Na Vakawati kei na iTavi ni iTubutubu ena Gauna ni Vakataotioti

“Sa vakalekalekataki na gauna sa vo.”​—1 KOR. 7:​29.

1. (a) Na cava so e yaco tiko ena gauna qo era okati mera ituvaki “lewalewai dredre”? (b) Na cava meda kauai kina ena veisau ni itovo kei na bula ena vuvale?

E PAROFISAITAKI ena Vosa ni Kalou ni na levu na ivalu, uneune, mate ca qai lailai na kakana ena gauna ni vakataotioti. (Tani. 8:​17, 19; Luke 21:​10, 11) Kaya tale ga na iVolatabu ni na yaco e so na veiveisau lelevu ena bula ni kawatamata ena gauna vakairogorogo qo. A kainaki nira na tiko yavavala na vuvale. Qori e dua na ituvaki “lewalewai dredre” ena yaco ena “iotioti ni veisiga” e cacamatua qo. (2 Tim. 3:​1, NW, 2-4) Cava meda kauai kina? Eda kauai baleta ni sa tete e vuravura taucoko, e tarai keda vakalevu, qai rawa ni moica noda rai me baleta na vakawati kei na nodra itavi na itubutubu. Ena sala cava?

2. Rai cava e takalevu tu e vuravura me baleta na vakawati kei na veisere?

² Ena gauna qo sa rawarawa sara na veisere, e takalevu tale ga. Sa qai toso cake tiko ga na iwiliwili ni veisere ena vuqa na vanua. Ia meda kua ni guilecava ni duatani sara na rai nei Jiova me baleta na vakawati kei na veisere, ni vakatauvatani kei na rai e takalevu tu e vuravura. Na cava gona na rai nei Jiova?

3. Cava na rai nei Jiova kei Jisu me baleta na vakawati?

³ E vinakata na Kalou o Jiova mera dina ina nodra bubului ni vakamau na veiwatini. A kaya o Jiova ena gauna e vakamautaki rau kina na imatai ni tagane kei na yalewa ni ‘na kabita na watina na tagane, rau na lewe dua ga.’ A tokaruataka o Jisu na vosa vata ga qori qai tomana: “Na ka sa vauca vata na Kalou, me kakua ni tawasea rua na tamata.” E kaya tale ga: “Na tagane e sereka na watina qai vakawati tale e sa wili me veibutakoci ke sega ni veidauci o watina.” (Vkte. 2:​24; Maciu 19:​3-6, 9, NW) Nodrau rai gona o Jiova kei Jisu ni dodonu me dei qai tawamudu na ivau ni vakawati, ena qai tinia ga o mate. (1 Kor. 7:​39) Ni ituvatuva dokai na vakawati, me kua gona ni caka tu ga vakaveitalia na veisere. E kaya sara ga na Vosa ni Kalou ni cata o Jiova na veisere e sega na kena yavu vakaivolatabu.a​—Wilika Malakai 2:​13-​16; 3:6.

Doka na iTuvatuva ni Vakawati

4. Na cava ra dau veivutunitaka kina e so na lotu Vakarisito itabagone na nodra a vakawati totolo?

⁴ Eda bula tu qo ena vuravura tawavakalou e vakaliuci kina na gagadre ni veiyacovi. Eda taketetaki ena veisiga ena ka e veivagarogaroi. Ena rawarawa sara meda rawai. Qai wacava li o ira na itabagone mareqeti ena loma ni ivavakoso! Na idre kaukaua qori e dau vakavuna mera garova na itabagone na veiyacovi, dina nira saga vakaukaua mera cata. Cava gona mera cakava mera sabaya kina na veitemaki va qori? So era saga mera vakawati ga nira se itabagone baleta nira nanuma nira na sega kina ni veidauci. Ia sega ni dede, sa ra veivutunitaka e levu na nodra a vakawati totolo. Na vuna? Ni oti ga nodra marautaka nodra vakawati vou, era liaca ni sega ni ganiti ira na watidra, oya ni duidui sara na ka ra taleitaka kei na nodra rai me baleta na veika ni nodra bula ena veisiga. E ka dina ni bolebole vei ira e so na veiwatini ni yacovi ira qori.

