Tudei Ena “Loloma Ka Tu Vei Iko Eliu”

“Taura matua na ka sa tu vei iko.”​—VKTA. 3:​11.

1, 2. Na cava o vakila ena gauna o vakadeitaka kina ni ka dina na veika o vulica tiko baleti Jiova?

O SE nanuma tiko na imatai ni gauna o vulica kina na inuinui totoka e vakarautaka na Kalou vei ira na kawatamata talairawarawa? Ke o lewena tu e liu e dua tale na matalotu, cava o nanuma ni vakamacalataki vei iko na inaki ni Kalou ena iVolatabu, se na kena vakamatatataki na ivakavuvuli era a buawa voli? De o liaca ni o vakacalai tu. Ia sa na dua na ka na nomu marau ni o sa qai kila na ka dina! Ke rau susugi iko na itubutubu lotu vaKarisito, o se nanuma tiko na gauna o vakadeitaka kina ni ka dina na veika o vulica baleti Jiova, o qai nakita dei mo talairawarawa?​—Roma 12:2.

² E levu na tacimu vakayalo era na talanoataka vei iko nira marautaka vakalevu na nodra volekati Jiova, kei nodra vakavinavinakataka ni volekati ira tale ga o koya. (Joni 6:​44) E uqeti ira sara ga na marau qori mera vakaitavi ena cakacaka vaKarisito. Era tukuna yani kina vei ira kece ga era sotava na ka era sa vakila tiko. Qori tale beka ga na ka o a vakila?

3. A vakacava tu na ivavakoso e Efeso ena gauna a vakauitukutuku kina vei ira o Jisu?

³ Ni vosa tiko o Jisu vei ira ena ivavakoso lotu vaKarisito e Efeso, e tukuna na ‘loloma a tu vei ira e liu.’ Era itovo vinaka na kai Efeso, ia sa luluqa ga nodra lomani Jiova. Kaya kina o Jisu: “Au sa kila na nomui valavala, kei na nomu oca kei na nomu dauvosota, ni ko sa sega tale ni vosoti ira era sa ca; o sa vakatovolei ira talega era sa kaya era sai apositolo, a ra sa segai, o sa kilai ira ni ra sa daulasu ga: ia ko sa lomavinaka ga, ka vosota tiko, ka oca e na vuku ni yacaqu, ka sega ni guca. Ia ka so ga na ka ko sa ca kina, e na vuku ni ko sa biuta na nomu loloma ka tu vei iko eliu.”​—Vkta. 2:​2-4.

4. Cava e veiganiti kina nikua na itukutuku i Jisu vei ira e Efeso?

⁴ E veiganiti dina na ivakasala i Jisu vei ira e Efeso kei na so tale na ivavakoso e cavuti ena Vakatakila ni raici vata kei na ituvaki era a tu kina na lotu vaKarisito lumuti ena dua na gauna me tekivu mai na 1914. (Vkta. 1:​10) Ena rawa tale ga ni malumu nikua na “loloma ka tu vei [ira] eliu” na lotu vaKarisito me baleti Jiova kei na nodra taleitaka na ka dina. Me salavata ga kei na veika qori, e vinaka meda na veivosakitaka mada qo na noda dau vakasamataka vakatitobu na veika eda a vakila ena imatai ni gauna eda vulica kina na ka dina, ni na uqeta, vakabulabulataka, qai vaqaqacotaka na noda lomana Kalou kei na noda taleitaka na ka dina.

O Vakadeitaka Vakacava ni O sa Vulica Tiko na ka Dina?

5, 6. (a) Na cava meda vakadeitaka na lotu vaKarisito yadudua? (b) Na cava e vakadeitaka vei iko nira vakatavulica tiko na iVakadinadina i Jiova na ka dina? (c) Ena uqeti vakacava e dua me vakabulabulataka tale na loloma a tu vei koya e liu?

