Jisu Karisito​—Na Daukaulotu Levu

“Ni’u sa lako maivei koya, a sa talai au mai ko koya.”​—JONI 7:​29.

1, 2. Na cava na daukaulotu, o cei na Daukaulotu levu?

NA CAVA o vakasamataka ni o rogoca na vosa “daukaulotu”? E so ra vakasamataki ira na italatala ni lotu ni veivanua vakarisito, qai levu vei ira na italatala oqori era dau vakaitavi ena veika vakapolitiki kei na veika vakailavo ni matanitu era veiqaravi kina. Ia o keda na iVakadinadina i Jiova eda na vakasamataki ira na daukaulotu e lesi ira na iLawalawa Dauvakatulewa mera lai vunautaka na itukutuku vinaka e veiyasa i vuravura. (Maciu 24:14) Era vakuai ira ena so na ka na daukaulotu oqo, ra qai vakayagataka vakatabakidua na nodra gauna kei na kaukaua mera qarava kina nodra ilesilesi lagilagi. Oya mera tubera e so tale mera veivolekati kei na Kalou o Jiova, mera veiwekani tale ga kei koya.​—Jeme. 4:8.

² Na vosa “daukaulotu” e sega ni kune ena Ai Vola Tabu vakaViti. Ia na Efeso 4:​11 (VV) e dusia ni Vosa vaKirisi e vakadewataki me “dauveivakalotutaki” e vakadewataki tale ga me “daukaulotu.” O Jiova na Dauveivakalotutaki levu, ia sega ga ni vakatokai me Daukaulotu levu baleta ni sega ni dua e talai koya. A kaya ga o Jisu me baleta na Tamana vakalomalagi: “Ni’u sa lako maivei koya, a sa talai au mai ko koya.” (Joni 7:​29) E vakaraitaka o Jiova na levu ni nona lomana na kawatamata ena nona tala mai na Luvena duabau i vuravura. (Joni 3:​16) E Daukaulotu levu o Jisu qai Daukaulotu vinaka duadua, ni dua na vuna e talai mai kina oya me “dautukuna na ka dina.” (Joni 18:37) A vuavuaivinaka na nona tukuna na itukutuku vinaka ni Matanitu ni Kalou, eda qai vakila tale ga ena gauna oqo na kena yaga. Me kena ivakaraitaki, ena yaga noda vakamurimuria na ivakarau ni nona veivakavulici ena cakacaka vakavunau, se da lesi meda daukaulotu se sega.

3. Na taro cava so eda na dikeva?

³ Nida vakasamataka na nona dau vunautaka o Jisu na Matanitu ni Kalou, e vinaka meda na dikeva e vica na taro oqo: Na cava a vakila o Jisu ni mai cakacaka vakavunau e vuravura? Cava e laulau kina nona veivakavulici? Na cava e vuavuaivinaka kina nona cakacaka vakavunau?

Yalomalumalumu ni Veisau na iTuvaki

4-6. Na veiveisau cava a yaco ena bula i Jisu ni mai bula e vuravura?

⁴ Nikua, ena rairai gadrevi vei ira na daukaulotu kei na so tale na lotu Vakarisito era toki ina vanua e gadrevi vakalevu kina na dautukutuku, mera na veisau mera muria na ivakarau ni bula dredre era sega ni matau kina. Ia wacava li na veisau levu a vakila o Jisu ni mai bula e vuravura ni vakatauvatani kei na ivakarau ni nona bula mai lomalagi kei Tamana, ni a veiqaravi vata kei ira na agilosi era qaravi Jiova ena yalodina. (Jope 38:7) Sa na duidui sara nona veimaliwai kei na kawatamata ivalavala ca e vuravura! (Mari. 7:​20-​23) A gadrevi mada ga vua me vosota tiko nodratou veiqati nona tisaipeli. (Luke 20:46; 22:24) Ia e caka vinaka ga ena ka kece e sotava e vuravura.

⁵ A sega ni kila vakacakamana o Jisu na vosa; a vulica ga ni se gone. A dua dina na veisau levu oqori, ni vakatauvatani kei na nona dau dusimaki ira tu na agilosi mai lomalagi! Kena irairai ni dua wale ga na ‘vosa ni tamata’ a qai kila. E duatani sara mai “na vosa ni agilose.” (1 Kor. 13:1) Ia sega ga ni dua a tautauvata kei Jisu ena maqosa ni vosa vinaka e tauca.​—Luke 4:​22.

