Meda Dau “Yalololoma”

SE QAI vakadua me vakilai na noda gadreva dina meda vukei vakayalololoma ena vuku ni dausiga, tauvimate, bula dravudravua, basulawa, vakaduduile vakamatatamata, kei na leqa tubukoso. Na yalololoma e dusia na nona nanumi e dua ena nona rarawa se salavata kei na nona gadreva me vakacegui. Me vaka ga na katakata vakarauta ni matanisiga, na yalololoma e rawa ni vakacegui koya e rarawa, vakalailaitaka na mosi, e vakayaloqaqataki koya tale ga e sotava tu na leqa.

Rawa nida vakaraitaka na yalololoma ena noda vosa kei na ka eda cakava​—oya na noda kauaitaki ira na tani kei na noda tu vakarau ni vukei ira ena gauna e gadrevi kina. Sega ni vinaka meda vakaraitaka ga na yalololoma vei ira noda vuvale, itokani, kei ira eda veikilai. Meda okati ira tale ga kina eda sega ni veikilai. “Kevaka dou lomani ira sa lomani kemudou, a cava ena kemudoui sau?” a taroga o Jisu Karisito ena nona iVunau ena Ulunivanua. A kaya tale ga na turaga yalololoma oqo: “O koya, na ka vakaaduaga dou sa vinakata me ra kitaka vei kemudou na tamata, dou kitaka vaka talega kina vei ira.”​—Maciu 5:​46, 47; 7:​12.

Rawa ni o wilika ena iVolatabu na malanivosa oqori e vakatokai na Vunau Koula. Ra vakabauta e levu, ni iVolatabu e idusidusi vinaka duadua ena kena vakaraitaki na yalololoma. E vakabibitaka ni noda itavi meda vukei ira era leqa dina. Vakaraitaka tale ga ni ivakaraitaki uasivi ena yalololoma o Jiova, na Dauveibuli qai vakavuna na volai ni iVolatabu.

Kena ivakaraitaki, eda wilika: “[Na Kalou] sa dauia na lewa e na vukudra era sega ni vakatamani kei na yada, ka sa lomana na vulagi, ka me dausolia vua na kakana kei nai sulu.” (Vakarua 10:18) E vakamacalataki tale ga na Kalou o Jiova me dau “lewa vakadodonu e na vukudra era sa vakasaurarataki: o koya sa vakani ira era sa viakana.” (Same 146:7) Me baleti ira na vulagi era vakaleqai, a vakarota o Jiova: “Na kai tani . . . ena tautauvata vei kemudou kei na dua na kai nomudou, ia mo lomani koya me vaka ko sa lomani iko.”​—Vunau ni Soro 19:34.

Ka ni bolebole toka me vakaraitaki na yalololoma. A vola na yapositolo o Paula vei ira na lotu Vakarisito e Kolosa: ‘Luvata na tamata makawa kei na nona ivalavala, dou sa vakasuluma oqori sa vou, o koya sa vakavoui tiko ena vuku, me vaka na yaloyalona a buli koya, dou qai vakaisulu ena yalo dauloloma, me vaka dou sa nona digitaki na Kalou, kemudou sa yalosavasava qai daulomani.’​—Kolosa 3:​9, 10, 12.

Io, e gadrevi na sasaga me bucini kina na yalololoma. Oqori e tiki ni “tamata vou” e namaki mera vakaisulu kina na lotu Vakarisito. A bula donuya o Paula na ituvaki voravora e Roma makawa. Koya gona, a uqeti ira kina na nona itokani ena vakabauta mera veisautaka na nodra ivalavala me rawa nira vakaraitaka vakalevu na veinanumi kei na yalololoma.

Na Yaga ni Yalololoma

E nanumi ni o ira na dau yalololoma era dadatuvu qai vakaloloma. E dina beka na rai oya?

