Ka Mo Cakava Mo Maqosa Kina ena Veivakatisaipelitaki

“Lako . . . ka qisi ira me ra noqu tisaipeli na lewe ni veivanua kece ga.”​—MACIU 28:​19, VV.

1. Na kila kei na ivakarau ni rai cava a gadrevi vei ira e so era qarava na Kalou ena gauna makawa?

E DODONU mera vulica na qaravi Jiova na kila kei na ivakarau ni rai ena yaga ina nodra cakava na lomana. Kena ivakaraitaki na nona vakaroti Eparama kei Sera na Kalou me rau biuta na koro vutuniyau o Uri, ni a gadrevi vei rau na kila kei na maqosa ena cakacaka me vakarawarawataka nodrau bula ena valelaca. (Iperiu 11:​8, 9, 15) Vaka kina o Josua, a gadrevi me kila taumada na Lawa i Jiova, me yaloqaqa qai nuitaka na Kalou me liutaki ira kina na Isireli ina vanua yalataki. (Josua 1:​7-9) Oqori tale ga na ka a gadrevi vei Pisalieli kei Aoliapi, dina ni rau sa maqosa toka ena cakacaka vakamatai, ia a vakalougatataki rau na yalo tabu ni Kalou me levu tale na ka rau kila me qaravi vinaka kina na liutaki ni tara ni valenisoro kei na so na kena cakacaka.​—Lako Yani 31:​1-​11.

2. Na taro cava eda na veivosakitaka me baleta na veivakatisaipelitaki?

² Ni oti e vica vata tale na senitiuri, a lesi ira nona imuri o Jisu mera: “Lako . . . ka qisi ira me ra noqu tisaipeli na lewe ni veivanua kece ga, . . . vakavulici ira me ra muria na veika kece ga au sa vakarota tu vei kemudou.” (Maciu 28:​19, 20, VV) Se qai imatai ni gauna mera lesi kina ena dua na itavi dokai vaka oya. Na kila cava ena gadrevi me yaga ina noda veivakatisaipelitaki? Eda na rawata vakacava na kila oqori?

Me Titobu na Nomu Lomana na Kalou

3. Na cava eda na vakaraitaka nida muria na ivakaro meda veivakatisaipelitaki se tuberi ira e so tale mera tisaipeli?

³ Ena gadrevi taumada me titobu na noda lomana na Kalou ni bera nida torovi ira na tamata da qai uqeti ira mera mai qarava na Kalou dina. Era vakaraitaka na Isireli nira lomana na Kalou ena nodra talairawarawa mai vu ni lomadra ina nona ivakaro, ra cabora na isoro e vakadonuya, ra qai vakacaucautaki koya ena sere. (Vakarua 10:​12, 13; 30:​19, 20; Same 21:13; 96:​1, 2; 138:5) Nida veivakatisaipelitaki se da tuberi ira e so mera tisaipeli eda na muria tale ga na lawa ni Kalou, da qai vakaraitaka noda lomani Jiova nida tukuna na veika baleti koya kei na nona inaki. Meda dau vosa ena vakabauta, da qai digia vinaka na vosa eda vakayagataka meda vakaraitaka kina na titobu ni noda taleitaka na inuinui e vakarautaka vei keda na Kalou.​—1 Cesalonaika 1:5; 1 Pita 3:​15.

4. Na cava e taleitaka kina o Jisu na vakavulici ira na tamata baleti Jiova?

⁴ Ni titobu nona lomani Jiova o Jisu e dau taleitaka kina me tukuna na inaki ni Kalou, nona Matanitu, kei na sokalou dina. (Luke 8:1; Joni 4:​23, 24, 31) E kaya sara mada ga: “A qau kakana me’u kitaka na loma i koya sa talai au mai; ka me’u vakaotia na nona cakacaka.” (Joni 4:​34) E dusi Jisu na vosa ni daunisame: “Au sa reki me’u kitaka na ka ko ni sa vinakata, noqu Kalou: io, na nomuni vunau sa tu e na vu ni yaloqu. Au a vunautaka na veivakadonui e nai soqosoqo levu: raica, ka’u sa sega ni tarova na gusuqu, ko ni sa kila ga, Jiova.”​—Same 40:​8, 9; Iperiu 10:​7-​10.

