Meda Ucui Jiova ena Nona Rai Baleti Keda Yadudua
“Me kakua kina ni veisei na yago; . . . me veinanumi vakatautauvata na veitikina vakai ira.”—1 KOR. 12:25.
1. Na cava o vakila ni o se qai lewena na parataisi vakayalo?
NIDA sa biuta na veimaliwai kei ira na bula tu ena vuravura ca qo da qai tekivu soqoni kei ira na dauqaravi Jiova, eda na raica sara ga nodra veikauaitaki dina vakayalololoma. Era sega ni dau caka ca, se mera dau veicati se veiqati me vakataki ira na lewai tu ena kaukaua i Setani! Ia, eda sa mai lewena ga na parataisi vakayalo e vakilai kina na vakacegu kei na duavata.—Aisea 48:17, 18; 60:18; 65:25.
2. (a) Na cava ena rairai vakavuna tiko na noda rai baleti ira e so tale? (b) Na cava ena rairai gadrevi meda cakava?
2 Ia, nida se kawa ivalavala ca tiko ga, toso na gauna sa da na rairai tekivu vakalewai ira na tacida. Eda na kauai beka vakalevu ena nodra malumalumu, qai buawa e matada na nodra itovo vinaka vakayalo. Kena ibalebale ga nida sa sega ni ucui Jiova ena nona rai baleti keda yadudua. Ke vaka kina, sa kena gauna qo meda veisautaka noda rai da qai vakatotomuria na nona rai.—Lako 33:13.
Rai nei Jiova Baleti Ira na Mataveitacini
3. Na iVolatabu e vakatauvatana na ivavakoso lotu Vakarisito ina cava?
3 E vakatauvatana o Paula na ivavakoso lotu Vakarisito lumuti ena 1 Korinica 12:2-26, ina dua na yago e “vuqa na tikina.” E duidui na tiki ni yago, era vaka tale ga oya na lewe ni ivavakoso ni duidui na nodra itovo kei na ka era rawa ni cakava. Ia, e ciqomi ira kece o Jiova. E lomani ira qai karoni ira yadudua. E vakasalataki keda na lewe ni ivavakoso o Paula meda dau “veinanumi vakatautauvata.” Ia, ena via dredre toka baleta ni so e duidui na nodra itovo.
4. Na cava ena rairai gadrevi kina meda veisautaka na noda rai baleti ira na tacida vakayalo?
4 De dua eda dau kauai vakalevu ena nodra malumalumu na tacida. Ena via vaka noda vakaraica toka e dua na droini qai coba dei toka ga na matada ena dua na vanua lailai. Ia o Jiova e raica na ka kece e tiko ena droini. E rairai vaka tale tu ga oya na noda rai baleti ira na tacida, nida dau kauai ga ena ka e votivoti vei keda, ia o Jiova e kauaitaka na veika era vinaka kina, okati kina na nodra itovo. Ke da saga gona meda ucui Jiova ena nona rai baleti keda yadudua, eda sa uqeta sara tiko ga na veilomani kei na duavata ena ivavakoso.—Efeso 4:1-3; 5:1, 2.
5. Na cava meda kua ni dau vakalelewa kina?
5 E kila vinaka o Jisu ni noda malumalumu ga na tamata ivalavala ca meda dau vakalelewa. E veivakasalataki kina: “Dou kakua ni daulelewa, de dou lewai.” (Maciu 7:1) Vakasamataka ni tukuna sara ga vakadodonu: “Kakua ni daulelewa.” E kila nira dau vakalelewa e so era vakarorogo tu ena gauna e cavuta kina na vosa ya. Vakacava, eda sa dau vakalelewa tale tiko ga? Ke vaka kina, meda muduka, meda kua kina ni lewai. Na dodonu cava e tu vei keda meda vakalewa e dua e lesia o Jiova ina itavi bibi, se meda kaya ni sega ni ganiti koya me lewe ni ivavakoso? Ena rairai tu beka na nona malumalumu na tacida qori, ia ke vakadonui koya tiko ga o Jiova, cava meda vakalewai koya kina? (Joni 6:44) Eda vakabauta dei beka ni liutaka tiko nona isoqosoqo o Jiova, ke gadrevi tale ga na veisau ena qai cakava ga ena nona gauna lokuci?—Wilika Roma 14:1-4.