Sega! Na loloma e vu mai vua na Kalou ena uqeta me vakaraitaki na yalololoma dina. E kaya na iVolatabu “sa loloma na Kalou.” (1 Joni 4:​16) Vakatokai sara ga o koya me “Tama ni loloma, kei na Kalou ni veivakacegui kecega.” (2 Korinica 1:3) Na vosa “loloma” e kena ibalebale “nodra lomani na tani ena rarawa era sotava.” O Jiova e dau ‘lomasoli vei ira era sa sega ni vakavinavinaka ra qai tamata ca’!​—Luke 6:​35.

E vinakata na Dauveibuli meda vakaraitaka tale ga na itovo vinaka e so me vaka na yalololoma. Eda wilika ena Maika 6:8: “Sa vakatakila oti vei iko, na tamata, na ka e vinaka: ia ka cava tale sa taroga maivei iko ko Jiova, mo caka dodonu ga, ka mo vinakata na yalololoma?” E kaya na Vosa Vakaibalebale 19:22: “Ni sa yalololoma na tamata sa dauvinakati kina ko koya.” A ucui tamana vinaka o Jisu ena yalololoma, vakaroti ira tale ga nona imuri: “O koya mo dou qai yalololoma, me vaka sa yalololoma na Tamamudou.” (Luke 6:​36) E tukuni ena ivakadewa na Jerusalem Bible: “Mo dauloloma me vaka nona dauloloma na Tamamudou.”

E bibi meda dau yalololoma baleta nida na vakalougatataki kina. Vakavuqa meda vakadinata na ka e kaya na Vosa Vakaibalebale 11:17: “A tamata yalololoma sa caka vinaka ki na yalona.” Na Kalou e okata na noda yalololoma vei koya e gadreva na veivuke me ka vinaka eda cakava vua. E okata me nona itavi na nodra vakalougatataki na nona dauveiqaravi era vakaraitaka na yalololoma. A uqeti o Tui Solomoni me vola: “Sa ia na soli ka vei Jiova ko koya sa lomani ira na dravudravua; ia na ka sa solia ko koya ena saumi tale vua.” (Vosa Vakaibalebale 19:17) E vola tale ga o Paula: “Dou sa kila na ka vinaka kecega ena cakava na tamata yadua, . . . ena saumi vakakina mai vua na Turaga [Jiova].”​—Efeso 6:8.

Na yalololoma e yaga ena wali ni veileqaleqati qai uqeta na veiyaloni. E vakadodonutaka tale ga na rai se nanuma cala qai vakarawarawataka na veivosoti. E basika na nanuma cala ni sega ni vakaraitaki vakadodonu na noda nanuma kei na ivakarau ni lomada, se ni tauri cala na ka eda cakava. Yaga gona na yalololoma ena ituvaki vaka oqo qai vakilai tiko ga kina na veiyaloni. Rawarawa me vosoti o koya e dau yalololoma. Na yalololoma e yaga ena noda muria na ivakaro i Paula vei ira na lotu Vakarisito: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua.”​—Kolosa 3:​13.

Yalololoma​—iVakaraitaki ni Veinanumi

Na yalololoma ena rawa ni vakaseavutaka na rarawa. Me vaka eda sa dikeva oti mai, na yalololoma e ivakaraitaki ni veinanumi qai uqeta meda duavata kei ira na tani ena nodra rarawa. Okati ena yalololoma na nodra kauaitaki o ira na sotava tu na ituvaki dredre ra qai vukei sara.

Era vakatotomuri Jisu na lotu Vakarisito ena nodra dau veinanumi. Sega ni bau tu suka o Jisu me vukei ira vakayago se vakayalo na tani. A dau vukei ira vakayalololoma na gadreva tu na veivuke.

Dikeva na rai i Jisu me baleti ira na ilawalawa era leqa tu vakayalo: “Ni sa raici ira na lewe vuqa ko koya, sa lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:​36) Me baleta na vosa “lomani,” e kaya e dua na vuku ni iVolatabu ni dusia “na yalo e vu sara ga mai lomana e dua.” Tukuni ni oqo e dua vei ira na vosa vaKirisi bibi duadua ni yalololoma.