5, 6. Na itovo cava e bibi ena nodra tuberi e so tale mera tisaipeli?

⁵ O ira na ka vou era se qai vulica ga na ka dina vakaivolatabu e dau uqeti ira nodra lomana na Kalou mera tukuna ena vakabauta dei na veika baleti koya kei na nona Matanitu, ra lai uqeti tale kina e so mera vulica na iVolatabu. (Joni 1:​41) Io, na noda lomana na Kalou e dua na ka bibi e uqeti keda meda tuberi ira kina e so mera tisaipeli. Meda dei tiko mada ga ena noda lomana na Kalou nida dau wilika na nona Vosa da qai vakasamataka vakabibi.​—1 Timoci 4:​6, 15; Vakatakila 2:4.

⁶ Sega ni vakatitiqataki ni nona lomani Jiova o Jisu, a uqeti koya me qasenivuli gugumatua. Ia e so tale na ka a vakavuna me dautukutuku maqosa ni Matanitu ni Kalou. Cava tale beka a vu ni nona maqosa o Jisu ni tuberi ira e so mera tisaipeli?

Dau Veikauaitaki Vakayalololoma

7, 8. E raici ira vakacava na tamata o Jisu?

⁷ E dau nanumi ira na tamata o Jisu qai kauaitaki ira dina. Ena gauna mada ga e se bula tiko kina kei na Kalou qai nona “matai daucakacaka,” e dau taleitaka na veika e baleti ira na tamata. (Vosa Vakaibalebale 8:​30, 31) Ni bula voli vakatamata e vuravura, e dau lomani ira vakalevu na tamata, qai vakacegui ira na lako yani vua. (Maciu 11:​28-​30) E vakaraitaka vinaka o Jisu na loloma kei na veikauaitaki i Jiova, qai dreti ira oqori mera qarava na Kalou dina duadua ga. Era vakarorogo vei Jisu na tamata kece ni kauaitaki ira vakayalololoma kei na kedra ituvaki.​—Luke 7:​36-​50; 18:​15-​17; 19:​1-​10.

⁸ Na gauna e tarogi koya kina e dua na turaga ena ka me cakava me rawata kina na bula tawamudu, ‘e vakaraici koya o Jisu, qai lomana.’ (Marika 10:​17-​21) Eda wilika me baleti ira e so a vakavulica o Jisu mai Pecani: “Sa daulomani Marica ko Jisu, kei tacina, kei Lasarusa.” (Joni 11:​1, 5) Dau lomani ira vakalevu na tamata o Jisu qai bolea me kua ni cegu, ia me vakavulici ira ga. (Marika 6:​30-​34) Na titobu ni nona lomani ira na tamata o Jisu kei na nona dau kauaitaki ira, e sega kina ni dua erau vakatauvatani ena nona maqosa ni tuberi ira ina sokalou dina.

9. Na cava na rai i Paula baleta nona tuberi ira e so mera tisaipeli?

⁹ E kauaitaki ira vakalevu na tamata e vunau vei ira na yapositolo o Paula. Me kena ivakaraitaki, e kaya vei ira na sa mai lotu Vakarisito e Cesalonaika: “Ni keitou sa yalololoma sara vei kemudou, keitou sa vinakata me solia vei kemudou nai tukutuku-vinaka ni Kalou, ia ka sega ni koya walega, a neitou bula talega, ni keitou sa lomani kemudou vakalevu.” Nona sasaga gona vakayalololoma o Paula era ‘saumaki kina e so mai na qaravi matakau mera qarava na Kalou bula.’ (1 Cesalonaika 1:9; 2:8) Kevaka eda kauaitaki ira dina na tamata, me vaka e cakava o Jisu kei Paula, eda na marau dina nida raica ni uqeti ira “sa vakarau tu me vinakata na bula tawamudu” na itukutuku vinaka.​—Cakacaka 13:48.

Dau Vakuai Iko

10, 11. Na cava e gadrevi kina meda vakuai keda nida tuberi ira tiko e so tale mera tisaipeli?