5. Cava ena uqeti ira na vakawati mera dina tiko ga ina nodra bubului ni vakamau? (Raica tale ga na ivakamacala e ra.)

⁵ Sa na bau dredre dina na bula ke o vakawatitaka e dua na lotu Vakarisito, o qai liaca ni duatani sara vakalevu na nona itovo kei na nona rai mai na kena o nanuma taumada. (1 Kor. 7:​28) Ia se mani dredre vakacava na ituvaki, eda kila na lotu Vakarisito ni sega ni dodonu me drotaki na bula dredre va qori ena kena sagai na veisere e sega ni yavutaki vakaivolatabu. O koya gona, e bibi mera dokai na lotu Vakarisito kece era saga tiko ena nodra igu taucoko mera taqomaka nodra ivau ni vakawati ena nodra dina ina nodra bubului ni vakamau. Bibi tale ga vei keda na lewe ni ivavakoso vakarisito meda tokoni ira qori vakayaloloma.b

6. Na rai cava me tiko vei ira na itabagone lotu Vakarisito me baleta na vakawati?

⁶ Ke o dua na itabagone se bera ni vakawati, cava na nomu rai me baleta na vakawati? Ke o sega ni vinakata me yacovi iko na ka mosimosi, de vinaka mo wawa ga me yacova ni sa ganita nomu bula vakayago, vakayalo kei na nomu vakasama mo sa veivosaki kei na dua na lotu Vakarisito, mo drau nakinaki ina vakawati. E sega ni vakatura na iVolatabu e dua na yabaki ni vakawati.c Ia e tukuni ga kina ni vinaka mera wawa na sa via vakawati tiko me sivi mada na bula vakaitabagone, na gauna e dau kaukaua kina na gagadre ni veiyacovi. (1 Kor. 7:​36) Na vuna? Na gagadre va qori e rawa ni veivakacalai qai vakavuna na vakatulewa cala ena rairai tini ina rarawa. Nanuma tiko ni na yaga qai vakamarautaki keda na ivakasala ena iVolatabu e vakarautaka o Jiova me baleta na vakawati.​—Wilika Aisea 48:​17, 18.

Kua ni Vakawaletaka na iTavi ni iTubutubu

7. Cava ra dau vakila e so na veiwatini gone, ena vakaleqa vakacava nodrau veivolekati na veiwatini?

⁷ E dau totolo ga mera sa itubutubu tale e so na veiwatini gone. Se bera mada ga nira veikilai vinaka sa ra vakaluveni tale. Ni sucu na gone, ena gadrevi me qaravi ena siga kei na bogi. Sega ni vakabekataki ni na vakatabakidua ga vei gone na veikauaitaki i tina, ena rairai vuvu kina na watina. Na lailai tale ga ni moce e rawa ni vakavuna na vuturi kei na oca, vakaleqa sara ga kina nodrau veivolekati na veiwatini. Sega ni bera na nodrau liaca na veiwatini ni rau sa sega ni galala me vaka e liu. Sa na dredre na nodrau lako ina vanua rau dau lakova e liu, e yalani tale ga na ka rau dau cakava. Me rau raica vakacava na veisau qo?

8. Me raici vakacava na nodra itavi na itubutubu, na vuna?

⁸ Eda uqeti meda doka na ituvatuva ni vakawati, meda doka tale ga qai kua ni vakawaletaka na nodra itavi na itubutubu baleta ni qori e ilesilesi dokai qai vu vakalou. Se mani veiveisau cava e gadrevi me rau cakava na veiwatini lotu Vakarisito me tekivu mai na gauna e sucu kina na luvedrau, e dodonu me rau raica vakabibi. Me rau raica ni ‘isolisoli ni Kalou’ na luvedrau, ni o Jiova ga e vakavuna nodrau rawa ni vakaluveni. (Same 127:3) Na tina kei na tama lotu Vakarisito ena saga me qarava nona itavi me vaka na “[i]tubutubu e na ka sa vinaka vua na Turaga.”​—Efeso 6:1, VV.​

9. (a) Na cava e okati ena nodra susugi na gone? (b) Na cava e rawa ni cakava o tagane vakawati me kaukaua tiko ga kina vakayalo na watina?

⁹ Ena vakayabaki nodra vakuai ira na itubutubu mera susugi ira kina na luvedra. Ena taura toka na gauna kei na igu. Me nanuma tiko o tagane vakawati lotu Vakarisito ni na rairai sega ni vakarorogo vinaka o watina ena gauna ni soqoni, ena lailai tale ga na gauna me vuli kina vakataki koya qai vakasamataka vakabibi na ka e vulica. Ena rawa sara ga ni malumalumu kina nona veiwekani kei Jiova. Na tagane vakawati e raica vakabibi nona itavi ni veisusu ena saga ena nona vinaka kece me qarava tale ga na gone. Ena saga me vakamacalataka vei watina ni ratou sa yaco i vale na veika e rairai sega ni rogoca ena soqoni, baleta ni a oga tiko na meimei. De dua e rawa sara ga ni meimei ena so na gauna, me vakaitavi kina o watina ena vunautaki ni Matanitu ni Kalou.​—Wilika Filipai 2:​3, 4.