⁵ Ni dua e yalataki koya vei Jiova, e dodonu me “kila rawa” na “loma ni Kalou, sa yaga, ka vinaka, ka dodonu sara.” (Roma 12:​1, 2) Dua na sala eda na kila kina na loma ni Kalou oya na noda vulica na ka dina vakaivolatabu. Duidui na sala era vakadeitaka kina na tamata nira vakatavulica tiko na iVakadinadina i Jiova na ka dina. Era nanuma lesu e so ni veisautaka nodra bula na nodra wilika sara ga ena iVolatabu na yaca ni Kalou se na nodra vulica na kedra ituvaki dina na sa mate. (Same 83:18; Dauv. 9:​5, 10) Uqeti ira e so tale na nodra veilomani na tamata i Jiova. (Joni 13:34, 35) E so tale e uqeti ira na nodra sa qai kila na ibalebale dina ni noda sega ni vakavuravura. Era vakadeitaka ena ka ra vulica ni sega ni dodonu mera vakaitavi na lotu vaKarisito dina ena veika vakapolitiki se veivaluvaluti ni dua na matanitu.​—Aisea 2:4; Joni 6:​15; 17:14-​16.

⁶ Na veika gona era vulica qori kei na so tale e uqeti ira e levu mera lomana na Kalou. Saga me dau tiko na gauna mo nanuma lesu kina na veika a vakadeitaka vei iko ni ka dina na ka o vulica tiko. Sega ni dua drau tautauvata, ni duidui na kemu ituvaki kei na nomu itovo. Na ka gona e vakavuna na nomu lomani Jiova kei na nomu vakabauta na nona yalayala ena duidui vei ira e so tale. Ia se mani cava e vakavuna na nomu lomani Jiova, e se yaga tiko ga nikua me vaka na kena yaga ena imatai ni gauna o vulica kina. Se sega ni veisau na ka dina. Na nomu vakananuma gona na ka o a vakila kei na ka o vakasamataka ena gauna ya, ena vakabulabulataka tale na nomu taleitaka na ka dina me vaka ga na nomu taleitaka e liu.​—Wilika Same 119:151, 152; 143:5.

Vaqaqacotaka na Loloma a tu Vei Iko e Liu

7. Na cava mo vaqaqacotaka tale kina na loloma a tu vei iko e liu? O na cakava vakacava qori?

⁷ De dua, sa na levu sara na veisau ena nomu bula nikua ni vakatauvatani kei na gauna o se qai yalataki iko kina vei Jiova. A talei sara vakalevu vei iko na ka dina ena gauna o se qai tekivu vuli kina, ia ni toso na gauna a gadrevi me vaqaqacotaki nomu taleitaka na ka dina mo vosota kina e so na ituvaki vovou a vakatovolei kina nomu vakabauta. Macala ga ni a tokoni iko kina o Jiova. (1 Kor. 10:13) Na veika gona a yacovi iko ena veiyabaki sa sivi ena dau talei tu ga vei iko. A vaqaqacotaki kina na loloma a tu vei iko e liu, qai dua tale ga na sala o vakadeitaka kina na loma ni Kalou, e tukuni ni yaga.​—Josua 23:14; Same 34:8.

8. E vakatakilai koya vakacava vei Mosese o Jiova, era volekati koya kina vakacava na Isireli?

⁸ Me kena ivakaraitaki, vakasamataka na kedra ituvaki na Isireli ena gauna sa tukuna kina vei ira o Jiova ni na sereki ira ena nodra vesu tu vakabobula e Ijipita. E vakatakilai koya vei Mosese o Jiova qai kaya: “Au sa lewai au ga vakataki au.” (Lako 3:​7, 8, 13, 14, NW) E tukuna tiko ga o Jiova ni sega ni dua na ka ena tarova na nona sereki ira nona tamata. E vakatakila sara ga o Jiova vei ira na Isireli ena ituvaki kei na veika e yaco tarava e so na nona itovo, ni Kalou Kaukaua, Turaganilewa, iLiuliu, Dauveivakabulai, Dauvala Qaqa, qai Dauvakarautaka na ka kece era gadreva.​—Lako 12:12; 13:21; 14:24-​31; 16:4; Niem. 9:​9-​15.