¹⁰ O ira na maqosa ena nodra tuberi ira e so tale mera tisaipeli era dau vakuai ira. E sega ni bibi vei ira na vakaiyau. A tukuna o Jisu vei ira nona tisaipeli: “E dredre sara vei ira sa vutuniyau me curu ki na matanitu ni Kalou!” Ra kidacala na tisaipeli ena ka e tukuna oqori o Jisu, qai tomana o koya: “Ragone, e dredre sara vei ira era sa vakararavi ki nai yau me curu ki na matanitu ni Kalou! Sa rawarawa me curuma na mata ni cula na kameli, ka dredre vua na tamata vutuniyau me curu ki na matanitu ni Kalou.” (Marika 10:​23-​25) E vakatura tiko o Jisu na bula rawarawa vei ira na nona imuri, nira na kauaitaka ga na nodra tuberi e so tale mera tisaipeli. (Maciu 6:​22-​24, 33) Ena yaga vakacava na noda dau vakuai keda ena noda tubera e so tale mera tisaipeli?

¹¹ E gadrevi na sasaga me vakavulici kina na veika kece e vakarota o Jisu. Era na saga na dautukutuku mera vuli iVolatabu na tataleitaki ena veimacawa. Era veisautaka e so na dautukutuku na nodra cakacaka saumi mera sa cakacaka vagauna ga, mera vunau kina vei ira na lomadina. Levu na lotu Vakarisito era vulica e dua tale na vosa mera vunau kina vei ira na matatamata ena nodra itikotiko. So tale na dautukutuku era toki ina itikotiko vou se vanuatani mera vakalevutaka kina nodra tatamusuki vakayalo. (Maciu 9:​37, 38) Nodra cakava na veika oqori ena gadrevi kina mera vakuai ira. Ia e gadrevi e so tale na ka me qai maqosa kina e dua ena nona tuberi ira e so tale mera tisaipeli.

Dau Vosota Qai Vakayagataka Vinaka na Gauna

12, 13. Na cava e bibi kina na yalovosovoso nira tuberi e so mera tisaipeli?

¹² Na vosota e dua tale na itovo e yaga vakalevu ina noda tuberi ira e so tale mera tisaipeli. E gadrevi mera vuki totolo na tamata ena vuku ni itukutuku vinaka eda kacivaka tiko, ia ena vinakati na vosovoso kei na gauna mera na tuberi kina e so mera tisaipeli. (1 Korinica 7:​29) A sega ni yalototolo o Jisu vei Jemesa na tacina vakacabecabe. A kila vinaka tu o Jemesa na cakacaka vakavunau i Jisu, ia a taura na gauna me qai tisaipeli baleta ni a vakalatilati tale tiko e so na ka. (Joni 7:5) Dua na gauna lekaleka ni oti na mate i Jisu ina Penitiko 33 S.K. sa qai tisaipeli o Jemesa, ni vakaraitaka tale ga na iVolatabu ni a lai masu vata kei tinana, o ira na tacina, kei ira na yapositolo. (Cakacaka 1:​13, 14) A toso vinaka sara vakayalo o Jemesa, qai qarava e so na itavi bibi ena ivavakoso lotu Vakarisito.​—Cakacaka 15:13; 1 Korinica 15:7.

¹³ Me vakataki ira ga na dauteitei e dau taura na gauna me tubu kina na ka era tea, era vaka tale ga oya na lotu Vakarisito ni taura na gauna nodra tubera e dua me toso​—ena nona kila na Vosa ni Kalou, itovo vakarisito kei na nona lomani Jiova. Ena gadrevi kina na yalovosovoso. E vola o Jemesa: “Na veiwekani, mo dou qai vosota, me yaco mada na nona lako mai na Turaga. Raica, nai vakatau-ni-were sa waraka na vua ni qele e talei, a sa wawa vakadede, me rawata mada na uca sa liu, kei na uca sa muri. Dou wawa talega koi kemudou; vakataudeitaka na yalomudou: ni sa roro mai na nona lako mai na Turaga.” (Jemesa 5:​7, 8) Uqeti ira tiko nona itokani vakabauta vata o Jemesa mera ‘wawa ni sa voleka mai na Turaga.’ Ke sega ni matata e dua na ka vei ira nona tisaipeli, e dau vakamacalataka o Jisu ena vosovoso se tukuna na kena ivakatautauvata. (Maciu 13:​10-​23; Luke 19:11; 21:7; Cakacaka 1:​6-8) Sa tiko tawarairai ena gauna oqo na Turaga, e gadrevi meda dau vosovoso tale ga nida tuberi ira tiko e so mera tisaipeli. O ira tale ga na qai tisaipeli i Jisu ena gauna oqo mera na dau vakasalataki ena yalovosovoso.​—Joni 14:9.