10, 11. (a) Era na tuberi vakacava na gone ena “ivakarau ni vakasama i Jiova”? (b) Cava mera vakacaucautaki kina e levu na itubutubu lotu Vakarisito?

¹⁰ E sega wale ni okati ena nodra itavi dokai na itubutubu na vakarautaki ni kedra kakana na gone, nodra isulu, vanua mera tiko kina kei na qaravi ni nodra bula vakayago. E gadrevi tale ga mera vakavulici ena gauna sara ga era se gone lalai kina ena itovo mera bulataka, vakabibi nida bula tu qo ena gauna ni vakataotioti. E bibi mera tuberi na gone “ena ivakavuvuli kei na ivakarau ni vakasama i Jiova.” (Efeso 6:4, NW) E bibi mera vakavulici na gone ena “ivakarau ni vakasama” i Jiova nira se gonedramidrami sara ga me yacova na gauna dredre era sa na cauravou se goneyalewa kina.​—2 Tim. 3:​14, 15.

¹¹ Ena gauna a kaya kina o Jisu vei ira nona imuri mera “qisi ira me ra noqu tisaipeli na lewe ni veivanua kece ga,” sa lesia tale tiko ga na itavi qori vei ira na itubutubu lotu Vakarisito. Oya mera tuberi ira na luvedra mera tisaipeli i Jisu. (Maciu 28:​19, 20, VV) Ena sega ni rawarawa qori baleta ni kaukaua sara tiko na veivakamuai cala ni vuravura qo vei ira na itabagone. Dodonu gona mera lomani, ra vakacaucautaki tale ga o ira kece na itubutubu era cakava vinaka nodra itavi mera tuberi luvedra mera lotu Vakarisito yalayala. Era sega ni vakawaletaka nodra itavi na itubutubu qori, ra qai “rawai” vuravura se vorata na kena veivakamuai cala ena nodra vakabauta kei na yalodina.​—1 Joni 5:4.

Era Dawai se Sega ni Vakaluveni ena iNaki Dokai

12. Cava era digia kina e so na lotu Vakarisito mera na dawai tiko ena dua na gauna?

¹² E uqeti keda na Vosa ni Kalou meda vakasamataka na yaga ni bula vakadawai baleta ni “sa vakalekalekataki na gauna sa vo,” qai “veisau tiko o vuravura.” (1 Kor. 7:​29, 30, 31, NW) Era sa vakatulewataka gona e so na lotu Vakarisito mera sa dawai tu ga, so tale era digia mera dawai tiko ena dua na gauna, oti ra qai vakawati. Dodonu mera vakacaucautaki baleta nira sega ni vakayagataka na galala qori mera rawaka kina. Levu ra digia na bula qo mera kua kina ni “lomaocaoca” na qaravi Jiova. (Wilika 1 Korinica 7:​32-​35.) E so na lotu Vakarisito dawai era painia, so tale ra veiqaravi tiko e Peceli. Nodra vinakata mera yaga ina isoqosoqo i Jiova, ra saga kina e so na tagane dawai mera rawata na ivakatagedegede mera lai vuli ena Koronivuli ni Vuli ni Veiqaravi Vakaitalatala. So tale na lotu Vakarisito era a veiqaravi tu vakatabakidua ena gauna ra dawai tu kina, oti ra qai vakawati. Era vakadinadinataka ni yaga vakalevu ina nodra bula vakawati na veika era vulica ena gauna ra dawai tu kina.

13. Cava era vakatulewataka kina e so na veiwatini lotu Vakarisito mera kua ni vakaluveni?

¹³ Ena so na vanua e dua tale na veisau levu sa yaco tiko ena vuqa na vuvale, oya nodra vakatulewataka na vakawati mera sa kua ni vakaluveni. So ra cakava qori ena vuku ni leqa vakailavo; so tale era vinakata mera vakaliuca nodra cakacaka saumi. Ia so tale ga na veiwatini lotu Vakarisito era sega ni vakaluveni, era cakava qori mera galala, ra qai qaravi Jiova vinaka kina. Sega ni kena ibalebale qo nira sega ni marautaka nodra bula vakawati. Ia ra lomasoli ga mera vakaliuca na veika baleta na Matanitu ni Kalou, ra qai vakuai ira ena so na isolisoli talei ni vakawati. (1 Kor. 7:​3-5) So vei ira na veiwatini qo era qaravi Jiova kei ira na tacidra vakayalo ena cakacaka vakaivakatawa ni tabacakacaka kei na cakacaka vakaivakatawa ni tikina, so tale ra veiqaravi tiko e Peceli. E so era painia, so tale era daukaulotu. Ena sega ni guilecava o Jiova na nodra cakacaka kei na loloma era vakaraitaka ena vuku ni yacana.​—Iper. 6:10.

