Me Dua Beka e Dau Dusimaki Iko ena Veika Vakayalo?
SE QAI yabaki 16 o Usaia ena gauna a buli kina me tui ni matanitu ena ceva kei Juta. A veiliutaki me sivia e 50 na yabaki, mai na icavacava ni ikaciwa ni senitiuri ina itekivu ni ikawalu ni senitiuri B.S.K. Ena gauna se cauravou kina o Usaia, a dau “caka dodonu ko koya e na mata i Jiova.” Na cava e uqeti koya me muria tiko ga na sala dodonu? E tukuna na ivolatukutuku makawa: “Ka sa qarava [o Usaia] na Kalou e na gauna i Sakaraia, o koya sa vuku e na raivotu ni Kalou: ka ni sa qaravi Jiova tiko ko koya, sa vukei koya na Kalou me tamata yaco.”—2 Veigauna 26:1, 4, 5.
Eda sega ni kila e levu na ka me baleti Sakaraia na daunivakasala ni tui, vakavo ga na itukutuku e volai oqo ena iVolatabu. Ia, ni “vuku e na raivotu ni Kalou,” a dau veivuke sara vakalevu o Sakaraia ena nona uqeti na tui cauravou oqo me cakava na ka e dodonu. E kaya na Expositor’s Bible ni o Sakaraia e dua dina na turaga “e buta vinaka ena kilaka vakaivolatabu, e matua vakayalo qai dau tu vakarau ni wasea na ka e kila.” A tinimaka e dua na vuku ni iVolatabu me baleti Sakaraia: “E kila vinaka na veiparofisai . . . e vuku, daulotu qai turaga vinaka; e kena irairai ni a yaga dina vei Usaia na nona ivakaraitaki.”
A vakalougatataki vakalevu o Usaia ena nona yalodina qai “tubu . . . tiko vakalevu sara [“ena kaukaua,” NW]” baleta ni “sa vukei koya na Kalou.” Io, na nona rawaka vakayago e vakatau ena nona yalodina tiko “e na gauna i Sakaraia.” (2 Veigauna 26:6-8) A biuta o Usaia na ivakavuvuli i Sakaraia na nona daunivakasala ena gauna a rawaka kina. “Sa yalolevu mai me ca kina [o Usaia]: ni sa talaidredre vei Jiova na nona Kalou.” A vakayacora e dua na ka e beci kina na ituvatuva i Jiova, mani tauvi koya e dua na mate vakasisila ni kuli ni yago. A vakamalumalumutaki koya sara ga na mate oqo, mani sega kina ni qarava rawa na nona itavi vakatui.—2 Veigauna 26:16-21.
E dua beka e dusimaki iko ena veika vakayalo ena nomu ‘qara na Kalou’? Ena vaka kina, veitalia sara mada ga ni o se gone se sivita na gauna ni itabagone, tagane se yalewa. Mo vakamareqeta na veidusimaki oqori baleta ena rawa ni vukei iko mo cakava tiko ga na ka e dodonu ena mata i Jiova. Rogoca qai vakasamataka vakabibi na nona ivakaro na lotu Vakarisito matua vakayalo. Mo kua mada ga ni gole tani mai na ivakavuvuli i “koya sa vuku e na raivotu ni Kalou.”—Vosa Vakaibalebale 1:5; 12:15; 19:20.