 4:​13-​15) Se mani vakacava tu na levu ni nona vutuniyau e dua kei na ka e taukena, ena tawayaga kece na veika oqori ke sega ni vutuniyau ena veika vakalou. Na cava gona na ibalebale ni vutuniyau ena veika ni Kalou?

Vutuniyau ena Ka ni Kalou

12. Eda na vutuniyau vakacava ena ka ni Kalou?

¹² Na vutuniyau ena ka ni Kalou me vaka e tukuna o Jisu, e veibasai kei na nona kumuna na iyau e dua me vutuniyau kina vakayago. E kaya tiko ga o Jisu meda kua ni vakabibitaka na noda binia na iyau se da marautaka na ka eda taukena. Ia, meda vakayagataka na veika eda taukena meda vakavinakataka se vaqaqacotaka na noda veiwekani kei Jiova. Eda na vutuniyau kina ena ka ni Kalou. Na vuna? Ena vakalougatataki keda vakalevu o koya. E kaya na iVolatabu: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”​—Vosa Vakaibalebale 10:22.

13. E “veivakavutuniyautaki” vakacava na veivakalougatataki i Jiova?

¹³ Ni vakalougatataki ira nona tamata o Jiova e dau solia sara ga na isolisoli vinaka duadua. (Jemesa 1:​17) Kena ivakaraitaki, a vakalougatataki ira na Isireli ena nona vakatikori ira ena “vanua ka dave kina na wai-ni-sucu kei na oni.” Dina ni tu tale ga e Ijipita na veika oqori, ia e duidui sara na kena e qai solia o Jiova vei ira. E kaya o Mosese vei ira na Isireli, ni ‘vanua oqo e vakaraica tiko o Jiova na nomuni Kalou.’ Kena ibalebale ga nira na tiko vinaka ni vakaraici ira o Jiova. Ena vakalougatataki ira vakalevu na Isireli o Jiova kevaka era yalodina tiko ga vua, nodra marau tale ga ena uasivi sara ni vakatauvatani kei ira na tamata era tu wavoliti ira. Sa “veivakavutuniyautaki” dina na veivakalougatataki i Jiova!​—Tiko Voli Mai na Lekutu 16:13; Vakarua 4:​5-8; 11:​8-​15.

14. Na cava era marautaka na vutuniyau ena ka ni Kalou?

¹⁴ Na vosa “vutuniyau e na ka ni Kalou” e dau tukuni tale ga me “vutuniyau e na mata ni Kalou.” (Veiyalayalati Vou) Era dau kauaitaka vakalevu na vutuniyau vakavuravura na nodra rai e so tale. Laurai votu oqo ena nodra ivakarau ni bula. Era dau vinakata mera qoroi ena ka e vakatoka na iVolatabu me “yalo e dokadokataka na veika ni bula oqo.” (1 Joni 2:​16, VV) Ena yasana adua, era sega ni vaka oya na vutuniyau ena ka ni Kalou nira marautaka nona veivakadonui, nona veitokoni, nona yalololoma levu kei na nodra veiwekani vakavoleka kei koya. Oqo e vu ni nodra marau kei na nuidei, na ka e sega ni solia rawa na vutuniyau vakavuravura. (Aisea 40:11) Ia, na cava meda cakava meda vutuniyau kina ena mata ni Kalou?

Vutuniyau ena Mata ni Kalou

15. Na cava meda cakava meda vutuniyau kina ena ka ni Kalou?

¹⁵ Ena vosa vakatautauvata i Jisu, na turaga oya e lalawa qai cakacaka vakaukaua me vakaiyau kina, qai tukuni vua ni lialia. Kevaka e via vutuniyau e dua ena ka ni Kalou, e dodonu me cakacaka vagumatua qai oga vakalevu ena itavi e yaga dina qai vakainaki vua na Kalou. Dua na itavi oqo a vakarota o Jisu: “Dou lako yani ka qisi ira me ra noqu tisaipeli na lewe ni veivanua kece ga.” (Maciu 28:​19, VV) E rawa ni vakatauvatani kei na noda maroroi ilavo na noda vakayagataka na gauna, kaukaua kei na taledi, me kua ni yaga ga vei keda, ia me vunautaki ga kina na Matanitu ni Kalou kei na veivakatisaipelitaki. O ira na dau cakava oqori, sa levu sara na veika vivinaka vakayalo era tauca, me vaka e vakadinadinataki ena vica na ivakaraitaki e tarava.​—Vosa Vakaibalebale 19:17.