‘Vakararawataki na Yago’

14, 15. Ena “vakararawataki” vakacava “na yagodra” e so na itubutubu lotu Vakarisito?

¹⁴ E kaya na yapositolo o Paula vei ira na lotu Vakarisito vakawati ni na “vakararawataki na yagodra.” (1 Kor. 7:​28) E rairai okati e ke na nodrau dau tauvimate na veiwatini, na luvedrau, se nodrau itubutubu itabaqase. De dua e wili tale tiko ga kina na dredre kei na rarawa ra vakila na itubutubu nira susugi ira na luvedra. Me vaka a vakamacalataki taumada ena ulutaga qo, sa tukuni oti tu ena iVolatabu ni na yaco na “gauna cacamatua, lewalewai dredre” ena “iotioti ni veisiga.” Ra na lewalewai dredre gona na gone era “talaidredre kivei ira na nodra qase.”​—2 Tim. 3:​1, NW, 2-3.

¹⁵ E ka ni bolebole toka vei ira na itubutubu lotu Vakarisito mera susugi ira na luvedra. Eda na vakila tale ga na leqa e yaco tiko ena “gauna cacamatua” qo. Bibi gona vei ira na itubutubu mera vorata tiko ga na idre veivakaleqai ni “[i]valavala kei vuravura oqo,” ni rawa ni vakamuai ira cala na luvedra. (Efeso 2:​2, 3) Ia ka ni rarawa ni so na gauna e dreve nodra sasaga na itubutubu! Ke mani biuti Jiova e dua na gone ena vuvale lotu Vakarisito, sa na “vakararawataki” rau dina nona itubutubu. Sa na mai maumau wale nodrau sasaga me rau tuberi koya ena ka dina.​—Vkai. 17:25.

“Ena Qai Yaco na Veivakararawataki Levu”

16. Na “veivakararawataki” cava a parofisaitaka o Jisu?

¹⁶ E tiko e dua na veivakararawataki e uasivia sara na ka ni “veivakararawataki” kece e kune ena vakawati kei na vakaluveni. A kaya o Jisu ena nona parofisai me baleta nona tiko tawarairai kei na ivakataotioti ni veika vakavuravura: “Ena qai yaco na veivakararawataki levu ena ivakatagedegede e sega ni bau vakilai eliu me yacova mai oqo, ena sega tale ga ni qai yaco emuri.” (Maciu 24:​3, 21, NW) A qai kaya e muri o Jisu ni na bulata na “veivakararawataki levu” qori e dua na ilawalawa levu. Ia ena gauna sara ga sa vokeka kina ni vakarusai, ena qai saga vakaukaua na vuravura ca i Setani me vaqeavutaki ira na iVakadinadina i Jiova era bula vakacegu tu ena iotioti ni valu. Sega ni vakabekataki ni na gauna dredre dina vei keda kece qori, se da gone se da qase.

17. (a) Na cava eda nuidei kina me baleta na veisiga se bera mai? (b) Cava me na moica na noda rai me baleta na vakawati kei na itavi ni itubutubu?

¹⁷ Ia meda kua ni domobulataka na veisiga se bera mai. Mera nuidei na itubutubu era yalodina vei Jiova nira na taqomaki vata kei ira na luvedra. (Wilika Aisea 26:​20, 21; Sefa. 2:​2, 3; 1 Kor. 7:​14) Me moica mada ga na noda rai me baleta na vakawati kei na itavi ni itubutubu ena iotioti ni veisiga qo, na noda kila nida sa bula dina tiko ena gauna cacamatua. (2 Pita 3:​10-​13) Ke da cakava qori​—se da dawai, se vakawati, da vakaluveni se sega​—ena vakalagilagi qai vakacaucautaki kina o Jiova kei na ivavakoso vakarisito.

[iVakamacala e ra]

Railesuvi

• Na cava mera kua ni vakawati totolo kina na itabagone lotu Vakarisito?

• Na cava so e okati ena nodra susugi na gone?

• Cava era vakatulewataka kina e levu na lotu Vakarisito mera dawai, kei na cava ra vakatulewataka kina e levu na veiwatini lotu Vakarisito mera kua ni vakaluveni?

• Na ka ‘rarawa’ cava era na rairai vakila na itubutubu lotu Vakarisito?

[iYaloyalo ena tabana e 17]

Na cava e ka vakayalomatua kina mera se wawa mada na itabagone lotu Vakarisito era via vakawati tiko?

[iYaloyalo ena tabana e 18]

Levu sara na ka e rawa ni cakava na tagane vakawati lotu Vakarisito me vakaitavi tale ga kina o watina ena veika vakayalo

[iYaloyalo ena tabana e 19]

Na cava ra vakatulewataka kina e so na veiwatini lotu Vakarisito mera kua ni vakaluveni?