⁶ Dikeva mada e so tale na veiveisau levu a yaco ena nona bula na Luve ni Kalou e vuravura. A mai bula vakatamata o Jisu me vakataki ira era qai “wekana [“tacina,” VV]” se ra nona imuri lumuti, dina ga ni sega ni takavi koya na ivalavala ca i Atama. (Wilika Iperiu 2:​17, 18.) Ena iotioti ni bogi a bula kina e vuravura, a sega ni kerei Tamana vakalomalagi o Jisu me tala mai “e sivia e tinikarua na mataivalu agilosi.” Ia vakasamataka mada na nona dau liutaka o koya​—o Maikeli na agilosi turaga​—na mataivalu agilosi ni se bula e lomalagi! (Maciu 26:​53, VV; Juta 9) A dau cakamana o Jisu ena gauna a bula tu kina e vuravura, ia e lailai sara ni vakatauvatani kei na ka a rawa ni cakava ke bula tiko mai lomalagi.

7. Na cava era cakava na Jiu me baleta na Lawa?

⁷ Ni bera ni mai bula e vuravura o Jisu​—o koya “na Vosa”​—kena irairai ni a lesi koya na Kalou me nona Matanivanua me liutaki ira na Isireli ena vanualiwa. (Joni 1:1; Lako 23:​20-​23) A ‘soli vei ira na lawa ni Kalou, era solia na agilosi, ia era a sega ga ni muria!’ (Caka. 7:​53, VV; Iper. 2:​2, 3) O ira mada ga na iliuliu ni lotu Jiu ena imatai ni senitiuri era a sega ni kila na ibalebale dina ni Lawa. Kena ivakaraitaki, dikeva mada na lawa ni Siga ni Vakacecegu. (Wilika Marika 3:​4-6.) Era “vakawaletaka” na vunivola kei na Farisi “na veika bibi e na lawa me vaka na lewa dodonu, kei na lewa loloma kei na yalodina.” (Maciu 23:​23, VV) Ia a sega ni cegu o Jisu na vunautaka na ka dina vei ira.

8. Na cava e rawa ni vukei keda kina o Jisu?

⁸ A vakaraitaka o Jisu na yalo ni veiqaravi. E uqeti koya na loloma me kauaitaka na veika me baleta na kawatamata, qai vu dina mai lomana na nona via vakacegui ira. A sega ni cegu ena cakacaka ni veivakalotutaki. Ena vuku ni nona yalodina tu ga vei Jiova ena gauna kece a bula tu kina e vuravura, e “yaco [kina] me vu ni bula tawa mudu vei ira kecega sa talairawarawa vua.” Kena ikuri, “sa vosota na ka ca ko koya, ni sa dauveretaki, sa qai rawata kina me vukei ira [me vakataki keda] era sa dauveretaki.”​—Iper. 2:​18; 5:​8, 9.

Vakavulici Vinaka me Qasenivuli Maqosa

9, 10. Na veivakavulici cava a tuberi kina o Jisu ni bera ni mai bula e vuravura?

⁹ E tuvanaka na iLawalawa Dauvakatulewa mera dau vakavulici na lotu Vakarisito era lesi mera daukaulotu, ni bera nira gole ina nodra ilesilesi. A vakavulici tale beka ga o Jisu? Io, ia a sega ga ni lai vuli ena nodra koronivuli na rapai ni bera ni lumuti me Mesaia, era sega talega ni vakavulici koya na iliuliu ni lotu kilai levu ena gauna oya. (Joni 7:​15; vakatauvatana Cakacaka 22:3.) Ia, na cava ga e qasenivuli maqosa kina o Jisu?

¹⁰ Dina ni rau a vakavulici Jisu o Meri na tinana kei Josefa na tamana vakacabecabe, ia o Jiova ga​—o koya e uasivi duadua nona veivakavulici​—a vakatavulici koya ena veika bibi me baleta na cakacaka vakaitalatala. A kaya kina o Jisu: “Ni’u sa sega ni vosa vakataki au; ia ko Tamaqu sa talai au mai, sa vakarota vei au na ka me’u kaya, kei na ka me’u tukuna.” (Joni 12:49) Dikeva ni a vakamatatataki vei Jisu na ka me vakatavulica. Sega ni vakabekataki ni dua na gauna balavu a vakarogoca tiko kina o Jisu na veidusimaki i Tamana, ni bera ni mai bula e vuravura. Sega ni dua tale na vuli e uasivia na vuli oya!

11. E ucui Tamana vakacava o Jisu ena nona rai me baleta na kawatamata?

¹¹ Tekivu mai na gauna a buli kina, rau dau veivolekati sara na Luve ni Kalou kei na Tamana. Ni bera ni mai bula vakatamata o Jisu, a kila na rai ni Kalou me baleta na kawatamata ni dau dikeva na veika e cakava vei ira. E lomana vakalevu na kawatamata na Kalou qai ucui koya vinaka kina na Luvena​—na vatuka ni vuku​—sa rauta me kaya o Jisu: “Ka’u a daumarautaki ira na luve ni tamata.”​—Vkai. 8:​22, 31.