9, 10. Na ituvaki vakacava ena rawa kina vua e dua me kila na Kalou, cava e vinaka kina noda dau vakasamataka lesu e so na ka a yaco?

⁹ Ena duidui sara na kemu ituvaki ni vakatauvatani kei ira e Isireli makawa. Ia o sa na rairai sotava e so na ituvaki o qai vakadeitaka kina ni kauaitaki iko dina na Kalou, e qaqaco tale ga kina na nomu vakabauta. De dua, a vakaraitaka sara ga o Jiova ena so na sala ni Dauvakarautaka na ka kece o gadreva, e Dauveivakacegui, se Qasenivuli. (Wilika Aisea 30:20b, 21.) Se a rairai sauma beka na nomu masu. De yacovi iko sara tiko ga e dua na ituvaki dredre qai mai vakacegui iko e dua na nomu itokani lotu vaKarisito. Se o wilika e dua na tikinivolatabu ena nomu vuli vakataki iko, o qai raica ni veiganiti sara ga kei na ituvaki e yacovi iko tiko.

¹⁰ Era na rairai sega ni qoroqoro e so ni o talanoataka na veika a yacovi iko. E macala nira sega ni cakamana na veika kece qori. Ia o na okata sara ga me ka bibi dina. A vakadeitaka kina o Jiova ni na dau cakava tu ga na ka veiganiti me baleti iko. Vakasamataka lesu na veiyabaki o tiko kina ena dina. O rawa ni nanuma lesu e so na gauna o vakila sara ga kina ni kauaitaki iko o Jiova? Nomu vakasamataka lesu na veika qori kei na veika o vakila kina, ena uqeti iko mo lomani Jiova vakalevu me vaka ga nomu lomani koya ena gauna o vakadeitaka kina nona veikauaitaki. Dau vakavinavinakataka na veika qori. Me ka talei mada ga vei iko, qai dau vakasamataka vakatitobu. Na veika e dau yaco qori ena noda bula e vakadinadinataka ni kauaitaki keda yadudua o Jiova, qai sega ni dua e rawa ni vakalasuya qori.

Mo Dikevi Iko Vinaka Mada

11, 12. Na cava ena rairai vakavuna na luluqa ni nona taleitaka na ka dina e dua na lotu vaKarisito? Cava na ivakasala i Jisu?

¹¹ Ke sa sega ni tautauvata na nomu lomani Jiova kei na nomu taleitaka na ka dina ena gauna qo ni vakatauvatani kei na gauna e liu, sega ni kena ibalebale ya ni sa veisau o koya. E duadua tu ga o Jiova. (Mala. 3:6; Jeme. 1:​17) E se kauaitaki iko tiko ga nikua me vaka e liu. Na cava beka e rairai vakavuna me sa veisau na nomu veivolekati kei Jiova? De dua o lomaocaoca qai nuiqawaqawataka vakalevu na bula? De dua e liu, o dau masu vagumatua, vuli vakalevu, qai dau vakasama vakatitobu. O dau gumatua beka e liu ena cakacaka vakavunau kei na tiko ena soqoni ni vakatauvatani kei na gauna qo?​—2 Kor. 13:5.

¹² De dua, o na sega sara tu ga ni kila na veisau e sa yaco qori, ia ke o mani liaca ni sa veisau e so na ka, cava beka e vakavuna? De vakavuna e so na ka e gadrevi ga mo kauaitaka, me vaka na qaravi ni vuvale, noda bula se so na ka va ya, lai vakavuna nomu sega ni yadrava kina ni sa voleka na siga i Jiova. Tukuna o Jisu vei ratou nona yapositolo: “Dou qarauni kemudou vinaka, de dua na siga sa bibi kina na yalomudou e na daukana, kei na daumateni, kei na lomaocaoca e na veika ni bula oqo, ka yaco vakidacala kina vei kemudou na siga ko ya. Ni na vaka ga nai cori ni sa yaco vei ira kecega era sa tiko e dela i vuravura taucoko. O koya mo dou qai vakatawa, ka daumasu tikoga, mo dou vakabau kina mo dou yaga me bula mai na ka kecega oqo ena yaco mai.”​—Luke 21:34-​36.