E vaka sara ga oqori na totolo ni nodra veivuke na lotu Vakarisito vei ira era gadreva na veivuke vakayago se vakayalo. A vola na yapositolo o Pita: “Dou lomavata kecega, dou ia na loloma vakai kemudou, dou veilomani me vaka na veitacini, dou yalololoma.” (1 Pita 3:8) Kena ivakaraitaki, ni ratou toki ina dua tale na itikotiko e dua na vuvale vakarisito ena vuku ni tauvimate, era vakarautaka na mataveitacini e kea e dua na vale me ratou tiko wale kina me ono na vula. E kaya o ulunivale: “Era dau mai sikovi keitou ena veisiga na mataveitacini qai veivakacegui na vosa era tauca.”

Era kauaitaka tale ga na lotu Vakarisito dina na ka era gadreva o ira era sega mada ga ni veikilai. Ra marau ni solia wale nodra gauna, igu, kei na iyau mera veivuke kina. Era iVakadinadina i Jiova o ira a vakamacalataki ena imatai ni ulutaga, nira vukei ira era sega ni veikilai.

Io, e kune ena ivavakoso vakarisito na yalololoma, ra qai uqeti na lewena mera qara na sala e so mera veivuke kina. Ena vuku ni ituvaki dredre era sotava, era na rairai gadreva na luveniyali kei na yada ena loma ni ivavakoso moni vakaraitaka na kena vo na veikauaitaki kei na veinanumi. O na rawa beka ni vukei ira e yalani vei ira na veiqaravi vakavuniwai, era dravudravua, sotava na leqa ni veivakavaletaki se ituvaki dredre tale e so?

Kena ivakaraitaki e dua na veiwatini mai Kirisi. A tauvi stroke o tagane, rau qai kau vakaveiwatini ina dua na valenibula e yawa sara mai na vanua rau vakaitikotiko kina. E ivurevure ga ni lavo vei rau na moli e beti mai na nodrau iteitei. O cei ena cakava oqori ni rau sa tiko e valenibula? Io, era veivuke na lewe ni ivavakoso. Era betia qai volitaka na moli me rawa kina na nodrau ilavo na veiwatini, vakacegu tale ga kina nodrau vakasama.

Levu na sala e rawa ni vakaraitaki kina na yalololoma. Kena ivakaraitaki, era kila na lotu Vakarisito dau yalololoma ni so na gauna, na ka ga era na vinakata na vakaleqai tu, mera veisiko yani o ira era na rogoci ira, era veinanumi, qai vakacegui ira mai na iVolatabu.​—Roma 12:15.

Vakavumarau na Tiko ena Vanua e Kune Kina na Yalololoma

Na ivavakoso vakarisito e vuravura raraba e ivurevure ni veiyaloni kei na vakacegu qai vakaraitaki kina na yalololoma kei na veikauaitaki. Era vakadeitaka na lotu Vakarisito dina ni taleitaki na yalololoma, ia e cati na itovo voravora. Koya gona, nira saga mera vakatotomuria na Tamadra vakalomalagi, era saga kina mera dau vakaraitaka na “yalololoma” ena sala yaga e so.

Era sureti kemuni na iVakadinadina i Jiova mo ni mai vakadinadinataka na yalololoma kei na veikauaitaki e laurai votu vei ira na lotu Vakarisito. Era vakadeitaka ni oni na taleitaka na totoka ni nodra veimaliwai.​—Roma 15:7.

[iYaloyalo ena tabana e 5]

Uqeti ira na lotu Vakarisito e Kolosa o Paula mera vakaisulu ena yalololoma

[iYaloyalo ena tabana e 7]

A vukei ira vakayalololoma na gadreva tu na veivuke o Jisu