12, 13. (a) Cava e vulica o Jisu ni dikeva na ka a cakava o Tamana me baleti ira na Isireli? (b) E bulataka vakacava o Jisu na veika e vulica?

¹² E okati tale ga ena nona vuli na Luve ni Kalou na nona dikeva na ka e dau cakava o Jiova ni yaco e so na ituvaki dredre. Kena ivakaraitaki, na ka e cakava o Jiova nira talaidredre na Isireli. E kaya na Niemaia 9:​28: “Ni ra sa vakacegu oti, era sa caka ca tale e matamuni [Jiova]: o koya ko ni a laivi ira kina ki na liga ni nodra meca, a ra sa veitalia vei ira: ia ni ra sa saumaki mai, ka tagi vei kemuni, ko ni a rogoca mai lomalagi; ia ko ni a vakabulai ira vakavuqa, me vaka na nomuni loloma.” Ni dau cakacaka vata kei Tamana o Jisu qai dikeva na ka e cakava, e kauaitaki ira kina vakayalololoma na tiko ena nona yalava.​—Joni 5:​19.

¹³ E bulataka o Jisu na veika e vulica ena nona dau yalololoma vei ratou na nona tisaipeli. Ena bogi ni bera nona mate, ratou “biuti koya . . . ka dro” na nona yapositolo a dau lomana vakalevu. (Maciu 26:56; Joni 13:1) A cakitaki koya mada ga vakatolu na yapositolo o Pita! Ia, a sega ni cudruvi ratou nona yapositolo, uqeta ga me ratou lesu vua. A kaya vei Pita: “Ka’u sa masulaki iko, me kakua ni malumalumu na nomu vakabauta: ia ni ko sa saumaki tale [“lesu mai,” NW], mo vakataudeitaki ira na wekamu.” (Luke 22:32) A tauyavutaki o Isireli vakayalo vei iratou na “apositolo,” qai volai ena vatu e yavu ni bai e Jerusalemi Vou na yacadratou na 12 na yapositolo yalodina i Jisu Karisito, na Lami. Me yacova mai oqo, era cakacaka vata tiko na lotu Vakarisito lumuti kei ira na ‘so tani tale na sipi.’ Era lewe ni isoqosoqo e vuavuaivinaka ena vunautaki ni Matanitu ni Kalou baleta ni taqomaki ira na Kalou qai liutaki ira tiko na Luvena lomani.​—Efeso 2:​20; Joni 10:16; Vkta. 21:14.

Na Veivakavulici i Jisu

14, 15. E duidui vakacava na veivakavulici i Jisu ni vakatauvatani kei na nodra veivakavulici na vunivola kei na Farisi?

¹⁴ A bulataka vakacava o Jisu na veika a vulica ena gauna e vakavulici ratou kina na nona imuri? E uasivi sara na veivakavulici i Jisu nida vakatauvatana kei na nodra veivakavulici na iliuliu ni lotu Jiu. O ira na vunivola kei na Farisi era ‘vakawaletaka na vosa ni Kalou ena vuku ni nodra ivakavuvuli vakavanua.’ Ena yasana adua a sega ni vakavuvulitaka na nona nanuma o Jisu, a yavutaka ga na ka e tukuna ena vosa se itukutuku ni Kalou. (Maciu 15:​6, VV; Joni 14:10) Oqori sara ga na ka e dodonu meda cakava nida veivakavulici.

¹⁵ E dau cakava tale ga o Jisu e dua na ka era sega ni dau vakayacora na iliuliu ni lotu. A kaya me baleti ira na vunivola kei na Farisi: “Na ka kecega era sa kaya vei kemudou mo dou vakabauta, dou vakabauta ga ka cakava; ia dou kakua ga ni muria na nodrai valavala, ni ra sa vosa ga ka sega ni cakava.” (Maciu 23:3) A bulataka sara ga o Jisu na veika e vunautaka. Meda dikeva mada e dua na kena ivakaraitaki.

16. Na cava eda kaya kina ni bulataka sara ga o Jisu na nona ivakasala ena Maciu 6:​19-​21?

¹⁶ A uqeti ira nona tisaipeli o Jisu mera ‘kumuna na . . . iyau mai lomalagi.’ (Wilika Maciu 6:​19-​21.) A bulataka beka o Jisu na ivakasala oya? Io, sa rauta me kaya: “Sa vaqara na fokise, a sa vakairoro na manumanu vuka; ia na Luve ni tamata, sa sega vua na tikina me vakadavora kina na uluna.” (Luke 9:​58) A bula rawarawa ga o Jisu. A vakaliuca na vunautaki ni Matanitu ni Kalou, qai sega ni vakila na lomaocaoca e dau salavata na kumuni ni iyau e vuravura. E vakaraitaka o Jisu ni vinaka cake meda kumuna na iyau mai lomalagi, “sa sega ni vakacacana . . .  na sarasara se na veveka, a sa sega ni ravabasuka . . .  na daubutako me butakoca.” Eda sa muria tiko beka na ivakasala i Jisu meda kumuna na iyau mai lomalagi?