14. Dina nida dau vosovoso, ia eda na vakayagataka ga vakacava noda gauna nida tuberi ira e so mera tisaipeli?

¹⁴ E dina nida dau vosovoso, ia so na gauna ena sega ga ni vua na ka dina e lomadra e levu na tamata eda vakavulica ena iVolatabu. (Maciu 13:​18-​23) Kevaka sa dua toka na gauna na noda tuberi ira tiko, ena ka vakayalomatua meda tinia nodra vuli da qai lai vaqarai ira na via rogoca na ka dina vakaivolatabu. (Dauvunau 3:​1, 6) O ira tale ga na taleitaka dina na vuli era na rairai gadreva mera vakavulici mera veisautaka nodra rai, itovo, kei na veika era vakaliuca. Eda na vosovoso gona me vakataki Jisu, ni a yalovosovoso ena nona tuberi ratou nona tisaipeli me ratou veisautaka na nodratou rai.​—Marika 9:​33-​37; 10:​35-​45.

Mo Maqosa ena Veivakavulici

15, 16. Na cava e bibi kina na ivakamacala e rawarawa kei na vakavakarau vinaka nida tuberi ira e so mera tisaipeli?

¹⁵ Me vuavuaivinaka na noda tuberi ira e so mera tisaipeli ena gadrevi meda dau lomana na Kalou, da kauaitaki ira na tamata, da vakuai keda, da qai dau vosovoso. Gadrevi tale ga me vinaka na iwalewale ni noda veivakavulici, ni na matata kina na noda ivakamacala qai rawarawa na kena kilai. Kena ivakaraitaki ga na Qasenivuli Levu, o Jisu Karisito, ni dau rawarawa na kilai ni ka e tukuna qai yaga vakalevu. De o na nanuma e so na ka a tukuna me vaka oqo: “Dou kumuna vata na nomudoui yau mai lomalagi.” “Dou kakua ni solia na ka tabu vei ira na koli.” “Sa dau vakadinadinataki na vuku e na we ni nona cakacaka.” “Dou qai solia vei Sisa na ka nei Sisa; vei koya talega na Kalou na ka sa nona na Kalou.” (Maciu 6:​20; 7:6; 11:​19, VV; 22:21) E sega ni dau leleka ga na ka e tukuna o Jisu. Ia, e matata nona veivakavulici, ena vakamacala ke gadrevi. O na vakatotomuria vakacava na iwalewale ni veivakavulici i Jisu?

¹⁶ Kevaka me matata qai rawarawa na ka e vakavulici, ena bibi na vakavakarau vinaka. Ke sega, ena talimagimagi na dautukutuku. Ni na levu nona ivakamacala qai talaucaka na ka kece e kila me baleta e dua na ulutaga, sa na sega ni matata kina na tikina bibi. Ia, na dautukutuku e vakavakarau vinaka ena nanumi koya tiko nona vuli iVolatabu, na vakasamataka na ulutaga rau na vulica, qai vakamacalataka vakamatata na ka ga e gadrevi. (Vosa Vakaibalebale 15:28; 1 Korinica 2:​1, 2) Ena kauaitaka na ka e sa kila rawa tu o gonevuli, kei na tikina me vakabibitaki ena gauna ni vuli. De dua sa buta vinaka tu na dautukutuku ena iulutaga rau na vuli kina, ia ena matata na vuli ke vakamacalataki ga na ka e gadrevi.

17. Eda na uqeti ira vakacava na tamata mera vakamacala mai ena iVolatabu?

¹⁷ E uqeti ira tale ga na vakarorogo o Jisu mera dau vakamacala, e sega ni tukuna wale ga vei ira na itukutuku e dina. Kena ivakaraitaki nona taroga ena dua na gauna: “A cava ko lewa, Saimoni? era sa taroga vei cei nai vakacavacava se na soli ko ira na turaga vakavuravura? vei ira na nodra gone, se vei ira ga na tani?” (Maciu 17:​25) De dua eda dau taleitaka meda vakamacalataka e levu na ka ena iVolatabu nida caka vuli tiko, ia e gadrevi na lewa matau me vakamacala se tukuna tale ga nona nanuma o gonevuli. Me kua ni levu tale na taro eda vakataroga. Ia, kevaka eda maqosa, da tukuna na ivakatautauvata veiganiti, kei na taro vakavure vakasama, eda sa tuberi ira tiko mera ciqoma na veika e cauraki ena ivoladusidusi vakaivolatabu e tabaka na isoqosoqo.