6. Na cava na rai i Jiova me baleti keda na lotu Vakarisito?
6 E vakasakiti na rai i Jiova baleta ni kila rawa tu na ka vinaka eda na rawa ni cakava na lotu Vakarisito yadudua nida sa bula uasivi ena parataisi e vuravura. E kila vinaka tale ga noda toso vakayalo. Oya na vuna e sega ni dau vakaraica tiko ga kina na noda malumalumu yadua. Eda wilika ena Same 103:12: “Me vaka na kena yawa na vanua e cadra kina na siga ki na vanua sa dromu kina na siga, sa vakayawataka vakakina vei keda ko koya na nodai valavala ca.” Oqori e dua na vuna levu meda dui vakavinavinaka kina!—Same 130:3.
7. Na cava eda vulica ena rai i Jiova me baleti Tevita?
7 E vakadinadinataki tale ga ena iVolatabu na itovo vakasakiti i Jiova me dau kauaitaka ga vakalevu na nona itovo vinaka e dua. E tukuna na Kalou baleti Tevita ni “noqui talatala, o koya ka vakabauta na noqui vakaro, ka muri au e na yalona taucoko, me cakava ga na ka e dodonu vei au.” (1 Tui 14:8) Eda kila ni a caka cala o Tevita, ia e kauaitaka ga vakalevu o Jiova na nona itovo vinaka baleta ni kila ni dodonu tiko na ivakarau ni lomana.—1 Vei. 29:17.
Raici Ira na Mataveitacini Ena Rai i Jiova
8, 9. (a) Eda na ucui Jiova vakacava ena nona rai baleti ira na tacida? (b) Tukuna e dua na kena ivakaraitaki, na cava eda vulica kina?
8 Sega ni dua e kila na loma ni tamata, o Jiova duadua ga. Nida sega gona ni kila na inaki ni lomana e dua, oya na vuna bibi meda kua kina ni dau vakalelewa. Meda saga vagumatua meda ucui Jiova ena nona rai, ni sega ni dau vakaraica tiko ga na noda malumalumu baleta nida na rawa ni veisau meda vinaka. Sega beka ni ka vakayalomatua meda vakatotomuri koya? Noda cakava qori eda sa uqeta sara tiko ga kina na veiyaloni kei ira na mataveitacini.—Efeso 4:23, 24.
9 Kena ivakaraitaki, vakasamataka mada e dua na vale makawa—sa rairai lutu tu na kena isalisaliniwai, kavoro na iloilo ni katubaleka, sa vuca tale tu ga na doka ni vale. Levu era na kaya me basu, ni sa rui rairai ca tale ga. Ia, ena gole beka yani e dua, qai duatani na nona rai. De dua e sega ni raica wale ga na irairai ni vale e taudaku, e kila ni se vinaka tu na kena yavu, e rawa ni vakavinakataki tale. Mani volia sara, qai vakavinakataka, mai rairai totoka tale tu yani na vale qori. Ra qoroya ga o ira na tasivi e matanivale. Eda rawa beka ni vakataki koya e vakavinakataka na vale ya? Ena rawa ga ke da sega ni kauaitaka vakalevu na nodra malumalumu na tacida, ia meda dau kauai ga ena nodra itovo vinaka kei na toso vakayalo era rawa ni cakava. Noda cakava qori eda na lomani ira dina kina da qai taleitaka na nodra itovo vakalou, me vaka ga e dau cakava o Jiova.—Wilika Iperiu 6:10.
10. E yaga vakacava na ivakasala ena Filipai 2:3, 4?
10 E veivakasalataki na yapositolo o Paula ena ka meda cakava meda vakavinakataka kina noda veiwekani kei ira kece ena ivavakoso. Uqeti ira na lotu Vakarisito: “Me kakua ni caka e dua na ka e na veileti se na veidokadokai walega; mo dou yalomalumalumu ka dui vakasama ni sa uasivi cake vua ko koya kadua. Mo dou kakua ni nanuma na nomudou ka ga koi kemudou yadua, ia mo dou dui nanuma talega na nodra ka na tamata tani.” (Fpai. 2:3, 4) Ena vinaka noda rai baleti ira tale e so ke da dau yalomalumalumu. Noda dau veinanumi kei na noda raica tiko ga na veika era vinaka kina, eda sa ucui Jiova sara tiko ga ena ivakarau ni nona rai baleti keda yadudua.
11. Na veiveisau cava sa yaco tiko ena so na ivavakoso?
11 Na veiveisau e yaco tiko e vuravura raraba nikua e vakavuna nodra veitosoyaki vakalevu na duikaikai. Sa ra tawana tu gona e so na koro levu o ira mai na dui vanua. So era toki vou mai ina noda itikotiko era taleitaka tale ga na ka dina, ra qai tokoni keda ena sokaloutaki Jiova. Era lako “mai na veivanua kece, kei na veimataqali, kei na veimatanitu, kei na duivosavosa.” (Vkta. 7:9) Sa ra lewena tu gona e levu na ivavakoso vakarisito nikua na duikaikai.