Uqeti Ira na Lewenivanua na iTovo i Jisu

17. Na cava e so na itovo i Jisu e vakavuna me duatani sara na nona ivalavala ni veivakalotutaki?

¹⁷ Na cava e so na itovo i Jisu e vakavuna me duatani sara na nona ivalavala ni veivakalotutaki? Dua oya na nona rai me baleti ira na lewenivanua e vakaceguya. E vakaitovotaka o Jisu na itovo talei i Jiova me vaka na yalomalumalumu, loloma kei na veikauaitaki. Dikeva mada se uqeti ira vakacava na lewenivanua na tolu na itovo oqori mera torovi Jisu kina.

18. Na cava eda kaya kina ni yalomalumalumu o Jisu?

¹⁸ A ciqoma o Jisu na ilesilesi me lako mai i vuravura, qai “nakita ga vaka i koya me laiva tu mada yani na veika kece e a tu vua, ka mai taura na i vakarau ni bula vakatamata bobula. A sa yaco me vakataki ira na tamata ka sa rairai mai e na yago vakatamata.” (Fpai. 2:​7, VV) Sa dua dina na ivakaraitaki uasivi ni yalomalumalumu! A sega tale ga ni beci ira na lewenivanua. Sega ni tu vua na rai ni ‘dodonu moni vakarorogo vei au baleta niu lako mai lomalagi.’ Era saga na rogo o ira na mesaia vakailasu, ia a sega ni vaka oya o Jisu ni a sega ni raqataka na nona itutu dina ni Mesaia. E so mada ga na gauna e vakaroti ira na lewenivanua mera kua ni veitukuniyaka na nona itutu kei na veika e vakayacora. (Maciu 12:​15-​21) A vinakata o Jisu mera vakatulewataka na lewenivanua mera muri koya ena vuku ni veika era dikeva sara ga ni vakayacora. Era kalougata na nona tisaipeli baleta ni kila vinaka tu o Jisu nira sega ni uasivi vakataki ira na agilosi era dau veimaliwai kei koya mai lomalagi!

19, 20. E uqeti Jisu vakacava na loloma kei na veikauaitaki me vukei ira na lewenivanua?

¹⁹ A dau loloma tale ga o Jisu​—na itovo e kilai tani kina na Tamana vakalomalagi. (1 Joni 4:8) E vakavulici ira na lewenivanua o Jisu baleta ni lomani ira. Me kena ivakaraitaki, na nona lomana e dua na iliuliu gone. (Wilika Marika 10:​17-​22.) A sega wale ga ni via vukei koya o Jisu, “a sa lomana” tale ga, ia a sega ni via volitaka na nona iyau na iliuliu gone me dua kina na imuri i Jisu.

²⁰ E dua na itovo talei i Jisu na veikauaitaki. Eda dau leqa kece nida ivalavala ca, wili kina o ira na lewenivanua era ciqoma na veivakavulici i Jisu. Ni veivakavulici gona, a veikauaitaki o koya qai yalololoma baleta ni kila vinaka tu na kedra ituvaki na vakarorogo. Kena ivakaraitaki: Dua na gauna, a sega ni kana o Jisu kei ratou na yapositolo baleta ni ratou osooso. Ia vakacava na rai i Jisu ni dikevi ira na lewe vuqa era sa kumuni vata? “A sa lomani ira, ni ra sa vaka na sipi sa sega na nodrai vakatawa: a sa vakatekivu me vakatavulici ira e na ka e vuqa.” (Mari. 6:​34) Kila vinaka o Jisu nira vakaloloma tu na lewenivanua ena yalava oya, mani vakaogai koya na vakavulici ira kei na nona cakamana ena vukudra. Era tisaipeli kina i Jisu e so ni uqeti ira na nona itovo vinaka kei na nona vosa momona.

21. Na cava eda na vulica ena ulutaga tarava?

²¹ Ena vulici ena ulutaga e tarava e levu tale na ka me baleta na cakacaka vakaitalatala i Jisu. Na cava e so tale na sala eda na vakamurimuria kina na Daukaulotu levu, o Jisu Karisito?

O na Sauma Vakacava?

• Na veivakavulici cava a tuberi kina o Jisu ni bera ni mai bula e vuravura?

• E uasivi vakacava na veivakavulici i Jisu ni vakatauvatani kei na nodra veivakavulici na vunivola kei na Farisi?

• Na cava e so na itovo i Jisu e uqeti ira na lewenivanua mera volekati koya?

[iYaloyalo ena tabana e 15]

E vakavulici ira vakacava na lewe vuqa o Jisu?