18. Na cava e okati ena “veivakavulici”?

¹⁸ E vakamacalataki ena iVolatabu na “veivakavulici.” (2 Timoci 4:​2, VV; Taito 1:9) Na veivakavulici oqo e sega ni yalani ga ena nona tuberi e dua me nanuma na itukutuku dodonu. Eda na saga mera tuberi na gonevuli ena iVolatabu mera kila na duidui ni dina kei na lasu, na ca kei na vinaka, vaka kina na vuku kei na lialia. Nida cakava oqori da qai vakavulici ira mera lomani Jiova mai vu ni lomadra, era na raica na gonevuli na vuna mera talairawarawa kina vua na Kalou.

Gumatua ni Tuberi Ira e so Mera Tisaipeli

19. Era vakaitavi vakacava na lotu Vakarisito kece ena nodra tuberi e so mera tisaipeli?

¹⁹ E yaga tale ga na ivavakoso lotu Vakarisito nira tuberi kina e so tale mera tisaipeli. Ni dua e sa mai tisaipeli vou, ena sega wale ga ni marau kina na iVakadinadina i Jiova a vakavulici koya ena iVolatabu. E vaka ga nona yali e dua na gone, qai tuvanaki mera vaqarai koya e dua na ilawalawa. Dina ni na dua ga vei ira e kunei koya, ia ni sa lesu vua nona itubutubu, era na marau kece na vaqarai koya tiko. (Luke 15:​6, 7) Na lewe ni ivavakoso tale ga era cakacaka vata ena nodra tuberi e so mera tisaipeli. Era vakaitavi kece na lotu Vakarisito ena nodra vaqarai o ira e rawa nira tisaipeli i Jisu. Ni dua na tataleitaki vou e se qai tekivu lako mai ina soqoni ena Kingdom Hall, era vakaitavi na lotu Vakarisito kece ena nona uqeti me taleitaka na sokalou dina. (1 Korinica 14:​24, 25) Era dau marau gona na lotu Vakarisito kece nira mai tisaipeli vou e vica vata na udolu e veiyabaki.

20. Na cava mo cakava ke o via vakavulici ira e so tale ena ka dina vakaivolatabu?

²⁰ Levu na lotu Vakarisito yalodina era na marau ni vakavulica e dua me baleti Jiova kei na sokalou dina. So era solia kina nodra igu taucoko, ia era na rairai sega ni vakavulica rawa e dua. Ke o mani vakila tiko oqori, saga me qaqaco tiko ga nomu lomani Jiova, nomu veikauaitaki, nomu vakuai iko, nomu yalovosovoso, kei na nomu vakavinakataka na iwalewale ni nomu veivakavulici. Koya e bibi sara nomu dau masulaka nomu gagadre mo vakavulica e dua ena iVolatabu. (Dauvunau 11:1) Me vakayaloqaqataki iko mada ga nomu kila ni veiqaravi kece o cakava vei Jiova e sa tokoni tiko kina na nodra tuberi e so tale mera tisaipeli, e vakalagilagi tale ga kina na Kalou.

Vakamacalataka Mada

• Na cava e vakatovolei kina na noda lomana na Kalou nida tuberi ira e so tale mera tisaipeli?

• Na itovo cava e gadrevi vei ira na dautukutuku nira tubera e so tale mera tisaipeli?

• Na cava e okati ena “veivakavulici”?

[iYaloyalo ena tabana e 21]

Eda vakaraitaka na lotu Vakarisito na titobu ni noda lomana na Kalou nida tuberi ira e so tale mera tisaipeli

[iYaloyalo ena tabana e 23]

Na cava meda dau veikauaitaki kina na dautukutuku?

[iYaloyalo ena tabana e 24]

Na itovo cava me laurai vei keda na dautukutuku?

[iYaloyalo ena tabana e 25]

Eda dau marau na lotu Vakarisito kece nida raica na vuavuaivinaka ni nodra tuberi e so tale mera tisaipeli