13. Na cava a vakatauvatana o Jemesa ina Vosa ni Kalou?

¹³ E uqeti ira nona itokani vakabauta na dauvola iVolatabu o Jemesa mera dikeva vinaka na nodra vakayagataka na Vosa ni Kalou. E vola: “Dou muria na vosa ka kakua ni rogoca walega, ka vakaisini kemudou kina vakai kemudou. Ia kevaka e dua sa rogoca walega na vosa, ka sega ni muria, sa tautauvata kei na tamata sa laki ilova na mata ni yagona e nai iloilo: ni sa ilovi koya, a sa qai lako tani yani, a sa guilecava vakasauri se sa vakaevei nai valavala ni yagona. Ia ko koya sa vakaraica matua na vunau vinaka sara, na vunau ni veisereki, ka tu dei kina, sa sega ni daurogoca ka guilecava, ia sa kitaka talega na cakacaka, ena kalougata kina ko koya oqo e na nona cakacaka.”​—Jeme. 1:​22-​25.

14, 15. (a) Ena dusimaki iko vakacava na iVolatabu mo vakavinakataka kina na kemu ituvaki vakayalo? (b) Na taro cava mo na vakasamataka vakatitobu?

¹⁴ E rawa ni vakayagataka na iloilo e dua me kila kina ni rairai vinaka. Kena ivakaraitaki, ke raica ni sega ni buki vinaka tu nona neketai, ena vakadodonutaka. Ke raica e dua na yalewa ni sega ni seru vinaka tu, ena seru vakavinaka. E va tale ga qori na ka e cakava na iVolatabu ena gauna eda vakadikevi keda kina. Nida vakatauvatana noda bula kei na ka e kaya na iVolatabu, eda sa vakayagataka sara tiko ga me vaka na iloilo. Ia na cava na yaga ni noda titiro ena iloilo, oti da qai sega ni kauaitaka na keda rairai se meda via vakavinakataka? Eda na yalomatua ke da cakava sara ga na ka eda raica ena “vunau,” oya meda “muria.” E ka vakayalomatua vei ira na vakila ni sa luluqa tiko na nodra lomana na Kalou kei na nodra taleitaka na ka dina mera taroga: ‘Na cava beka au nuiqawaqawataka tiko, au sa walia tiko vakacava? Cava au dau cakava e liu? Sa veisau beka e so na ka?’ Ke da sa liaca e so na malumalumu ena gauna eda dikevi keda tiko kina, meda kua sara ni vakawalena. Ke gadrevi me vakavinakataki na malumalumu qori se meda veisau, meda saga sara ena noda igu taucoko, da kua tale ni lokuyara.​—Iper. 12:12, 13.

¹⁵ Nomu dau vakasamataka vakatitobu na ka, ena uqeti iko mo tekia e so na isausau rawarawa mo toso tiko kina vakayalo. E uqeti Timoci vakayalo na nona itokani vakacakacaka o Paula, ena veika me vakavinakataka kina nona cakacaka vakaitalatala. E uqeta na cauravou qori me: “Dau vakananuma na veika qo; bulataka sara; mera raica kece na nomu toso.” E ka vakayalomatua gona meda dau vakasamataka na Vosa ni Kalou, kei na veika meda cakava meda toso kina.​—1 Tim. 4:​15, NW.