12. Na cava me noda rai baleti ira na mataveitacini, cava e ka ni bolebole kina qori ena so na gauna?
12 Nira tiko gona ena ivavakoso eda lewena na duikaikai, gadrevi kina me dau vinaka tiko ga na noda rai baleti ira. Meda nanuma na veivakadreti ni yapositolo o Pita meda ‘lomani ira eda vakabauta vata’ ena ‘loloma e vu dina sara ga mai lomada.’ (1 Pita 1:22, VV) Ia ena ka ni bolebole toka meda saga na veilomani dina ena ivavakoso era lewena na duikaikai. Ena rairai duidui vakalevu na nodra itovo vakavanua na mataveitacini, ivakatagedegede ni vuli, bula vakailavo, kei na matatamata era lewena. Vakacava, e bau ka ni bolebole toka na nomu saga mo kila na nodra ivakarau ni rai kei na ka era cakava e so na tacimu vakayalo ni yaco e so na ituvaki? De dua e va tale ga qori na nodra rai baleti iko. Ia eda vakasalataki kece: “Lomani ira na mataveitacini kece.”—1 Pita 2:17, NW.
13. Na rai cava meda veisautaka?
13 De dua ena vinakati meda veisautaka na noda rai me baleti ira kece na tacida vakayalo meda lomani ira kina vakalevu. (Wilika 2 Korinica 6:12, 13.) Eda dau kaya beka ena so na gauna “Au sega ni veivakaduiduitaki, ia . . . ” qai salamuria noda vakalewa e so na itovo e kilai kina e dua na matatamata? Ke sa kadre tu e lomada na rai va qori, dodonu ga me cavuraki tani. De vinaka meda dikevi keda tale mada, ‘Vakacava, au dau saga beka meu kilai ira vinaka na taciqu vakayalo era duikaikai?’ Noda lialiaci va qori ena uqeti keda meda taleitaki ira na tacida vakayalo, da lomani ira tale ga se mani vanua cava era cavutu mai kina.
14, 15. (a) Vakamacalataka na nodrau ivakaraitaki e rua erau veisautaka nodrau rai baleti ira e so tale. (b) Eda na vakatotomuri rau vakacava?
14 E tukuni ena iVolatabu na nodra veisau e so, dua gona na yapositolo o Pita. E Jiu qai sega ni dau curuma nodra vale na kai matanitu tani. Ia vakasamataka mada nona sa dusimaki me lako ina vale ni kai matanitu tani e sega ni cilivi, o Kolinio! E veisautaka nona rai o Pita, kila o koya ni loma ni Kalou mera lewena na ivavakoso vakarisito na tamata kece. (Caka. 10:9-35) Oqori tale ga na ka e cakava o Saula. A veisautaka nona rai qai muduka nona dau veivakaduiduitaki, a qai yapositolo e muri, veisau tale ga na yacana me o Paula. A bau vakatusa sara mada ga ni a cati ira kaukaua na lotu Vakarisito ni ‘a vakacacana vakalevu na isoqosoqo lewenilotu ni Kalou, qai saga me vaqeavutaka.’ Ia, ni vakadodonutaki koya na Turaga o Jisu, e levu sara na veisau e vakayacora qai tekivu rogoca tale ga na nodra veidusimaki na mataveitacini a dau vakacacani ira e liu.—Kala. 1:13-20, VV.
15 Sega ni vakabekataki ni na veisau tale ga noda rai ena veidusimaki ni yalo tabu i Jiova. De dua eda se dau veivakaduiduitaki tiko ga, ia e sega ga ni laurai levu. Dodonu meda cavuraka tani da qai ‘gumatua sara ni maroroya na lomavata ni yalo tabu eda vauci vata kina ena veivinakati.’ (Efeso 4:3-6) E uqeti keda na iVolatabu meda “dauloloma, o koya sai vau vinaka sara.”—Kolo. 3:14.
Vakatotomuri Jiova ena Noda Cakacaka Vakaitalatala
16. Na cava na inaki ni Kalou baleti ira na duikaikai?
16 A vola na yapositolo o Paula ni ‘sega ni dau vakaduiduitaka na tamata na Kalou.’ (Roma 2:11, VV) E inaki i Jiova me yaga tale ga vei ira na duikaikai na ituvatuva ni sokalou e vakarautaka. (Wilika 1 Timoci 2:3, 4.) E vakarautaka “na i Tukutuku Vinaka tawa mudu” me tukuni vei ira “na veimatanitu kei na veiyavusa, kei na veimataqali vosa kei na veimataqali tamata.” (Vkta. 14:6, VV) A kaya o Jisu: “Na were ko vuravura.” (Maciu 13:38) Na cava gona e vinakati meda cakava kei ira na lewe ni noda vuvale?