16, 17. Tukuna e so na ivakaraitaki era vutuniyau kina e so ena mata ni Kalou.

¹⁶ Kena imatai, nona ivakaraitaki e dua na turaga lotu Vakarisito mai na dua na vanua vakaEsia. E dau vakavinakataka na kompiuta qai sau vinaka. Ia, e kania vakalevu nona gauna na nona cakacaka, e vakila ni sa dravudravua vakayalo. Sega kina ni via saga na itutu torocake, mani kere vakacegu lai dua sara nona bisinisi ni volitaki aisikirimu e gaunisala. E cakava oya me levu na gauna e vakayagataka ena veika vakayalo kei na veika e vauca. Era vakalialiai koya na nona itokani vakacakacaka e liu, ia na cava e vakila? E kaya: “Levu cake sara na noqu ilavo mai na noqu cakacaka e liu. Au marau vakalevu niu sega ni lomabibi se nuiqawaqawa me vaka au vakila ena noqu cakacaka e liu. Koya e bibi sara niu sa volekati Jiova ena gauna oqo.” Na veisau oya e rawa kina vua na lotu Vakarisito oqo me cakacaka vakaitalatala vakatabakidua, sa veiqaravi sara tiko ena gauna oqo ena nodra valenivolavola ni tabana ni iVakadinadina i Jiova ena nona vanua. Sa “veivakavutuniyautaki” dina na veivakalougatataki i Jiova.

¹⁷ Dua tale ivakaraitaki e baleta e dua na marama e susu ena vuvale e vakaliuci kina na vuli. A vuli ena univesiti mai Varanise, Mexico kei Suwitisiladi, sega ni vakabekataki ni na dua kina nona cakacaka vinaka. “Au rawaka vakalevu; au dau dokai, levu tale ga na ka e soli vei au,” e kaya, “ia au vakila ga e lomaqu na galili, au sega ni lomavakacegu.” Sa qai vulica na veika me baleti Jiova. E kaya: “Niu sa toso tiko vakayalo, au sa vinakata meu vakamarautaki Jiova vaka kina meu dolea nona veivuke, e matata kina vei au na ka meu cakava​—meu qaravi koya vakatabakidua.” A vakacegu mai na nona itutu, sega ni dede sa papitaiso. Sa sivi oqo e 20 na yabaki nona marautaka tiko na veiqaravi vakatabakidua ena cakacaka vakaitalatala. “Era nanuma e so niu sa vakawalena tu na noqu taledi,” e kaya, “ia ra raica votu noqu mamarau, ra qoroya tale ga na ivakavuvuli au bulataka. Au masuti Jiova ena veisiga me vakayalomalumalumutaki au, me ciqomi au kina.”

18. Eda rawa ni vutuniyau vakacava ena ka ni Kalou me vakataki Paula?

¹⁸  A rawa sara ga ni dua nona cakacaka vinaka o Saula, na turaga a qai veisau me yapositolo o Paula. Ia e vola: “Au sa okata me sega ni yaga na ka kece ga e na kena talei na kilai Karisito Jisu na noqu Turaga.” (Filipai 3:​7, 8, VV) E raica o Paula na nona vutuniyau ena vuku i Karisito me uasivia na veika kece e dulaka tu o vuravura. Kevaka o biuta laivi na kocokoco kei na nanumi iko ga qai qaravi Jiova, o na marau ni o vutuniyau vua na Kalou. E vakadeitaki keda na Vosa ni Kalou: “A kenai sau ni yalomalumalumu kei na rerevaki Jiova nai yau, kei na vakarokoroko, kei na bula.”​—Vosa Vakaibalebale 22:4.

Vakamacalataka Mada

• Na cava nona leqa na turaga ena ivakatautauvata i Jisu?

• Na cava e tukuni kina vua na turaga ena vakatautauvata ni lialia?

• Na cava na ibalebale ni vutuniyau ena ka ni Kalou?

• Eda na rawa vakacava ni vutuniyau ena ka ni Kalou?

[iYaloyalo ena tabana e 26]

Na cava e tukuni kina vua na turaga vutuniyau ni lialia?

[iYaloyalo ena tabana e 27]

Rawa vakacava ni ka ni veivakatovolei na sasaga ni rawaka?

[iYaloyalo ena tabana e 28]

“Na veivakalougatataki maivei Jiova sa ia na veivakavutuniyautaki”