16. Na cava mo qarauna ni o vakadikevi iko tiko ena ka e tukuna na iVolatabu?

¹⁶ E dau laurai ga e so na malumalumu ena gauna eda dikevi keda kina. Ena rawa ni vakayalolailaitaki keda, ia meda kua ni soro kina. Na inaki levu ga ni noda dikevi keda va qori, oya meda kila kina na veika meda vakavinakataka. Dau vinakata o Setani meda nanuma nida tawayaga na lotu vaKarisito baleta ga nida sega ni uasivi. E kaya o koya ni sega ni taleitaka o Jiova na sasaga kece eda cakava tiko meda qaravi Jiova kina. (Jope 15:15, 16; 22:3) E lasu wale ga qori qai saqati koya kina vakaukaua o Jisu, ni raici keda na Kalou nida ibulibuli talei kece vua. (Wilika Maciu 10:29-​31.) Na noda kila tiko nida sega ni uasivi, e dodonu me uqeti keda meda saga ena yalomalumalumu meda vakavinakataka tiko ga na ka eda cakava, da qai nuitaka na veidusimaki i Jiova. (2 Kor. 12:7-10) Ke vakaiyalayala na ka o rawa ni cakava ena vuku ni tauvimate se bula va qase, saga mo tekia ga na isausau e veiganiti, ia mo kua ga ni soro koso se me luluqa na nomu loloma.

Levu na ka Mo Vakavinavinakataka

17, 18. Ena yaga vakacava na nomu vaqaqacotaka na loloma a tu vei iko e liu?

¹⁷ Ena yaga sara vakalevu na nomu vaqaqacotaka tiko ga na loloma a tu vei iko e liu. Ena titobu kina na nomu kila na Kalou kei na nomu taleitaka na nona veidusimaki vakayalololoma. (Wilika Vosa Vakaibalebale 2:​1-9; 3:​5, 6.) “Ka sa levu na kenai sau ni sa vakabauti tiko [na lewa i Jiova],” e kaya na daunisame. “Sa dina nai tukutuku i Jiova, ka sa vakavukui ira era sa sega ni vuku.” Koya e uasivi sara oya nira na “kalougata ko ira era sa dodonu sara e na sala, era muria na vunau i Jiova.”​—Same 19:​7, 11; 119:1.

¹⁸ Sega ni vakabekataki ni levu sara na ka mo na vakavinavinaka kina. O sa kila na vuna e yaco tu kina e levu na ka e vuravura. Sa yaga dina vei iko na ka e cakava na Kalou vei ira nona tamata, oya nona kauaitaki ira kei na nona karoni ira vakayalo. Macala ga ni o na vakavinavinakataka sara vakalevu na nona dusimaki iko o Jiova ina nona ivavakoso e vuravura raraba, vaka kina nona digi iko mo nona iVakadinadina. Mo dau vakavinavinakataka gona na veivakalougatataki qori! Sega ni katumi rawa na veika o vakalougatataki tiko kina. Na nomu dau vakavinavinakataka na veivakalougatataki va qori, ena uqeti iko mo muria na ivakasala: “Taura matua na ka sa tu vei iko.”​—Vkta. 3:​11.

19. Nida vakasamataka tiko vakatitobu na noda veiwekani kei na Kalou, cava soti e gadrevi meda na qai dei tiko ga kina vakayalo?

¹⁹ Dua na sala eda na taura matua kina na ka sa tu vei keda oya na noda dau vakasamataka na veika a vaqaqacotaka noda vakabauta ena veiyabaki sa sivi. Na ivola qo e veiuqeti ina so na ka bibi meda cakava meda dei tiko ga kina vakayalo. Okati tale ga kina na masu, tiko ena soqoni vaKarisito kei na noda dau vakamacala kina. Okati tale ga na noda gumatua ena cakacaka vakavunau. Na veika kece qori ena vakavouya, vakabulabulataka qai vakaqaqacotakatiko ga na loloma a tu vei keda e liu.​—Efeso 5:​10; 1 Pita 3:​15; Juta 20, 21.

O na Sauma Vakacava?

• Ena vakayaloqaqataki iko vakacava nikua na veika a vakavuna taumada nomu lomani Jiova?

• Na cava o na vakadeitaka ni o vakasamataka lesu na veika a yacovi iko ena veiyabaki sa sivi?

• Na cava mo vakadikeva tale kina na ivakarau ni nomu lomana na Kalou?

[iYaloyalo ena tabana e 23]

Na cava e vakavuna nomu taleitaka na ka dina, o a vakadeitaka tale ga vakacava ni ka dina qori?

[iYaloyalo ena tabana e 25]

O sa raica beka e so na ka baleti iko e gadrevi mo vakavinakataka?