17. Eda na vunau vakacava vei ira na duikaikai?
17 Eda na sega ni lako rawa kece ina vanua yawa e veiyasa i vuravura meda lai vunautaka kina na itukutuku ni Matanitu ni Kalou. Ia eda rawa ni tukuna na itukutuku vinaka qori vei ira na duikaikai era toki mai ina noda yalava ni cakacaka vakavunau. Eda tu vakarau beka ni vunau vei ira na duikaikai, sega ni vei ira ga eda dau vunau kina vakalevu? De vinaka meda lalawataka meda vunau vei ira na se bera ni rogoca na itukutuku vinaka.—Roma 15:20, 21.
18. Dau veikauaitaki vakacava o Jisu?
18 E vinakata o Jisu me vunau vei ira kece na lewenivanua. A sega ni vunau ena dua ga na vanua. Tukuni ena iVolatabu ni “lako voli ko Jisu e na veikoro kecega kei na veikoro lalai.” Ni “raici ira na lewe vuqa ko koya, sa lomani ira” qai via vakacegui ira sara ga.—Maciu 9:35-37.
19, 20. Na sala cava so eda na vakavotuya kina nodrau dau kauaitaki ira kece na lewenivanua o Jiova kei Jisu?
19 Na cava o rawa ni cakava mo vakatotomuri Jisu kina? Ra saga e so na tacida mera lai vunau ena so na vanua ena nodra yalava e sega ni dau cakacakataki wasoma. Rairai okati kina na yalava ni bisinisi, vanua ni gade, ikelekele ni basi se motoka e vakavodo pasidia, se na itikotiko ni veivakavaletaki e dau loka vakalevu. So tale na tacida era saga mera vulica e dua tale na vosa mera vunau kina vei ira na gole mai vanuatani era sa tiko ena nodra yalava ni vunau, se so tale na ilawalawa eda sega ni dau vunau vakalevu vei ira. Nida kidavaki ira mada ga ena nodra vosa era na kila kina nida kauaitaki ira dina. Ke da sega ni rawa ni vulica e dua tale na vosa, rawa beka nida uqeti ira era cakava tiko qori? Meda kua ni vakalewai ira na vulica e dua tale na vosa se na vuna era saga kina mera vunau ena vosa qori. Ni talei vua na Kalou na bula kece, meda ucui koya tale ga ena rai va ya.—Kolo. 3:10, 11.
20 Ke da ucuya na Kalou ena nona rai baleti keda yadudua, eda na vunau vei ira kece na lewenivanua, se mani vakacava tu na ituvaki ni nodra bula. So beka e sega tu nodra vale, e duka na kedra irairai, se ra bula vakasisila tu. Ke so era sega ni caka vinaka vei keda, meda kua ni vakalewa na matatamata se yavusa era cavutu mai kina. Era a vakacacani Paula e so, ia e vunau tiko ga vei ira. (Caka. 14:5-7, 19-22) E nuitaka nira na veisau e so ra qai taleitaka na ka era rogoca.
21. Ena uqeti iko vakacava na rai i Jiova me baleti ira na so tale?
21 E matata vakasigalevu ni gadrevi meda ucui Jiova ena nona rai nida veimaliwai tiko kei ira na tacida era tiko ena noda vanua, se mataveitacini e vuravura raraba, kei ira sara mada ga ena noda yalava ni cakacaka vakavunau. Ke da ucui Jiova ena nona rai baleti keda yadudua, sega ni vakabekataki nida na uqeta na veiyaloni kei na vakacegu. Eda na tuberi ira kina e so tale mera kilai Jiova, na Kalou e ‘sega ni dau vinakati ira vakailoa na tamata’ ia e kauaitaki ira ga vakayalololoma, “ni ra sa cakacaka ni ligana ko ira kecega.”—Jope 34:19.
O Rawa ni Sauma?
• Na rai cava baleti ira na tacida me kua ni tiko vei keda?
• Eda na ucui Jiova vakacava ena noda rai baleti ira e so tale?
• Na rai cava me tiko vei keda baleti ira na tacida vakayalo e vuravura raraba?
• Nida cakacaka tiko vakaitalatala eda na ucui Jiova vakacava ena nona rai baleti keda yadudua?
[iYaloyalo ena tabana e 26]
Cava mo cakava mo kilai ira kina vakavinaka na duikaikai?
[iYaloyalo ena tabana e 28]
Sala cava so o na vunautaka kina vei ira e levu na itukutuku vinaka?